នៅពេលមន្ត្រីជាន់ខ្ពស់រដ្ឋាភិបាលគ្រួសារហ៊ុន ដែលកើតចេញពីការបោះឆ្នោតបង្គ្រប់កិច្ចមិនសុចរិតជាច្រើននាក់ ត្រូវបានលាតត្រដាងថា មានជាប់ពាក់ព័ន្ធយ៉ាងជ្រៅនៅក្នុងបទឧក្រិដ្ឋចាប់ជម្រិតតាមប្រព័ន្ធអនឡាញ ដែលចុងក្រោយនេះបានធ្វើទារុណកម្មលើនិស្សិតជនជាតិកូរ៉េវ័យ២២ឆ្នាំម្នាក់ រហូតដល់ស្លាប់ វាមិនត្រឹមតែធ្វើឱ្យប៉ះពាល់ដល់មុខមាត់ និងកេរ្តិ៍ឈ្មោះរបស់កម្ពុជាលើឆាកអន្តរជាតិប៉ុណ្ណោះទេ វាក៏ថែមទាំងធ្វើឱ្យពលរដ្ឋខ្មែរ ដែលកំពុងធ្វើការនៅប្រទេសកូរ៉េរងការរើសអើងផងដែរ។
យុវជន យង់ ស៊ីណេត កំពុងរស់នៅកូរ៉េដែលសកម្មនឹងកិច្ចការងារសង្គម បានប្រាប់វីអូឌីនៅថ្ងៃ១៧ខែតុលានេះថា លោកមិនទាន់ជួបដោយផ្ទាល់នូវការរើសអើងនោះទេ គឺគ្រាន់តែជួបជនជាតិកូរ៉េមួយចំនួនគេបង្ហាញកែវភ្នែកឱ្យឃើញពីការរើសអើង ប៉ុន្តែមានពលករខ្មែរផ្សេងទៀត ជួបដោយផ្ទាល់ពីការរើសអើង។
លោកថា៖ «គេសួរថា អ្នកឯងដឹងអត់ៗ ហេតុអីបានប្រទេសអ្នកឯងទៅជាចឹង? ហីលក្ខណៈថា សួរហ្នុង សួររបៀបសួរមិនមែនដោយការចង់ដឹង សួរដោយថាផ្ជុចយកឱ្យយើងគាំងធ្វើឱ្យយើងនឹងទទួលរងនូវសម្ពាធផ្លូវចិត្ត។ បងយល់ហើយមួយគេហៅថាសំណួរសួរចង់ដឹងចង់ឮ មួយសួរថា លក្ខណៈថាចង់ផ្ចាញ់ផ្ចាល់អ៊ីចឹងមានករណីចឹង។ ហើយគាត់និយាយជាមួយខ្ញុំថា វាមានអារម្មរណ៍សម្ពាធផ្លូវចិត្តខ្លាំងមែនទែន។ ហើយកន្លែងផ្សេងៗ ម្សិលមិញខ្ញុំជួបប្អូនស្រីដែលគាត់ដាក់ពាក្យរកការងារ ហើយនៅពេលដែលគាត់ខលទៅថា យកគាត់អាហ្នឹងខ្មែរយើងនៅនឹងទាក់ទងទៅ។ ស្រាប់តែឮគាត់ថា អ្នកដែលចូលនឹងគឺខ្មែរទេ ស្រាប់តែឮថាខ្មែរលែងយកវិញអ៊ីចឹង»។
លោក មាស ពិសាល ប្រធានចលនាយុវជនគណបក្សសង្គ្រោះជាតិនៅកូរ៉េខាងត្បូង ក៏បានប្រាប់វីអូឌីនៅថ្ងៃទី១៧ខែតុលានេះដែរថា ពិតជាមានការរើសអើងមកលើពលករខ្មែរនៅកូរ៉េពិតប្រាកដមែន ចាប់តាំងពីមានការចុះផ្សាយថា និស្សិតកូរ៉េម្នាក់ត្រូវបានក្រុមឧក្រិដ្ឋជនជនជាតិចិន ធ្វើទារុណកម្មរហូតដល់ស្លាប់នៅភ្នំបូកគោក្នុងប្រទេសកម្ពុជា។
លោកថា៖ «មានមែនបងករណីនឹងមានមែន ប៉ុន្តែចំពោះបងប្អូនដែលគាត់ផ្តល់មកយើងដែលមានលក្ខណៈភស្តុតាងរឹងមាំអីហ្នឹង វាមិនទាន់មានទេ ប៉ុន្តែបើនិយាយពីការព្រួយបារម្ភវិញ គឺពួកគាត់គ្រប់គ្នាព្រួយបារម្ភខ្លាំងហ្មង ភាគច្រើនគឺបង្ហាញពីការព្រួយបារម្ភខ្លាំង»។
បន្ថែមពីនេះ លោក ពិសាល បានអំពាវនាវឱ្យឯកអគ្គរាជទូតខ្មែរប្រចាំនៅប្រទេសកូរ៉េ ជួបជាមួយស្ថាប័នអាជ្ញាធរកូរ៉េ ពាក់ព័ន្ធដើម្បីពន្យល់ពីការពិត ក៏ដូចជាសំណូមពរឱ្យមានការជួយសម្របសម្រួល ជួយណែនាំទៅដល់រោងចក្រសហគ្រាស ដែលពលរដ្ឋខ្មែរកំពុងធ្វើការ ជួយផ្សព្វផ្សាយកុំឱ្យពលរដ្ឋកូរ៉េមានការរើសអើងឬក៏ធ្វើទុក្ខបុកម្នេញលើពលករខ្មែរ។
លោក ពិសាល បានអំពាវនាវទៅដល់ពលករខ្មែរនៅកូរ៉េ សូមកុំឱ្យមានការព្រួយបារម្ភខ្លាំងពេកតែត្រូវបន្តផ្តោតលើការធ្វើការងារឱ្យបានល្អ ដើម្បីបង្ហាញអំពីអត្តចរិកល្អរបស់ខ្មែរបន្តទៅទៀត ហើយព្យាយាមអត់ធ្មត់ធ្វើការងារប្រកបដោយទំនួលខុសត្រូវ ដោយមិនបាច់ព្យាយាមបកស្រាយ ឬក៏ព្យាយាមធ្វើការតបតអ្វីទេ ហើយប្រសិនបើមានបញ្ហាអ្វី គឺត្រូវទាក់ទងទៅស្ថានទូតខ្មែរ ទាក់ទងទៅមជ្ឈមណ្ឌលគាំពារជនបរទេស ដើម្បីឱ្យគេជួយ ឬទាក់ទងមកលោកក៏បាន លោកនឹងព្យាយាមជួយឱ្យអស់ពីលទ្ធភាព។
ស្ត្រីខ្មែរម្នាក់រស់នៅក្នុងទីក្រុងសេអ៊ូល ប្រទេសកូរ៉េខាងត្បូង បាននិយាយនៅលើផេកហ្វេសប៊ុកឈ្មោះ Yun Jeong-hee នៅថ្ងៃទី១៧ខែតុលាថា អ្នកស្រីបានទទួលដំណឹងពីពលករខ្មែរជាច្រើនថា រោងចក្រកូរ៉េមួយចំនួន បានបដិសេធមិនទទួលយកពលករខ្មែរចូលធ្វើការឡើយ ដោយប្រាប់ថា គេឈប់យកពលករខ្មែរធ្វើការទៀតហើយ គឺលុបចោលទាំងអស់។
អ្នកស្រីលើកឡើងថា មានពលករខ្មែរម្នាក់ដែលឡើងមកធ្វើការនៅប្រទេសកូរ៉េតាមរដូវកាល គឺត្រូវចប់កុងត្រានៅខែ១២ ប៉ុន្តែមិនទាន់ចប់កុងត្រាផង ថៅកែគប់ឥវ៉ាន់ដេញគាត់ឱ្យទៅទិញសំបុត្រយន្តហោះត្រឡប់ទៅកម្ពុជាវិញ គឺមានករណីរើសអើងជាច្រើនមិនមែនមានតែ២-៣នាក់ទេ។
អ្នកស្រីថា៖ «សូម្បីតែខ្ញុំ ខ្ញុំខលទៅខាងថៅកែផ្ទាល់ថា មានត្រូវការរើសមនុស្សទៀតអត់ ដោយសារខ្ញុំមានបងប្អូនខ្មែរមួយចំនួនគាត់អត់មានការងារធ្វើទេ។ ពាក្យដែលគាត់និយាយជាមួយខ្ញុំ គាត់ថា ចាប់ពីថ្ងៃនឹងទៅគាត់ឈប់យកពលករខ្មែរទៀតហើយ ហើយខ្ញុំសួរគាត់ថា ថី? គាត់ថាគាត់អត់សូវចូលចិត្តបងប្អូនខ្មែរយើងទេ គាត់និយាយចឹងហ្មង ហើយខ្ញុំថា ហេតុអីបានអត់ចូលចិត្ត? ពីព្រោះមិនមែនមកពីព័ត៌មានណាហីពីព្រោះព័ត៌មានគឺជារឿងប្រទេស ហើយយើងជាអ្នកធ្វើការធម្មតា យើងធ្វើការធម្មតាទៅខ្ញុំប្រាប់គាត់ចឹង។ ប៉ុន្តែនៅតែគាត់ថា រោងចក្រគាត់លែងទទួលបងប្អូនខ្មែរទៀតហើយ គឺខ្ញុំជួបឡើងប៉ុន្មានរោងចក្រហើយខ្ញុំតេទៅជួប គឺគាត់និយាយដូចគ្នាចឹង ខ្ញុំពិតជាសោកស្តាយមែនទែន»។
លោកនាយកដ្ឋមន្ត្រី ហ៊ុន ម៉ាណែត កាលពីថ្ងៃទី១៦ខែតុលា បានជួបពិភាក្សាការងារជាមួយ អ្នកស្រី គីម ជីណា អនុរដ្ឋមន្ត្រីទី២ នៃក្រសួងការបរទេសសាធារណរដ្ឋកូរ៉េ ដោយបានពិភាក្សាគ្នាពាក់ព័ន្ធនឹងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេសការឆបោកតាមប្រព័ន្ធបច្ចេកវិទ្យា ដោយបានគូសបញ្ជាក់អំពីកិច្ចសហប្រតិបត្តិការជាច្រើនឆ្នាំកន្លងមក រវាងអាជ្ញាធរកម្ពុជា និងអាជ្ញាធរកូរ៉េ ហើយដែលបានសម្រេចនូវលទ្ធផលល្អ ជាផ្លែផ្កាជាច្រើនរួចមកហើយ។
ក្នុងពេលជាមួយគ្នា កម្ពុជា និងកូរ៉េ នឹងបន្តពង្រឹងកិច្ចសហប្រតិបត្តិការរួមគ្នាដើម្បីបង្ការ ទប់ស្កាត់ និងប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា ឱ្យមានប្រសិទ្ធភាពខ្ពស់ផងដែរ។ នេះបើយោងតាមបណ្តាញសង្គម លោកហ៊ុន ម៉ាណែត។
ជាមួយគ្នានេះ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅព្រឹកថ្ងៃទី១៦ ខែតុលា បានទទួលជួបពិភាក្សាការងារជាមួយ លោក PARK IL ដែលទើបទទួលបានការតែងតាំងជាតំណាងជាន់ខ្ពស់របស់ក្រសួងការបរទេសកូរ៉េ ទទួលបន្ទុកជាឯកអគ្គរដ្ឋទូតស្ដីទីនៃសាធារណរដ្ឋកូរ៉េប្រចាំកម្ពុជា មុនពេលដែលលោកចេញដំណើរទៅបំពេញបេសកកម្មការទូតនៅកម្ពុជា ក្នុងពេលឆាប់ៗខាងមុខ។ កិច្ចពិភាក្សា បានផ្ដោតជាពិសេសពាក់ព័ន្ធនឹងការប្ដេជ្ញាចិត្តរួមគ្នា ក្នុងការទប់ស្កាត់ និងបង្ក្រាបករណីឆបោកតាមប្រព័ន្ធបច្ចេកវិទ្យា ដើម្បីការពារផលប្រយោជន៍របស់ប្រជាជន និងប្រជាជាតិទាំងពីរ។ នេះបើយោងតាមស្ថានឯកអគ្គរាជទូតកម្ពុជាប្រចាំនៅកូរ៉េ។
ក្នុងរយៈពេលជាច្រើនថ្ងៃកន្លងមកនេះ គេឃើញសមត្ថកិច្ចចម្រុះនៅតាមបណ្តាខេត្តក្រុងជាច្រើន បានចុះបង្ក្រាបនៅតាមអគារដែលសង្ស័យថា កំពុងប្រតិបត្តិការណ៍ឆបោកតាមប្រព័ន្ធបច្ចេកវិទ្យា ដោយនៅតាមទីតាំងខ្លះបានឃាត់ខ្លួនជនបរទេសរាប់រយនាក់ ភាគច្រើនជាជនជាតិចិន ក៏ប៉ុន្តែគេមិនទាន់ឃើញព័ត៌មានណាមួយ ពីការចាប់ខ្លួនឬក៏បើកការស៊ើបអង្កេតទៅលើមន្ត្រីជាន់ខ្ពស់រដ្ឋាភិបាល ឬឧកញ៉ាណាម្នាក់ដែលសហរដ្ឋអាមេរិក បានចង្អុលចំឈ្មោះពីការជាប់ពាក់ព័ន្ធក្នុងឧក្រិដ្ឋកម្មនេះទេ រួមទាំងឧកញ៉ា ចេន ហ្ស៊ី ផងដែរ ខណៈក្នុងរយៈពេលជាច្រើនថ្ងៃមកនេះ ផេកអគ្គស្នងការដ្ឋាននគរបាលជាតិ មិនឃើញចុះផ្សាយពីការចុះបង្ក្រាបនេះឡើយ។
លោក ខែម មុនីកុសល អតីតមន្ត្រីគណបក្សសង្គ្រោះជាតិ បានចោទសួរថា តើអ្នកណាជាអ្នកដឹកនាំយុទ្ធនាការបង្ក្រាបឧក្រិដ្ឋកម្មអនឡាញ ដែលកំពុងតែផ្ទុះផ្អើលពេញពិភពលោក ដែលបាននិងកំពុងធ្វើឱ្យកម្ពុជាស្អុយឈ្មោះអាសោចនេះ? លោកថា គឺលោក ស សុខា ឧបនាយកដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោកនេត សាវឿន ឧបនាយករដ្ឋមន្ត្រីទទួលបន្ទុកសន្តិសុខជាតិ លោកឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្ដាលសន្តិសុខ គឺជាមនុស្សដែលស្ថិតនៅក្នុងចំណោមមន្ត្រីជាន់ខ្ពស់កម្ពុជា ២៨នាក់ ដែលវិទ្យាស្ថានស្រាវជ្រាវ Humanity Research Consultancy បានរកឃើញកាលពីថ្ងៃទី២៥ ខែឧសភា ឆ្នាំ២០២៥ ពាក់ព័ន្ធនឹងការចាប់ជម្រិតតាមប្រព័ន្ធអនឡាញ។
លោកថា៖ «អារបាយការណ៍ Humanity Research Consultancy គឺគេចុះផ្សាយនៅក្នុងហ្នឹងវាមាន២០-៣០នាក់ មានឈ្មោះនៅក្នុងហ្នឹង ហើយបញ្ជាឱ្យមនុស្សទាំងអស់ហ្នឹង ទៅបង្ក្រាបយ៉ាងម៉េចទៅ បើពួកគាត់មានឈ្មោះនៅក្នុងមានជាមេក្លោងរកស៊ីល្បែងអនឡាញហ្នឹង? ឥឡូវយើងគិតមើលបងប្អូនជួយគិតមើលបានមិនបាន»។
ពលករខ្មែរម្នាក់ដែលកំពុងធ្វើការនៅកូរ៉េ ដែលកំពុងបារម្ភពីការរើសអើង បាននិយាយលើបណ្តាញសង្គមដោយចោទសួរថា ហេតុអ្វីនៅពេលអន្តរជាតិ ជាពិសេសអាមេរិក មិនទាន់លើកឡើងពីបញ្ហាចាប់ជម្រិត និងហ្គេមអនឡាញនេះ រដ្ឋាភិបាលកម្ពុជាមិនព្រមធ្វើការបង្ក្រាប ដល់គេនិយាយទើបចុះបង្ក្រាប?
លោកលើកឡើងថា មន្ត្រីស៊ីប្រាក់ខែរាស្ត្រ ប៉ុន្តែបែរជាមិនធ្វើការបម្រើរាស្ត្រហើយ ថែមទាំងមន្ត្រីមួយចំនួនចូលដៃចូលជើងជាមួយក្រុមឧក្រិដ្ឋជន រកស៊ីបំផ្លាញខ្មែរបំផ្លាញមុខមាត់កម្ពុជា លើឆាកអន្តរជាតិ ឱ្យល្បីតែពីរឿងអាក្រក់។ លោកថា បើគ្មានសមត្ថភាពមិនចេះធ្វើការទេ សូមចុះចេញទៅ ទុកឱ្យខ្មែរដែលគេមានសមត្ថភាពធ្វើម្តង។
ពលកររូបនោះ និយាយថា៖«ឥឡូវពួកខ្ញុំនៅក្រៅប្រទេស ដូចសំរាមវាអន់វាថោកចឹង! តែខ្ញុំអត់ខឹងទេដែលជនជាតិគេប្រមាថជនជាតិយើង ដោយសារយើងវាអ៊ីចឹងយល់ហ្ហេ? ទោះខំបកស្រាយរិចមាត់យ៉ាងម៉េចក៏បកមិនកើតដែរ អាអ្នកខំបកយើងខំបកហើយ ហើយចុះអាអ្នកបើកដៃឱ្យខ្មោចព្រៃចូលមកអុកឡុកពេញស្រុកហ្នឹង អ្នកណា? បានប្រយោជន៍អីខ្លះពីពួកបើកដៃឱ្យគេនឹង? ខំទ្រសម្បើមណាស់ រលាយរលត់ជាតិស្អុយឈ្មោះអស់ហើយ។ ខឹងជនជាតិកូរ៉េ ឥឡូវទៅខឹងជនជាតិអាមេរិកផងទៅសមាជិកសភាគេ៣នាក់ បើតាមខ្ញុំស្តាប់ព័ត៌មាន គេស្នើដាក់កម្ពុជាចូលក្នុងបញ្ជីខ្មៅ បញ្ជីប្រផេះ ក៏បានខ្មៅក៏បាន រឿងឧក្រិដ្ឋកម្មអនឡាញស្កេមមើហ្នឹង ដល់កហើយមិនដឹងនិយាយថាម៉េចទៀតទេ»។
សហរដ្ឋអាមេរិក និងចក្រភពអង់គ្លេស នៅថ្ងៃទី១៥ខែតុលា បានរួមគ្នាដាក់ទណ្ឌកម្មធ្ងន់ធ្ងរលើក្រុមហ៊ុន Prince Group របស់អ្នកឧកញ៉ា ចេន ហ្ស៊ី ដែលជាទីប្រឹក្សារបស់ប្រធានព្រឹទ្ធសភាកម្ពុជា លោក ហ៊ុន សែននិងលោកនាយករដ្ឋមន្ត្រី ហ៊ុន ម៉ាណែត ជុំវិញឧក្រិដ្ឋកម្មឆបោកតាមអនឡាញ។
ជាមួយគ្នានេះ អាមេរិកបានសម្រេចបង្កកប្រាក់ឧកញ៉ា ចេន ហ្ស៊ី ដែលជាជនជាតិចិនទទួលបានសញ្ជាតិខ្មែរក្នុងទឹកប្រាក់ជាង ១៥ពាន់លានដុល្លារ។
ក្រៅពី លោក ចេន ហ្ស៊ី មន្រ្តីជាន់ខ្ពស់រដ្ឋាភិបាលកម្ពុជា និងឧកញ៉ាមួយចំនួន ក៏ជាប់ក្នុងបញ្ជីខ្មៅរបស់អាមេរិកពាក់ព័ន្ធនឹងការចាប់ជម្រិតតាមប្រព័ន្ធអនឡាញនេះផងដែរ ក្នុងនោះមានដូចជា លោកនេត សារឿន ឧបនាយករដ្ឋមន្រ្តីនិងជាក្មួយប្រសារលោក ហ៊ុន សែន ឧកញ៉ាហ៊ុន តូ ជាក្មួយលោកហ៊ុន សែន ឧកញ៉ាកុក អានសមាជិកព្រឹទ្ធសភា លោកឌី វិជ្ជា កូនប្រសារលោក ហ៊ុន សែន លោកគួច ចំរើន អភិបាលខេត្តកណ្តាលលោកស សុខា រដ្ឋមន្ត្រីក្រសួងមហាផ្ទៃ និងលោកយឹម លក្ខណ៍ ប្អូនថ្លៃលោកហ៊ុន ម៉ានី ។ល។
ចាប់តាំងពី លោក ហ៊ុន សែន បានប្រើតុលាការដែលជាឧបករណ៍នយោបាយរបស់លោក រំលាយគណបក្សសង្គ្រោះជាតិ និងចាប់ឃុំខ្លួនមេបក្ស លោក កឹម សុខា ដែលមានពលរដ្ឋគាំទ្រជិតកន្លះប្រទេស កាលពីចុងឆ្នាំ២០១៧មក ប្រទេសកម្ពុជា ត្រូវបានគេមើលឃើញថា បានបាត់បង់ប្រព័ន្ធត្រួតពិនិត្យអំណាចតាមបែបប្រជាធិបតេយ្យ ធ្វើឱ្យរដ្ឋាភិបាលគ្រួសារហ៊ុនអាចជិះសេះលែងដៃ ធ្វើអ្វីៗតាមតែអំពើចិត្ត ដូចជា ធ្វើឱ្យបាត់បង់ទឹកដីទៅប្រទេសជិតខាង ធ្វើឱ្យមានអយុត្តិធម៌សង្គមរីកកាន់តែធំ គម្លាតរវាងអ្នកមាននិងអ្នកក្រកាន់តែខ្លាំង និងគប់គិតបើកដៃឱ្យឧក្រិដ្ឋជនជនជាតិចិន ចូលមកបើកអាជីវកម្មល្បែងចាប់ជម្រិតតាមប្រព័ន្ធអនឡាញ ធ្វើឱ្យកម្ពុជាកាន់តែមានកេរ្តិ៍ឈ្មោះស្អុយអាសោចនាពេលបច្ចុប្បន្ន និងក៏បានធ្វើឱ្យពលរដ្ឋខ្មែរដែលកំពុងរស់នៅនិងធ្វើការនៅបរទេស រងការរើសអើងផងដែរ៕
