កម្មកររោងចក្រតារាល់(TARAL) ដែលបានតវ៉ាច្រើនថ្ងៃជាប់គ្នារហូតមានការបិទកំណាត់ផ្លូវជាតិលេខ៣ ក្នុងស្រុកគងពិសី ខេត្តកំពង់ស្ពឺនោះ បានចូលធ្វើការធម្មតាឡើងវិញហើយ ក្រោយភាគីក្រុមហ៊ុនទទួលយកលក្ខខណ្ឌការងារ ដែលទាមទារដោយកម្មករ ក្រោមការសម្របសម្រួលពីអាជ្ញាធរពាក់ព័ន្ធ។
នេះបើតាមការអះអាងរបស់កម្មករម្នាក់ ដែលបានប្រាប់វីអូឌី នៅថ្ងៃទី៦ ខែតុលា ឆ្នាំ២០២៥ ក្នុងលក្ខខណ្ឌសុំមិនឱ្យប្រាប់ឈ្មោះ។
លោកថា៖ «កម្មករចូលធ្វើការធម្មតាវិញហើយឥលូវនេះ។ តវ៉ាយើងនៅតែមួយចំនួនទៀតទេ គាត់អត់ទាន់ឯកភាព ចាំមើលថៅសិន តែកម្មករកម្មការិនីយើងចូលធ្វើការអស់ហើយ គាត់ដោះស្រាយអារឿងលុយដែលយើងតវ៉ា ២ថ្ងៃហ្នឹង សុំគាត់កុំឱ្យគាត់កាត់ប្រាក់ឈ្នួលហ្នឹង គាត់លើកទឹកចិត្តយើង ២០០ភាគរយវិញហើយ អត់អីទេ ចឹងស្មើនឹង២ថ្ងៃហ្នឹងគាត់អត់កាត់ទេ ហើយចំណែកមួយវិញទៀត សុំលុយបាយថ្ងៃត្រង់ហ្នឹង ឥឡូវខាងថៅកែក្រុមហ៊ុនគាត់កំពុងពិភាក្សាគ្នា នឹងរកដំណោះស្រាយជូន នៅតែមួយចំណុចហ្នឹងទៀតទេ អត់ទាន់អូខេ ប៉ុន្តែបងប្អូនកម្មករយើងចូលធ្វើការធម្មតាហើយ អត់អីទេ ចាំឱ្យថៅកែគាត់ដោះស្រាយឱ្យតាមក្រោយទៅ ប្រាក់លុយបានថ្ងៃត្រង់២ពាន់រៀលហ្នឹង តែប៉ុណ្ណឹងទេ»។
ការអះអាងនេះ ដូចគ្នាទៅនឹងការលើកឡើងរបស់មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស(សង់ត្រាង់ ដែលអង្គការនេះ បានផ្សព្វផ្សាយលើទំព័រហ្វេសប៊ុករបស់ខ្លួននៅថ្ងៃចន្ទនេះ ។
សង់ត្រាល់ បាននិយាយថា យោងប្រភពកម្មករ Pheap KH និងសហព័ន្ធសហជីពសេរីកម្មករនៃព្រះរាជាណាចក្រកម្ពុជា (FTUWKC) កម្មកររោងចក្រតារាល់ (TARAL) បានចូលធ្វើការវិញ នៅព្រឹកថ្ងៃចន្ទ ទី០៦ ខែតុលា ឆ្នាំ២០២៥នេះ។
សង់ត្រាល់ បញ្ជាក់ថា ការត្រឡប់ទៅបំពេញការងារធម្មតាវិញរបស់កម្មករ គឺបន្ទាប់ពីមានការសម្របសម្រួលពីភាគីមន្ត្រីពាក់ព័ន្ធ កាលពីថ្ងៃទី០៤ ខែតុលា ហើយថា ការយល់ព្រមនេះ បន្ទាប់ពីកម្មកររាប់ពាន់នាក់ បន្តតវ៉ាក្នុងបរិវេណរោងចក្រ នៅថ្ងៃទី០២ ថ្ងៃទី០៣ និងព្រឹកថ្ងៃទី០៤ ខែតុលា និងរហូតមានការបិទផ្លូវជាតិលេខ៣ ផងដែរ មុននឹងសម្រេចឈានទៅចូលធ្វើការជាធម្មតាឡើងវិញ។
បើតាមប្រភពពីកម្មកររោងចក្រតារាល់(TARAL) ដែលកម្មករផ្ទុះការវ៉ានេះ មានកម្មករប្រមាណ ៥៣០០នាក់ ហើយមូលហេតុចម្បងដែលជំរុញឱ្យមានការតវ៉ា ក្រោយពីខាងក្រុមហ៊ុននេះ មានបំណងប្តូរក្រុមហ៊ុនដឹកកម្មករបច្ចុប្បន្ន ដែលមានជាង១០០នាក់ ទៅក្រុមហ៊ុនផ្សេងវិញ។
ជម្រើសថ្មីនេះ ធ្វើឱ្យអ្នកបើកបររថយន្តដឹកកម្មករទាំងនោះ ធ្វើពហិការ មិនទៅដឹកកម្មករទៅរោងចក្រដូចសព្វមួយដង ដែលធ្វើឱ្យកម្មករមួយចំនួន មិនបានទៅធ្វើការចំនួន២ថ្ងៃ ហើយភាគីរោងចក្របានកាត់ប្រាក់ឈ្នួលពួកគេចំនួន២ថ្ងៃនោះ។
ហេតុផលនេះ បានធ្វើឱ្យកម្មករផ្ទុះការតវ៉ា និងបានទាមទារលក្ខខណ្ឌការងារចំនួន ១៦ចំនុចបន្ថែមទៀត ក្នុងនោះ មានស្នើសុំលុយថ្លៃបាយថ្ងៃត្រង់ បញ្ហាការចេញចូលយឺតម៉ោង និងបញ្ហាផ្សេងៗទៀត។
ជុំវិញបញ្ហានេះ សមាគមការពារសិទ្ធិមនុស្សអាដហុក ធ្លាប់និយាយថា ការតវ៉ារបស់កម្មកររោងចក្រតារាល់ អ៊ីនធើណេសិនណល ឯ.ក (TARAL INTERATIONAL CO., LTD) គឺក្នុងគោលបំណងទាមទារឱ្យក្រុមហ៊ុនអនុវត្តលក្ខខណ្ឌទូទៅនៃការងារ សុវត្ថិភាព និងសុខភាព លក្ខខណ្ឌទំនាក់ទំនងវិជ្ជាជីវៈ និងលក្ខខណ្ឌរបបសន្តិសុខសង្គម ឱ្យបានត្រឹមត្រូវតាមច្បាប់ និងលិខិតបទដ្ឋានគតិយុត្តពាក់ព័ន្ធក្នុងវិស័យការងារ៕
