អង្គការសម្ព័ន្ធភាពការងារ និងសិទ្ធិមនុស្សសង់ត្រាល់ នៅថ្ងៃទី១៤ ខែតុលា បានចុះផ្សាយនូវអត្ថបទវិចារណាកថាមួយ ក្រោមចំណងជើងថា ភាពជាប់គាំងសេរីភាពនៃការបង្កើតសមាគម ដែលនិយាយពី ឧបសគ្គនៃការចុះបញ្ជីសហជីពជាប្រព័ន្ធរបស់កម្ពុជា។
អត្ថបទបានរំលេចថា ការចុះឈ្មោះបង្កើតសហជីព បានក្លាយជាការសាកល្បងភាពស៊ូទ្រាំរបស់កម្មករ ពិសេសគឺការសងសឹករបស់និយោជកទៅលើក្រុមកម្មករដែលចង់បង្កើតសហជីព ដែលប្រព្រឹត្តទៅតាមដំណាក់កាល។
តាមសង់ត្រាល់ ដំណាក់កាលទាំងនោះ គឺចាប់ផ្ដើមពេលដែលកម្មករដាក់ពាក្យស្នើសុំទៅកាន់ក្រសួង ហើយក្រោយមកកិច្ចសន្យាការងាររបស់ពួកគេ បែរជាផុតកំណត់ ខណៈកម្មករមួយចំនួនទៀតត្រូវបានចោទប្រកាន់ថាបានប្រព្រឹត្តបទល្មើសផ្សេងៗ។
ក្នុងអំឡុងពេលនោះ សមាជិកសហជីពត្រូវបានគេបញ្ចុះបញ្ចូលឱ្យចាកចេញពីក្រុម ឬមានការគំរាមកំហែងផ្សេងៗ។
បន្ទាប់មក ក្រសួងការងារ បានបដិសេធការចុះបញ្ជីការសហជីព ដោយផ្អែកលើហេតុផលទាំងនេះ ឬពាក្យស្នើសុំមានខុសអក្ខរាវិរុទ្ធជាដើម ដែលធ្វើឱ្យនីតិវិធីស្នើសុំបង្កើតសហជីពឯករាជ្យចាយពេលកាន់តែយូរ។
បើតាមសង់ត្រាល់ វិធីសាស្ត្រនេះគឺធ្វើឡើងមានលក្ខណៈជារង្វង់ ត្រឡប់ចុះឡើងៗ ដោយកាលណាការស្នើសុំចាយពេលកាន់តែយូរ នោះការតាំងចិត្តបង្កើតសហជីពនឹងកាន់តែចុះខ្សោយ ហើយវាបានក្លាយជាវិធីសាស្ត្របង្ក្រាបសហជីពឯករាជ្យ។
តាមអត្ថបទដដែល ការពន្យារពេលនីតិវិធីរដ្ឋបាលនេះ ក្នុងករណីខ្លះមានរយៈពេលជាង ៤ឆ្នាំ ដែលបានក្លាយជាច្រកមួយអនុញ្ញាតឱ្យនិយោជក ធ្វើសកម្មភាពរារាំងសហជីព រួមទាំងការបណ្តេញមេដឹកនាំសំខាន់ៗ និងការគាបសង្កត់កម្មករឱ្យចាកចេញពីក្រុមសហជីព ហើយពួកគេនឹងរងគ្រោះដោយសារ គ្មានសហជីពឯករាជ្យ និងស្របច្បាប់ នៅចាំការពារ។
គិតត្រឹមខែសីហា ឆ្នាំ២០២៥ យ៉ាងហោចណាស់មានសហជីពក្នុងស្រុកចំនួន ៣៤ និងសហព័ន្ធចំនួន៣ ត្រូវបានគេរាយការណ៍ថាជាប់គាំងនៅក្នុងការចុះឈ្មោះនេះ។
អង្គការសង់ត្រាល់ ចង្អុលទៅរោងចក្រមួយក្នុងតំបន់សេដ្ឋកិច្ចពិសេសប៉ោយប៉ែត ដែលសហជីពឯករាជ្យមួយ បានដាក់ពាក្យស្នើសុំ១១ដង ក្នុងរយៈពេលពីរឆ្នាំមកហើយ ខណៈដែលមេដឹកនាំបួននាក់ត្រូវបានបណ្តេញចេញ។
អត្ថបទវិចារណកថារបស់សង់ត្រាល់ គូសបញ្ជាក់ថា ការអនុវត្តនេះនៅតែបន្តកើតមាន បើទោះបីជាមានការអំពាវនាវម្តងហើយម្តងទៀត ឱ្យធ្វើកំណែទម្រង់ពីស្ថាប័នអន្តរជាតិ រួមទាំងអង្គការសហប្រជាជាតិ (UN) អង្គការពលកម្មអន្តរជាតិ (ILO) និងសហភាពអឺរ៉ុប (EU) ដែលការអនុគ្រោះពាណិជ្ជកម្ម (EBA) ត្រូវបានផ្សារភ្ជាប់ទៅនឹងការកែលម្អសិទ្ធិការងារ។
វីអូឌី មិនអាចសុំការអត្ថាធិប្បាយពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ស៊ុន មេសា បានទេនៅថ្ងៃទី១៤ ខែតុលានេះ។
តែបើយោងតាមការបង្ហោះសារនៅលើគណនីបណ្ដាញសង្គមផ្ទាល់ខ្លួន អ្នកនាំពាក្យរូបនេះ លើកឡើងថា វិចារណកថា ឬ Op-Ed គឺជាគំនិតមួយ ឬជាការវិភាគមួយផ្អែកលើគំនិតខ្លួនឯង ឬព័ត៌មានដែលទទួលប៉ុណ្ណោះ។
លោកបន្តថា ការវិភាគខ្លះគ្រាន់តែជាការវិភាគមួយដែលគ្មានវិជ្ជាជីវៈ មិនគ្រប់ជ្រុងជ្រោយ មិនឆ្លុះបញ្ចាំងពីទិដ្ឋភាពពិតប្រាកដ និងជាក់ស្តែង ហើយមិនអាចជឿទុកចិត្តបាន និងសរសេរវិភាគតាមអារម្មណ៍ ហើយបើចង់ដឹងថា អ្នកសរសេរមានវិជ្ជាជីវៈ និងទទួលយកបានអត់ ត្រូវមើលនិន្នាការនយោបាយ និងប្រភពលុយ។
តាមរយៈអត្ថបទវិចារណកថា សង់ត្រាល់ ជំរុញឱ្យក្រសួងការងារ និងបណ្ដុះបណ្ដាលវិជ្ជាជីវៈ អនុវត្តកំណែទម្រង់រដ្ឋបាលជាបន្ទាន់ ដូចជា ការបញ្ចប់ការចាប់កំហុសតូចតាច ដូចជា អក្ខាវិរុទ្ធ និងពន្លឿនការចុះឈ្មោះបង្កើតសហជីពប្រកបដោយតម្លាភាព ដើម្បីធានាថាកម្ពុជាគោរពរដ្ឋធម្មនុញ្ញរបស់ខ្លួន និងច្បាប់ការងារអន្តរជាតិ៕
