ការស៊ើបអង្កេតមួយរបស់វីអូឌី រកឃើញថា លោក ហ៊ុន តូ ដែលជាបងប្អូនជីដូនមួយរបស់លោកនាយករដ្ឋមន្រ្តី ហ៊ុន ម៉ាណែត បានដកខ្លួនដោយស្ងាត់ៗចេញពីធនាគារដែលរងទណ្ឌកម្មពីសហរដ្ឋអាមេរិក ក្រោមបទល្មើសហិរញ្ញវត្ថុ។ ស្ថាប័នហិរញ្ញវត្ថុទាំងនេះ រួមមាន ធនាគារ HH, ធនាគារ Panda និង Huione Pay។
កាលពីដើមខែកញ្ញា ឆ្នាំ២០២៥ សហរដ្ឋអាមេរិកបានដាក់ទណ្ឌកម្មក្រុមហ៊ុន និងឧក្រិដ្ឋជនជាជនជាតិចិនដែលមានសញ្ជាតិខ្មែរ ក្នុងនោះមានឈ្មោះ Chen Al Len និងឈ្មោះ Su Liangsheng ដែលមានបណ្តាញនឹងលោក ហ៊ុន តូ។ លោក Chen និង លោក Su សុទ្ធតែជាម្ចាស់ធនាគារ HH Bank នៅក្នុងប្រទេសកម្ពុជា ដែលធនាគារនេះត្រូវបានបង្កើតឡើងដោយលោក ហ៊ុន តូ ផងដែរ។ ប៉ុន្តែលោក ហ៊ុន តូ និងលោក Su បានដកឈ្មោះរបស់ពួកគេចេញពីធនាគារមួយនេះ កាលពីខែឧសភា ឆ្នាំ២០២៥ ពោលគឺប៉ុន្មានខែមុនការដាក់ទណ្ឌកម្មរបស់អាមេរិក។
វីអូឌី មិនទាន់អាចសុំការអត្ថាធិប្បាយពីលោក ហ៊ុន តូ បាននៅឡើយទេ។
ធនាគារ Panda ត្រូវបានលុបចេញពីកំណត់ត្រាសាធារណៈ
លើសពីធនាគារ HH លោក ហ៊ុន តូ និងបងស្រីរបស់លោក គឺអ្នកស្រី ហ៊ុន គឹមឡេង ក៏បានចូលរួមបង្កើតធនាគារ Panda រួមជាមួយជនជាតិចិនជាច្រើននាក់។ ដំបូងឡើយ កំណត់ត្រាផ្លូវការបានចុះបញ្ជីបងប្អូនទាំងពីរនាក់នេះ ជាម្ចាស់ក្រុមហ៊ុន។ ទោះជាយ៉ាងណា មកដល់ដើមឆ្នាំ២០២៥ ស្ថានភាពរបស់ពួកគេត្រូវបានផ្លាស់ប្តូរមកជា “អតីតម្ចាស់” ហើយថ្មីៗនេះ ឈ្មោះរបស់ពួកគេត្រូវបានដកចេញទាំងស្រុងពីបញ្ជីអនឡាញរបស់ក្រសួងពាណិជ្ជកម្ម។
ជាធម្មតា ក្រសួងពាណិជ្ជកម្ម តែងរក្សាបញ្ជីអតីតម្ចាស់ក្រុមហ៊ុននៅលើវេបសាយ។ ករណីនេះបង្កការសង្ស័យចំពោះភាពច្បាស់លាស់ និងសុចរិតភាពក្នុងការចុះបញ្ជីព័ត៌មានសាធារណៈ។
វីអូឌី បានទាក់ទងទៅអ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ កាលពីថ្ងៃទី៣០ ខែកញ្ញា ដើម្បីសុំការពន្យល់លើរឿងនេះ ប៉ុន្តែលោកបានប្រាប់ឱ្យអ្នកយកព័ត៌មានផ្ញើសំណួរតាមប្រព័ន្ធតេឡេក្រាមវិញ។ យ៉ាងណា រហូតមកដល់ម៉ោងផ្សាយនេះ វីអូឌីពុំទទួលបានការឆ្លើយតបពីលោកឡើយ។
គួរបញ្ជាក់ថា បច្ចុប្បន្ននេះ ធនាគារ Panda Bank ត្រូវបានចុះបញ្ជីក្រោមឈ្មោះបុគ្គលមួយចំនួន ក្នុងនោះមានឈ្មោះ ឡាន ជាងភីង (Lan Jianping) ខូវ ម៉េងងី ប៊ុណ្ណច័ន្ទ នីតា ហ៊ុន ផល្លីន យ៉ាន សត្យា និងHe Yanming។
នៅពេលបង្កើតធនាគារPandaដំបូង លោក ហ៊ុន តូ បានប្រើប្រាស់ផ្ទះរបស់លោកស្ថិតនៅលើផ្លូវ២៤៥ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ធ្វើជាទីស្នាក់ការធនាគារ។ បច្ចុប្បន្ននេះ ធនាគារនេះមានទីស្នាក់ការធំមួយស្ថិតនៅលើបណ្តោយផ្លូវ២៨៩ សង្កាត់បឹងកក់១ ខណ្ឌទួលគោក រាជធានីភ្នំពេញ។
Huione Pay និងការចោទប្រកាន់លាងលុយកខ្វក់
លោក ហ៊ុន តូ ក៏បានផ្តាច់ទំនាក់ទំនងជាមួយ Huione Pay ដែលជាក្រុមហ៊ុនសេវាកម្មហិរញ្ញវត្ថុមួយ ដែលត្រូវបានចោទប្រកាន់ដោយអាជ្ញាធរអាមេរិក កាលពីខែឧសភា ឆ្នាំ២០២៥ ពីបទលាងលុយកខ្វក់ដែលបានមកពីការបោកប្រាស់ និងឆបោកតាមអនឡាញ ឬហៅថា Scam។ ឈ្មោះរបស់លោកត្រូវបានដកចេញពីកំណត់ត្រាសាជីវកម្មទាំងអស់ ហើយក្រុមហ៊ុនខ្លួនឯងក៏លែងត្រូវបានចុះបញ្ជីនៅលើវេបសាយក្រសួងពាណិជ្ជកម្មផងដែរ។
ទំនាក់ទំនងជាមួយការឆបោកអនឡាញ និងកាស៊ីណូ
លើសពីវិស័យធនាគារ លោក ហ៊ុន តូ ក៏មានបណ្តាញជាមួយអាជីវកម្មដែលមានទំនាក់ទំនងជាមួយចិន ដែលពាក់ព័ន្ធនឹងសកម្មភាពបទឧក្រិដ្ឋ។ លោក ហ៊ុន តូ ជាម្ចាស់ក្រុមហ៊ុនLixin Group ដែលរកស៊ីល្បែងអនឡាញខុសច្បាប់ និងការបោកបញ្ឆោតតាមអនឡាញ ឬហៅថាScam។
កាលពីកន្លងទៅ វីអូឌី បានស៊ើបអង្កេតរកឃើញថា ក្រុមហ៊ុនLixin កំពុងប្រតិបត្តិការល្បែងអនឡាញខុសច្បាប់ ឈ្មោះWM ដោយលួចលាក់ ចេញពីទីតាំងក្នុងខេត្តព្រះសីហនុ ជាច្រើនឆ្នាំមកហើយ។ ការស៊ើបអង្កេតរបស់អ្នកសារព័ត៌មានវីអូឌី ក៏រកឃើញទៀតថា ទីតាំងLixin Harbour City ក្នុងខេត្តព្រះសីហនុ ត្រូវបានប្រើប្រាស់ជាកន្លែងរកស៊ីបោកបញ្ឆោតតាមអនឡាញ។
លោក ស៊ឹង សែនករុណា អ្នកតាមដានសិទ្ធិមនុស្សមួយរូបដែលកំពុងស្នាក់នៅប្រទេសអូស្រ្តាលី ថ្លែងថា ទោះបីជាមានភស្តុតាងកាន់តែច្រើនដែលភ្ជាប់ លោក ហ៊ុន តូ ទៅនឹងបុគ្គល និងស្ថាប័នដែលកំពុងប្រឈមមុខនឹងទណ្ឌកម្មអន្តរជាតិក៏ដោយ ក៏គ្មានសកម្មភាពផ្លូវច្បាប់ណាមួយ ត្រូវបានធ្វើឡើងប្រឆាំងនឹងលោកនៅក្នុងប្រទេសកម្ពុជាឡើយ។ លោកបន្ថែមថាសមត្ថកិច្ចពាក់ព័ន្ធមិនហ៊ានលូកដៃចាត់វិធានការលើ លោក ហ៊ុន តូ ឡើយ ដោយសារតែឥទ្ធិពល និងអំណាចរបស់ លោក ហ៊ុន តូ ជាសាច់ញាតិរបស់លោក ហ៊ុន សែន។
លោកថ្លែងថា៖ «កាលណាធ្វើការស៊ើបអង្កេត ស្រាវជ្រាវ បើកសំណុំរឿងហ្នឹង អាចនឹងប៉ះពាល់ទៅដល់តំណែង និងតួនាទីរបស់អ្នកអនុវត្តច្បាប់ទាំងអស់ហ្នឹង»។
លោក ស៊ឹង សែនករុណា បន្តថា ក្រៅពីវិស័យធនាគារ មានមុខជំនួញផ្សេងទៀតដែលអាចជាប់ពាក់ព័ន្ធនឹងការលាងលុយក្នុងប្រទេសកម្ពុជា ក្នុងនោះមានវិស័យអចលនទ្រព្យ និងការបើកកាស៊ីណូ និងល្បែងអនឡាញ៕
