សំណុំរឿងឃាតកម្មលើអតីតមន្ត្រីបក្សប្រឆាំងសញ្ញាតិខ្មែរ-បារាំង គឺលោក លិម គិមយ៉ា ដែលត្រូវបានកប់ទុកអស់រយៈពេល៩ខែមកនេះ ត្រូវបានគាស់រំលើងឡើងវិញហើយ។ តុលាការក្រុងបាងកក បានបើកសវនាការជំនុំជម្រះសំណុំរឿងក្ដៅគគុកនេះ កាលពីថ្ងៃទី៣០ ខែកញ្ញា ក្រោយផ្អិបទុកអស់រយៈពេលជាច្រើនខែ។ ក្រោយជំនុំជម្រះបាន នៅថ្ងៃទី៣ ខែតុលា តុលាការទីក្រុងបាងកក បានសម្រេចកាត់ទោសខ្មាន់កាំភ្លើង ជាជនជាតិថៃ ឱ្យជាប់ពន្ធនាគារមួយជីវិត។
ប៉ុន្តែករណីនេះ បានចោទជាសំណួរក្នុងរង្វង់អ្នកតាមដាននយោបាយ អ្នកវិភាគ រហូតដល់ពលរដ្ឋសាមញ្ញ ពីអាថ៌កំបាំងនៅពីក្រោយការផ្អិបសំណុំរឿងដ៏កក្រើកមួយនេះ ដល់ទៅ៩ខែ និងទើបគាស់រំលើងក្នុងពេលប្រទេសទាំងពីរកំពុងមានភាពតានតឹងនៅតំបន់ព្រំដែន។
ការស៊ើបអង្កេតដែលមានភាពចង្អៀតនៅកម្ពុជា
បើនិយាយពីករណីឃាតកម្មលើអតីតតំណាងរាស្ត្រ លោក លិម គិមយ៉ា ដ៏កក្រើកនៅកណ្ដាលទីក្រុងបាងកក ប្រទេសថៃ កាលពីថ្ងៃទី៧ ខែមករានោះ គេនឹងនឹកឃើញទៅដល់ការស៊ើបអង្កេតដ៏ពុះកញ្ជ្រោល របស់ក្រុមអ្នកសារព័ត៌មាន និងមន្ត្រីស៊ើបអង្កេតរបស់ថៃ ដែលបានស្រាវជ្រាវរឿងនេះ រហូតឈានដល់ការកំណត់បានអត្តសញ្ញាណរបស់ជនសង្ស័យ ដែលជាជនជាតិថៃចំនួន ២នាក់ និងខ្មែរ ២នាក់ ដែលគេសង្ស័យថា កំពុងលាក់ខ្លួនក្នុងប្រទេសកម្ពុជា ដែលមានការធានាពីមេដឹកនាំរដ្ឋ។
ក៏ប៉ុន្តែ បើក្រឡេកមកមើលខាងកម្ពុជាវិញ ទោះបីហេតុការណ៍នេះ បានកើតមកលើអ្នកនយោបាយប្រឆាំងដ៏លេចធ្លោ ដែលធ្វើឱ្យមានការចោទប្រកាន់ថា ជាស្នាដៃរបស់បក្សកាន់អំណាចក្ដី ក៏អាជ្ញាធរមិនបានបើកការស៊ើបអង្កេត និងបញ្ចេញព័ត៌មានអ្វីនោះឡើយ ខណៈសារព័ត៌មានក្នុងស្រុកទាំងអស់ ក៏មិនបានអនុញ្ញាតឱ្យចុះស្រាវជ្រាវ ឬចុះផ្សាយឱ្យទូលំទូលាយនោះដែរ ដោយស្ថាប័នមួយចំនួន បានត្រឹមតែត្រងយកព័ត៌មាន ពីប្រភពក្រៅស្រុក ហើយច្បិចយកចំណុចខ្លះៗ មកចុះផ្សាយតែប៉ុណ្ណោះ។
ទោះជាយ៉ាងណា អតីតអ្នកធ្វើការផ្នែកស៊ើបអង្កេតឱ្យស្ថាប័នអន្តរជាតិមួយនៅក្រៅប្រទេស ដែលធ្លាប់បានចុះស៊ើបអង្កេតករណីនេះ បានអះអាងអំពីការរកឃើញភាពមិនច្បាស់លាស់ និងចំណុចដែលគួរឱ្យសង្ស័យជាច្រើន ពាក់ព័ន្ធនឹងករណីចាប់ខ្លួនខ្មាន់កាំភ្លើងនៅក្នុងទឹកដីកម្ពុជា។
លោក វណ្ណ តារា ជាឈ្មោះដែលវីអូឌី ហៅដើម្បីការពារសុវត្ថិភាពរបស់ប្រភព។ លោក វណ្ណ តារា ឱ្យដឹងថា ការស៊ើបអង្កេតរបស់លោក ត្រូវបានបញ្ចប់ស្ទើរតែទាំងស្រុងទៅហើយ ក៏ប៉ុន្តែត្រូវបានបញ្ឈប់ ក្រោយស្ថានភាពហិរញ្ញវត្ថុមានបញ្ហាកាលពីខែមីនាកន្លងទៅ ដោយសារការកាត់ផ្ដាច់ជំនួយរបស់រដ្ឋការសហរដ្ឋអាមេរិក ក្នុងអាណត្តិលោកប្រធានាធិបតី ដូណាល់ ត្រាំ ។
លោកឱ្យដឹងថា ការចុះស៊ើបអង្កេតនៅពេលនោះ គឺធ្វើឡើងនៅពេលដែលប៉ូលិសបានចាប់ខ្លួនខ្មាន់កាំភ្លើងជនជាតិថៃ ដែលបានបាញ់សម្លាប់ លោក លិម គិមយ៉ា ឈ្មោះ អេកាឡាក់ ផែណយ (EkkalakPhaenoi) កាលពីថ្ងៃទី៨ ខែមករា នៅទីតាំងភូមិព្រៃស្វាយ ឃុំព្រៃស្វាយ ស្រុកមោងឫស្សី ខេត្តបាត់ដំបង ។
ក្នុងប្រតិបត្តិការនេះ ស្នងការនគរបាលខេត្តបាត់ដំបង អះអាងថា ការចាប់ខ្មាន់កាំភ្លើង គឺធ្វើឡើងតាមការស្នើសុំកិច្ចសហការរបស់សមត្ថកិច្ចថៃ ក៏ប៉ុន្តែប៉ូលិសថៃ ដែលជាអ្នកតាមប្រមាញ់ខ្មាន់កាំភ្លើងពីទឹកដីថៃ រហូតធ្លុះដល់ទឹកដីកម្ពុជានោះ បានប្រាប់អ្នកសារព័ត៌មានថៃថា រូបគេបានរកឃើញខ្មាន់កាំភ្លើងនៅក្នុងហាងគុយទាវមួយកន្លែង នៅភូមិព្រៃស្វាយ ហើយក៏បញ្ជូនដំណឹងនេះទៅកាន់ស្នងការខេត្តបាត់ដំបង ដែលមានតួនាទីគ្រប់គ្រងដែនសមត្ថកិច្ចនៅក្នុងរឿងនេះ ដើម្បីចាប់ខ្លួនខ្មាន់កាំភ្លើង។
ទោះជាយ៉ាងនេះក្ដី អតីតអ្នកស៊ើបអង្កេត គឺលោក វណ្ណ តារា បានប្រាប់វីអូឌីថា បន្ទាប់ពីខ្មាន់កាំភ្លើង ត្រូវបានចាប់ខ្លួនហើយនោះ លោកបានចុះទៅដល់ទីតាំងនៅភូមិព្រៃស្វាយ ដោយផ្ទាល់ និងបានរកឃើញភាពមិនស្របគ្នាមួយចំនួន នៅក្នុងករណីនេះ។ លោកបន្តថា តាមការសាកសួរម្ចាស់ហាងគុយទាវ និងហាងបាយទាំងអស់ នៅភូមិព្រៃស្វាយ ប្រមាណ ១០នាក់ ពួកគាត់បានអះអាងដូចៗគ្នាថា មិនបានដឹងអំពីរឿងនេះឡើយ។
ទោះជាយ៉ាងណា តាមការសាកសួរពីអាជីវករលក់ដូរមួយចំនួន នៅផ្សារព្រៃស្វាយ បានអះអាងថា ពួកគាត់បានឃើញបុរសរូបរាងស្គម ខ្ពស់ ដែលត្រូវបានគេកំណត់ថាជាខ្មាន់កាំភ្លើង ត្រូវប៉ូលិសចាប់ខ្លួន នៅខាងក្រោយផ្ទះរបស់អ្នកភូមិមួយកន្លែង គឺមិនមែននៅក្នុងហាងដូចប៉ូលិសថៃបានអះអាងនោះឡើយ។ ពួកគាត់បានអះអាងទៀតថា មុនពេលត្រូវប៉ូលិសចាប់ខ្លួន ពួកគាត់បានឃើញខ្មាន់កាំភ្លើងស្នាក់នៅក្នុងទីតាំងមួយកន្លែង ក្បែរកន្លែងស្ទាក់រថយន្តឈ្នួល ដែលដឹកជញ្ជូនអ្នកដំណើរទៅរាជធានីភ្នំពេញ ក៏ប៉ុន្តែពួកគាត់មិនបានដឹងច្បាស់ អំពីទីកន្លែងស្នាក់នៅរបស់ខ្មាន់កាំភ្លើងនេះឡើយ។
លោក វណ្ណ តារា និយាយថា៖ «ត្រង់ចំណុចហ្នឹង ខ្ញុំបានហៅទូរស័ព្ទទៅសួរស្នងការនគរបាលខេត្តបាត់ដំបង ជាច្រើនលើកហើយ អំពីអត្តសញ្ញាណអ្នកដឹកជញ្ជូន និងអ្នកផ្ដល់កន្លែងស្នាក់នៅឱ្យខ្មាន់កាំភ្លើង ព្រោះភូមិព្រៃស្វាយហ្នឹង នៅឆ្ងាយពីទីរួមស្រុក អត់មានផ្ទះសំណាក់ ឬសណ្ឋាគារទេ ហើយលោក អេកាឡាក់ ផែណយ ហ្នឹង ទើបតែជាន់ដីខ្មែរជាលើកទីមួយទេ អ៊ីចឹងវាទាល់តែមានអ្នកនាំផ្លូវ និងអ្នកទទួលខុសត្រូវតាមដំណាក់កាលមួយ ដែលគេរៀបចំឱ្យស្រេច។ ចម្ងល់មួយទៀតហ្នឹង បើខ្មាន់កាំភ្លើងត្រៀមធ្វើដំណើរទៅភ្នំពេញ តើនរណាជាអ្នកទទួល? បើប៉ូលិសស្រុកខ្មែរ ចង់ស្រាវជ្រាវនោះ វាអត់ពិបាកទេ កាមេរ៉ាតាមផ្លូវមាន អាចឆែកបាន ហើយសួរតែអ្នកផ្ដល់កន្លែងស្នាក់នៅទៅ នឹងដឹងហើយ គ្មានអីពិបាកឡើយ ព្រោះការពិតវានៅលើគោកទេ»។
ប្រពន្ធជនជាតិបារាំង របស់លោក លិម គិមយ៉ា គឺលោកស្រី លិម អានី ក្រោយពីបានវិលទៅដល់ប្រទេសបារាំងវិញ បន្ទាប់ពីបានផ្ដល់សក្ខីកម្មទៅកាន់តុលាការព្រហ្មទណ្ឌថៃ ក្នុងករណីឃាតកម្មរបស់ប្ដី បានប្រាប់ទៅ វិទ្យុអាស៊ីសេរីថា ក្នុងគម្រោងដំណើរទេសចរ ៣សប្ដាហ៍ នៅកម្ពុជា ប្អូនថ្លៃរបស់លោកស្រី បានបបួលគ្រួសារលោកស្រីទិញសំបុត្រឡានក្រុងចំនួន ៤កន្លែង ដើម្បីទៅលេងសាច់ញាតិ នៅទីក្រុងបាងកក។
ត្រង់ចំណុចនេះ អតីតអ្នកសារព័ត៌មានដដែល សង្កេតឃើញថា ករណីឃាតកម្មលើលោក លិម គិមយ៉ា មានការពាក់ព័ន្ធជាមួយក្រុមហ៊ុនដឹកអ្នកដំណើររបស់កម្ពុជា ឬមានរណុកក្នុង ដែលប្រាប់ពីគម្រោង ពេលវេលា និងទិសដៅធ្វើដំណើររបស់លោក លិម គិមយ៉ា ដល់អ្នកបញ្ជា ដើម្បីរៀបចំគម្រោងជាក់លាក់ក្នុងការបាញ់ប្រហារ។
លោក វណ្ណ តារា និយាយថា៖ «ខ្ញុំបានព្យាយាមសួរទៅកាន់ស្នងការប៉ូលិសនៅខេត្តសៀមរាប ជាច្រើនលើក ប៉ុន្តែនៅតែជាសំណួរដែលគ្មានចម្លើយ។ ខ្ញុំឆ្ងល់ហេតុអីរឿងហ្នឹង ម៉េចបានធ្វើប៉ូលិសទាំងតូចទាំងធំ ស្ងាត់មាត់ អស់អ៊ីចឹងទៅ។ បើប្រៀបធៀបដោយផ្អែកតាមសម្មតិកម្ម អ្នកបញ្ជាខ្មាន់កាំភ្លើង ជនជាតិខ្មែរ បានដឹងពីដំណើររបស់លោក លិម គិមយ៉ា ទៅកាន់ប្រទេសថៃ តាំងពីលោកនៅលើទឹកដីកម្ពុជាម្ល៉េះ។ តាមការសន្និដ្ឋានបឋមខ្ញុំថា នេះជាគម្រោងការលបធ្វើឃាតរហ័ស ដែលមានរយៈពេល ២ថ្ងៃ»។
រឿងក្ដីឧក្រិដ្ឋកម្មត្រូវបានបំបែក
នៅក្នុងរឿងឃាតកម្មអ្នកនយោបាយប្រឆាំងរបស់កម្ពុជា បន្ទាប់ពីខ្មាន់កាំភ្លើងបានបាញ់ប្រហារមកលើ លោក លិម គិមយ៉ា នៅថ្ងៃទី៧ ខែមករា នៅលើដងវិថីដ៏មមាញឹកមួយ ក្បែរវត្តបវ័ន្ដនិវេដ (Wat Bowonniwet Vihara) ដែលស្ថិតនៅចម្ងាយជាង ១គីឡូម៉ែត្រ ពីព្រះបរមរាជវាំងរបស់ថៃ។ នៅមុនពេលត្រូវបានខ្មាន់កាំភ្លើងបាញ់សម្លាប់ លោក លិម គិមយ៉ា បានសរសេររិះគន់ចំពោះការរៀបចំព្រឹត្តិការណ៍សាទរកម្ពុជា ដែលដឹកនាំធ្វើឡើងដោយកូនប្រុសពៅរបស់លោក ហ៊ុន សែន គឺលោក ហ៊ុន ម៉ានី ថា ជាព្រឹត្តិការណ៍មួយពេលខ្លី គ្មានស្ថិរភាព និងមិនបានផ្តល់ប្រយោជន៍អ្វីដល់ប្រជាពលរដ្ឋ។
រយៈពេលប្រហែល ២ម៉ោង ក្រោយធ្វើសកម្មភាពបាញ់សម្លាប់ អត្តសញ្ញាណរបស់ជនដៃដល់ ត្រូវបានគេរកឃើញភ្លាមៗ ខណៈអ្នកពាក់ព័ន្ធត្រូវបានគេកំណត់បានជាបន្តបន្ទាប់។ ក៏ប៉ុន្តែការស៊ើបអង្កេតនេះ គឺភាគច្រើនបានមកពីក្រុមអ្នកសារព័ត៌មានថៃ បានដើរលឿនជាងអាជ្ញាធរ និងប៉ូលិសស៊ើបអង្តេតស្ទើរតែគ្រប់ជំហាន។
ជាក់ស្ដែង ក្រោយពេលក្រុមអ្នកសារព័ត៌មាន បានបង្ហាញវីដេអូពីកាមេរ៉ាសុវត្ថិភាព ខ្មាន់កាំភ្លើងត្រូវបានគេស្គាល់ថា គឺជាអតីតទាហានជើងទឹកថៃ ដែលត្រូវបានបណ្ដេញចេញពីក្របខ័ណ្ឌ ហើយដែលក្រោយមកបានប្រកបរបរជាអ្នករត់ម៉ូតូឌុប ឈ្មោះ អេកាឡាក់ ផែណយ ដែលបានធ្វើសកម្មភាពទាញកាំភ្លើងខ្លី ពីក្នុងកាបូបស្ពាយឆៀង មកបាញ់លើលោក លិម គិមយ៉ា ចំនួន៣គ្រាប់ចំកណ្ដាលទ្រូង បណ្ដាលឱ្យស្លាប់នៅនឹងកន្លែង។ ប៉ុន្មានម៉ោងក្រោយមក ជនសង្ស័យម្នាក់ទៀតដែលជាជនជាតិខ្មែរ ត្រូវបានគេរកឃើញអត្តសញ្ញាណ គឺជាអ្នកប្រាប់គោលដៅទៅខ្មាន់កាំភ្លើង។
ជនសង្ស័យទីពីរនេះ គឺលោក ពេជ្រ គឹមស្រ៊ីន ដែលមហាជនសង្ស័យថាជាប្អូនបង្កើតរបស់ប្រធានគណបក្សយុវជនកម្ពុជា គឺលោក ពេជ្រ ស្រស់ និងជាមនុស្សជំនិតរបស់លោកអភិបាលរាជធានីភ្នំពេញ គឺលោក ឃួង ស្រេង។ ប្រភពដែលស្និទ្ធពីសកម្មជនគណបក្សប្រឆាំង បានអះអាងថា លោក លិម គិមយ៉ា មិនដែលមានទំនាក់ទំនងជាមួយជនសង្ស័យឈ្មោះ ពេជ្រ គឹមស្រ៊ីន នោះឡើយ។
ជនសង្ស័យ លោក ពេជ្រ គឹមស្រ៊ីន ត្រូវបានគេរកឃើញថា បានធ្វើដំណើរជាមួយលោក លិម គិមយ៉ា នៅលើឡានក្រុង តាំងពីខេត្តសៀមរាប រហូតដល់ច្រកទ្វារព្រំដែនប៉ោយប៉ែត។ នៅមុនពេលដែលខ្មាន់កាំភ្លើងបាញ់សម្លាប់ លោក លិម គិមយ៉ា គេឃើញលោក ពេជ្រ គឹមស្រ៊ីន បានធ្វើការទាក់ទងតាមទូរស័ព្ទជាច្រើនដង និងបានផ្ដល់សញ្ញានៅពេលជួបខ្មាន់កាំភ្លើង ពេលចុះពីលើរថយន្តក្រុងទៀតផង។ ក្រោយហេតុការណ៍បាញ់សម្លាប់លោក លិម គិមយ៉ា លោក ពេជ្រ គឹមស្រ៊ីន ក៏បានស្ថិតនៅទីតាំងក្បែរនោះដែរ ហើយក្រោយមកលោកបានត្រឡប់មកកម្ពុជាវិញយ៉ាងតក់ក្រហល់ តាមជើងហោះហើរនៅព្រលានយន្តហោះ សុវណ្ណភូមិ។
ការតាមប្រមាញ់ឃាតករ ដ៏រហ័ស
ងាកមកផ្ដោតលើឃាតករវិញ បន្ទាប់ពីធ្វើសកម្មភាពរួច ខ្មាន់កាំភ្លើងឈ្មោះ អេកាឡាក់ ផែណយ បានរត់គេចខ្លួនតាមមធ្យោបាយជាច្រើនដំណាក់កាល រហូតបានឆ្លងដែនចូលមកកម្ពុជា តាមច្រកព្រំដែនខៅឌិន ឬភ្នំដិន ជាប់ស្រុកសំពៅលូន ស្ថិតក្នុងខេត្តបាត់ដំបង។ ដំណើរនៃការគេចខ្លួនរបស់ខ្មាន់កាំភ្លើងនេះ ត្រូវបានអ្នកសារព័ត៌មានថៃ យកមកលាតត្រដាង តាមរយៈវីដេអូ ដែលប្រមូលបានមកពីកាមេរ៉ាសុវត្ថិភាពនៅតាមផ្លូវនានា។ នៅក្នុងការស៊ើបអង្កេតត្រឹមរយៈពេល ២៤ម៉ោង បណ្ដាញសារព័ត៌មាន និងអាជ្ញាធរថៃ កំណត់អត្តសញ្ញាណអ្នកពាក់ព័ន្ធបានជាច្រើននាក់ មានដូចជា អ្នកទទួលបញ្ចាំកាំភ្លើងដែលឃាតករប្រើសម្រាប់ធ្វើសកម្មភាពម្នាក់ អ្នករត់តាក់ស៊ីដែលដឹកជញ្ជូនខ្មាន់កាំភ្លើងនៅទីតាំងផ្សេងគ្នាចំនួន ២នាក់ និងមេខ្យល់ចំនួន ២នាក់ ដែលនាំខ្មាន់កាំភ្លើងចូលទឹកដីកម្ពុជា។
ក្នុងករណីនេះ អ្នកពាក់ព័ន្ធ ដែលជាជនជាតិថៃទាំងអស់ ត្រូវបានអាជ្ញាធរថៃបង្គាប់ឱ្យចូលមកបំភ្លឺ និងចាប់ខ្លួនបានជាបន្តបន្ទាប់ ខណៈអាជ្ញាធរកម្ពុជា មិនបានធ្វើការស្រាវជ្រាវ និងស្វែងរកមេខ្យល់ជនជាតិខ្មែរ ២នាក់ ដែលនាំខ្មាន់កាំភ្លើងឆ្លងកាត់ដែនតាមច្រករបៀងទាំងយប់ និងអ្នកដែលដឹកខ្មាន់កាំភ្លើង ទៅកាន់ភូមិព្រៃស្វាយ ស្រុកមោងឫស្សី នោះឡើយ។
នៅក្នុងភាពចន្លោះប្រហោងនេះ អតីតអ្នកស៊ើបអង្កេតលោក វណ្ណ តារា បានប្រាប់ថា លោកបានចុះទៅដល់ទីតាំងច្រកព្រំដែនស្រុកសំពៅលូន។ លោកអះអាងថា តាមរយៈការសាកសួរពលរដ្ឋជាច្រើននាក់ ដែលជាអ្នកប្រកបរបរដឹកជញ្ជូន និងលក់ដូរនៅតំបន់នោះ ពួកគាត់បានអះអាងថា ច្រករបៀងខុសច្បាប់ នៅតំបន់ព្រំដែនស្រុកសំពៅលូននេះ មានភាពបត់បែនច្រើន និងងាយវង្វេង ហើយអ្នកដែលអាចនាំខ្មាន់កាំភ្លើងដើរឆ្លងចូលទាំងយប់បែបនេះ គឺមានតែក្រុមអ្នកនាំទំនិញឆ្លងដែនខុសច្បាប់នៅក្នុងតំបន់នេះប៉ុណ្ណោះ។
ចំពោះអត្តសញ្ញាណអ្នកបើករថយន្តដឹកខ្មាន់កាំភ្លើងទៅកាន់ភូមិព្រៃស្វាយ ស្រុកមោងឫស្សី វិញ អាជីវករលក់អីវ៉ាន់ម្នាក់ បានបង្ហើបថា គឺជាអ្នករត់តាក់ស៊ី ដែលដឹកជញ្ជូនអ្នកដំណើរពីស្រុកសំពៅលូន ទៅកាន់ខេត្តបន្ទាយមានជ័យ និងខេត្តបាត់ដំបង។
លោក វណ្ណ តារា និយាយថា៖ «គាត់ប្រាប់ថា គាត់បានឃើញបុរសស្គម ខ្ពស់ ពាក់អាវយឺតស [អេកាឡាក់ ផែណយ] បានឡើងជិះឡាន ដែលបានចាំនៅកន្លែងហ្នឹង ប៉ុន្តែគាត់អត់ហ៊ាននិយាយចំៗទេ គាត់ខ្លាចមានបញ្ហា ប៉ុន្តែគាត់បាននិយាយទៀតថា ឡានដែលដឹកខ្មាន់កាំភ្លើងហ្នឹង គឺដូចឡានតូរីស្ត ពណ៌ស។ គាត់ថា បើចង់ដឹងច្បាស់ ទាល់តែសុំវីដេអូពីកាមេរ៉ាសុវត្ថិភាព នៅទីតាំងដូរលុយមួយកន្លែង នៅក្បែរនោះ ព្រោះមុនចាកចេញ ខ្មាន់កាំភ្លើងបានចូលទៅដូរលុយ ដោយមានជនជាតិខ្មែរយើង នៅជាមួយផងដែរ »។
អត្តសញ្ញាណអ្នកបញ្ជាខ្មាន់កាំភ្លើង គឺជាឈ្មួញនយោបាយ
ឈានមកដល់ការអត្តសញ្ញាណអ្នកបញ្ជាខ្មាន់កាំភ្លើងវិញម្ដង អ្នកស៊ើបអង្កេតរូបនេះ លើកឡើងថា មូលហេតុនៃការរកឃើញអ្នកបញ្ជាឃាតករនៅពីក្រោយ ដែលជាមនុស្សនៅក្បែរមេដឹកនាំកម្ពុជានេះ ទំនងកើតចេញពីវិប្បដិសារី របស់ខ្មាន់កាំភ្លើងខ្លួនឯង។ លោកពន្យល់ថា ក្នុងកំឡុងពេលអនុវត្តនីតិវិធីស៊ើបសួរ ក្រោយបញ្ជូនខ្លួនមកដល់រាជធានីភ្នំពេញ ខ្មាន់កាំភ្លើងមិនបានសារភាពប្រាប់ប៉ូលិសខ្មែរ អំពីរឿងអ្វីមួយនោះឡើយ ក៏ប៉ុន្តែក្រោយមកខ្មាន់កាំភ្លើងបានប្រាប់ពីអត្តសញ្ញាណអ្នកបញ្ជា ទៅកាន់ប៉ូលិសថៃម្នាក់ ដែលតាមចាប់ខ្លួនរូបគេពីទឹកដីថៃ រហូតដល់កម្ពុជា គឺលោក សារាវ៉ាត់ ចិ ឬអធិការ ចិ ជាលក្ខណៈបុគ្គលទៅវិញ។
លោក វណ្ណ តារា បន្តថា៖«ខ្ញុំចាំច្បាស់ថា ខ្មាន់កាំភ្លើងបានប្រាប់ទៅលោកអធិការ ចិ ថា អ្នកដែលបញ្ជានៅពីក្រោយនោះ គឺជាជនជាតិខ្មែរ ដែលប្រើឈ្មោះជាភាសាថៃ ថា «ស៊ុមវ៉ាំង បាំរុងគីត»។ ឈ្មោះនេះត្រូវបានលោកអធិការ ចិ ប្រាប់ទៅសារព័ត៌មានថៃរ៉ាត់ [Thairath] ហើយរឿងនេះ ក៏បានដឹងទៅដល់វិទ្យុអាស៊ីសេរី ជាភាសាខ្មែរ និងបានយកឈ្មោះនេះ មករាយការណ៍ផ្ទាល់នៅក្នុងកម្មវិធីផ្សាយផ្ទាល់។ ពេលកំពុងផ្សាយផ្ទាល់នៅម៉ោងជាង ៨យប់ហ្នឹង ពលករខ្មែរដែលស្គាល់ឈ្មោះ ស៊ុមវ៉ាំង បាំរុងគីត បានទាក់ទងទៅប្រាប់លោក ថា ថៃ ដែលជាអ្នករាយការណ៍របស់ វិទ្យុអាស៊ីសេរី ថា ឈ្មោះស៊ុមវ៉ាំង បាំរុងគីត នេះ គឺជាឈ្មោះរបស់ លោក លី រតនៈរស្មី ដែលគេហៅថា លោកគ្រូស៊ុមវ៉ាំងៗ»។
លោកគ្រូ ស៊ុមវ៉ាំង បាំរុងគីត ដែលជាឈ្មោះភាសាថៃរបស់លោក លី រតនៈរស្មី នោះគឺជាអតីតសកម្មជនគណបក្សសង្គ្រោះជាតិ ដែលចុះចូលជាមួយគណបក្សកាន់អំណាច និងជាទីប្រឹក្សារបស់លោក ហ៊ុន សែន ប្រធានព្រឹទ្ធសភាកម្ពុជា។
ប្រភពដែលមានទំនាក់ទំនងរកស៊ីជាមួយលោក លី រតនៈរស្មី អះអាងថា លោកបានចូលបម្រើការនៅក្រុមហ៊ុនសន្តិសុខមួយកន្លែង ដែលមានឈ្មោះហៅកាត់ថា ភី.ស៊ី.អេស (PCS) នៅខេត្តឈុនបុរី នៅឆ្នាំ២០១១ ក្នុងតួនាទីជាអ្នកចាត់ការទូទៅ។ ប្រភពអះអាងទៀតថា គឺនៅពេលនោះហើយ ដែលលោក លី រតនៈរស្មី បានប្រើឈ្មោះជាជនជាតិថៃ ថា ស៊ុមវ៉ាំង បាំរុងគីត (Sumwang bamrungkit) និងជាកន្លែងដែលលោកបានជួបជាមួយខ្មាន់កាំភ្លើង ឈ្មោះ អេកាឡាក់ ផែណយ កាលពីឆ្នាំ២០២២ នៅពេលដែលអតីតទាហានជើងទឹករូបនេះ ត្រូវបានបណ្ដេញចេញពីអង្គភាព ហើយមកធ្វើការជាមួយលោក លី រតនៈរស្មី បានមួយរយៈ។
លោក លី រតនៈរស្មី បានចុះចូលជាមួយគណបក្សប្រជាជនកម្ពុជា នៅឆ្នាំ២០២២ ដោយមានអភិបាលរាជធានីភ្នំពេញ លោក ឃួង ស្រេង ជាអ្នករៀបចំពិធីទទួលលោក និងមនុស្សមួយចំនួនទៀត ដែលលោកបានកៀរគរយកមកពីប្រទេសថៃ។ ក្រោយមក លោកត្រូវបាន លោក ហ៊ុន សែន ប្រធានគណបក្សប្រជាជនកម្ពុជា តែងតាំងជាទីប្រឹក្សា កាលពីខែមករា ឆ្នាំ២០២៤។
បន្ទាប់ពីចុះចូល និងបានឡើងកូដក្នុងជួរគណបក្សកាន់អំណាចហើយនោះ លោក លី រតនៈរស្មី បានបង្កើតគុណសម្បត្តិជាច្រើនដល់គណបក្សប្រជាជនកម្ពុជា នៅលើទឹកដីថៃ ដូចជា ការដើរអូសទាញពលករឱ្យចុះចូលជាមួយបក្សកាន់អំណាច និងការគំរាមកំហែងមកលើសកម្មជនបក្សប្រឆាំង ដែលរស់នៅប្រទេសថៃ។
ដោយសារតែគុណសម្បត្តិទាំងនេះហើយ លោក លី រតនៈរស្មី បានមានឱកាសចួបជាមួយលោកនាយករដ្ឋមន្ត្រី ហ៊ុន ម៉ាណែត ហើយគណបក្សប្រជាជនកម្ពុជា បានចាត់តាំងឱ្យលោកទទួលខុសត្រូវទៅលើកិច្ចការរបស់គណបក្ស នៅតំបន់ខេត្តឈុនបុរី (Chonburi) ប៉ាថុមថានី (Pathum Thani) រ៉ាក់យ៉ង (Rayong ) និងខេត្តចន្ទបុរី (Chanthaburi) ជាដើម។
ក្រៅពីបម្រើបក្សកាន់អំណាច លោក លី រតនៈរស្មី បានពង្រីកអាជីវកម្មមួយចំនួន មានដូចជា ក្រុមហ៊ុននាំពលករ ក្រុមហ៊ុននាំចូល និងចែកចាយអាហារបំប៉ន និងវិស័យអចលនទ្រព្យនៅក្រុងប៉ោយប៉ែត ខេត្តបន្ទាយមានជ័យ ជាដើម។
ប្រធានក្រុមហ៊ុនអាហារបំប៉នថៃម្នាក់ ដែលរកស៊ីវិនិយោគជាមួយលោក លី រតនៈរស្មី បានអះអាងប្រាប់សារព័ត៌មានប៉ុស្តិ៍លេខ៨ របស់ថៃ ចុះផ្សាយកាលពីថ្ងៃទី១៦ ខែមករា ឆ្នាំ២០២៥ថា នៅមុនតុលាការឧក្រិដ្ឋកម្មថៃចេញដីកាចាប់ខ្លួនប្រហែល ២ថ្ងៃ លោក លី រតនៈរស្មី បានប្រកាសលាក្រុមការងារថា «លោកទៅហើយ និងសូមផ្ញើក្រុមហ៊ុនផង» ហើយចាប់តាំងពីពេលនោះមក ក៏បាត់ដំណឹងរហូត។
ការផ្អិបសំណុំរឿង
បើទោះបីជាប៉ូលិសអាំងទែប៉ូល បានចេញនិវេទន៍ក្រហមតាមចាប់ខ្លួន និងមានការអំពាវនាវពីប្រទេសបារាំង ជាច្រើនលើកយ៉ាងណាក្ដី ក៏អាជ្ញាធរកម្ពុជាមិនបានចាប់ខ្លួនជនសង្ស័យទាំង២នាក់ គឺលោក លី រតនៈរស្មី និងលោក ពេជ្រ គឹមស្រ៊ីន បញ្ជូនទៅឱ្យអាជ្ញាធរថៃ បន្តនីតិវិធីនោះឡើយ ដែលប្រការនេះ បានធ្វើឱ្យសំណុំរឿងឃាតកម្មលើលោក លិម គិមយ៉ា ត្រូវបានជាប់គាំងអស់រយៈពេលជិត ៩ខែ។
បន្ទាប់ពីអាជ្ញាធរថៃ បានសួរចម្លើយក្នុងស្ថានភាពដ៏តានតឹង ខ្មាន់កាំភ្លើង ឈ្មោះ អេកាឡាក់ ផែណយ បានសារភាពថា ការណ៍ដែលរូបគេទទួលយកបញ្ជាឱ្យបាញ់សម្លាប់ លោក លិម គិមយ៉ា នេះគឺមិនមែនដើម្បីប្រាក់ឈ្នួលនោះទេ ប៉ុន្តែគឺដើម្បីសងគុណ លោក លី រតនៈរស្មី ដែលបានជួយទំនុកបំរុងលោកកន្លងមក។ ខ្មាន់កាំភ្លើងបានសារភាពទៀតថា ចំពោះគម្រោងលួចធ្វើឃាត លោក លិម គិមយ៉ា និងការរត់គេចខ្លួននោះ គឺមានការរៀបចំឡើងដោយឈ្មោះ ស៊ុមវ៉ាំង បាំរុងគីត និងក្រុមមនុស្សចំនួនទៀត ដែលមានរយៈពេលខ្លី និងមានលក្ខណៈជាប្រព័ន្ធ ក្នុងនោះរួមទាំង លោក ពេជ្រ គឹមស្រ៊ីន ផងដែរ។
មុននឹងធ្វើសកម្មភាព ឃាតកររូបនេះធ្លាប់បានសួរទៅកាន់ លោក លី រតនៈរស្មី ពីមូលហេតុដែលឈានដល់ការរៀបចំធ្វើឃាតនេះដែរ ហើយកាលនោះ លោក លី រតនៈរស្មី បានប្រាប់ថា គឺដោយសារជនរងគ្រោះ គឺលោក លិម គិមយ៉ា មានទំនាស់ក្នុងអាជីវកម្មរកស៊ីជាមួយគ្នា។
យ៉ាងណាមិញ ចម្លើយសារភាពរបស់ខ្មាន់កាំភ្លើង នៅត្រង់ចំណុចនេះ ត្រូវបានអគ្គស្នងការនគរបាលភូមិន្ទថៃ លោក គិតតិរ៉ាត់ ផាន់ផេត(Kittirat Phanphet) បានសម្រេចជាផ្លូវការ ដោយសំអាងថាមានទម្ងន់ និងបញ្ជាក់ថា ករណីឃាតកម្មនេះ គឺជាជម្លោះបុគ្គលដែលកើតឡើងដោយការខឹងសម្បារផ្ទាល់ខ្លួន និងមិនពាក់ព័ន្ធរឿងនយោបាយឡើយ។ លោក ផាន់ផេត អះអាងទៀតថា អ្វីដែលលោកនិយាយនេះ គឺគ្មានបំណងការពារ ឬផ្គាប់ចិត្តនរណាម្នាក់ឡើយ ប៉ុន្តែការស៊ើបអង្កេតដែលចេញមក ជាជម្លោះរវាងខ្មែរនឹងខ្មែរ នៅលើទឹកដីថៃ គឺអ្នកបញ្ជា ឈ្មោះ លី រតនៈរស្មី និងអ្នកស្លាប់គឺលោក លិម គិមយ៉ា។
ទោះជាបែបនេះក្ដី ការលើកឡើងរបស់អគ្គស្នងការនគរបាលភូមិន្ទថៃ លោក គិតតិរ៉ាត់ ផាន់ផេត ហាក់លើសពីការអះអាងរបស់ស្នងការនគរបាលក្រុងបាងកក ប៉ុស្ដិ៍ទី១ គឺលោក អដ្ឋាផន វង្សសិរិព្រីដា (Arthaphorn Wongsiripreeda) ដែលលោកបានលើកឡើងថា «មូលហេតុនៃការបាញ់សម្លាប់ដែលខ្មាន់កាំភ្លើង ឈ្មោះ អេកាឡាក់ ផែណយ បានប្រាប់ថា ជារឿងជម្លោះបុគ្គលនេះ មិនទាន់អាចយកជាការបានឡើយ ព្រោះខ្មាន់កាំភ្លើងត្រឹមតែជាអ្នកទទួលបញ្ជា ហើយដើម្បីឱ្យដឹងកាន់តែច្បាស់នោះ គឺទាល់តែសួរចម្លើយជនសង្ស័យដែលជាអ្នកបញ្ជា ឈ្មោះ លី រតនៈរស្មី និងអ្នកប្រាប់អត្តសញ្ញាណជនរងគ្រោះ ឈ្មោះ ពេជ្រ គឹមស្រ៊ីន ទើបអាចដឹងពីមូលហេតុពិត»។
ទន្ទឹមគ្នានេះ ប្រពន្ធជាតិបារាំងរបស់លោក លិម គិមយ៉ា គឺលោកស្រី លិម អានី បានអះអាងថា ប្ដីរបស់លោកស្រីមិនដែលមានទំនាក់ទំនង ឬស្គាល់គ្នាជាមួយជនសង្ស័យឈ្មោះ លី រតនៈរស្មី នោះឡើយ។
ភាពមិនស្របគ្នា រវាងអគ្គស្នងការនគរបាលភូមិន្ទ និងស្នងការនគរបាលក្រុងបាងកក និងការអះអាងរបស់គ្រួសារជនរងគ្រោះនេះ ត្រូវបានអ្នកឃ្លាំមើលគ្រប់មជ្ឈដ្ឋាន លើកឡើងដូចគ្នាថា ករណីឃាតកម្មលើអតីតតំណាងរាស្ត្របក្សប្រឆាំង លោក លិម គិមយ៉ា គឺកើតចេញពីគំនុំនយោបាយ ដែលជាប់ពាក់ព័ន្ធនឹងមេដឹកនាំកម្ពុជា ខណៈរដ្ឋាភិបាលថៃបានបង្កកសំណុំរឿងនេះ ដើម្បីធ្វើសម្បទាននយោបាយដល់មេដឹកនាំកម្ពុជា តាមរយៈការកាត់ផ្ដាច់ចរន្តស៊ើបអង្កេត ដោយសំអាងលើចម្លើយសារភាពដែលគ្មានទម្ងន់។
វីអូឌី បានព្យាយាមទាក់ទងទៅប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ប៉ែន បូណា ដើម្បីសុំការអត្ថាធិប្បាយជុំវិញករណីនេះ តែពុំមានការឆ្លើយតបរហូតមកទល់ម៉ោងផ្សាយ។
ជុំវិញរឿងនេះ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ឃើញថា គ្រួសារលោក លិម គិមយ៉ា អាចនឹងទទួលបានយុត្តិធម៌ ដោយសារប្រទេសថៃ នឹងប្រើករណីនេះ វាយប្រហារទៅលើក្រុមគ្រួសារមេដឹកនាំកម្ពុជា ស្របពេលប្រទេសទាំងពីរកំពុងមានវិវាទ តាមរយៈការវែកមុខរកមេខ្លោងនៅពីក្រោយឃាតកម្ម។ លោកបន្តថា មេខ្លោង ឬអ្នកបញ្ជា អាចនឹងរកឃើញកាន់តែលឿន ប្រសិនបើនីតិវិធីមានការចូលដៃពីតុលាការប្រទេសបារាំង ជាពិសេសនៅពេលចាប់បាន លោក លី រតនៈរស្មី និងលោក ពេជ្រ គីមស្រ៊ីន ដែលជាប់ពាក់ព័ន្ធករណីនេះ។
លោក អ៊ុ សំអាន ថ្លែងថា៖«អាជ្ញាធរ និងតុលាការថៃធ្វើម៉េចត្រូវតែចាប់ខ្លួន ពេជ្រ គីមស្រ៊ីន និង លី រតនៈរស្មី ឱ្យបានដើម្បីកាត់ទោសនៅស្រុកថៃ ហើយធ្វើម៉េចតុលាការថៃហ្នឹង ត្រូវតែស្វែងរកយុត្តិធម៌សម្រាប់ឃាតកម្មទៅលើ លោក លិម គិមយ៉ា ដើម្បីលាងមុខមាត់ខ្លួននៅលើឆាកអន្តរជាតិ ព្រោះឃាតកម្មនៅលើទឹកដីថៃ មិនអ៊ីចឹងទេ វារងភាពអាម៉ាសចំពោះថៃផងដែរ»។
លោក អ៊ុំ សំអាន ប្រមើលមើលដែរថា តុលាការប្រទេសថៃ អាចនឹងចេញដីកាចាប់ខ្លួនលោក ហ៊ុន សែន និងថ្នាក់ដឹកនាំកម្ពុជាផ្សេងទៀត ប្រសិនបើមានភស្តុតាងរឹងមាំណាមួយបង្ហាញថា ពួកគេពិតជាមេខ្លោងនៅពីក្រោយការបញ្ជាឃាតករសម្លាប់មនុស្សឆ្លងដែនបែបនេះ។
ចំណែក ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ឃើញថា ករណីឃាតកម្មនេះ ច្បាស់ជាមានពាក់ព័ន្ធជាមួយរដ្ឋាភិបាលកម្ពុជា ដ្បិតថ្នាក់ដឹកនាំពុំបានបង្ហាញការយកចិត្តទុកដាក់ស្វះស្វែងស៊ើបអង្កេតរកជនសង្ស័យ ដើម្បីយកមកកាត់ទោសរកយុត្តិធម៌ឱ្យគ្រួសារ លោក លិម គិមយ៉ា ឡើយ ទោះបីមានការចង្អុលបង្ហាញច្បាស់ៗពីអ្នកពាក់ព័ន្ធ។
លោក ម៉ែន ណាត ថ្លែងថា៖ «ពីព្រោះមនុស្សពីរនាក់ហ្នឹង គឺលោក ពេជ្រ គីមស្រ៊ីន និងលោក លី រតនៈរស្មី នេះ នរណាក៏ដឹងថាមានជាប់ជំពាក់ ជាមួយនឹងមន្ត្រីជាន់ខ្ពស់រដ្ឋាភិបាល ជាពិសេស ដូចជាករណីលោក ហ៊ុន ម៉ានី ដូចជាករណី លោក ហ៊ុន សែន ផ្ទាល់ និងករណីឈ្មោះលោក ឃ្លាំង ហួត និងលោក ឃួង ស្រេង អីនេះ»។
យ៉ាងណាក៏ដោយចុះ អតីតអ្នកស៊ើបអង្កេត គឺលោក វណ្ណ តារា ដែលបានស៊ើបអង្កេតលើករណីនេះ យល់ឃើញថា ករណីឃាតកម្មលើលោក លិម គិមយ៉ា មានសង្ឃឹមតិចតួច ក្នុងការទទួលបានយុត្តិធម៌ ដោយសារករណីនេះ មានជាប់ពាក់ព័ន្ធនឹងមេដឹកនាំកម្ពុជា និងឆ្លងកាត់ការធ្វើសម្បទាននយោបាយ រវាងមេដឹកនាំកម្ពុជា ខណៈករណីឃាតកម្មនយោបាយជាច្រើនទៀត ដែលគេរកឃើញថា បង្កើតឡើងដោយរដ្ឋអំណាចដែរនោះ គ្រួសារជនរងគ្រោះមិនដែលទទួលបានយុត្តិធម៌ និងមិនបើកឱ្យមានការស៊ើបអង្កេតស៊ីជម្រៅនោះឡើយ ដូចជា រឿងឃាតកម្មលើប្រធានសហជីពកម្ពុជា លោក ជា វិជ្ជា និងអ្នកវិភាគឯករាជ្យ លោកបណ្ឌិត កែម ឡី ជាដើម។
លោកបន្តថា ករណីឃាតកម្មនយោបាយទាំងនេះ ត្រូវបានគេដោះស្រាយ ដោយប្រើរូបមន្តបង្កើតឃាតករសិប្បនិម្មិត ឱ្យមកទទួលទោសជំនួស និងការប្រឌិតអង្គហេតុក្លែងក្លាយ ពីទំនាក់ទំនងរវាងជនសង្ស័យ និងជនរងគ្រោះជាដើម។ លោកបន្តទៀតថា ករណីរបស់ លោក លិម គិមយ៉ា នេះ ក៏អាចនឹងត្រូវគេប្រើរូបមន្តដូចគ្នានេះដែរ ដោយសារតែរដ្ឋាភិបាលកម្ពុជា គ្មានឆន្ទៈក្នុងការបញ្ជូនជនសង្ស័យ២នាក់ ទៅឱ្យអាជ្ញាធរថៃនោះឡើយ ស្របពេលដែលការបើកសវនាការជំនុំជម្រះក្ដីនេះឡើងវិញ ត្រូវបានមតិភាគច្រើនយល់ឃើញថា ជាយុទ្ធសាស្ត្ររបស់ថៃ ដែលប្រើប្រាស់រឿងអាស្រូវរបស់ថ្នាក់ដឹកនាំគ្រួសារត្រកូលហ៊ុន ដើម្បីវាយប្រហារ និងយកប្រៀប ក្នុងពេលប្រទេសទាំងពីរកំពុងមានវិវាទរឿងព្រំដែន៕
