ប្រធានាធិបតីម៉ាដាហ្គាស្កា លោក អ៊ែនឌ្រី រ៉ាចូលីណា បានតែងតាំងឧត្តមសេនីយ៍ រូភីន ហ្វធូនណាត ហ្សាហ្វីសាំបូ ជានាយករដ្ឋមន្ត្រី កាលពីថ្ងៃចន្ទ ដែលមួយសប្តាហ៍បន្ទាប់ពីរំលាយរដ្ឋាភិបាល ដើម្បីជាការឆ្លើយតបទៅនឹងការតវ៉ាដែលកំពុងបន្តជុំវិញការផ្តាច់ទឹក និងកាត់ផ្តាច់ចរន្តអគ្គិសនី។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី០៧ ខែតុលា ឆ្នាំ២០២៥នេះថា លោក ហ្សាហ្វីសាមបូ (Zafisambo) បានជំនួសលោកនាយករដ្ឋមន្ត្រី គ្រីសស្ទៀន អែនធីសេយ(Christian Ntsay) ដែលត្រូវបានបណ្តេញចេញពីតំណែង ដែលជាផ្នែកនៃការផ្លាស់ប្តូររបស់ប្រធានាធិបតី។ លោកឧត្តមសេនីយ៍ គឺជានាយកខុទ្ទកាល័យយោធានៅក្នុងការិយាល័យនាយករដ្ឋមន្ត្រីរហូតដល់ការតែងតាំងនេះ។
មុនពេលដែលតែងតាំង លោក ហ្សាហ្វីសាំបូ (Zafisambo) លោក រ៉ាចូលីណា(Rajoelina) បាននិយាយថាប្រទេសនេះ ត្រូវការ‘‘នាយករដ្ឋមន្ត្រីដែលមានសមត្ថភាពក្នុងការស្តារសណ្តាប់ធ្នាប់ និងការជឿទុកចិត្តរបស់ប្រជាជន’’។ លោកបានបន្ថែមថា ភារកិច្ចសំខាន់បំផុតរបស់លោក ហ្សាហ្វីសាំបូ គឺស្តារឡើងវិញនូវការផ្គត់ផ្គង់អគ្គិសនី និងទឹក។
កាលពីថ្ងៃចន្ទ ក្រុមអ្នកតវ៉ាបានត្រឡប់មកតាមផ្លូវសម្រាប់សប្តាហ៍ទីបី ក្នុងការបាតុកម្មប្រឆាំងនឹងរដ្ឋាភិបាលហើយ លោក រ៉ាចូលីណា(Rajoelina) ក៏បានបណ្តេញគណៈរដ្ឋមន្ត្រីកាលពីសប្តាហ៍មុន ប៉ុន្តែក្រុមបាតុករជាច្រើនកំពុងតែទាមទារឱ្យមេដឹកនាំ អាយុ ៥១ឆ្នាំរូបនេះ លាលែងពីតំណែង។
ជាមួយគ្នានេះ ទោះបីជាមានទ្រព្យសម្បត្តិរ៉ែសំខាន់ៗ ជីវៈចម្រុះ និងដីកសិកម្មក៏ដោយ ក៏ម៉ាដាហ្គាស្កា(Madagascar) ស្ថិតក្នុងចំណោមប្រទេសដ៏ក្រីក្របំផុតក្នុងពិភពលោក ដោយមើលឃើញថា ប្រាក់ចំណូលជាមធ្យមតាមមនុស្សម្នាក់ៗធ្លាក់ចុះចំនួន ៤៥% ចាប់តាំងពីទទួលបានឯករាជ្យនៅឆ្នាំ១៩៦០ រហូតដល់ឆ្នាំ២០២០។
ដោយឡែក លោក រ៉ាចូលីណា(Rajoelina) បាននិយាយនៅក្នុងសន្ទរកថាមួយកាលពីថ្ងៃសុក្រថា លោកបានត្រៀមខ្លួនរួចរាល់ ដើម្បីស្តាប់ភាពសោកសៅទុក្ខព្រួយរបស់អ្នកតវ៉ា ប៉ុន្តែលោកហាក់បីមិនអើពើនឹងការអំពាវនាវឱ្យលាលែងពីតំណែងនោះទេ៕
