បើទោះបីជាចាប់តាំងពីកងទ័ពថៃ បើកការបាញ់ផ្លោង និងទម្លាក់គ្រាប់ស្រោចយ៉ាងសន្ធាប់មកលើទឹកដីកម្ពុជាក្នុងរយៈពេល៥យប់៥ថ្ងៃ ហើយកងទ័ពខ្មែរនៅជួរមុខបង្ហាញពីភាពក្រតោកយ៉ាក និងទ័ពថៃចូលរាយបន្លាលួសព័ទ្ធយកផ្ទះយកដីបង្កការឈឺចាប់ដល់ពលរដ្ឋខ្មែរយ៉ាងណាក្តី ក៏លោក ហ៊ុន សែន នៅស្ងៀមបាត់មាត់បាត់កខុសប្រក្រតី។ ក៏ប៉ុន្តែពេលក្រុមMMOថៃ ប្រមាថមើលងាយរូបលោក លោកនិងស្ថាប័នរដ្ឋដែលនៅក្រោមបង្គាប់របស់លោក បែរជាបញ្ចេញប្រតិកម្មតបត។ ត្រង់ចំណុចនេះ ត្រូវបានអ្នកឃ្លាំមើលលើកឡើងថា លោក ហ៊ុន សែន ជាមនុស្សអាត្មានិយម គិតតែពីផលប្រយោជន៍ខ្លួនឯង និងបក្ខពួកដើម្បីក្រាញអំណាចតពូជ ដោយមិនបានគិតពីសុខទុក្ខរបស់ប្រជាពលរដ្ឋ កងទ័ព និងទឹកដីឡើយ។
ព្រឹទ្ធសភា និងរដ្ឋាភិបាលកម្ពុជា នៅថ្ងៃទី៧ ខែតុលា ឆ្នាំ២០២៥ បានចេញសេចក្តីថ្លែងការណ៍២ផ្សេងគ្នា សម្តែងការសោកស្តាយជាពន់ពេក និងថ្កោលទោសយ៉ាងខ្លាំងក្លាបំផុត ចំពោះការប្រមាថ និងគ្មានការគោរពរបស់ជនជាតិថៃមួយចំនួន ដោយយករូបថត លោក ហ៊ុន សែន ប្រធានព្រឹទ្ធសភាទៅធ្វើជាផ្ទាំងបាញ់ស៊ីបយករង្វាន់ និងយកទៅដាក់តាំងជារូបទីងមោងជាដើម។
ស្ថាប័នរដ្ឋកំពូលទាំងពីរនេះ បានចាត់ទុកសកម្មភាពអសីលធម៌របស់ជនជាតិថៃនេះ ថាជាការប្រមាថយ៉ាងធ្ងន់ធ្ងរ ដល់សេចក្តីថ្លៃថ្នូររបស់មនុស្សជាតិ តម្លៃសីលធម៌ និងការគោរពគ្នាទៅវិញទៅមករវាងប្រជាជាតិ និងប្រជាជាតិ។ ទង្វើបែបនេះ ក៏បានធ្វើឱ្យប៉ះពាល់ដល់ស្មារតីនៃភាពជាអ្នកជិតខាងល្អ មិត្តភាព និងសន្តិសហវិជ្ជមានដែលជាគោលការណ៍គ្រឹះដឹកនាំ ទំនាក់ទំនងរវាងកម្ពុជាថៃ ក្នុងនាមជាសមាជិកក្នុងអាស៊ាននិងអន្តរជាតិ។
បន្ថែមពីនេះ អង្គភាពអ្នកនាំពាក្យរដ្ឋាភិបាល យល់ឃើញថា ជនជាតិអាស៊ី ជាពិសេសជនជាតិថៃ និងខ្មែរ មានប្រពៃណីគោរពយ៉ាងខ្ពង់ខ្ពស់ចំពោះអង្គព្រះមហាក្សត្រ និងថ្នាក់ដឹកនាំកំពូលរបស់ប្រទេស និងថា ក្នុងហេតុផលនេះហើយបានថ្នាក់ដឹកនាំកំពូលកម្ពុជាទាំង លោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត តែងតែអំពាវនាវជាញឹកញាប់ដល់ប្រជាពលដ្ឋខ្មែរ សូមកុំយកព្រះឆាយាល័ក្ខណ៍ព្រះមហាក្សត្រ និងរូបថតថ្នាក់ដឹកនាំថៃ ទៅធ្វើសកម្មភាពណាមួយដែលមិនគួរគប្បី និងសូមកុំមានការរើសអើងចំពោះប្រជាជនថៃដែលកំពុងស្នាក់នៅ និងប្រកបមុខរបបនៅកម្ពុជា។
លោក ប៉ែន បូណា ប្រធានអង្គភាពអ្នកនាំពាក្យរដ្ឋាភិបាល ថ្លែងថា នៅឯប្រទេសថៃ អំពើអសីលធម៌ និងការប្រមាថគ្រប់បែបយ៉ាងចំពោះថ្នាក់ដឹកនាំកម្ពុជា បានប្រព្រឹត្តទៅដោយចំហរ និងដោយគ្មានវិធានការអ្វីទាំងអស់។ លោកបានសម្តែងការសោកស្តាយយ៉ាងខ្លាំង ចំពោះការបណ្តែតបណ្តោយឱ្យអំពើប្រមាថបែបនេះកើតឡើង។
លោកថា៖ «អ្នកនាំពាក្យរាជរដ្ឋាភិបាលកម្ពុជា សូមបញ្ជាក់សារជាថ្មីជូនសាធារណជនមេត្តាជ្រាបថា កម្ពុជាទោះបីជាប្រទេសតូច មានប្រជាជនតិច និងសេដ្ឋកិច្ចនៅទន់ខ្សោយ ប៉ុន្តែថ្នាក់ដឹកនាំកម្ពុជាតែងតែប្រកាន់ខ្ជាប់នូវគោលការណ៍ស្រឡាញ់សន្តិភាព ការដោះស្រាយបញ្ហាដោយសន្តិវិធី និងចង់បានព្រំដែនសន្តិភាពមិត្តភាព សហប្រតិបត្តិការណ៍ និងការអភិវឌ្ឍ ដោយមិនដែលចាត់ទុកប្រទេសជិតខាង ឬប្រទេសណាមួយជាសត្រូវនោះឡើយ»។
យ៉ាងណាក្តី អ្នកឃ្លាំមើលមិនចំណុះរដ្ឋាភិបាល ចាត់ទុកការចេញសេចក្តីថ្លែងការណ៍ថ្កោលទោសថៃនេះ ថាជាវប្បធម៌ហៃអើ រុញទូកបណ្តោយទឹកដើម្បីតែផលប្រយោជន៍ផ្ទាល់ខ្លួន។
លោក ហ៊ុន សែន កាលពីថ្ងៃទី៧ខែតុលា បានសរសេរសារនៅលើបណ្តាញសង្គមដោយមានភ្ជាប់វីដេអូដែលក្រុមMMO ថៃបានបាញ់ស៊ីបលើរូបថតលោក ដោយចោទជាសំណួរថា «នេះឬជាជនជាតិស៊ីវិល័យមានគុណធម៌ សីលធម៌ និងអរិយធម៌ខ្ពស់? ប៉ុន្តែយ៉ាងណាក្តី លោក ហ៊ុន សែន បានប្រាប់ឱ្យប្រជាជនកម្ពុជាកុំធ្វើទង្វើអាក្រក់បែបនេះ ដែលជាទង្វើអមនុស្ស និងអន់ជាងសត្វ។ មិនថាវីដេអូនេះ ធ្វើដោយមនុស្សផ្ទាល់ ឬដោយ AI គឺសុទ្ធតែបង្ហាញនូវអំពើអាក្រក់ទាំងអស់មិនថាជនជាតិណា ឬក្រុមណានោះទេ»។
ជាមួយគ្នានេះ លោក ហ៊ុន សែន លើកឡើងថា សកម្មភាពរបស់ជនជាតិថៃនេះ ធ្វើឡើងក្នុងគោលដៅធ្វើឱ្យលោកបាត់បង់ការអត់ធ្មត់ ក្នុងពេលបទឈប់បាញ់ កំពុងស្ថិតក្នុងស្ថានភាពផុយស្រួយ ឬយ៉ាងហោចណាស់ញុះញង់ឱ្យកងទ័ព និងប្រជាជនកម្ពុជាមួយចំនួន តបតតាមរបៀបបង្កអរិយភាព។
ក្នុងពេលកាន់អំណាចជាង៤០ឆ្នាំមកនេះ លោក ហ៊ុន សែន ដែលត្រូវបានលើកបន្តុបដោយវៀតណាម រងកររិះគន់ថា មិនបានធ្វើខ្លួនជានាយករដ្ឋមន្ត្រី ឬជាប្រធានព្រឹទ្ធសភា ដែលតាមច្បាប់ត្រូវជាតំណាងរបស់ប្រជាជាតិខ្មែរទាំងមូលនោះទេ ពីព្រោះជារឿងៗ លោក ហ៊ុន សែន តែងតែប្រើពាក្យសម្តីហិង្សា អសីលធម៌ប្រមាថអាយុជីវិតប្រជាពលរដ្ឋខ្មែរដែលមានមតិផ្ទុយពីលោក ដោយបញ្ជាឱ្យមន្ត្រីក្រោមបង្គាប់តាមកម្ទេច តាមកម្ចាត់ ងើបមួយវ៉ៃមួយ ទៅលើអ្នកនយោបាយប្រឆាំង និងសកម្មជនសង្គមដែលមានមតិផ្ទុយ។ ដូចជាកាលពីអំឡុងឆ្នាំ២០២៤ លោក ហ៊ុន សែន បានបញ្ជាឱ្យតាមចាប់ខ្លួន លោក ផន ផាណា សកម្មជនគណបក្សប្រឆាំងមិនថា រស់ឬស្លាប់នោះទេ គឺត្រូវចាប់ឱ្យបាន។
លោកថា៖ «ត្រូវតាមយកអាមួយនេះឱ្យបាន បើទោះបីដោយតម្លៃណាក៏ដោយ រស់ឬស្លាប់យើងអត់ដឹងទេតែដឹងថា អាមួយនឹងគឺមិនអាចទៅណាមិនឱ្យចេញទៅណាបាន ដូច្នេះត្រូវអនុវត្តវិធានការនេះជាបន្ទាន់ដាច់ខាតមិនឱ្យអា ផន ផាណា នេះរួចខ្លួនបានទេ»។
លោកផន ផាណា បានចាត់ទុកលោកហ៊ុន សែន ថា ជាមេដឹកនាំដែលគ្មានមនោសញ្ចេតនា ចំពោះជាតិសាសន៍ខ្មែរខ្លួនឯង ពីព្រោះលោក ហ៊ុន សែន ហ៊ានធ្វើគ្រប់យ៉ាងរហូតដល់តាមសម្លាប់តាមកម្ទេច តាមកម្ចាត់ងើបមួយវ៉ៃមួយ ចំពោះអ្នកដែលមានមតិផ្ទុយពីខ្លួន ដូចជារូបលោកជាដើម ដើម្បីតែសម្រេចមហិច្ឆតាក្រាញអំណាចតពូជ។
លោកថា៖ «លោក ហ៊ុន សែន តាមសម្លាប់ខ្ញុំ មិនថាស្លាប់ឬរស់ មិនមែននិយាយទេណា គឺបញ្ជាឱ្យមនុស្សតាមចាប់ខ្ញុំ ហើយខ្ញុំរត់គេចប្រផាប់ប្រភីង កុំតែបានទូតសហរដ្ឋអាមេរិកគេយកទៅទេណា កុំតែបានអង្គការសហប្រជាជាតិ កុំតែបានអង្គការសិទ្ធិមនុស្ស គេអន្តរាគមន៍ដុតដៃដុតជើងទេណា គឺលោក ហ៊ុន សែន គឺតាមចាប់តាមសម្លាប់ខ្ញុំពិតមែន អាហ្នឹងមិនមែនជារឿងគំរាមកំហែង ឬក៏ជាហ្គេមដូចគេធ្វើផង។ សួរថា លោក ហ៊ុន សែន គាត់ចេះឈឺចាប់ គ្រាន់តែគេយករូបភាពគាត់យកទៅធ្វើផ្ទាំងស៊ីប ចុះលោក ហ៊ុន សែន ធ្វើអាទង្វើព្រៃផ្សៃដាក់គេ សម្លាប់ក្រុមគ្រួសារគេតាមចាប់តាមសម្លាប់ខ្ញុំ ឬក៏ចាប់សកម្មជននយោបាយផ្សេងៗ ដាក់គុកសួរថា តើគាត់ចេះយល់ពីអារម្មរណ៍ក្រុមគ្រួសារគេតើគេឈឺចាប់ប៉ុណ្ណា»។
បើទោះបីជាអំឡុងពេលមានសង្គ្រាមជាមួយថៃ ប្រជាជាតិខ្មែរនៅគ្រប់ទិសទីបានរួបរួមសាមគ្គីគ្នា និងបានអំពាវនាវឱ្យខ្មែរគ្រប់និន្នាការនយោបាយរួបរួមសាមគ្គីគ្នា ដោយចាប់ផ្តើមពីការដោះលែងអ្នកទោសនយោបាយ ដើម្បីទប់ទល់ទៅនឹងការឈ្លានពានរបស់ថៃក្តី ក៏លោក ហ៊ុន សែន ដែលបច្ចុប្បន្នកំពុងរស់នៅក្នុងវិមានស្កឹមស្កៃពាក់សុទ្ធតែនាឡិកាទំនើប ជិត១០គ្រឿង មានតម្លៃរហូតដល់ប្រមាណ ៦០លានដុល្លារ មិនត្រឹមតែមិនបានបង្ហាញសញ្ញាណាមួយ ពីចេតនាចង់បង្រួបបង្រួមជាតិខ្មែរ ឬក៏ដោះលែងអ្នកទោសនយោបាយខ្មែរណាម្នាក់ប៉ុណ្ណោះទេ ថែមទាំងបន្តចាប់ខ្លួនអ្នកនយោបាយប្រឆាំង និងអ្នកកាសែត និយាយការពិតយ៉ាងហោចណាស់ ៤នាក់ថែមទៀត ធ្វើឱ្យចំនួនអ្នកទោសមនសិការដែលជាប់ឃុំ ក្នុងនោះក៏មានអតីតប្រធានគណបក្សសង្គ្រោះជាតិ លោក កឹម សុខា ផងដែរឡើងដល់៨០នាក់។
លោក មួន សារ៉ាត់ បានសរសេរសារបង្ហោះលើបណ្តាញសង្គម ដោយមានដាក់ភ្ជាប់រូបថតលោក ហ៊ុន សែន លោកជា វិជ្ជា លោកកែម ឡី និងលោកលិម គិមយ៉ា ដែលត្រូវបានគេបាញ់សម្លាប់ថា លោក ហ៊ុន សែន ឈឺចាប់ពេលឃើញការសម្តែងមតិទៅលើរូបភាពប្រឌិតតំណាំង “ការស្អប់ខ្ពើម” ចំពោះរូបលោក។ «ប៉ុន្តែលោក ហ៊ុន សែន ខ្លួនឯងគ្មានចិត្តមេត្តា ឬអាសូរដល់ជីវិតរបស់ជនស្លូតត្រង់ ដែលលោកបញ្ជារឱ្យសម្លាប់ពិតៗបន្តិចសោះឡើយ»។
ព្រះតេជគុណ ប៊ុត ប៊ុនតិញ បានសរសេរសារខ្លីសំដៅលោក ហ៊ុន សែន ថា«សត្រូវនៅចំពោះមុខទុកឱ្យគេមើលងាយតាមទំនើងចិត្ត។ តែបើជាតិសាសន៍ឯងតាមវ៉ៃដល់ផ្ទះ តាមកម្ទេច ចេញមួយវ៉ៃមួយ។ ថោកប៉ុណ្ណេះហើយ នៅមានមនុស្សឆ្កួតការពារទៀត។ ទឹកដីមិនការពារទៅការពារជនពាល»។
ជាមួយគ្នានេះ លោកគឹម សុខ អ្នកនាំពាក្យក្រុមប្រឹក្សាជាតិតស៊ូ បានសរសេរលើបណ្តាញសង្គមថា មានហ៊ុន សែន មានសង្គ្រាម។ ចំពោះថៃឈ្លានពានមកលើបូរណភាពទឹកដីកម្ពុជា លោក ហ៊ុន សែន និងលោក ហ៊ុន ម៉ាណែត និយាយពីការចរចាទ្វេភាគី និងភាពទន់ភ្លន់។ ប៉ុន្តែចំពោះខ្មែរប្រជាធិបតេយ្យ ឪកូនទាំងពីរនិយាយតែពី«ងើប១វាយ១» ខ្នោះ គុក ដែលត្រង់ចំណុចនេះសូមប្រជាពលរដ្ឋខ្មែរគិត។
បន្ថែមពីនេះ លោក ប៉ា ងួនទៀង ប្រធានស្ថាប័នវីអូឌី ក៏បានសរសេរលើបណ្តាញសង្គមរបស់លោកផងដែរថា លោកហ៊ុន សែន មិនគួរប្រតិកម្មជាមួយMMOថៃទេ ព្រោះនោះមិនមែនជាផេកផ្លូវការរបស់រដ្ឋថៃឡើយ។ មេដឹកនាំកំពូលខ្មែរឈ្លោះជាមួយពលរដ្ឋគេ វានាំឱ្យខូចតម្លៃខ្លួនឯង ខូចកិត្តិយស និងខាតប្រយោជន៍ជាតិ។
សម្រាប់ លោក អ៊ុំ សំអាន អតីតតំណាងរាស្ត្រគណបក្សសង្គ្រោះជាតិ បានចាត់ទុកថៃ និងលោក ហ៊ុន សែនថា ជាមនុស្សអសីលធម៌ និងមានសារជាតិអាក្រក់ដូចគ្នា ពីព្រោះថៃបានឈ្លានពានខ្មែរនិងធ្វើបាបពលរដ្ឋខ្មែរ រីឯលោក ហ៊ុន សែន បានធ្វើទុក្ខបុកម្នេញ និងធ្វើបាបពលរដ្ឋខ្មែរដូចថៃដែរ ហើយលោកមិនគាំទង្វើអសីលធម៌ទាំងនេះទេ។
លោកលើកឡើងថា ថៃរាយបន្លាលួសរំលោភយកដីខ្មែរនិងផ្ទះពលរដ្ឋខ្មែរស្រេចចិត្ត អត់ឃើញរដ្ឋាភិបាលចេញសេចក្តីថ្លែងការណ៍ និងថ្កោលទោសថៃ បែរជារដ្ឋាភិបាលចេញសេចក្តីថ្លែងការណ៍ និងថ្កោលទោសថៃ ពីរឿងប្រមាថមើលងាយលោក ហ៊ុន សែន ទៅវិញ។ លោក សំអាន បញ្ជាក់ថា សម្រាប់រដ្ឋាភិបាលកម្ពុជា គឺទឹកដីមិនសំខាន់ស្មើនឹងលោក ហ៊ុន សែន នោះទេ ពីព្រោះបើរដ្ឋាភិបាលចេះឈឺចាប់រឿងទឹកដីដូចថៃប្រមាថមើលងាយ លោក ហ៊ុន សែន នោះដីខ្មែរមិនបាត់បង់នោះទេ។
ជម្លោះព្រំដែនកម្ពុជា ថៃដែលបានផ្ទុះជាភ្លើងសង្គ្រាមឆេះសន្ធោសន្ធៅរយៈពេល៥យប់៥ថ្ងៃ គឺចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ ដោយយោធាថៃប្រើយន្តហោះចម្បាំងទម្លាក់គ្រាប់បែកចង្កោម និងដ្រូនទម្លាក់គ្រាប់មកលើកងទ័ពកម្ពុជា បណ្តាលឱ្យជីវិតកងទ័ពទាំងសងខាងស្លាប់ និងរងរបួសជាច្រើន ត្រូវបានអ្នកនយោបាយប្រឆាំង និងអ្នកឃ្លាំមើលឯករាជ្យមួយចំនួន ស្តីបន្ទោសថា ដើមហេតុគឺបង្កឡើងដោយលោក ហ៊ុន សែន ដែលមានអំណួតមិនចេះប្រមាណខ្លួន ហ៊ានលូកដៃចូលទៅកកូរកកាយនយោបាយផ្ទៃក្នុងថៃ រាប់ចាប់តាំងពីការជួលក្រុមឃាតករឱ្យទៅបាញ់សម្លាប់អតីតតំណាងរាស្ត្រគណបក្សប្រឆាំង លោកលិម គិមយ៉ា នៅក្នុងទីក្រុងបាងកក និងការបញ្ចេញសារសំឡេងសន្ទនាឯកជន ជាមួយអតីតនាយករដ្ឋមន្ត្រីថៃ អ្នកស្រី ផៃថងថាន ស៊ីណាវាត្រ ជាដើម៕
