លោករដ្ឋមន្ត្រីការពារជាតិសហអាមេរិក ភីត ហេកសេត(Pete Hegseth) បាននិយាយថា លោកមានសិទ្ធិអនុញ្ញាតគ្រប់បែបយ៉ាងដែលចាំបាច់ ក្នុងការប្រើប្រាស់យោធាសហរដ្ឋអាមេរិក ក្នុងការវាយប្រហារលើនាវាដែលស្ថិតនៅក្បែរឆ្នេរសមុទ្រនៃប្រទេសវេណេស៊ុយអេឡា ដែលត្រូវបានចោទប្រកាន់ថា ដឹកជញ្ជូនគ្រឿងញៀនខុសច្បាប់។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី០៦ ខែតុលា ឆ្នាំ២០២៥នេះថា លោក ភីត ហេកសេត(Pete Hegseth) បាននិយាយនៅក្នុងបទសម្ភាសន៍របស់សារព័ត៌មានហ្វក្សញូ(Fox News) កាលពីថ្ងៃអាទិត្យថា សហរដ្ឋអាមេរិកបានសម្លាប់មនុស្សចំនួន ៤នាក់ នៅក្នុងការវាយប្រហារនៅសមុទ្រខារីប៊ីន(Caribbean) កាលពីថ្ងៃសុក្រ ដែលយ៉ាងហោចណាស់ វាជាការវាយប្រហារលើកទី៤ ក្នុងរយៈពេលនៃប៉ុន្មានសប្តាហ៍ថ្មីៗនេះ។ យ៉ាងណា លោកមិនបានផ្តល់ព័ត៌មានលម្អិតអំពីសិទ្ធិអនុញ្ញាតនេះទេ។
ជាមួយគ្នានេះ ក្រុងវ៉ាស៊ីនតោន(Washington) បានលើកយករដ្ឋធម្មនុញ្ញសហរដ្ឋអាមេរិក អំពីអំណាចសង្រ្គាម ការចាត់តាំងក្រុមជួញដូរគ្រឿងញៀនជាអង្គការភេរវករបរទេស សិទ្ធិការពារខ្លួន និងច្បាប់អន្តរជាតិស្តីអំពីអ្នកប្រយុទ្ធខុសច្បាប់ជាមូលដ្ឋានច្បាប់សម្រាប់ការវាយប្រហារនេះ។
ដោយឡែក អ្នកជំនាញច្បាប់ និងសមាជិកសភាមួយចំនួន បានអះអាងថា ការប្រើប្រាស់កម្លាំងយោធានៅក្នុងដែនទឹកអន្តរជាតិប្រឆាំងនឹងឧក្រិដ្ឋជនដែលត្រូវបានចោទដោយរំលងដំណើរនីតិវិធីត្រឹមត្រូវ ដែលរំលោភទៅនឹងស្តង់ដារនៃការអនុវត្តច្បាប់ និងមិនមានមូលដ្ឋានច្បាប់ច្បាស់លាស់ ក្រោមច្បាប់សហរដ្ឋអាមេរិក និងច្បាប់អន្តរជាតិ គឺមិនអាចអះអាងដោយសុចរិតដោយចាត់តាំងថា ក្រុមនេះជាក្រុមភេរវករទេ។
លោក ហេកសេត (Pete Hegseth) និងប្រធានាធិបតី ដូណាល់ ត្រាំ (Donald Trump) មិនបានផ្តល់ភស្តុតាងសម្រាប់ការអះអាងថា កប៉ាល់គោលដៅបានដឹកគ្រឿងញៀននោះទេ។ បន្ថែមពីនេះ លោក ត្រាំ(Trump) បានប្រាប់សភាកាលពីសប្តាហ៍មុនថា លោកបានកំណត់ថាសហរដ្ឋអាមេរិកស្ថិតក្នុង‘‘ជម្លោះប្រដាប់អាវុធមិនមែនអន្តរជាតិ’’ ជាមួយក្រុមជួញដូរគ្រឿងញៀនដោយមិនផ្តល់នូវហេតុផលផ្លូវច្បាប់ថ្មីណាមួយឡើយ។
ដោយឡែក ក្រុមអ្នករិះគន់និយាយថា ការវាយប្រហារតាមនាវានេះ គឺជាការខិតខំប្រឹងបន្ថែមរបស់ លោក ត្រាំ ដើម្បីសាកល្បងវិសាលភាពនៃអំណាចប្រធានាធិបតីរបស់លោក។
ប្រភពរ៉យទ័រ(Reuters)ដដែល បានរាយការណ៍ថា ប្រធានាធិបតី លោក ដូណាល់ ត្រាំ(Donald Trump) បាននិយាយកាលពីថ្ងៃអាទិត្យថា កងកម្លាំងសហរដ្ឋអាមេរិកបានបុកនាវាមួយផ្សេងទៀត ដែលត្រូវបានចោទថាបានដឹកគ្រឿងញៀនខុសច្បាប់ នៅក្បែរឆ្នេរសមុទ្រនៃប្រទេសវេណេស៊ុយអេឡា កាលពីល្ងាចថ្ងៃសៅរ៍ ហើយបន្ថែមថា សហរដ្ឋអាមេរិក នឹងចាប់ផ្តើមពិនិត្យមើលការជួញដូរគ្រឿងញៀន ដែលកើតឡើងនៅផ្លូវគោកផងដែរ។
ក្រសួងទំនាក់ទំនងរបស់ប្រទេសវេណេស៊ុយអេឡា មិនបានឆ្លើយតបភ្លាមៗចំពោះការស្នើសុំអធិប្បាយនោះទេ ប៉ុន្តែប្រធានាធិបតីនីកូឡា ម៉ាឌូរ៉ូ (Nicolas Maduro) បានបង្ហោះវីដេអូតាមតេឡេក្រាមភ្លាមៗ បន្ទាប់ពីការប្រកាសរបស់ លោក ត្រាំ ដែលក្នុងនោះលោកបានរិះគន់ការឈ្លានពានរបស់សហរដ្ឋអាមេរិក ប្រឆាំងនឹងប្រទេសវេណេស៊ុយអេឡាផងដែរ៕
