មហាអំណាចលោកខាងលិច បានបង្កើនសម្ពាធលើការលក់ប្រេងរបស់រុស្ស៊ី ចំពេលមានសង្រ្គាមជាមួយអ៊ុយក្រែនខណៈប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា ឥណ្ឌានឹងឈប់ទិញហើយចក្រភពអង់គ្លេសបានដាក់ទណ្ឌកម្មលើក្រុមហ៊ុនប្រេងកំពូលរបស់រុស្ស៊ី។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី១៦ ខែតុលា ឆ្នាំ២០២៥នេះថា ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី(Volodymyr Zelenskiy) គ្រោងនឹងជួបជាមួយលោក ត្រាំ(Trump)នៅទីក្រុងវ៉ាស៊ីនតោន(Washington) នៅថ្ងៃសុក្រ ដើម្បីជំរុញឱ្យមានការគាំទ្រផ្នែកយោធា និងថាមពល ស្របពេលដែលទីក្រុងគីវ(Kyiv) និងទីក្រុងមូស្គូ(Moscow) កំពុងបង្កើនសង្រ្គាមជាមួយនឹងការវាយប្រហារលើហេដ្ឋារចនាសម្ព័ន្ធថាមពល។
មន្រ្តីឥណ្ឌា ក៏កំពុងនៅក្នុងទីក្រុងវ៉ាស៊ីនតោនផងដែរ សម្រាប់កិច្ចពិភាក្សាពាណិជ្ជកម្ម ដោយសហរដ្ឋអាមេរិកបានដំឡើងពន្ធទ្វេដងលើទំនិញឥណ្ឌា ហើយអ្នកចរចារបស់ខ្លួននិយាយថា ការទប់ស្កាត់ការនាំចូលប្រេងពីរុស្ស៊ីនឹងក្លាយជាកូនសោរក្នុងការបិទកិច្ចព្រមព្រៀង។
បីប្រភពដែលដឹងអំពីរឿងនេះ បាននិយាយថា រោងចក្រចម្រាញ់ប្រេងរបស់ឥណ្ឌា កំពុងរៀបចំផ្លាស់ចេញឆ្ងាយពីរុស្ស៊ី ហើយការទិញប្រេងអាចនឹងធ្លាក់ចុះពីខែធ្នូ បើទោះជាបន្ថែមថាពួកគេមិនត្រូវបានណែនាំជាផ្លូវការឱ្យបញ្ឈប់ការទិញក៏ដោយ។
ឥណ្ឌា និងចិន គឺជាអ្នកទិញប្រេងដ៏ធំបំផុតរបស់រុស្ស៊ី ក្នុងការបញ្ចុះតម្លៃដែលទីក្រុងមូស្គូ ត្រូវបានបង្ខំឱ្យផ្តល់ជូនបន្ទាប់ពីបាត់បង់ការលក់ទៅអឺរ៉ុប ក្នុងការលុកលុយរបស់ខ្លួននៅអ៊ុយក្រែនក្នុងឆ្នាំ២០២២។
លោក ត្រាំ បានប្រាប់ទៅកាន់សារព័ត៌មាននៅថ្ងៃពុធថា ‘‘ខ្ញុំមិនសប្បាយចិត្តទេដែលឥណ្ឌាកំពុងទិញប្រេងហើយលោក ម៉ូឌី(Modi) បានធានាខ្ញុំនៅថ្ងៃនេះថា ពួកគេនឹងមិនទិញប្រេងពីរុស្ស៊ីទេ វាគឺជាជំហ៊ានដ៏ធំ។ ឥឡូវយើងនឹងធ្វើជាមួយចិនដូចគ្នា’’៕
