រដ្ឋាភិបាលកម្ពុជា ដោយមានការគាំទ្រពីអង្គការយូនីសេហ្វ បាននិងកំពុងធ្វើយុទ្ធនាការនៅទូទាំងប្រទេស ដើម្បីដោះស្រាយបញ្ហាអត្រាបោះបង់ការសិក្សា ដែលនៅមានកម្រិតខ្ពស់នៅឡើយ និងធានាថា កុមារគ្រប់រូបចាប់ពីវ័យកុមារតូច រហូតដល់វ័យជំទង់ទទួលបានការអប់រំប្រកបដោយបរិយាបន្ន និងគុណភាព។
សេចក្តីប្រកាសព័ត៌មានរបស់ក្រសួងអប់រំ យុវជន និងកីឡា និងអង្គការយូនីសេហ្វ ចុះថ្ងៃទី១៤ ខែតុលា ឆ្នាំ២០២៥នេះ បានលើកឡើងថា កម្ពុជា បានសម្រេចបាននូវវឌ្ឍនភាពក្នុងវិស័យអប់រំ ក្នុងរយៈពេលប៉ុន្មានឆ្នាំកន្លងមកនេះ ដោយអត្រាកុមារបានចុះឈ្មោះចូលរៀនមានការកើនឡើងជាបន្តបន្ទាប់ និងកំពុងរស់រានមានជីវិតក្នុងឆ្នាំដំបូងនៃជីវិតរបស់ពួកគេ។ ទោះជាយ៉ាងណា កុមារ និងក្មេងជំទង់ជាច្រើន នៅតែមិនបានចូលរៀន។
ប្រភពដដែលបន្តថា៖ «កុមារមកពីគ្រួសារក្រីក្រ តំបន់ជនបទ សហគមន៍ជនជាតិដើមភាគតិច និងកុមារដែលមានពិការភាព បន្តប្រឈមនឹងឧបសគ្គក្នុងការរៀនសូត្រ និងមានចំនួនតិចតួចក្នុងថ្នាក់រៀន។ កុមារដែលមានពិការភាពទំនងជាមិនបានចូលរៀនរហូតដល់ទៅពីរដង បើធៀបជាមួយកុមារដទៃដែលមានអាយុប្រហាក់ប្រហែលគ្នា»។
ករណីនេះហើយដែលក្រសួងអប់រំ ក្រោមការគាំទ្រដោយយូនីសេហ្វ បានធ្វើយុទ្ធនាការរួមគ្នានៅទូទាំងប្រទេស ដើម្បីលើកកម្ពស់ការយល់ដឹង កៀរគរសហគមន៍ និងពង្រឹងប្រព័ន្ធគាំទ្រដើម្បីរក្សាកុមារនៅបន្តសិក្សា និងបង្កើនលទ្ធផលសិក្សា។
យុទ្ធនាការដែលចាប់ផ្តើមនៅខេត្តរតនគិរី សៀមរាប និងកំពង់ចាម ដែលជាខេត្តមានអត្រាបោះបង់ការសិក្សាខ្ពស់ និងមានវិសមភាពខ្លាំងនេះ នឹងផ្តោតលើការអប់រំកុមារតូច បរិយាកាសសិក្សាប្រកបដោយបរិយាប័ន្ន និងអន្តរាគមន៍តាមតម្រូវការ សម្រាប់កុមារដែលងាយរងគ្រោះបំផុត។ យុទ្ធនាការនេះ នឹងត្រូវបានអនុវត្តនៅទូទាំងប្រទេស តាមរយៈបណ្តាញពហុព័ត៌មាន ប្រព័ន្ធបណ្តាញសង្គម វិទ្យុ ទូរទស្សន៍ និងការទៅផ្សព្វផ្សាយដល់សហគមន៍។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ត្រូវបានស្រង់សម្តីដាក់ក្នុងសេចក្តីប្រកាសព័ត៌មាននោះថា ការធ្វើឱ្យប្រសើរឡើងនូវលទ្ធផលសិក្សា និងការកាត់បន្ថយការបោះបង់ការសិក្សារបស់កុមារ នៅតែជាអាទិភាពចម្បងនៃផែនការយុទ្ធសាស្រ្តវិស័យអប់រំរបស់កម្ពុជា ខណៈកម្ពុជាក៏បាននិងកំពុងពង្រីកលទ្ធភាពនៃការទទួលបានសេវាអប់រំគ្រប់កម្រិត និងត្រូវធានាថា កុមារគ្រប់រូបមិនត្រឹមតែបានចូលរៀនប៉ុណ្ណោះទេ ប៉ុន្តែពួកគេត្រូវបញ្ចប់ការសិក្សាដោយមានជំនាញចាំបាច់សម្រាប់ជីវិត និងការងារផងដែរ។
លោកបានគូសបញ្ជាក់បន្ថែមថា៖ «យើងកំពុងធ្វើការរួមគ្នាដើម្បីកសាងប្រព័ន្ធអប់រំ ដែលមានសមធម៌ មានភាពធន់ និងឆ្លើយតបទៅនឹងតម្រូវការរបស់អ្នកសិក្សាគ្រប់រូបនៅទូទាំងប្រទេសកម្ពុជា»។
បើតាមសេចក្តីប្រកាសព័ត៌មាន នៅឆ្នាំ២០២៣ កម្ពុជាមានកុមារក្នុងវ័យសិក្សាប្រមាណ ៣លាននាក់ (២លាននាក់នៅក្នុងបឋមសិក្សា និង ១លាននាក់ នៅអនុវិទ្យាល័យ) ដែលក្នុងនោះមានកុមារ និងក្មេងជំទង់ប្រហែល ៣សែននាក់ នៅក្រៅសាលា។
គិតមកដល់ឆ្នាំ២០២៤ អត្រាបោះបង់ការសិក្សានៅតែខ្ពស់ គឺមានកុមារ ១៥.៥ភាគរយ បានបោះបង់ការសិក្សានៅកម្រិតមធ្យមសិក្សា បឋមភូមិ ខណៈក្មេងជំទង់កាន់តែច្រើនកំពុងនៅរៀន មានតែ ៦០ភាគរយប៉ុណ្ណោះ បានបញ្ចប់អនុវិទ្យាល័យ ហើយកុមារអាយុ ៥ឆ្នាំ ប្រមាណ ៣០ភាគរយ មិនទាន់បានចុះឈ្មោះចូលរៀននៅកម្រិតកុមារតូចបានគ្រប់ៗគ្នានៅឡើយ។
លោក វីល ផាកស៍ នាយកយូនីសេហ្វប្រចាំនៅកម្ពុជា បានថ្លែងក្នុងពិធីប្រកាសដាក់ឱ្យអនុវត្តយុទ្ធនាការជាតិនេះ ជាផ្លូវការនៅខេត្តកំពង់ចាម នាថ្ងៃអង្គារនេះថា ការអប់រំប្រកបដោយគុណភាព គឺជាកាតព្វកិច្ច ហើយអនាគតរបស់កុមារមិនអាចរងចាំបាននោះទេ ដែលការណ៍នេះត្រូវមានការធ្វើសកម្មភាពឥឡូវនេះ ដើម្បីធានាថាកុមារគ្រប់រូបត្រូវបានមើលឃើញ គាំទ្រ និងផ្តល់ឱកាសឱ្យបានស្មើៗគ្នា។
លោកថា៖ «ទាំងនេះ ជាមូលហេតុដែលយើងគាំទ្រក្រសួងអប់រំ យុវជន និងកីឡា ក្នុងការចាប់ផ្តើមយុទ្ធនាការសាធារណៈចំនួន២ រួមគ្នាដោយគោលដៅតែមួយ គឺធានាបាននូវការអប់រំប្រកបដោយគុណភាពសម្រាប់កុមារគ្រប់រូប ចាប់ពីវ័យកុមារតូចដល់វ័យជំទង់»។
ស្របពេលគ្នានេះ ក្រសួងអប់រំ និងអង្គការយូនីសេហ្វ លើកទឹកចិត្តដល់ដៃគូរអភិវឌ្ឍ រាជរដ្ឋាភិបាល អង្គការសង្គមស៊ីវិល និងអង្គភាពព័ត៌មានទាំងអស់ ជួយផ្សព្វផ្សាយ និងអនុវត្តយុទ្ធនាការនេះនៅក្នុងខេត្តរៀងៗខ្លួន ដើម្បីធានាថាកុមារទាំងអស់នៅកម្ពុជា ជាពិសេសកុមារដែលងាយរងគ្រោះបំផុត ទទួលបានអត្ថប្រយោជន៍ពីអន្តរាគមន៍ទាំងអស់នេះ៕
