រដ្ឋាភិបាលកម្ពុជា តាមរយៈយោធភូមិភាគទី៥ នៃកងយោធពលខេមរភូមិន្ទ បានបដិសេធជុំវិញការផ្សព្វផ្សាយថា ថៃបានឈូសឆាយផ្លូវរំលោភយកដីខ្មែរ នៅឃុំថ្មដា ស្រុកវាលវែង ខេត្តពោធិ៍សាត់ ជារឿងមិនពិត ដោយសំអាងថាសកម្មភាពនោះគឺនៅក្នុងទឹកដីរបស់ថៃ ។
សេចក្ដីប្រកាសព័ត៌មានរបស់យោធភូមិភាគទី៥ នៃកងយោធពលខេមរភូមិន្ទចុះថ្ងៃទី១៧ខែតុលានេះបានបដិសេធថា ការដែលអ្នកប្រើប្រាស់បណ្តាញសង្គមមួយចំនួនថា ថៃបានឈូសឆាយផ្លូវរំលោភចូលដីខ្មែរ នៅឃុំថ្មដា ស្រុកវាលវែង ខេត្តពោធិ៍សាត់ មិនមែនជាការពិត។
យោធភូមិភាគទី៥ បានបញ្ជាក់ថា សកម្មភាពនៃការឈូសឆាយរបស់ថៃ គឺនៅក្នុងផ្នែកនៃដីថៃ ហើយថា កងកម្លាំងកម្ពុជា ដែលកំពុងឈរជើងនៅតំបន់នេះ ការពារ យ៉ាងម៉ឺងម៉ាត់នូវបូរណភាពទឹកដីកម្ពុជា និងបានអំពាវនាវកុំឱ្យសាធារណជនចែករំលែករឿងមិនពិតនេះ។
សម្រាប់ប្រភពខាងលើ បញ្ជាក់ថា កម្ពុជា និងថៃ មានមូលដ្ឋានគ្រប់គ្រាន់ និងច្បាស់លាស់ ទាំងមូលដ្ឋានច្បាប់ យន្តការស្ថាប័ន និងវិធានការបច្ចេកទេស សម្រាប់ដោះស្រាយបញ្ហាព្រំដែនរវាងប្រទេសទាំងពីរ ជាពិសេសផែនទីមាត្រដ្ឋាន ១/២០០.០០០ យោងតាមអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧ ព្រមទាំងមានការបោះបង្គោលជាមួយគ្នាចំនួន ៧៤បង្គោល ហើយភាគីទាំងពីរកម្ពុជា-ថៃ បានទទួលស្គាល់ និងបញ្ជាក់ឡើងវិញនៅក្នុងអនុស្សរណៈនៃការយោគយល់ឆ្នាំ២០០០ (MoU2000)។
យ៉ាងណា ការចេញសេចក្ដីបដិសេធរបស់យោធភូមិភាគទី៥ នៃកងយោធពលខេមរភូមិន្ទ បែបនេះ ក្រោយពីមានការបង្ហោះ និងចែករំលែកព្រោងព្រាតនូវវីដេអូរយៈពេលជិត១នាទី នៅថ្ងៃទី១៦ ខែតុលា ឆ្នាំ២០២៥ ដែលមានចំណងជើងថា ថៃបានឈូសឆាយផ្លូវរំលោភចូលដីខ្មែរនៅអូរភ្លុកដំរី ឃុំថ្មដា ស្រុកវាលវែង ខេត្តពោធិ៍សាត់ ។
យ៉ាងណា តំណាងរាស្រ្តបក្សសង្រ្គោះជាតិ លោក អ៊ុំ សំអាន អះអាងផ្ទុយពីនេះ ដោយលោកថា ថៃពិតជាបានធ្វើសកម្មភាពរំលោភយកដីខ្មែរ នៅចំនុចអូរភ្លុកដំរី ឃុំថ្មដា ស្រុកវាលវែង ខេត្តពោធិ៍សាត់ ជារឿងពិត ដោយថា នេះបើយោងតាមអ្នកដែលស្ថិតនៅទីតាំងនោះផ្ទាល់ បានផ្ដល់ព័ត៌មានមកកាន់លោក ។
លោក អ៊ុំ សំអាន ហៅការច្រានចោលនេះ អាចជាលេខដើម្បីគេចចេញពីការទទួលខុសត្រូវ ដើម្បីបិទបាំងភាពកម្សោយនៃការដឹកនាំរបស់រដ្ឋាភិបាលកម្ពុជា ដើម្បីតែការពារអំណាចប៉ុណ្ណោះ។
លើសពីនេះ លោកជំរុញឱ្យរដ្ឋាភិបាលគួរតែបង្ហាញព័ត៌មានពិតមកកាន់ពលរដ្ឋ ដោយលើកយកផែនទី១/២០០.០០០មកជាអំណះអំណាង។ លោកព្រមានថា បើមិនដូច្នេះទេ កម្ពុជាអាចនឹងបន្តបាត់បង់ដែនអធិបតេយ្យខ្លួនបន្ថែមទៀតជាមិនខាន។
លោកថា៖ «ដូច្នេះរដ្ឋាភិបាលក៏ដូចជាយោធភូមិភាគទី៥ គាត់គួរតែបង្ហាញភ័ស្តុតាងច្បាស់លាស់ ជាពិសេសគឺបង្ហាញទៅលើផែនទីខ្នាតមួយលើពីររយពាន់ ជាផែនទីឧបសម្ព័ន្ធភ្ជាប់សន្ធិសញ្ញាបារាំងសៀម១៩០៤ ១៩០៧ ថាទីតាំងនោះ ក្នុងដីខ្មែរ ឬដីថៃ និងត្រូវមានអ្វីមកសំអាងផង បើសិនជាគាត់អត់មានអ្វីមកសំអាងផង ហើយអះអាងថា ការឈូសឆាយលើដីគេហ្នឹង ពលរដ្ឋប្រាកដជាមិនជឿទេ ព្រោះយើងទទួលបានព័ត៌មានពីព្រំដែនមក បានបញ្ជាក់ថា ថៃបានឈូសឆាយផ្លូវហ្នឹងនៅលើទឹកដីខ្មែរយើង មិនមែនស្ថិតក្នុងទឹកដីថៃប្រទេសថៃទេ ថៃទើបតែរំលោភឈ្លានពានឈូសឆាយបន្តចូលមកក្នុងទឹកដីខ្មែរយើងនៅតំបន់ហ្នឹងបន្តទៀត»។
ប្រហាក់ប្រហែលគ្នានេះដែរ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត យល់ថា ការបកស្រាយរបស់កងទ័ពជើងគោក យោធភូមិភាគទី៥នេះ ជារឿងមិនសមទំនង ប្រៀបបានជាការជួយលាក់បាំងថៃរំលោភចូលទឹកដីកម្ពុជា ដែលទង្វើទាំងនេះ លោកថា ស្មើនឹងទោសក្បត់ជាតិ ។
លោកថា ជាឧទាហរណ៍កន្លងទៅ ដូចជាករណីថៃចូលរាយបន្លាលួសនៅភូមិព្រៃចាន់ ភូមិជោគជ័យ នៅស្រុកអូរជ្រៅ ខេត្តបន្ទាយមានជ័យ និងថ្មីៗនេះ មានការយល់ព្រមរុះរើប៉ុស្ត៍នគរបាល នៅចំនុចអូរភ្លុកដំរីជាដើម។
លោក ម៉ែន ណាត បន្តថា ចំពោះការដែលតែងតែចេញបដិសេធនេះ ជាទម្លាប់រដ្ឋាភិបាលកម្ពុជា ធ្លាប់បានធ្វើជាច្រើនករណីមកហើយ ហើយថែមទាំងហាមឃាត់មិនឱ្យមានការផ្សព្វផ្សាយព័ត៌មានជាក់ស្ដែង នៅតាមតំបន់ព្រំដែនកម្ពុជា ថៃ ទៀតផង។
ដែលទង្វើបែបនេះ មិនមែនអ្វីដែលមេដឹកនាំគួរធ្វើឡើយ ផ្ទុយទៅវិញរដ្ឋាភិបាលគួរតែបង្ហាញជំហរយ៉ាងម៉ឺងម៉ាត់ឆ្លើយតបនឹងទង្វើឈ្លានពានពីបរទេស ដោយប្រើប្រាស់សិទ្ធិស្វ័យការពារខ្លួនស្របតាមធម្មនុញ្ញអង្គការសហប្រជាជាតិ និងច្បាប់អន្តរជាតិនានា។
លោកថា៖ «ការការពារនេះ មិនខុសនឹងច្បាប់អន្តរជាតិទេ ដូចជាធម្មនុញ្ញអង្គការសហប្រជាជាតិ មាត្រា៥១ បញ្ជាក់អំពីរដ្ឋដែលទទួលរងគ្រោះពីរដ្ឋមួយទៀត មានការឈ្លានពាន គឺរដ្ឋរងគ្រោះនោះមានសិទ្ធិការពារខ្លួនហៅថាសិទ្ធិស្វ័យការពារខ្លួន ការឈ្លានពានពីប្រទេសមួយទៀត ហើយរដ្ឋាភិបាលកម្ពុជាមិនត្រូវឈប់ទេ នយោបាយការទូតដែលកំពុងធ្វើត្រូវបន្តទៅទៀត ប៉ុន្តែត្រូវតែម៉ឺងម៉ាត់។ បើសិនជាទទួលយកហេតុផលរបស់ថៃ ទាមទារដើម្បីជាថ្នូរនឹងស្ថានភាព នោះយើងនឹងបាត់បង់ទឹកដី ដូច្នេះរឿងនេះមិនត្រូវដោះដូរទេ បើដោះដូរពាក់ព័ន្ធនឹងអំពើក្បត់ជាតិ ដូចមាត្រា៤៤០នៃក្រមព្រហ្មទណ្ឌ បច្ចុប្បន្នចឹងចុងក្រោយគឺកម្ពុជាត្រូវតែប្ដឹង ដាច់ខាតទៅតុលាការយុត្តិធម៌អន្តរជាតិ ដើម្បីជាមធ្យោបាយក្នុងការស្វែងរកយុត្តិធម៌ជូនប្រទេសកម្ពុជា ជូនពលរដ្ឋកម្ពុជាដែលសុទ្ធតែជាវិធានការ ដែលអាចការពារអធិបតេយ្យរបស់កម្ពុជាបាន»។
ជុំវិញការចេញមកច្រានចោលនេះ អ្នកច្បាប់ និងជាអ្នកវិភាគឯករាជ្យ លោក វ៉ន ចាន់ឡូត ក៏បានលើកឡើងបែបមន្ទិលសង្ស័យផងដែរ។
លោកនិយាយក្នុងសំដីដើមថា៖ «បើថៃឈូសដីខ្លួនឯងដដែល មិនចាំបាច់ពិបាកមកប្រឈមមុខបែបនេះទេ។ ត្រូវចាំ ដីថៃបានអភិវឌ្ឈន៍គ្មានសល់ចន្លោះទេ នៅសល់តែដីរំលោភបំពានប៉ុណ្ណោះ។ យោធាខ្មែរការពារជនឈ្លានពានហើយ ប្រទេសជាតិ និងពលរដ្ឋសង្ឃឹមអ្វី? ភូមិភាគ៥នេះហើយ អនុញ្ញាតឱ្យយោធាថៃមកវាយកម្ទេចផ្ទះ៣ខ្នងកាលពីពេលមុន ហើយត្រៀមកម្ទេចអគារកាស៊ីណូបន្ថែមទៀត»។
គួររំឭកថា ក្រោយប៉ះទង្គិចគ្នាដោយអាវុធទ្រង់ទ្រាយធំ កាលពីថ្ងៃទី២៤ ខែកក្កដា ឆ្នាំ២០២៥ និងមានបទឈប់បាញ់នៅថ្ងៃទី២៨ ខែកក្កដានោះ ថៃមិនបានគោរពបទឈប់បាញ់ទេ ។
ថៃចូលមករាយបន្លាលួសព័ទ្ធយកប្រាសាទតាមាន់ធំ ស្ថិតក្នុងខេត្តឧត្តរមានជ័យ តំបន់អានសេះ ក្នុងខេត្តព្រះវិហារ និងភូមិព្រៃចាន់ ភូមិអូរបីជាន់ ក្នុងស្រុកអូរជ្រៅ ខេត្តបន្ទាយមានជ័យ និងគំរាមវាយកយកទីតាំង១៧កន្លែងទៀតនៅក្នុងខេត្តពោធិ៍សាត់ និងខេត្តកោះកុង តាមផែនទីដែលថៃគូរដោយឯកតោភាគីខ្នាត១លើ៥០ពាន់។
លើសពីនេះ កាលពីថ្ងៃសុក្រ ទី១០ ខែតុលានេះ ថៃបានបញ្ជូនគ្រឿងចក្រ និងកងកម្លាំងមកឈ្លានពានដីខ្មែរ តាមការគ្រោងទុក ទាំងគ្មានការទប់ស្កាត់ពីភាគីរដ្ឋាភិបាលកម្ពុជានោះទេ។
មាត្រា៥២នៃរដ្ឋធម្មនុញ្ញ ចែងថា រាជរដ្ឋាភិបាលកម្ពុជា ប្តេជ្ញារក្សាការពារឯករាជ្យ អធិបតេយ្យ បូរណភាពទឹកដី អនុវត្តនយោបាយបង្រួបបង្រួមជាតិ ដើម្បីការឯកភាពជាតិ។
រីឯក្រមព្រហ្មទណ្ឌមាត្រា៤៤០ ចែងថា «អំពើប្រគល់ឱ្យរដ្ឋបរទេស ឬភ្នាក់ងារបរទេស នូវដែនដីជាតិទាំងស្រុង ឬមួយផ្នែក ជាអំពើក្បត់ជាតិ ត្រូវផ្តន្ទាទោសដាក់ពន្ធនាគារអស់មួយជីវិត»៕
