មន្ត្រីក្រសួងរតនាគារ លោក ស្កុតបេសេន កាលពីថ្ងៃពុធ បានទទូចថា ក្រុងវ៉ាស៊ីតោនមិនចង់បង្កើនជម្លោះពាណិជ្ជកម្មជាមួយប្រទេសចិន ដោយសង្កត់ធ្ងន់ថា លោកប្រធានាធិបតី ដូណាល់ ត្រាំ គឺត្រៀមខ្លួនរួចរាល់ដើម្បីជួបជាមួយប្រធានាធិបតីចិន លោក ស៊ី ជីនពីង នៅប្រទេសកូរ៉េខាងត្បូងចុងខែនេះ។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី១៥ ខែតុលា ឆ្នាំ២០២៥នេះថា លោក បេសេន(Bessent) បានប្រាប់ទៅកាន់សារព័ត៌មានស៊ីអ៊ែនប៊ីស៊ី(CNBC)ថា មន្ត្រីនៃប្រទេសទាំងពីរកំពុងទាក់ទងគ្នាជារៀងរាល់ថ្ងៃ ដើម្បីរៀបចំកិច្ចប្រជុំនេះ ហើយទីក្រុងវ៉ាស៊ីនតោនមិនចង់ដកខ្លួនចេញពីប្រទេស ដែលមានសេដ្ឋកិច្ចធំទីពីរនៅក្នុងពិភពលោកនោះទេ។
លោកបាននិយាយថា វាគឺដោយសារតែភាពជឿទុកចិត្ត រវាង លោក ត្រាំ(Trump) និងលោក ស៊ី(Xi) ទើបជម្លោះពាណិជ្ជកម្មរវាងប្រទេសទាំងពីរមិនបានកើនឡើងបន្ថែមទៀត។
ប្រទេសទាំងពីរ ហាក់បីបានត្រៀមខ្លួនរួចរាល់ក្នុងការត្រឡប់ទៅរកសង្រ្គាមពាណិជ្ជកម្ម កាលពីសប្តាហ៍មុន បន្ទាប់ពីប្រទេសចិនបានប្រកាសកាលពីថ្ងៃព្រហស្បតិ៍ ពីការពង្រីកដ៏ធំនៃការគ្រប់គ្រងការនាំចេញរ៉ែកម្រ។ លោក ត្រាំ បានឆ្លើយតបកាលពីថ្ងៃសុក្រ ដោយការគម្រាមតំឡើងពន្ធលើទំនិញចិនឱ្យដល់កម្រិត៣ខ្ទង់ ដោយបានបញ្ជូនទីផ្សារហិរញ្ញវត្ថុ និងទំនាក់ទំនងរវាងសហរដ្ឋអាមេរិក និងចិនចូលទៅក្នុងស្ថានភាពចលាចល។ លោក បេសេន និងមន្ត្រីផ្សេងទៀត បានព្យាយាមស្តារទំនាក់ទំនងឱ្យត្រឡប់ទៅជាស្ថានភាពធម្មតាវិញ តាមរយៈការសម្ភាសន៍ជាបន្តបន្ទាប់នៅសប្តាហ៍នេះ។
កាលពីថ្ងៃពុធ លោក បេសេន(Bessent) បាននិយាយថា ប្រទេសចិនមានចេតនាយ៉ាងច្បាស់ ដើម្បីចាត់វិធានការ ‘‘តាំងពីដើម’’ ដោយបានច្រានចោលការអះអាងរបស់ទីក្រុងប៉េកាំងថា សកម្មភាពនេះ គឺជាការឆ្លើយតបទៅនឹងសកម្មភាពរបស់សហរដ្ឋអាមេរិក៕
