អង់គ្លេស និងសហរដ្ឋអាមេរិក នៅថ្ងៃអង្គារ បានដាក់ទណ្ឌកម្មបណ្តាញពហុជាតិ មានមូលដ្ឋាននៅអាស៊ីអាគ្នេយ៍ដែលត្រូវបានចោទពីបទដំណើរការមជ្ឈមណ្ឌលបោកប្រាស់តាមអនឡាញទ្រង់ទ្រាយធំ ប្រើកម្មករដែលត្រូវបានជួញដូរ ដើម្បីបោកប្រាស់ជនរងគ្រោះជុំវិញពិភពលោក។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី១៤ ខែតុលា ឆ្នាំ២០២៥នេះថា រដ្ឋាភិបាលអង់គ្លេសបាននិយាយថា មជ្ឈមណ្ឌលដែលមានទីតាំងនៅប្រទេសកម្ពុជា មីយ៉ាន់ម៉ា និងទូទាំងតំបន់ដែលប្រើប្រាស់ការផ្សាយពាណិជ្ជកម្មការងារក្លែងបន្លំ ដើម្បីទាក់ទាញកម្មករ បន្ទាប់មកបានបង្ខំឱ្យប្រព្រឹត្តការបោកប្រាស់តាមអនឡាញ ក្រោមការគម្រាមកំហែងនៃការធ្វើទារុណកម្ម។
នេះរួមបញ្ចូលទាំងការទាក់ទាញជនរងគ្រោះ ចូលទៅក្នុងស្នេហាក្លែងក្លាយ មុនពេលដែលបញ្ចុះបញ្ចូលពួកគេឱ្យវិនិយោគប្រាក់ជាច្រើន ចូលនៅក្នុងកម្មវិធីរូបិយបណ្ណក្លែងក្លាយ។
រដ្ឋមន្រ្តីការបរទេសអង់គ្លេស លោក អ៊ីវ៉េត ឃូបភើ (Yvette Cooper) បាននិយាយថា៖ «មេក្លោងដែលនៅពីក្រោយមជ្ឈមណ្ឌលបោកប្រាស់ដ៏គួរឱ្យរន្ធត់ទាំងនេះ កំពុងបំផ្លាញជីវិតរបស់ជនដែលងាយរងគ្រោះ និងទិញផ្ទះនៅទីក្រុងឡុង ដើម្បីទុកលុយរបស់ពួកគេ»។
ជាមួយគ្នានេះ ក្រសួងរតនាគារសហរដ្ឋអាមេរិក បាននិយាយថា ខ្លួនបានអនុវត្តនូវអ្វីដែលខ្លួនពិពណ៌នាថាជាសកម្មភាពដ៏ធំ មិនធ្លាប់មាន នៅក្នុងអាស៊ីអាគ្នេយ៍ដែលដាក់គោលដៅមនុស្សចំនួន ១៤៦នាក់ នៅក្នុងអង្គការឧក្រិដ្ឋកម្ម ព្រីនគ្រុប(Prince Group) ដែលចក្រភពអង់គ្លេស ក៏បានដាក់ទណ្ឌកម្មផងដែរ។
ការដាក់ទណ្ឌកម្មរបស់ចក្រភពអង់គ្លេស បានកំណត់គោលដៅអង្គភាពចំនួន៦ ហើយនិងបុគ្គលចំនួន៦នាក់ រួមទាំងប្រធានក្រុមហ៊ុនព្រីនគ្រុប(Prince Group) មហាសេដ្ឋីខ្មែរ-ចិន លោក ចេន ហ្ស៊ី (Chen Zhi) ដែលសហរដ្ឋអាមេរិក និងចក្រភពអង់គ្លេស បានចោទប្រកាន់ថា បានត្រួតត្រាបរិវេណអគារដែលត្រូវបានប្រើប្រាស់សម្រាប់ការឆបោកតាមអនឡាញ។
លោក ចេន (Chen) អាយុ៣៨ឆ្នាំរូបនេះ ត្រូវបានចោទប្រកាន់នៅថ្ងៃទី០៨ ខែតុលា នៅក្នុងតុលាការរដ្ឋសហព័ន្ធ ប្រូកគ្លីន(Brooklyn) លើការចោទប្រកាន់ពីបទសមគំនិតបោកប្រាស់ និងសមគំនិតលាងលុយ នេះបើតាមលិខិតរបស់តុលាការដែលបានផ្សព្វផ្សាយជាសាធារណៈ កាលពីថ្ងៃអង្គារ។
រដ្ឋអាជ្ញាសហរដ្ឋអាមេរិក បាននិយាយថា លោក ចេន ហ្ស៊ី និងសហការីរបស់លោក បានដំណើរការមជ្ឈមណ្ឌលពលកម្មដោយបង្ខំ នៅក្នុងប្រទេសកម្ពុជា ដែលជាកន្លែងឃុំឃាំងមនុស្សដោយបង្ខំឱ្យអនុវត្តក្លែងបន្លំការវិនិយោគរូបិយប័ណ្ណគ្រីបតូ។ បន្ថែមពីនេះ លោក ចេន(Chen) ត្រូវបានចោទថា បានលាងលុយកង្វក់តាមរយៈល្បែងអនឡាញ និងក្រុមហ៊ុនរុករករ៉ែរូបិយប័ណ្ណគ្រីបតូ។
រដ្ឋអាជ្ញា បាននិយាយថា ពួកគេបានរឹបអូសប្រហែល ១២៧ ២៧១ប៊ីតខ័ញ(bitcoin) ឬ ១៤.២ពាន់លានដុល្លារជាមូលនិធិអាចតាមដានពីឧក្រិដ្ឋកម្ម។ ពួកគេកំពុងស្នើសុំការអនុម័តពីតុលាការ ដើម្បីកាន់កាប់ប៊ីតខ័ញជាអចិន្ត្រៃយ៍ ដែលពួកគេបាននិយាយថា ជាសកម្មភាពរឹបអូសដ៏ធំបំផុតនៅក្នុងប្រវត្តិសាស្រ្តរបស់នាយកដ្ឋានយុត្តិធម៌៕
