ប្រធានាធិបតីម៉ាដាហ្គាស្កា លោក អ៊ែនឌ្រីរ៉ា ចូលីណា បានភៀសខ្លួនចេញពីប្រទេសអាហ្រ្វិកដោយប្រមុខបក្សប្រឆាំង ប្រភពយោធា និងអ្នកការទូតបរទេស បាននិយាយកាលពីថ្ងៃចន្ទថា ជាលើកទី២ហើយដែលក្រុមបាតុករវ័យក្មេងបានផ្តួលរំលំរដ្ឋាភិបាល ក្នុងរយៈពេលជាងមួយខែនៃចលនាហ្សែនហ្ស៊ីទូទាំងពិភពលោក។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី១៤ ខែតុលា ឆ្នាំ២០២៥នេះថា លោកសាយនី រ៉ាន់ឌ្រាណា សូឡូនាកូ (Siteny Randrianasoloniaiko) មេដឹកនាំបក្សប្រឆាំងក្នុងសភាបានប្រាប់រ៉យទ័រថាលោក រ៉ាចូលីណា បានចាកចេញពីម៉ាដាហ្គាស្កា កាលពីថ្ងៃអាទិត្យ បន្ទាប់ពីអង្គភាពនៃកងទ័ពបានរត់ចោលជួរហើយបានចូលរួមជាមួយក្រុមអ្នកតវ៉ា។
នៅក្នុងសន្ទរកថាទៅកាន់ប្រជាជាតិដែលបានចាក់ផ្សាយតាមហ្វេសប៊ុក លោក រ៉ាចូលីណា បាននិយាយថា លោកត្រូវផ្លាស់ទៅកន្លែងដែលមានសុវត្ថិភាព ដើម្បីការពារអាយុជីវិតរបស់លោកផ្ទាល់។ លោកមិនបានបង្ហាញពីកន្លែងលាក់ខ្លួនរបស់លោកទេ ប៉ុន្តែហាក់បីរឹងទទឹងដោយបាននិយាយថា លោកនឹង‘‘មិនអនុញ្ញាតឱ្យម៉ាដាហ្គាត្រូវបានបំផ្លាញនោះទេ’’។
ប្រភពយោធាបានប្រាប់រ៉យទ័រ(Reuters)ថា លោក រ៉ាចូលីណា បានហោះចេញពីម៉ាដាហ្គាស្កា ជាអតីតអាណានិគមបារាំង តាមយន្តហោះយោធាបារាំងកាលពីថ្ងៃអាទិត្យ។ វិទ្យុបារាំងអ៊ែអេហ្វអ៊ី(RFI) បានរាយការណ៍ថា លោកបានចុះកិច្ចព្រមព្រៀងជាមួយប្រធានាធិបតី អេម៉ានូអ៊ែល ម៉ាក្រុង (Emmanuel Macron)។
លោក ម៉ាក្រុង និយាយនៅក្នុងប្រទេសអេហ្ស៊ីប បន្ទាប់ពីកិច្ចប្រជុំកំពូលស្តីអំពីបទឈប់បាញ់នៅហ្គាហ្សា និងកិច្ចព្រមព្រៀងចំណាប់ខ្មាំង លោកមិនអាចបញ្ជាក់ភ្លាមៗនូវរបាយការណ៍ដែលថាបារាំងបានជួយ លោក រ៉ាចូលីណា ឱ្យភៀសខ្លួនចេញពីប្រទេសនោះទេ។ លោកបានបន្ថែមថា សណ្តាប់ធ្នាប់រដ្ឋធម្មនុញ្ញ ត្រូវតែរក្សាក្នុងម៉ាដាហ្គាស្កា ខណៈដែលប្រទេសបារាំងបានយល់អំពីទុក្ខសោកយុវជនរបស់ប្រទេស ភាពទុក្ខសោកទាំងនោះមិនត្រូវបានកិបកេងដោយយោធាឡើយ។
ប្រភពយោធា បាននិយាយថា យន្តហោះចម្បាំងកងទ័ពបារាំងខាសា(Casa) បានចុះចតនៅអាកាសយានដ្ឋាន សង់តេម៉ារី(Sainte Marie) ក្នុងម៉ាដាហ្គាស្កា កាលពីថ្ងៃអាទិត្យ ៥នាទីក្រោយមកឧទ្ធម្ភាគចក្រមួយគ្រឿងបានមកដល់ និងផ្លាស់ប្តូរអ្នកដំណើរចូលទៅក្នុង ខាសា(Casa) ហើយបានបន្ថែមថាអ្នកដំណើរនោះ គឺលោក រ៉ាចូលីណា (Rajoelina)៕
