កម្មករ-កម្មការិនីប្រមាណជាង ៥០០០នាក់ ធ្វើការនៅរោងចក្រកាត់ដេរសំលៀកបំពាក់ឈ្មោះ តារ៉ាល់ បាននាំគ្នាធ្វើកូដកម្មតវ៉ានៅមុខរោងចក្រ និងបានឈានដល់ការបិទកំណាត់ផ្លូវជាតិលេខ៣ ក្នុងឃុំស្នំក្រពើ ស្រុកគងពិសី ខេត្តកំពង់ស្ពឺ ដើម្បីទាមទារឱ្យខាងរោងចក្របញ្ឈប់ការគាបសង្កត់លើកម្មករ និងដោះស្រាយអត្ថប្រយោជន៍ការងារ ទៅតាមច្បាប់ស្តីពីការងារ។
កម្មករធ្វើការនៅរោងចក្រកាត់ដេរ តារ៉ាល់ ម្នាក់ដែលសុំមិនបញ្ចេញឈ្មោះ បានប្រាប់វីអូឌី នៅថ្ងៃទី០៣ ខែតុលា ឆ្នាំ២០២៥នេះថា កម្មករនៅរោងចក្រនេះប្រមាណ ៥៣០០នាក់ បានផ្ទុះការតវ៉ាចាប់តាំងពីថ្ងៃម្សិលមិញ បន្ទាប់ពីខាងក្រុមហ៊ុនមានបំណងប្តូរក្រុមហ៊ុនដឹកកម្មករបច្ចុប្បន្នដែលមានជាង១០០នាក់ ទៅក្រុមហ៊ុនផ្សេងវិញ ដែលធ្វើឱ្យអ្នកបើកបររថយន្តដឹកកម្មករ មិនបានដឹកកម្មករទៅរោងចក្រ បណ្តាលឱ្យកម្មករមួយចំនួនមិនបានទៅធ្វើការចំនួន២ថ្ងៃ ហើយរោងចក្របានកាត់ប្រាក់ឈ្នួល២ថ្ងៃនោះ។
លោកបន្តថា ហេតុផលនេះបានធ្វើឱ្យកម្មករផ្ទុះការតវ៉ា និងបានឈានទៅដល់ការទាមទារលក្ខខណ្ឌការងារមួយចំនួន ក្នុងនោះ មានស្នើសុំលុយថ្លៃបាយថ្ងៃត្រង់ បញ្ហាការចេញចូលយឺតម៉ោង និងបញ្ហាផ្សេងៗទៀតជាង ១០ចំណុច។
លោកនិយាយថា៖ «តវ៉ាតាំងពីថ្ងៃទី០២មក តាំងពីម្សិលមិញមក ដោយសារសុំតវ៉ាកុំឱ្យកាត់លុយ ព្រោះគាត់អត់មានកំហុសអីទេ ត្រូវមកធ្វើការតើ តែតៃកុងឡានគេអត់ដឹកមក គេមានរឿងបញ្ហាជាមួយក្រុមហ៊ុនធ្វើម៉េច គេទម្លាក់គ្នានៅឆ្ងាយពីរោងចក្រ គ្នាមកធ្វើម៉េចកើត ចឹងមានការកូដកម្មតាំងពីថ្ងៃហ្នឹងទៅ តៃកុងហ្នឹងមាន១០០នាក់ជាងហ្នឹង ជិត១០០នាក់ តៃកុងឡានក្នុងរោងចក្រហ្នឹង វាមានតៃកុងឡានខ្លះគាត់ដឹកចូល តៃកុងឡានខ្លះគាត់អត់ដឹកចូលទេ ដោយសារបញ្ហាខាងក្រុមហ៊ុនចង់ប្តូរក្រុមហ៊ុនដឹកឡានចឹង វាមានបញ្ហាគ្នាចឹង[…]ខាងតៃកុងឡានគាត់អ្នកខំរកកម្មករឱ្យចូលធ្វើការពីមុន»។
ចំណែក លោក យ៉ិត យុតយូ មន្ត្រីសហជីពនៃសហព័ន្ធសហជីពសេរីកម្មករនៃព្រះរាជាណាចក្រកម្ពុជា ដែលបានចុះទៅអង្កេតករណីនេះ បានឱ្យដឹងថា តាមព័ត៌មានបឋមដែលលោកទទួលបានពីកម្មករ ដើមចមនៃវិវាទការងារនេះកើតឡើងដោយសារតែខាងក្រុមហ៊ុនបញ្ឈប់តៃកុងឡានដែលធ្លាប់ដឹកកម្មករ និងធ្លាប់ប្រមូលកម្មករនៅមូលដ្ឋានឱ្យបានចូលធ្វើការនៅក្នុងរោងចក្រនេះ ដែលនាំឱ្យកម្មករមិនសប្បាយចិត្ត ក៏ផ្ទុះការតវ៉ាតែម្តង។
ក្រៅពីនោះ លោកថា កម្មករក៏បានទាមទារកុំឱ្យរោងចក្រកាត់ប្រាក់បំណាច់ឆ្នាំ និងប្រាក់រង្វាន់ ផ្តល់ប្រាក់ថ្លៃបាយថ្ងៃត្រង់ចំនួន ២ពាន់រៀល និងកុំរឹតបន្តឹងខ្លាំងពេកនៅពេលកម្មករសុំច្បាប់ជាដើម។
បើតាម លោក យ៉ិត យុតយូ អំឡុងពេលកម្មករធ្វើកូដកម្មតវ៉ាបិទកំណាត់ផ្លូវជាតិលេខ៣មុខរោងចក្រនេះប្រមាណជា ២ម៉ោងនោះ ក៏មានការប៉ះទង្គិចគ្នាបន្តិចបន្តួច និងមានការគប់កំប៉ុងភេសជ្ជៈដាក់គ្នារវាងកម្មករ និងសមត្ថកិច្ចដែលចុះទៅសម្រួលការធ្វើចរាចរណ៍នៅទីនោះផងដែរ។
ចំពោះដំណោះស្រាយលើវិវាទការងារនៅរោងចក្រនេះ លោកយល់ថា មានតែការជជែកចរចាគ្នាដោយសន្តិវិធី រវាងភាគីកម្មករ និងរោងចក្រ ក្រោមការសម្របសម្រួលរបស់ក្រសួងការងារទេ ទើបអាចដោះស្រាយបញ្ចប់វិវាទនេះបាន។
លោកថា៖ «ទី១ ក្រសួងត្រូវជជែកជាមួយតំណាងកម្មករដោយផ្ទាល់ អំពីតម្រូវការរបស់កម្មករថាតើគាត់ចង់បានអី ហ្នឹងចំណុចទី១ ហើយទី២ ក្រៅពីការជជែកជាមួយតំណាងកម្មករ ក្រសួងត្រូវសម្របសម្រួលមើលលទ្ធភាពរបស់ក្រុមហ៊ុន អំពីអ្វីដែលកម្មករគាត់ចង់បាន ចឹងមានតែការជជែកទេទើបអាចឈានទៅរកដំណោះស្រាយបានល្អប្រសើរ ខ្ញុំគិតថា ការចង់បានរបស់កម្មករវាមិនហួសហេតុពេករហូតដល់ថ្នាក់រោងចក្រធ្វើអត់បានទេ អាហ្នឹងសំខាន់ទៅលើឆន្ទៈរបស់រោងចក្រថាគាត់ចង់ធ្វើឬក៏អត់»។
វីអូឌី មិនទាន់អាចសុំការបញ្ជាក់ជុំវិញករណីនេះ ពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានទេ នៅរសៀលថ្ងៃសុក្រនេះ។
បើតាមការផ្សព្វផ្សាយលើបណ្តាញសង្គមហ្វេសប៊ុករបស់សមាគមការពារសិទ្ធិមនុស្សអាដហុក ការតវ៉ារបស់កម្មកររោងចក្រតារ៉ាល់ អ៊ីណធើណេសិនណល ឯ.ក (TARAL INTERATIONAL CO., LTD) គឺក្នុងគោលបំណងទាមទារឱ្យក្រុមហ៊ុនអនុវត្តលក្ខខណ្ឌទូទៅនៃការងារ សុវត្ថិភាព និងសុខភាព លក្ខខណ្ឌទំនាក់ទំនងវិជ្ជាជីវៈ និងលក្ខខណ្ឌរបបសន្តិសុខសង្គម ឱ្យបានត្រឹមត្រូវតាមច្បាប់ និងលិខិតបទដ្ឋានគតិយុត្តពាក់ព័ន្ធក្នុងវិស័យការងារ។
ប្រភពដដែល បន្តថា ក្រោយការចរចាចប់ នៅម៉ោង ១:៥៥នាទី ភាគីពាក់ព័ន្ធ ដែលរួមមានតំណាងក្រសួងការងារ មន្ទីរការងារ អាជ្ញាធរ តំណាងក្រុមហ៊ុន និងតំណាងកម្មករ បានឯកភាពគ្នាលើចំណុចមួយចំនួន ជុំវិញបញ្ហាការមកយឺតម៉ោងធ្វើការ ការសុំច្បាប់សម្រាកពេលឈឺ និងចំណុចមួយចំនួនទៀត ខណៈការស្នើសុំផ្តល់ប្រាក់រង្វាន់លើកទឹកចិត្ត កាស្នើសុំផ្ដល់លុយថ្លៃបាយថ្ងៃត្រង់ចំនួន ២,០០០រៀល ១នាក់ ក្នុងមួយថ្ងៃ និងការសុំផ្តល់ប្រាក់រង្វាន់ផ្នែកតុកាត់ឱ្យបានសមរម្យជាដើមនោះ ខាងតំណាងរោងចក្រនឹងយកសំណើរទាំងនេះទៅពិភាក្សាជាមួយថៅកែធំរបស់ក្រុមហ៊ុន។
សមាគមអាដហុក បានឱ្យដឹងដែរថា ក្នុងកិច្ចប្រជុំចរចានោះ ក្រុមហ៊ុនបានឯកភាពថានឹងដោះស្រាយរាល់សំណូមពររបស់កម្មករនិយោជិតឱ្យបានឆាប់រហ័ស ហើយក្រុមហ៊ុននឹងមិនមានការគុំគួនចំពោ កម្មករកម្មការិនីណាម្នាក់ក្នុងពេលធ្វើកូដកម្មកន្លងមកនោះទេ៕
