តុលាការខេត្តកំពង់ស្ពឺ បានអះអាងថា ខ្លួនបានចោទប្រកាន់មន្ត្រីមួយរូប មានតួនាទីជានាយប៉ុស្តិ៍នគរបាលរដ្ឋបាលពោធិ៍អង្ក្រងនៃអធិការដ្ឋាននគរបាលស្រុកបសេដ្ឋ ពីបទឃាតកម្ម ពាក់ព័ន្ធករណីផ្ទុះអាវុធ បង្កឱ្យយុវជនម្នាក់ស្លាប់ នៅនឹងកន្លែងកើតហេតុ វេលាម៉ោង១០យប់ កាលពីសប្តាហ៍មុន។
ការចោទប្រកាន់នេះ ក្រោយពីមានការរិះគន់ពីគ្រួសារជនរងគ្រោះ រួមទាំងអ្នកប្រើប្រាស់បណ្តាញសង្គមផងរិះគន់ការចេញបំភ្លឺខុសពីការពិតរបស់ស្នងការនគរបាលខេត្តកំពង់ស្ពឺ ក្រោយមានហេតុការណ៍កើតឡើងបានមួយថ្ងៃ។
នេះតាមសេចក្តីប្រកាសព័ត៌មាន ស្តីពី ចំណាត់ការលើសំណុំរឿងពាក់ព័ន្ធនឹងករណីឃាតកម្មនេះ ចុះថ្ងៃទី៧ ខែតុលា ឆ្នាំ២០២៥ អយ្យការអមសាលាដំបូងខេត្តកំពង់ស្ពឺ ។
ប្រភពនោះ បានបញ្ជាក់ថា កាលពីថ្ងៃទី០៣ ខែតុលា ឆ្នាំ២០២៥ វេលាម៉ោង២២ ឬម៉ោង១០យប់ នៅតាមផ្លូវបេតុងមួយកន្លែង ស្ថិតក្នុងភូមិក្រញូង ឃុំពោធិ៍អង្ក្រង ស្រុកបសេដ្ឋ ខេត្តកំពង់ស្ពឺ មានករណីផ្ទុះអាវុធចំនួន០១គ្រាប់ ដែលបង្កឡើងដោយជនសង្ស័យឈ្មោះ ទ្រី បូរិន ភេទប្រុស អាយុ ៣៨ឆ្នាំ តួនាទីជានាយប៉ុស្តិ៍នគរបាលរដ្ឋបាលពោធិ៍អង្ក្រងនៃអធិការដ្ឋាននគរបាលស្រុកបសេដ្ឋ។
ការផ្ទុះអាវុធនេះ បណ្តាលឲ្យជនរងគ្រោះឈ្មោះ ផាន ផាយុ ស្លាប់បាត់បង់ជីវិត ហើយថា ក្រោយកើតហេតុ កម្លាំងសមត្ថកិច្ច បានធ្វើការឃាត់ខ្លួនជនសង្ស័យខាងលើ រួមជាមួយវត្ថុតាង AK47 រួចកសាងសំណុំរឿង បញ្ជូនមកអយ្យការអមសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធីច្បាប់។
បន្ទាប់ពីធ្វើការសួរចម្លើយ និងពិនិត្យភស្តុតាង តំណាងអយ្យការខេត្តកំពង់ស្ពឺ សម្រេចចោទប្រកាន់លើជនសង្ស័យឈ្មោះ ទ្រី បូរិន ភេទប្រុស អាយុ៣៨ឆ្នាំ ពីបទ ឃាតកម្ម ដោយបើកការស៊ើបសួរទៅចៅក្រមស៊ើបសួរ តាមរយៈដីកាសន្និដ្ឋានបញ្ជូនរឿងឱ្យស៊ើបសួរ ចុះថ្ងៃទី០៧ ខែតុលា ឆ្នាំ២០២៥ ដើម្បីចាត់ការតាមនីតិវិធី។
ជាការកត់សម្គាល់ក្រោយកើតហេតុម្តាយជនរងគ្រោះ ទាមទារឱ្យស្ថាប័ន្ធពាក់ព័ន្ធជួយរកយុត្តិធម៌ឱ្យកូនប្រុសដែលត្រូវគេបាញ់សម្លាប់នេះ។ ដោយឡែកនៅថ្ងៃ៤ខែតុលា ស្នងការដ្ឋាននគរបាលខេត្តកំពង់ស្ពឺ តាមរយៈក្រុមការងារប្រតិកម្មរហ័សរបស់ស្នងការ បានចេញសេចក្តីបំភ្លឺថា ហេតុការណ៍ស្លាប់របស់យុវជននេះ បង្កឡើងដោយជនរងគ្រោះ។
លិខិតបំភ្លឺរបស់ស្នងការនគរបាលខេត្តកំពង់ស្ពឺ បានបញ្ជាក់ថា នៅយប់ថ្ងៃទី៣ ខែតុលា ឆ្នាំ២០២៥ វេលាម៉ោង ២២:០០នាទី កំលាំងនគរបាលរដ្ឋបាលពោធិ៍អង្ក្រង ដឹកនាំដោយ លោកអនុសេនីយ៍ឯក ទ្រី បូរិន នាយប៉ុស្តិ៍នគរបាលរដ្ឋបាលពោធិ៍អង្ក្រង និងមន្ត្រីនគរបាលប៉ុស្តិ៍ ៥នាក់ បានចុះធ្វើការល្បាតក្នុងភូមិសាស្ត្រឃុំពោធិ៍អង្ក្រង។
លុះមកដល់ចំណុចផ្លូវបេតុងចំណុចកើតហេតុ មានមុខសញ្ញាសង្ស័យ ២នាក់ ជិះម៉ូតូមួយគ្រឿង ម៉ាកហុងដាឌ្រីម ដែលពេលនោះ សមត្ថកិច្ចបានស្ទាក់ឃាត់ដើម្បីសួរនាំ ប៉ុន្តែមុខសញ្ញាបើកម៉ូតូមិនព្រមបញ្ឈប់ និងបានព្យាយាមបើកគេចពីសមត្ថកិច្ចបកថយក្រោយរួចបានជ្រុល បុកលោកអនុសេនីយ៍ឯក ទ្រី បូរិន នាយប៉ុស្តិ៍ បុកចំអាវុធAK47 បណ្តាលឱ្យរាលកៃផ្ទុះចំឈ្មោះ ផា រ៉ាយុ ភេទប្រុស អាយុ ១៧ឆ្នាំ ជាអ្នកបើកម៉ូតូ រស់នៅភូមិព្រៃស្រួល ឃុំពោធិ៍អង្ក្រង ស្រុកបសេដ្ឋ ខេត្តកំពង់ស្ពឺ បណ្តាលឱ្យជនរងគ្រោះស្លាប់ ។
លើសពីនេះ ប្រភពនោះថា ក្រោយកើតហេតុ អធិការដ្ឋាននគរបាលស្រុកបសេដ្ឋ បាននាំខ្លួនលោក ទ្រី បូរិន មកស្នងការដ្ឋាននគរបាលខេត្តកំពង់ស្ពឺ ដើម្បីអនុវត្តនីតិវិធី និងស្នើសុំគោលការណ៍ថ្នាក់ដឹកនាំមានចំណាត់ការតាមផ្លូវច្បាប់ ចំពោះសកម្មភាពដែលបានបង្កឱ្យជនរងគ្រោះបាត់បង់អាយុជីវិត។
យ៉ាងណាក៏ចេញបំភ្លឺរបស់ស្នងការខេត្ត ហាក់ផ្ទុយគ្នាទៅនឹងការរកឃើញរបស់តុលាការ ប៉ុន្តែការរកឃើញរបស់តុលាការ ហាក់ស៊ីគ្នាទៅនឹងការបញ្ជាក់របស់សាក្សីមួយចំនួនបានប្រាប់អ្នកសារព័ត៌មាន ដោយពួកគេថា ការស្លាប់របស់យុវជន ផា រ៉ាយុ អាយុ១៧ឆ្នាំ ដោយសារនាយប៉ុស្តិ៍ លោក ទ្រី បូរិន ជាអ្នកបាញ់។
មន្ត្រីគណបក្សប្រឆាំងដែលតាមដានរឿងនេះ គឺលោក មុត ចន្ថា បាននិយាយលើហ្វេសប៊ុករបស់លោកថា ស្នងការនគរបាលខេត្តកំពង់ស្ពឺ បកស្រាយស៊ុមគ្រលុំ ការពារឃាតករដែលជានាយប៉ុស្តិ៍នគរបាលឃុំពោធិ៍អង្ក្រង ដែលបានបាញ់សម្លាប់យុវជន។
លោកថា៖ «នេះជាអំពើឃាតកម្មដោយចេតនា មិនមែនជាអំពើអចេតនា»។
សម្រាបលោក ម៉ុត ចន្ថា គួរតែដកស្នងការនគរបាលខេត្តកំពង់ស្ពឺ បញ្ឈរជើង ពីបទគប់គិតការពារឃាតករជាមេប៉ុស្តិ៍ ហើយថានេះជាអំពើក្លែងភស្តុតាងដែលត្រូវមានទោស ដែលស្នងការនគរបាលរូបនេះគួរត្រូវបកស័ក្តិ និងផ្តន្ទាទោស៕
