បន្ទាប់ពីមានសង្គ្រាមហែកកេរ្ដិ៍ រវាងអតីតបងប្អូនធម៌ទាំង២ គឺប្រធានព្រឹទ្ធសភាកម្ពុជា លោក ហ៊ុន សែន និងអតីតនាយករដ្ឋមន្រ្តីថៃ លោក ថាក់ស៊ីន ទើបតែស្ងប់ស្ងាត់ទៅមិនបានប៉ុន្មានផងនោះ ប្រភពបែកធ្លាយមួយ បានអះអាងថា លោក ហ៊ុន សែន ធ្លាប់បានកសាងភូមិគ្រឹះមួយកន្លែង នៅត្រើយខាងកើតនៃទន្លេបាសាក់ ក្នុងរាជធានីភ្នំពេញ សម្រាប់អតីតបងធម៌ គឺលោក ថាក់ស៊ីន កាលពីពេលដែលពួកគេនៅល្អូកល្អឺនជាមួយគ្នា។
អតីតតំណាងរាស្រ្តគណបក្សសង្គ្រោះជាតិ លោក អ៊ុំ សំអាន បានសរសេរនៅលើបណ្ដាញសង្គមហ្វេសប៊ុក កាលពីថ្ងៃទី១៣ ខែតុលាថា លោក ហ៊ុន សែន បានកសាងភូមិគ្រឹះមួយកន្លែង នៅក្បាលកោះអន្លង់ចិន នៅត្រើយខាងកើតទន្លេបាសាក់ នៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ឱ្យលោក ថាក់ស៊ីន។ លោកបញ្ជាក់ថា ក្រោយពេលទំនាក់ទំនងគ្រួសារហ៊ុន និងត្រកូលស៊ីណាវ៉ាត់ ប្រេះឆាគ្នា លោក ហ៊ុន សែន បានឱ្យមេបញ្ជាការកងអង្គរក្សរបស់លោក គឺលោក ហ៊ីង ប៊ុនហៀង ជាអ្នកគ្រប់គ្រងភូមិគ្រឹះនេះ។
បន្ថែមពីនេះ លោក អ៊ុំ សំអាន បានអះអាងប្រាប់វីអូឌីថា រឿងលោក ហ៊ុន សែន ធ្វើផ្ទះឱ្យលោក ថាន់ស៊ីន នេះ គឺលោកបានទទួលបានប្រភពពីមន្រ្តីជាន់ខ្ពស់របស់គណបក្សប្រជាជនកម្ពុជាម្នាក់ ដែលលោកសុំលាក់អត្តសញ្ញាណ ដើម្បីការពារសុវត្ថិភាព ហើយដែលប្រភពនេះ គឺអាចទុកចិត្តបាន។
លោក អ៊ុំ សំអាន ថ្លែងថា៖ «ដូច្នេះរឿងនេះ គឺជារឿងពិត ហើយយើងមិនអាចបញ្ចេញឈ្មោះ ឬអត្តសញ្ញាណអ្នកដែលផ្ដល់មកឱ្យយើងបានទេ ព្រោះគេសុំមិនបញ្ចេញឈ្មោះ ព្រោះប្រភពបានមកពីមន្រ្តីគណបក្សប្រជាជនគេផ្ដល់មកឱ្យយើង»។
ផ្អែកតាមរូបភាពពីផ្កាយរណបរបស់ក្រុមហ៊ុនហ្គូហ្គល (Google Earth) ភូមិគ្រឹះនៅត្រើយខាងកើតទន្លេបាសាក់ ក្នុងសង្កាត់ព្រែកថ្មី ដែលគេអះអាងថាជាផ្ទះដែលលោក ហ៊ុន សែន ធ្វើសម្រាប់ជូនបងធម៌ គឺលោក ថាក់ស៊ីន នោះចាប់ផ្ដើមកសាងឡើងក្នុងចន្លោះដើមឆ្នាំ២០០៨ ពោលគឺនៅក្នុងកំឡុងពេលដែលលោក ថាក់ស៊ីន បាននិរទេសខ្លួនជាលើកទី២ ក្រោយមានរឿងក្ដីក្ដាំនៅតុលាការថៃ កាលពីឆ្នាំ២០០៨ និងក្រោយមកត្រូវបានលោក ហ៊ុន សែន ដែលកាលនោះជាប្អូនធម៌ បានតែងតាំងជាទីប្រឹក្សាសេដ្ឋកិច្ច។
ភូមិគ្រឹះនេះ បានបុកគ្រឹះសាងសង់ឡើងនៅលើទំហំក្បាលដី ២២ម៉ែត្រ និងបណ្ដោយជាង ១៣០ម៉ែត្រ ដោយមានផ្ទះវីឡាស្កឹមស្កៃមួយខ្នង អាងទឹក អាហារដ្ឋាន សួនច្បារ និងផ្ទះលំហែនៅជាប់មាត់ទន្លេ ដ៏មានផាសុខភាពមួយកន្លែង សម្រាប់គយគន់ទេសភាពសាឡង់ដឹកខ្សាច់នាដងទន្លេ។ បើមើលពីលើដំបូល ភូមិគ្រឹះនេះ ហាក់មិនទំនងមានម្ចាស់ជាប្រជាពលរដ្ឋសាមញ្ញ ឬមន្រ្តីតូចតាចនោះឡើយ។
យ៉ាងណាមិញ នៅដើមឆ្នាំ២០១៣ ផ្ទៃដីក្នុងភូមិគ្រឹះនេះ បានពង្រីកចំនួន២ដង ទៅទិសខាងលិចរហូតមានក្បាលដីទំហំជាង ៧០ម៉ែត្រ រហូតដល់ឆ្នាំ២០១៤ ទីតាំងបរិវេណថ្មី ដែលបានពង្រីកស្ថិតក្នុងរបងជាមួយភូមិគ្រឹះនេះ ត្រូវបានគេសាងសង់ភោជនីយដ្ឋានដ៏ធំមួយ ដែលឈ្មោះថា បាសាក់ សួគ៌ និងមួយផ្នែកទៀត ធ្វើជា ប៊ូទីក វីឡា អាហារដ្ឋាន ហាងកាហ្វេ និងមានការសាងសង់វីឡាដ៏ធំមួយបន្ថែមទៀត ហើយនៅឆ្នាំ២០១៦ បរិវេណភូមិគ្រឹះនេះ បានពង្រីកខ្លួន និងមានការសាងសង់សំណង់មួយចំនួនបន្ថែមទៀត។
ទោះជាបែបនេះក្ដី ក្នុងកំឡុងឆ្នាំ២០២០ អាជីវកម្មដែលមានឈ្មោះ បាសាក់ សួគ៌ ទាំងអស់ មានសភាពកាន់តែស្ងប់ស្ងាត់ រហូតឈានដល់ការបិទអាជីវកម្មទាំងស្រុង ហើយនៅឆ្នាំ២០២២ សំណង់ និងសួនច្បារមួយចំនួន ដែលស្ថិតនៅក្នុងរបងភូមិគ្រឹះនេះ ត្រូវបានរុះរើ និងវាយកម្ទេចចោល។
វីអូឌី មិនអាចស្វែងរកមធ្យោបាយដើម្បីទាក់ទងម្ចាស់អាជីវកម្មយីហោទន្លេ បាសាក់ សួគ៌ ដើម្បីសុំការបកស្រាយបាននោះទេ ដោយសារឈ្មោះអាជីវកម្មនេះ មិនមាននៅក្នុងបណ្ដាញសង្គម ឬប្រព័ន្ធស្វែងរក នៅលើហ្គូហ្គលនោះទេ។ ដោយឡែកចំពោះប្រជាពលរដ្ឋដែលនៅក្នុងតំបន់នោះ ក៏ពុំមាននរណាម្នាក់បានដឹងពីអត្តសញ្ញាណនៃម្ចាស់វិមានដ៏អាថ៌កំបាំងនេះដែរ។
ចំណែកលោក ហ៊ីង ប៊ុនហៀង ដែលប្រភពពីមន្រ្តីជាន់ខ្ពស់របស់គណបក្សប្រជាជនកម្ពុជា អះអាងថា បានទទួលសិទ្ធិពី លោក ហ៊ុន សែន ក្នុងការគ្រប់គ្រងភូមិគ្រឹះមួយនេះ បន្តពីលោក ថាក់ស៊ីន នោះ វីអូឌី ក៏មិនអាចទាក់ទងបានដូចគ្នា គិតត្រឹមម៉ោងផ្សាយនេះ។
អាស្រ័យតាមរូបភាពរបស់ផ្កាយរណប ភូមិគ្រឹះ ដែលគេសង្ស័យថា របស់លោក ថាក់ស៊ីន នេះបានបិទទ្វារ និងមានស្មៅដុះ ដែលទំនងដោយសារមិនសូវមានមនុស្សចេញចូលឆ្លងកាត់ រយៈពេលជាយូរមកហើយនោះ តាំងពីឆ្នាំ២០១៥មកម្ល៉េះ ពោលគឺស្របគ្នា ទៅនឹងពេលដែលលោក ថាក់ស៊ីន និងប្អូនស្រីបង្កើត គឺលោកស្រី យីងឡាក់ កំពុងនិរទេសខ្លួននៅទីក្រុងឌូបៃ និងមិនសូវបានធ្វើដំណើរមកកម្ពុជា ជាញឹកញាប់នោះឡើយ។ កាលនោះ គេឃើញលោក ថាក់ស៊ីន បានធ្វើដំណើរមកកម្ពុជាម្ដងម្កាល ដើម្បីមកលេងកូនហ្គោល ឬចូលរួមក្នុងកម្មវិធីជួបជុំរបស់គ្រួសារត្រកូលហ៊ុន។
ជុំវិញរឿងនេះ ប្រធានអ្នកឃ្លាំមើលកម្ពុជា លោក ម៉ែន ណាត លើកឡើងថា ការប្រគល់ភូមិគ្រឹះនោះទៅឱ្យលោក ហ៊ីង ប៊ុនហៀង បង្ហាញពីទំនាក់ទំនងប្រេះឆាកាន់តែខ្លាំង រវាងបងប្អូនធម៌ទាំងពីរ។
លោកបន្តថា ប្រសិនបើរឿងនេះជាការពិត លោក ហ៊ុន សែន អាចមានទោសពីបទបំពានលើសិទ្ធិកាន់កាប់អចលនទ្រព្យ ដោយការប្រគល់ភូមិគ្រឹះ និងដីធ្លីក្នុងប្រទេសខ្មែរ ឱ្យទៅជនជាតិបរទេសធ្វើកម្មសិទ្ធិ។
តែយ៉ាងណា លោកថា ករណីនេះពិបាកស៊ើបអង្កេត ព្រោះគ្រួសារលោក ហ៊ុន សែន ជាអ្នកក្ដោបក្ដាប់អំណាច ខណៈអង្គកាពប្រឆាំងអំពើពុករលួយគ្មានតម្លាភាព។
លោក ម៉ែន ណាត និយាយថា៖ «ស៊ើបអង្កេតយ៉ាងម៉េច បើគ្រួសារមេដឹកនាំកំពូល លោក ហ៊ុន សែន ជាអ្នកផ្ទេរប្រគល់ផ្ទះទៅឱ្យ លោក ថាក់ស៊ីន ឬក៏ប្រគល់ដីឱ្យលោក ថាក់ស៊ីន ធ្វើវីឡាស្កឹមស្កៃនេះ ឱ្យអ្នកណាស៊ើបអង្កេតបាន បើលោកហ៊ុន សែន ជាមេដឹកនាំកំពូលរបស់កម្ពុជាទៅហើយហ្នឹង។ បើស៊ើបអង្កេតបានទាល់តែមានរដ្ឋាភិបាលថ្មី មិនមែនជារដ្ឋាភិបាលសព្វថ្ងៃ»។
ពាក់ព័ន្ធនឹងរឿងនេះ លោក ហ៊ុន សែន ដែលជាអតីតប្អូនធម៌ លោក ថាក់ស៊ីន បានទម្លាយក្រោយពេលទំនាក់ទំនងបងប្អូនធម៌ បានបែកបាក់គ្នានោះថា លោកធ្លាប់ជួយដល់អតីតបងធម៌ គឺលោក ថាក់ស៊ីន និងប្អូនស្រីបង្កើត គឺលោកស្រី យ៉ីងឡាក់ នៅពេលមានបញ្ហា និងត្រូវនិរទេសខ្លួន ហើយនៅភូមិគ្រឹះរបស់លោក ហ៊ុន សែន នៅទីក្រុងតាខ្មៅ ខេត្តកណ្តាល ក៏មានបន្ទប់ពីរ សម្រាប់ទុកជូនដល់បងប្អូនទាំងពីរនាក់សម្រាកនៅពេលមកកម្ពុជា។
ទោះជាយ៉ាងនេះក្ដី តាមទម្លាប់ការរស់នៅរបស់គ្រួសារត្រកូលហ៊ុន ពួកគេមិនដែលបង្ហាញពីកន្លែងសំខាន់ៗ នៅក្នុងភូមិគ្រឹះដ៏ធំស្កឹមស្កៃរបស់ពួកគេ ជាសាធារណៈនោះឡើយ ក្រៅតែពីបន្ទប់ទទួលទានអាហារ បន្ទប់ធ្វើការផ្ទាល់របស់លោក ហ៊ុន សែន កន្លែងហាត់ប្រាណ និងទីធ្លាក្នុងបរិវេណមួយចំនួនប៉ុណ្ណោះ។
ទន្ទឹមគ្នានេះ មតិរបស់អ្នកឃ្លាំមើលភាគច្រើន ជឿថា ការបញ្ចេញព័ត៌មានអំពីករណីលោក ហ៊ុន សែន កសាងភូមិគ្រឹះឱ្យ លោក ថាក់ស៊ីន នេះគឺជារឿងពិត ព្រោះកន្លងមក មន្រ្តីក្នុងជួរគណបក្សប្រជាជនកម្ពុជា ក៏តែងតែលួចបញ្ចេញព័ត៌មានសម្ងាត់ជាច្រើនមកផងដែរ ដែលព័ត៌មានទាំងនោះភាគច្រើន គឺជារឿងពិត ជាក់ស្ដែង ដូចជាការបញ្ចេញសំឡេងរបស់ លោក ហ៊ុន សែន ដែលបញ្ជាឱ្យបក្ខពួករបស់លោក ធ្វើការវាយប្រហារ និងតាមកម្ចាត់អ្នកប្រឆាំង ដែលរស់នៅក្នុងប្រទេសថៃជាដើម៕
