ព្រឹទ្ធសភាសហរដ្ឋអាមេរិក កាលពីថ្ងៃពុធ បានរារាំងជាបឋមដើម្បីបញ្ចប់ការប្រើប្រាស់យោធារបស់លោកប្រធានាធិបតី ដូណាល់ ត្រាំ ក្នុងការប្រើយោធាដើម្បីបំផ្លាញទូកដែលដឹកអ្នកជួញដូរគ្រឿងញៀនខុសច្បាប់ លើកលែងតែលោកត្រូវបានអនុញ្ញាតពីសភា។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី០៩ ខែតុលា ឆ្នាំ២០២៥នេះថា ការខិតខំប្រឹងប្រែងនេះ ដឹកនាំដោយសមាជិកព្រឹទ្ធសភាគណបក្សប្រជាធិបតេយ្យ លោក អាដាម ស៊ីហ្វ(Adam Schiff)នៃរដ្ឋកាលីហ្វញ្ញ៉ា(California) និង លោក ធីម ខេន (Tim Kaine) នៃរដ្ឋវើជីនៀ(Virginia) និងមានការគាំទ្រពីសមាជិកព្រឹទ្ធសភាគណបក្សសាធារណៈរដ្ឋ លោក រ៉េន ផូល (Rand Paul) នៃរដ្ឋឃីន ថាក់គី(Kentucky) ត្រូវបានបញ្ឈប់ដោយការបោះឆ្នោត ៤៨ ទល់នឹង៥១។
ជាមួយគ្នានេះ សមាជិកគណបក្សសាធារណរដ្ឋម្នាក់ទៀត គឺលោកស្រី លីសា មួកូស្គី (Lisa Murkowski)នៃរដ្ឋអាឡាស្កា(Alaska) បានចូលរួមនៅក្នុងកិច្ចខិតខំប្រឹងប្រែងដែលជាជំហាននីតិវិធីមួយ ក្នុងការនាំយកច្បាប់នោះសម្រាប់បោះឆ្នោតអនុម័តដោយព្រឹទ្ធសភាពេញលេញ។
យោធាសហរដ្ឋអាមេរិក បានធ្វើការវាយប្រហារយ៉ាងហោចណាស់៤ដង នៅក្នុងមហាសមុទ្រការីប៊ីន(Caribbean) ប្រឆាំងនឹងកប៉ាល់ដែលត្រូវបានចោទប្រកាន់ថា ដឹកគ្រឿងញៀនខុសច្បាប់ដែលថ្មីៗនេះ នៅថ្ងៃទី ០៣ ខែតុលា នៅជិតឆ្នេរសមុទ្រនៃប្រទេសវេណេស៊ុយអេឡា យ៉ាងហោចណាស់ មានមនុស្ស ៤នាក់ បានស្លាប់ក្នុងការវាយប្រហារនោះ នេះបើយោងតាមរដ្ឋមន្ត្រីការពារជាតិអាមេរិក លោក ភីត ហេកសេត(Pete Hegseth)។
នៅមុននេះ កាលពីថ្ងៃពុធ លោក ខេន បានប្រាប់ទៅកាន់សារព័ត៌មានថា អំឡុងពេលសន្និសីទសង្ខេបមួយសម្រាប់សមាជិកគណៈកម្មាធិការព្រឹទ្ធសភា ដែលទាក់ទងទៅនឹងកិច្ចការយោធា កាលពីសប្តាហ៍មុន បុគ្គលិករដ្ឋបាលមិនបានផ្តល់ព័ត៌មានអំពីមូលហេតុដែលយោធាសហរដ្ឋអាមេរិក ត្រូវបានបញ្ជាឱ្យវាយប្រហារបំផ្លាញនាវាទាំងនេះជំនួសដោយការស្ទាក់ចាប់នោះទេ។
លោក និងលោក ស៊ីហ្វ(Schiff) បាននិយាយថា ការវាយប្រហារអាចធ្វើឡើងដោយយល់ច្រលំទៅលើជនស្លូតត្រង់រួមទាំងអ្នកដែលជាជនរងគ្រោះនៃការជួញដូរមនុស្សផងដែរ៕
