ប្រធានាធិបតីម៉ាដាហ្គាស្កា បាននិយាយកាលពីថ្ងៃអាទិត្យថា ការប៉ុនប៉ងដណ្តើមអំណាចដោយកងកម្លាំងកំពុងដំណើរការ ខណៈដែលទាហានជាច្រើនបានបោះការគាំទ្ររបស់ពួកគេ នៅពីក្រោយចលនាតវ៉ាដែលដឹកនាំដោយយុវជនបានអង្រួនកោះនៅអាហ្វ្រិកអស់រយៈពេលជាងពីរសប្តាហ៍។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី១៣ ខែតុលា ឆ្នាំ២០២៥នេះថា កងទ័ពមកពីអង្គភាពខែបសេត(CAPSAT) ដែលបានជួយប្រធានាធិបតី អ៊ែនឌ្រី រ៉ាចូលីណា(Andry Rajoelina) ដណ្តើមអំណាចនៅក្នុងឆ្នាំ២០០៩ បានជំរុញឱ្យទាហានដូចគ្នាមិនឱ្យគោរពតាមបទបញ្ជាកាលពីថ្ងៃសៅរ៍ និងគាំទ្រក្រុមបាតុករ។ ការតវ៉ាដំបូងឡើយ ចាប់ផ្តើមពីការត្អូញត្អែររបស់ប្រជាជនមូលដ្ឋាន ដែលចាប់ផ្តើមពីថ្ងៃទី២៥ ខែកញ្ញា ហើយឥឡូវនេះបានបង្កបញ្ហាប្រឈមធ្ងន់ធ្ងរបំផុត ទៅលើការគ្រប់គ្រងរបស់ លោក រ៉ាចូលីណា(Rajoelina)តាំងពីលោកឈ្នះការបោះឆ្នោតនៅឆ្នាំ២០២៣។
មន្ត្រីខែបសេត(CAPSAT) បាននិយាយកាលពីថ្ងៃអាទិត្យថា ពួកគេបានបញ្ជាលើប្រតិបត្តិការណ៍សន្តិសុខរបស់ប្រទេស និងសម្របសម្រួលគ្រប់សាខានៃយោធាពីមូលដ្ឋានរបស់ពួកគេ នៅជាយរដ្ឋធាននី អាន់តាណាណារីវ៉ូ(Antananarivo)។ ពួកគេបាននិយាយទៀតថា ពួកគេបានតែងតាំងឧត្តមសេនីយ៍ ឌីម៉ូស្ទីន ពីគូឡាស (Demosthene Pikulas) ដែលជាអតីតប្រធានសាលាយោធាជាមេទ័ព។
យ៉ាងណា ប្រភពថា សាក្សីរ៉យទ័រ(Reuters)ម្នាក់ បានឃើញមនុស្សបីនាក់រងរបួស បន្ទាប់ពីការបាញ់នៅតាមបណ្តោយផ្លូវទៅកាន់បន្ទាយខែបសេត(CAPSAT ) កាលពីថ្ងៃអាទិត្យ។ ទោះជាយ៉ាងណា មិនមានសញ្ញានៃការប៉ះទង្គិចគ្នាជាបន្តបន្ទាប់នោះទេ។
ជាមួយគ្នានេះ ប្រភពថា នៅក្នុងសេចក្តីថ្លែងការណ៍មួយ នៅលើគណនេយ្យប្រព័ន្ធផ្សព្វផ្សាយសង្គម ការិយាល័យរបស់ លោក រ៉ាចូលីណា បាននិយាយថា ‘‘ការប៉ុនប៉ងដោយខុសច្បាប់ និងដណ្តើមអំណាចដោយបង្ខំ’’ កំពុងដំណើរការ និងបានបន្ថែមថា ប្រធានាធិបតី បានជំរុញ‘‘ការសន្ទនាដើម្បីដោះស្រាយវិបត្តិ’’។
នៅតាមបណ្តោយមហាវិថីឯករាជ្យ(Independence Avenue) ដែលជាផ្លូវសំខាន់បំផុត នៅរដ្ឋធានីអាន់តាណាណារីវ៉ូ អ្នកសារព័ត៌មានរ៉យទ័រ(Reuters) បានឃើញអ្នកតវ៉ាកំពុងស្រែកនូវពាក្យស្លោកថា ប្រឆាំងរដ្ឋាភិបាល កាលពីថ្ងៃអាទិត្យ ដោយគ្រវីទង់ជាតិម៉ាឡាហ្គាស៊ី និងជិះម៉ូតូឡើងចុះក្នុងអារម្មណ៍រីករាយ៕
