មេដឹកនាំគណបក្សកាន់អំណាចកម្ពុជា លោក ហ៊ុន សែន បានបញ្ចេញប្រតិកម្ម ទៅនឹងវីដេអូសម្តែងមួយ ដែលគេដឹងថា ផលិតឡើងដោយពលរដ្ឋថៃពាក់ព័ន្ធនឹងរូបលោក ដោយអំពាវនាវកុំឱ្យពលរដ្ឋខ្មែរធ្វើត្រាប់តាម ដោយចាត់ទុកថា ទង្វើនោះជាអំពើអមនុស្ស និងអន់ជាងសត្វទៅទៀត។
បើតាមរូបភាពវីដេអូដែលគេបង្ហោះលើបណ្តាញសង្គម ដែលជំរុញឱ្យលោក ហ៊ុន សែន បញ្ចេញប្រតិកម្មនោះ គឺមានមនុស្សមួយក្រុមឈរមើលបុរសម្នាក់ស្លៀកពាក់ជាឯកសណ្ឋានកងម្លាំងថៃ កាន់កាំភ្លើងបាញ់ស៊ីបទៅលើរូបគាត់ បាញ់សំដៅក្បាល ដែលបិទនៅជាប់នឹងជម្រាំង ហើយអ្នកកាន់កាំភ្លើងក៏បានបាញ់សំដៅក្បាល ហើយក៏មានឮសំឡេងស្រែកពីក្រោយជាភាសាថៃថាបាញ់ទៅៗផងដែរ។
ជុំវិញបញ្ហានេះ មេដឹកនាំបក្សកាន់អំណច និងជាប្រធានព្រឹទ្ធសភាកម្ពុជា លោក ហ៊ុន សែន បានចោទជាសំណួរថា នេះឬជាជនជាតិស៊ីវិល័យមានគុណធម៌ សីលធម៌ និងអរិយធម៌ខ្ពស់?
លើសពីនេះ លោកនិយាយថាសូមជនរួមជាតិកម្ពុជា កុំធ្វើទង្វើអាក្រក់បែបនេះ ដែលថាជាទង្វើអមនុស្ស និងអន់ជាងសត្វ។ មិនថាវីដេអូនេះធ្វើដោយមនុស្សផ្ទាល់ ឬដោយ AI គឺសុទ្ធតែបង្ហាញនូវអំពើអាក្រក់ទាំងអស់មិនថាជនជាតិណា ឬក្រុមណានោះទេ។
លោកបញ្ជាក់ក្នុងសម្តីដើមថា៖ «កន្លងមកនេះ បងប្អូនយើងមួយចំនួន បានសុំមកខ្ញុំដើម្បីធ្វើការតបតតាមរយៈយករូបថត ឬព្រះឆាយាល័ក្ខព្រះមហាក្សត្រថៃ យកមកដាក់ ហើយបាញ់យករង្វាន់ដូចជនជាតិថៃមួយចំនួនបាននិងកំពុងធ្វើ។ ខ្ញុំបានប្រាប់ទៅវិញថា បើយល់ថាគេធ្វើបែបនេះជាការខុស សូមកុំប្រឡងយកខុសជាមួយគេធ្វើអី ព្រោះអំពើបែបនេះជាអំពើអមនុស្ស និងអន់ជាងសត្វទៅទៀត»។
ក្នុងន័យនេះ លោកចាត់ទុកទង្វើនេះថា ក្នុងគោលដៅធ្វើឱ្យលោកបាត់បង់ការអត់ធ្មត់ ក្នុងពេលបទឈប់បាញ់ កំពុងស្ថិតក្នុងស្ថានភាពផុយស្រួយ ឬយ៉ាងហោចណាស់ញុះញង់ឱ្យកងទ័ព និងប្រជាជនកម្ពុជាមួយចំនួនតបតតាមរបៀបបង្កអរិយភាព ឬសត្រូវ ។
សម្រាប់មេដឹកនាំកម្ពុជារូបនេះ កុំយកព្រះឆាយាល័ក្ខព្រះមហាក្សត្រថៃ ឬរូបថតមេដឹកនាំថៃណាមួយមកធ្វើមិនគប្បីឱ្យសោះ។ លោកថា ទោះជាប្រទេសខ្មែរតូច សេដ្ឋកិច្ចទន់ខ្សោយ តែកុំខ្សោយខាងសីលធម៌ និងត្រូវតែបន្តជាជាតិសាសន៍ថ្លៃថ្នូរមានសីលធម៌ខ្ពស់។
លើសពីនេះ លោកថា ពលរដ្ឋខ្មែរគួរបង្វែរបញ្ហានេះ ទៅជា កុំទិញទំនិញថៃ និងឈប់ប្រើប្រាស់ប្រាក់បាតថៃលើដីខ្មែរតទៅទៀត ដើម្បីពង្រឹងឯករាជ្យភាពខាងរូបិយវត្ថុរបស់កម្ពុជា ហើយកុំធ្វើសកម្មភាពណាមួយប៉ះពាល់ដល់ក្រុមហ៊ុនថៃ និងប្រជាជនថៃ ដែលកំពុងរស់នៅធ្វើការរកស៊ីនៅកម្ពុជា។
លោកសំអាងថា មនុស្សមួយចំនួននៅថៃ រាប់ទាំងអ្នកដឹកនាំថៃខ្លះផង កំពុងវាយតម្លៃខុសពីសេដ្ឋកិច្ចកម្ពុជាថា កំពុងជួបការលំបាកក្រោយពីថៃបិទព្រំដែនដោយខ្វះទំនិញប្រើប្រាស់។
បន្ថែមជាងនេះ លោកហាក់បានវាយបកវិញថា លោកគួរតែអរគុណអ្នកដឹកនាំថៃម្ដងទៀត ដែលវាយក្បាលគេត្រូវក្បាលខ្លួនឯង ព្រោះកម្ពុជាធ្លាប់យកប្រាក់ក្នុងមួយឆ្នាំៗ មិនតិចជាង៥ពាន់លានដុល្លារទៅទិញទំនិញថៃ ហើយបង្វិលលុយនេះមកទិញទំនិញក្នុងស្រុក ដែលធ្វើឱ្យទំនិញផលិតក្នុងស្រុកមានទីផ្សារដែលជាឱកាសពង្រឹងសេដ្ឋកិច្ចកម្ពុជា។
ក្រោពីនេះ លោកថា បងប្អូននៅជិតព្រំដែនថៃ សូមប្រញាប់ប្ដូរប្រាក់បាតថៃ ជាមួយប្រាក់រៀល ឬដុល្លារ ដោយថា ព្រោះពេលខាងមុខបងប្អូន នឹងរងការខាតបង់ធ្ងន់ធ្ងរ និងអាចក្លាយជាចំណុចដែលគេយកធ្វើជាចំណុចខ្សោយដែលគេគំរាម ដូចករណីអគ្គិសនី អ៊ីនធឺណិត និងប្រេងឥន្ធនៈកាលពីពេលមុន។ ឈប់ប្រើប្រាក់បាតមកប្រើប្រាក់រៀល គឺជួយពង្រឹងនូវរូបិយវត្ថុរបស់ជាតិយើង។
សម្រាប់តំណាងរាស្រ្តគណបក្សសង្គ្រោះជាតិដែលត្រូវតុលាការរំលាយ លោក អ៊ុំ សំអាន ហៅទង្វើរបស់ជនជាតិថៃក្នុងវីដេអូនេះ បង្ហាញពីភាពអវិជ្ជមាន ក្នុងការរើសអើងពូជសាសន៍ដទៃ និងបានគាំទ្រទៅនឹងប្រតិកម្មរបស់មេដឹកនាំខ្មែរលោក ហ៊ុន សែន ។
ប៉ុន្តែលោកថា មេដឹកនាំខ្មែរគួរហាមឃាត់ទំនិញពីវៀតណាមផងដែរ ដោយថា ផលិតផលពីវៀតណាម មានហានិភ័យខ្ពស់ខាងសុខភាព ហើយទន្ទឹមនឹងនេះ កម្ពុជាក៏ត្រូវលើកកម្ពស់ផលិតផលក្នុងស្រុកឱ្យមានទីផ្សារខ្ពស់ផងដែរ។
លោកថា៖ «អ៊ីចឹងបើសិនបិទទំនិញថៃ តែហ៊ានយកទំនិញយួនចូលមកជំនួសទំនិញថៃដដែលហ្នឹងផលិតផលក្នុងស្រុក កសិកម្មក្នុងស្រុកហ្នឹង ក៏អត់មានន័យអីដែរ មិនបានឡើងថ្លៃហើយក៏បានជួយទៅដល់ជីវភាពរបស់ពលរដ្ឋដែរ ហើយទំនិញយួនហ្នឹងអាក្រក់ជាងទំនិញថៃទៅទៀត ព្រោះទំនិញយួនមានជាតិគីមីជាងទំនិញថៃទៀត វាជារឿងមួយបើបិទខាងលិចក៏ត្រូវបិទខាងកើតដែរ»។
ដោយឡែក ប្រធានអង្គការប្រជាធិបតេយ្យខ្មែរ ប្រចាំប្រទេសអូស្ត្រាលី លោក ស៊ឹង សែនករុណា មើលឃើញថា ការប្រតិកម្មរបស់មេដឹកនាំបក្សកាន់អំណាច លោក ហ៊ុន សែន ទៅនឹងទង្វើពលរដ្ឋថៃនេះ ហាក់នៅស្ទើរណាស់ បើធៀបទៅនឹងកន្លងទៅ លោក ហ៊ុន សែន ផ្ទាល់ក៏ធ្លាប់ធ្វើទង្វើទាំងនេះ ទៅលើពលរដ្ឋខ្មែរ រួមទាំងធ្វើទុក្ខបុកម្នេញទៅលើនរណាដែលហ៊ាននិយាយរិះគន់ខ្លួន។
ម្យ៉ាងវិញទៀត លោកថា ពាក់ព័ន្ធទៅការហាមឃាត់ទំនិញ ការចរាចរប្រាក់បាតថៃ មកលើទីផ្សារកម្ពុជា ហើយងាកមកលើកស្ទួយប្រាក់រៀលនេះ អាចធ្វើទៅបាន លុះត្រាតែកម្ពុជាពង្រឹងលើវិស័យសេដ្ឋកិច្ច ការវិនិយោគ ហើយធ្វើឱ្យរូបិយប័ណ្ណខ្លួនមានតម្លៃខ្ពស់លើទីផ្សារ។
លោកថា៖ «កម្ពុជាយើងការគ្រប់គ្រងក្នុងការចរាចរណ៍សាច់ប្រាក់នេះ បើសិនជាតាមព្រំដែនខាងលិច គឺគេចាយលុយបាត ព្រំដែនខាងកើតចាយលុយដុងរបស់វៀតណាម ជាទម្លាប់ទៅហើយដែលពិបាកក្នុងការ[…] ប៉ុន្តែអ្វីដែលអាចធ្វើទៅបាន លុះត្រាតែកម្ពុជាខ្លួនឯង ឬពង្រឹងនូវសេដ្ឋកិច្ចរឹងមាំពលរដ្ឋគ្រប់រូបមានជីវភាពធូរធាតម្លៃរូបិយប័ណ្ណរបស់យើង នឹងកាន់តែហក់ឡើងមានតម្លៃខ្លាំង ទើបបណ្ដាប្រទេសជិតខាងគេមិនអាចធ្វើការបង្វិល ឬក៏ចរាចរលុយរបស់គេមកប្រទេសយើង ប៉ុន្តែប្រសិនជាសេដ្ឋកិច្ចរបស់ប្រទេសយើងមិនល្អប្រសើរ បែបដឹងហើយ ក្នុងកំពុងតែជួបមានវិបត្តិទាំងផ្ទៃក្នុងផង ទាំងប៉ះទង្គិចជាមួយនឹងប្រទេសជិតខាងផងដែរ សេដ្ឋកិច្ចធ្លាក់ចុះបែបនេះទៀត ខ្ញុំគិតថា មិនអាចធ្វើទៅបានទេ លុះត្រាតែកម្ពុជាពង្រឹងខ្លួនឯងឲ្យខ្លាំងជាងមុន មានស្ថានភាពសេដ្ឋកិច្ចនិងការវិនិយោគខ្លាំងក្លា បានអាចប្រណាំងប្រជែងជាមួយនឹងរូបិយប័ណ្ណរបស់ប្រទេសជិតខាង»។
យ៉ាងណា សម្រាប់គណបក្សក្រៅរដ្ឋាភិបាល និងអ្នកឃ្លាំមើលដែលមិនចំណុះឱ្យរដ្ឋាភិបាលបានលើកឡើងថា កម្ពុជាអាចខ្លាំង និងគេចចេញពីការប្រមាថពីប្រទេសជិតខាងបាន លុះត្រាតែកម្ពុជាខ្លួនឯងលាងជម្រះខ្លួនពីការរិះគន់ពីសហគមន៍អន្តរជាតិ លើកយកច្បាប់អន្តរជាតិមកអនុវត្តន៍ បើកលំហឱ្យមានប្រជាធិបតេយ្យ ការគោរពសិទ្ធមនុស្សពេញលេញ មានការផ្សះផ្សាជាតិឡើងវិញ កត្តាចម្បងបំផុតគឺកម្ពុជាត្រូវពង្រឹងទាំងសេដ្ធកិច្ច និងយោធាឱ្យខ្លាំង៕
