ភាពចម្រូងចម្រាស ការស្លាប់យុវជនអាយុ១៧ឆ្នាំម្នាក់ ដោយសារត្រូវគ្រាប់កាំភ្លើងរបស់នាយប៉ុស្តិ៍នគរបាលឃុំពោធិ៍អង្ក្រង ក្នុងស្រុកបសេដ្ឋ ខេត្តកំពង់ស្ពឺ ជំរុញឱ្យមានការលើកឡើងថា ជាគំរូអាក្រក់ បើរដ្ឋាភិបាលមិនអាចរកការពិត ដើម្បីផ្តល់យុត្តិធម៌ដល់ជនរងគ្រោះបាន ។
ពួកគេថា ការមិនបើកការស៊ើបអង្កេតរកការពិត និងចាត់វិធានការមន្ត្រីពាក់ព័ន្ធ ដែលបានគប់គិតគ្នា ធ្វើរបាយការណ៍ភូតកុហក់ដោយអាងតែខ្លួនជាអ្នកអនុវត្តច្បាប់ ហើយធ្វើរបាយការណ៍ទម្លាក់កំហុស ដាក់ជនរងគ្រោះ វាជាការលើកទឹកចិត្តឱ្យមានវប្បធម៌នីទណ្ឌភាព ដែលនឹងប៉ះពាល់ដល់មុខមាត់ និងអំណាចរបស់មេដឹកនាំ ខណៈបញ្ហាសង្គមបច្ចុប្បន្នកំពុងតែចាក់ស្រែស។
ការជំរុញនេះ ធ្វើឡើងក្រោយពីមានករណីយុវជនម្នាក់ឈ្មោះ ផា រ៉ាយុ អាយុ ១៧ឆ្នាំ បានស្លាប់ដោយសារត្រូវគ្រាប់កាំភ្លើងរបស់នាយកប៉ុស្តិ៍នគរបាលឃុំពោធិ៍អង្ក្រង កាលពីយប់ថ្ងៃទី០៣ ខែតុលា ឆ្នាំ២០២៥ ខណៈដែលយុវជនរងគ្រោះ និងមិត្តភ័ក្តម្នាក់ទៀត បានឌុបគ្នាទៅទិញទឹកកក នៅតាមបណ្តោយផ្លូវលំ ស្ថិតក្នុងឃុំពោធិ៍អង្ក្រង ស្រុកបសេដ្ឋ ខេត្តកំពង់ស្ពឺ។ នេះបើតាមការផ្សព្វផ្សាយរបស់សារព័ត៌មានអនឡាញក្នុងស្រុក។
ក្រោយកើតហេតុ មិត្តភ័ក្តរបស់ជនរងគ្រោះ និងជាសាក្សីឃើញផ្ទាល់ភ្នែក បានផ្តល់បទសម្ភាសន៍ដល់អ្នកសារព័ត៌មានទាំងនោះថា មុនពេលកើតហេតុ ពួកគេបានជិះម៉ូតូទៅទិញទឹកកក ហើយក៏ជួបក្រុមមនុស្សមួយក្រុមដែលពួកគេមិនបានដឹងថាជាមន្ត្រីនគរបាលប៉ុស្តិ៍ពោធិ៍អង្ក្រងនោះទេ ដោយសារតែមេឃងងឹតសូន្យ ហើយពេលនោះពួកគេក៏បើកម៉ូតូត្រឡប់ក្រោយវិញ ហើយក៏ជួបមេប៉ុស្តិ៍ពោធិ៍អង្ក្រង ដែលមានកាន់កាំភ្លើងជាប់ដៃ ហើយបានបាញ់សំដៅទៅមិត្តភ័ក្តរបស់ខ្លួនឈ្មោះ ផារ៉ាយុ ត្រូវចំទ្រូង បណ្តាលឱ្យម៉ូតូដួលធ្លាក់ស្រែស្លាប់តែម្តង។
យុវជនរូបនេះ និយាយថា៖ «បាញ់ត្រង់ហ្នឹង ខ្ញុំជិះហើយ ខ្ញុំត្រឡប់មកវិញខ្ញុំបកមកក្រោយវិញ ដល់ខ្ញុំបកមកវិញ បានគាត់ឈរកន្លែងហ្នឹង គាត់ឈរកន្លែងនៀក ម្នាក់ឯង អាពេលដល់បានឃើញស្ពាយកាំភ្លើង ឃើញកាន់កាំភ្លើងគំរាម ដល់ពេលគេចដល់ត្រឹមហ្នឹងជិតផុតហើយ បាញ់ផឹង បានមួលហ្គាទៅមុខ ធ្លាក់នៅនោះ វាថាត្រូវទ្រូងហើយ ដល់ចឹងឈាមធ្លាក់នៅហ្នឹងម៉ាត់ៗ ដល់ខ្ញុំលើកវាដល់លើគោក វាដកចង្កាមាន់»។
តែសម្រាប់ សេចក្តីបំភ្លឺរបស់ស្នងការដ្ឋាននគរបាលខេត្តកំពង់ស្ពឺ ចុះថ្ងៃទី០៤ ខែតុលា បានលើកឡើងថា នៅយប់កើតហេតុនោះ កម្លាំងនគរបាលរដ្ឋបាលពោធិ៍អង្ក្រង ដឹកនាំដោយលោក ទ្រី បូរិន នាយប៉ុស្តិ៍នគរបាលរដ្ឋបាល និងមន្ត្រីនគរបាលប៉ុស្តិ៍ ៥នាក់ បានចុះធ្វើការល្បាតក្នុងភូមិសាស្ត្រឃុំពោធិ៍អង្ក្រង លុះដល់កន្លែងកើតហេតុ មានមុខសញ្ញាជនសង្ស័យ ២នាក់ ជិះម៉ូតូម៉ាកហុងដាឌ្រីមមួយគ្រឿង ហើយសមត្ថកិច្ចក៏បានស្ទាក់ឃាត់ដើម្បីសួរនាំ ប៉ុន្តែមុខសញ្ញាមិនព្រមឈប់ និងបានព្យាយាមគេចពីសមត្ថកិច្ច មកម៉ូតូថយក្រោយ ក៏បានជ្រុលបុកលោក ទ្រី បូរិន បុកចំអាវុធ AK47 បណ្តាលឱ្យរាកៃផ្ទះចំឈ្មោះ ផា រ៉ាយុ អាយុ ១៧ឆ្នាំ ជាអ្នកបើកបរម៉ូតូ បណ្តាលឱ្យជនរងគ្រោះស្លាប់តែម្តង។
ជុំវិញការបំភ្លឺរបស់សាក្សីដែលឃើញផ្ទាល់ភ្នែក និងការបំភ្លឺរបស់សមត្ថកិច្ចដែលមានលក្ខណៈខុសគ្នា អតីតតំណាងរាស្ត្រគណបក្សសង្គ្រោះជាតិខេត្តកំពង់ស្ពឺដែលតុលាការរំលាយ លោក សួន សូរីដា យល់ឃើញថា ក្រសួងមហាផ្ទៃ ចាំបាច់ណាស់ត្រូវចាត់វិធានការស៊ើបអង្កេតឱ្យបានច្បាស់លាស់ ដើម្បីស្វែងរកការពិត និងផ្តល់យុត្តិធម៌សម្រាប់ជនរងគ្រោះ។
លោកថា ប្រសិនបើរកឃើញថា ជនរងគ្រោះពិតជាស្លាប់ដោយសារការបាញ់ប្រហារពីសំណាក់មេប៉ុស្តិ៍មែននោះ ជនដៃដល់ត្រូវទទួលទោសតាមច្បាប់ ហើយសមត្ថកិច្ចស្នងការដ្ឋាននគរបាលខេត្តកំពង់ស្ពឺ ក៏ត្រូវទទួលខុសត្រូវចំពោះមុខច្បាប់ ការដែលខ្លួនបានស៊ុមគ្រឡុំគ្នា កែ ភស្តុតាង ដើម្បីជួយសម្រាលទោសជនដៃដល់។
បើតាម លោក សួន សូរីដា ករណីដែលបានកើតឡើងនៅស្រុកបដេស្ឋ ខេត្តកំពង់ស្ពឺ ជាគំរូអាក្រក់របស់មន្ត្រីអនុវត្តច្បាប់ ហើយថាគំរូអាក្រក់នេះ វានឹងពង្រីកឱ្យមានជនរងគ្រោះកាន់តែច្រើននៅក្នុងប្រទេសកម្ពុជា បើក្រសួងមហាផ្ទៃ មិនបោសសំអាតមន្ត្រីពាក់ព័ន្ធនឹងបទឧក្រិដ្ឋនេះ ព្រោះជាមន្ត្រីមិនទទួលខុសត្រូវ ហើយទម្លាក់កំហុសដាក់ជនរងគ្រោះទៅវិញ។
លោក សួន សូរីដា ក៏បានព្រមានដែរថា អំពើអយុត្តិធម៌នេះ បើរដ្ឋាភិបាលមិនបោសសំអាតអំពើអយុត្តិធម៌បែបនេះទេ វានឹងគំរាមកំហែងដល់អំណាចមេដឹកនាំកំពូល បើមិនវះកាត់ ដើម្បីធានាយុត្តិធម៌សង្គមទេនោះ ខណៈបញ្ហាសង្គមជាច្រើនទៀត កំពុងតែចាក់ស្រែសមានទាំងបញ្ហាព្រំដែន។
លោកថា៖ «ក្រៅពីប្រជាពលរដ្ឋដាក់ការសម្អប់ ឬក្រៅពីទៅលើរឿងកងកម្លាំងនគរបាល គឺប្រជាពលរដ្ឋនឹងខឹងសម្បាទៅលើរដ្ឋាភិបាលហើយ ព្រោះរដ្ឋាភិបាលគឺជាអ្នកមើលការខុសត្រូវទៅលើការអនុវត្តច្បាប់របស់នគរបាលទាំងអស់ហ្នឹង ហើយបើសិនជាស្រាប់តែរឿងដែលវាផ្ទុះឡើង ហើយមហាជនគេសង្ស័យថាវាជារឿងផ្ទុះអាវុធដោយចេតនា ហើយបែរជាប្រឌិតរឿងបង្កើតថាអាហ្នឹងវាជាការផ្ទុះអាវុធដោយអចេតនា ដោយអី អាហ្នឹងខ្ញុំគិតថា វាធ្វើឱ្យប្រជាពលរដ្ឋខ្មែរហ្នឹងអស់ជំនឿជាមួយរដ្ឋាភិបាលកាន់តែខ្លាំង ក្នុងស្ថានភាពដែលរដ្ឋាភិបាលហាក់ដូចជាអសមត្ថភាព នៅក្នុងការតតាំងជាមួយនឹងប្រទេសថៃឈ្លានពានផង ហើយស្រាប់តែរដ្ឋាភិបាលបង្កើតប្រឌិតរឿងធ្វើឱ្យប្រជាពលរដ្ឋអស់សង្ឃឹមថែមទៅទៀត ខ្ញុំគិតថា ភាពអស់សង្ឃឹមរបស់ប្រជាពលរដ្ឋទៅនឹងរដ្ឋាភិបាលហ្នឹងកាន់តែខ្លាំងឡើងៗ ប្រសិនបើរដ្ឋាភិបាលមិនពង្រឹងប្រសិទ្ធភាពនៅក្នុងការអនុវត្តច្បាប់នៅក្នុងផ្ទៃក្នុងប្រទេសទេ។ ត្រង់ចំនុចនេះខ្ញុំមិនមែនចង់និយាយថា ឱ្យអនុវត្តច្បាប់ចាប់ចងតាមទំនើងចិត្តទេ គឺអនុវត្តច្បាប់ទៅតាមនីតិរដ្ឋ បានន័យថា អ្នកដែលមានទោសត្រូវបាននាំខ្លួនមកកាត់ទោសតាមច្បាប់»។
ចំណែក លោក មុត ចន្ថា អតីតប្រធានខុទ្ទការល័យប្រធានគណបក្សសង្គ្រោះជាតិ បានលើកឡើងក្នុងទំព័រហ្វេសប៊ុកកាលពីថ្ងៃទី០៥ និងទី០៦ ខែតុលាដែរថា ករណីនេះ បើតាមសាក្សីឃើញផ្ទាល់ភ្នែក បានបញ្ជាក់ថា ឃាតករជាមេប៉ុស្តិ៍នគរបាលឃុំពោធិ៍អង្ក្រង បានប្រើប្រាស់កាំភ្លើងអាកា AK47 ភ្ជង់ដើមទ្រូងជនរងគ្រោះ រួចកេះកៃបាញ់សម្លាប់តែម្តង។ ប៉ុន្តែការបំភ្លឺរបស់ស្នងការនគរបាលខេត្ត បែរជាការពារឃាតករជាកូនចៅរបស់ខ្លួន ដោយថា យុវជនរងគ្រោះជិះម៉ូតូទៅបុកមេប៉ុស្តិ៍ ទើបបណ្តាលឱ្យរាលកៃកាំភ្លើងទៅវិញ។
លោក មុត ចាន់ថា ចាត់ទុកការបំភ្លឺរបស់ស្នងការនគរបាលខេត្តកំពង់ស្ពឺ ថាជាការស៊ុមក្រឡំការពារឃាតករ ដែលជានាយប៉ុស្តិ៍នគរបាលឃុំពោធិ៍អង្ក្រង ដែលបាញ់សម្លាប់យុវជន និងជាអំពើក្លែងភស្តុតាងដែលត្រូវមានទោស ដែលស្នងការនគរបាលខេត្តកំពង់ស្ពឺ គួរត្រូវបកស័ក្តិ និងផ្តន្ទាទោស។
លោកបានសរសេរក្នុងសំណេរដើមថា៖ «ចាប់ស្នងការនគរបាលខេត្តកំពង់ស្ពឺ មកកាត់ទោសពីបទក្លែងភស្តុតាង ដើម្បីការពារឃាតករជាកូនចៅខ្លួន! គួរតែដកស្នងការនគរបាលខេត្តកំពង់ស្ពឺ បញ្ឈរជើង ពីបទគប់គិតការពារឃាតករជាមេប៉ុស្តិ៍ ដែលបានបាញ់សម្លាប់យុវសិស្ស អាយុ ១៧ឆ្នាំ[…]នេះជាអំពើឃាតកម្មដោយចេតនា មិនមែនជាអំពើអចេតនា!»។
តាមរយៈវីដេអូឃ្លីបខ្លីមួយមានរយៈពេល ១:១៥នាទី ដែលផ្សព្វផ្សាយលើទំព័រហ្វេសប៊ុក VTS TV News ស្ត្រីជាម្តាយរបស់យុវជនរងគ្រោះ ផា រ៉ាយុ បានរៀបរាប់ទាំងទឹកភ្នែកថា កូនរបស់គាត់ជាក្មេងល្អ មិនដែលមានរឿងរ៉ាវ ឬទៅលួចឆក់ប្លន់អ្នកណានោះទេ ហើយនៅថ្ងៃកើតហេតុ កូនរបស់គាត់ក៏គ្មានកាំបិត ឬអាវុធអ្វីជាប់ខ្លួននោះដែរ ដែលមិនគួរណាសមត្ថកិច្ចបាញ់។
អ្នកស្រីថា៖ «កូនខ្ញុំអត់មានខិលខូចអីទេ ទៅលួចទៅប្លន់គេទេ កូនខ្ញុំទៅទិញទឹកកក ថាលេងបាល់ឈ្នះជាមួយពួកម៉ាក់នោះ វាអ្នកឌុប ដល់ពេលហើយគេថា វាយកកាំភ្លើងយកមកភ្ជង់ចំកន្លែងហ្នឹង[ទ្រូង] ហើយបាញ់គ្នាធ្លាក់ចូលក្នុងទឹកទៀត អត់មានអ្នកណាគេជួយទេ ហើយវាទៅជួយស្រង់ដាក់លើគោក រួចវាមកប្រាក់ខ្ញុំ កូនមីងឯងប៉ូលីសបាញ់ងាប់ហើយ បាញ់មួយងាប់ហើយ [អត់មានរឿងធំដុំអីទេ?]អត់មានទេ អត់មានសួរទេ អត់មានសួរហេតុផលទេ ហើយកូនខ្ញុំអត់មានអាវទេ វាទៅទិញទឹកកក អត់មានកាន់កាំបិទកាន់អីដែរ បើថា វាកាន់អីខុសច្បាស់ទៅ ចាំធ្វើបាបវាចឹង ចង់ឱ្យគាត់រកយុត្តិធម៌ឱ្យកូនខ្ញុំផង ស្នងការខេត្តកំពង់ស្ពឺជួយរកយុត្តិធម៌ឱ្យកូនខ្ញុំផង»។
លោក នី សុខា នាយកប្រតិបត្តិសមាគមការពារសិទ្ធិមនុស្សអាដហុក មានប្រសាសន៍នៅថ្ងៃទី០៦ ខែតុលានេះថា យោងតាមច្បាប់ ករណីឃាតកម្មដោយចេតនា និងអចេតនា ឬការធ្វើសកម្មភាព ឬក៏ទង្វើណាមួយដែលធ្វើឱ្យជនណាម្នាក់ស្លាប់ គឺសុទ្ធតែមានទោសព្រហ្មទណ្ឌដូចគ្នា គ្រាន់តែថា បើសកម្មភាពនោះធ្វើឱ្យដោយអចេតនា នោះកម្រិតទោសទណ្ឌស្រាលជាងសកម្មភាពដែលធ្វើដោយចេតនា។
ចំពោះការស្លាប់របស់យុវជន ផា រ៉ាយុ អាយុ ១៧ឆ្នាំ ដែលមានការអះអាងផ្សេងគ្នា រវាងសាក្សីដែលថាមេប៉ុស្តិ៍ជាអ្នកបាញ់បណ្តាលឱ្យស្លាប់ និងខាងស្នងការនគរបាលខេត្តកំពង់ស្ពឺ ថាត្រូវគ្រាប់កាំភ្លើង ដោយសាររាកៃកាំភ្លើងចំបណ្តាលឱ្យយុវជនស្លាប់នោះ លោកយល់ស្របដែរថា ក្រសួងឬស្ថាប័នពាក់ព័ន្ធ គួរតែបង្កើតក្រុមការងារឯករាជ្យមួយ ឬក៏ស្ថាប័នដែលអាចទុកចិត្តបាន ដើម្បីចុះស្រាវជ្រាវរកមូលហេតុឱ្យបានច្បាស់លាស់ ជៀសវាងការរិះគន់ និងមន្ទិលសង្ស័យពីសាធារណជន ព្រោះការបកស្រាយរបស់ស្នងការនគរបាលខេត្ត ដែលជាមេរបស់មេប៉ុស្តិ៍ពោធិ៍អង្ក្រងនោះ ចង់មិនចង់ គឺសាធារណជនមិនសូវជាមានជំនឿទុកចិត្តទេ។
៤ៈ២៣ លោកថា៖ «ដូច្នេះបើសិនក្នុងករណីមានការបកស្រាយដែលមានមន្ទិលបែបនេះ វាគួរតែមានក្រុមអ្នកធ្វើការស៊ើបអង្កេតឯករាជ្យមួយទៀត ដើម្បីទៅពិនិត្យ ដើម្បីទៅស៊ើបអង្កេតរឿងហ្នឹងឱ្យបានច្បាស់លាស់ គេហៅថា ធ្វើការអង្កេតត្រួតពិនិត្យលើអ្វីដែលជាការបកស្រាយរបស់ប្រជាពលរដ្ឋ ក៏ដូចជាស្នងការហ្នឹងថែមមួយកម្រិតទៀត ហើយក្រុមដែលទៅអង្កេត ទៅធ្វើការស្រាវជ្រាវទាំងអស់ហ្នឹង វាទាល់តែជាក្រុមមួយដែលមានឯករាជ្យដែលអាចឱ្យគេជឿទុកចិត្តបាន ឧទាហរណ៍ ដូចជា មានសមាសភាពពីខាងការចូលរួមចំណែកពីខាង UN (អង្គការសហប្រជាជាតិ) ឬពីខាងសង្គមស៊ីវិល ឬក៏វាមានស្ថាប័នពាក់ព័ន្ធផ្សេងទៀតដែលធ្វើឱយ៉ាងណាឱ្យមានការជឿទុកចិត្តពីមហាជន អាហ្នឹងជារឿងដែលធ្វើឱ្យភាគីទាំងសង្ខាងទទួលបានយុត្តិធម៌ផង វាធ្វើឱ្យមហាជនអស់មន្ទិលសង្ស័យផង អាហ្នឹងដើម្បីប្រយោជន៍សង្គម ប្រយោជន៍យុត្តិធម៌ទាំងអស់គ្នា»។
បើតាម លោក នី សុខា បើសិនជាករណីនេះ មេប៉ុស្តិ៍ពិតជាបាញ់យុវជនរងគ្រោះបណ្តាលឱ្យស្លាប់មែននោះ វានឹងជះឥទ្ធិពលមិនល្អចំពោះការអនុវត្តច្បាប់របស់កងកម្លាំងសមត្ថកិច្ច ដែលគ្មានវិន័យ និងហ៊ានប្រព្រឹត្តនូវបទល្មើស ហើយវាក៏នឹងប៉ះពាល់ដល់ការគោរពសិទ្ធិមនុស្ស ព្រោះរឿងនេះប្រព្រឹត្តឡើងដោយអ្នកមានអំណាច ឬក៏បុគ្គលដែលមានតួនាទី ក្នុងនាមជាសមត្ថកិច្ចថែមទៀតផង។ ប៉ុន្តែបើសិនជាករណីនេះ មានការស្រាវជ្រាវអង្កេតឱ្យបានស៊ីជម្រៅ និងច្បាស់លាស នោះវាជារឿងមួយដែលអាចលុបលាងនូវផលជះឥទ្ធិពលមិនល្អទៅលើសមត្ថកិច្ចផង និងធ្វើឱ្យសង្គមមានយុត្តិធម៌ផង។
លោកបន្ថែមថា៖ «រឿងនេះគួរតែមានការធ្វើការអប់រំទៅដល់សមត្ថកិច្ចផងដែរ ដើម្បីបញ្ចៀសកុំឱ្យមានបញ្ហាហ្នឹងកើតមានតទៅទៀត គឺថាយើងត្រូវតែពង្រឹងការអប់រំនូវក្រមសីលធម៌របស់កងសមត្ថកិច្ច គេហៅថា សិទ្ធិនៅក្នុងការកាន់អាវុធកាន់អីចឹងទៅណា ដើម្បីធ្វើម៉េចកុំឱ្យកងកម្លាំងសមត្ថកិច្ច មានការប្រព្រឹត្ត ឬក៏មានការធ្វេសប្រហែសប្រព្រឹត្តបែបហ្នឹងតទៅទៀត»។
វីអូឌី មិនអាចសុំការអត្ថាធិប្បាយជុំវិញរឿងនេះ ពីអ្នកនាំពាក្យក្រសួងមហាផ្ទៃ លោក ទូច សុខៈ និងស្នងការនគរបាលខេត្តកំពង់ស្ពឺ លោក ឃឹម សុកខៃ បានទេ នៅថ្ងៃទី០៧ ខែតុលានេះ។
យ៉ាងណា បើតាមការបំភ្លឺរបស់ស្នងការដ្ឋាននគរបាលខេត្តកំពង់ស្ពឺ ក្រោយកើតហេតុ មេប៉ុស្តិ៍ ទ្រី បូរិន បានរាយការណ៍ភ្លាមៗ និងបានប្រគល់ខ្លួនទៅផ្នែកព្រហ្មទណ្ឌនៃអធិការដ្ឋាននគរបាលស្រុកបសេដ្ឋ និងបញ្ជូនទៅស្នងការដ្ឋាននគរបាលខេត្ត ដើម្បីទទួលខុសត្រូវចំពោះសកម្មភាពកើតឡើងដោយអចេតនា និងការធ្វើប្រហែសរបស់ខ្លួន ហើយខាងស្នងការនគរបាលខេត្ត ក៏បានអនុវត្តនីតិវិធីសាកសួរ និងស្នើសុំគោលការណ៍ថ្នាក់ដឹកនាំ ដើម្បីមានចំណាត់ការទៅតាមផ្លូវច្បាប់ចំពោះសកម្មភាពដែលបង្កឱ្យជនរងគ្រោះស្លាប់បាត់បង់ជីវិត។
ស្នងការដ្ឋាននគរបាលខេត្ត បានគូសបញ្ជាក់ថា៖ «ចំពោះករណីលោកអនុសេនីយ៍ឯក ទ្រី បូរិន ស្នងការដ្ឋាននគរបាលខេត្ត នឹងធ្វើការដោយភាពយុត្តិធម៌ និងធានាផ្តល់ការជឿជាក់ដល់ក្រុមគ្រួសារជនរងគ្រោះ»។
យ៉ាងណា ក្រុមអ្នកឃ្លាំមើល រងចាំមើលនូវចំណាត់ការបន្តទៅលើមេប៉ុស្តិ៍រូបនេះ និងអ្នកដែលពាក់ព័ន្ធ នៅចំពោះមុខច្បាប់ ខណៈដែលខ្លួនជាមន្ត្រីអនុវត្តច្បាប់ បែរជាធ្វើឱ្យយុវជនវ័យក្មេងម្នាក់ត្រូវស្លាប់ ដោយសារគ្រាប់កាំភ្លើងរបស់ខ្លួនទៅវិញ៕
