ប៉ុន្មានម៉ោងបន្ទាប់ពីនាយករដ្ឋមន្ត្រីចុងក្រោយបំផុតរបស់លោក ត្រូវបានបង្ខំឱ្យលាលែងពីតំណែងដោយមិនអាចបង្កើតគណៈរដ្ឋមន្ត្រីដែលមានរយៈពេលលើសពីមួយថ្ងៃ ប្រធានាធិបតី លោក អេម៉ានូអ៊ែ ម៉ាក្រុង ត្រូវបានឃើញដើរតែម្នាក់ឯងនៅតាមដងទន្លេសែន(Seine) នៅពេលព្រឹកនារដូវស្លឹកឈើជ្រុះដ៏ត្រជាក់មួយ។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី០៧ ខែតុលា ឆ្នាំ២០២៥នេះថា អង្គរក្សរក្សាចម្ងាយពីមុខពីក្រោយ ខណៈដែលលោកដើរចេញតាមទ្វារចូលទៅកាន់ជាយថ្មបណ្តោយទន្លេ ដោយពាក់អាវធំវែងពណ៌ខ្មៅ។ ទិដ្ឋភាពដែលថតបានពីចម្ងាយតាមវីដេអូ និងបង្ហាញលើទូរទស្សន៍បារាំង បានធ្វើឱ្យនឹកឃើញដល់រូបភាពនៃលោក ហ្សាល ដឹហ្គោល(Charles de Gaulle) ដែលស្វែងរកភាពស្ងប់ស្ងាត់នៅតំបន់វាលទំនាបនៅប្រទេសអៀរឡង់(Ireland) បន្ទាប់ពីលោកបានលាលែងពីតំណែងនៅចុងទសវត្សឆ្នាំ១៩៦០ ជាមេដឹកនាំមួយរូប ខណៈដែលយុគសម័យនយោបាយលោកកំពុងនាំទៅរកការបញ្ចប់។
លោក ម៉ាក្រុង(Macron) គឺជាប្រធានាធិបតីរហូតដល់ឆ្នាំ២០២៧ ប៉ុន្តែការលាលែងពីតំណែងរបស់ លោក សេបាស្ទៀន ឡឹកង់នូ(Sebastien Lecornu) ដែលជានាយករដ្ឋមន្ត្រីទី៥ របស់គាត់ក្នុងរយៈពេល២ឆ្នាំ បានបង្កើនឱកាសមានកេរ្តិ៍ឈ្មោះល្អមួយ នៅក្នុងនយោបាយបារាំងដែលមិនអាចបញ្ចប់ អំឡុងអាណត្តិចុងក្រោយរបស់លោកបាន។
លោក ម៉ាក្រុង(Macron) ហាក់ដូចជាបានប្តេជ្ញាថាគេចវេសជោគវាសនាកាលពីថ្ងៃចន្ទ ដោយឱ្យលោក ឡឹកង់នូរយៈពេល២ថ្ងៃសម្រាប់ការចរចាចុងក្រោយជាមួយគូរប្រជែង ដើម្បីស្វែងរកផ្លូវចេញពីស្ថានភាពដ៏ពិបាកនេះ។
ដោយមានការស្នើឱ្យ លោក ឡឹកង់នូ ព្យាយាមម្តងទៀតចុងក្រោយ លោក ម៉ាក្រុង បានបង្ហាញការមិនសប្បាយចិត្តរបស់លោកចំពោះជម្រើសដែលលោកប្រឈម គឺការបោះឆ្នោតសភាថ្មីដែលអាចផ្ទេរអំណាចទៅឱ្យខាងស្តាំនិយម ឬការលាលែងរបស់លោកដោយផ្ទាល់ ជាវិធានការដែលលោកបានបដិសេធម្តងហើយម្តងទៀត។
នៅពេលដែលជម្រើសរបស់លោករួមតូច លោក ម៉ាក្រុង ដែលមិនមានប្រជាប្រិយបានក្លាយជាមនុស្សឯកោ ខណៈដែលសម្ព័ន្ធមិត្តពីមុនចេញឆ្ងាយពីលោក ដោយពួកគេស្វែងរកការពង្រឹងឱកាសរបស់ខ្លួន ក្នុងការបន្តតំណែងជាប្រធានាធិបតីនៅការបោះឆ្នោតឆ្នាំ២០២៧៕
