បេសកជនពាណិជ្ជកម្មអង់គ្លេស លោក ម៉ាត់ វេស្ទើន (Matt Western) មកបំពេញទស្សនៈកិច្ចនៅប្រទេសកម្ពុជា ដើម្បីពង្រឹងទំនាក់ទំនងពាណិជ្ជកម្ម និងការវិនិយោគ ខណៈទីផ្សារចក្រភពអង់គ្លេស ក៏បានភ្ជាប់លក្ខខណ្ឌសិទ្ធិមនុស្ស និងសិទ្ធិការងារ សម្រាប់ប្រទេសមានការអភិវឌ្ឍតិចតួចដូចកម្ពុជាជាដើម។
ប្រភពពីគេហទំព័ររបស់រដ្ឋាភិបាលចក្រភពអង់គ្លេស បានផ្សាយនៅថ្ងៃទី១៩ ខែតុលា ឆ្នាំ២០២៥នេះថា បេសកជនពាណិជ្ជកម្មរបស់នាយករដ្ឋមន្ត្រីចក្រភពអង់គ្លេសប្រចាំនៅប្រទេសកម្ពុជា វៀតណាម ថៃ និងឡាវ លោក Matt Western កំពុងបំពេញទស្សនៈកិច្ចនៅប្រទេសកម្ពុជា ដើម្បីបញ្ជាក់ឡើងវិញចំពោះការប្តេជ្ញាចិត្តរបស់ចក្រភពអង់គ្លេស ក្នុងការពង្រឹងទំនាក់ទំនងពាណិជ្ជកម្ម និងការវិនិយោគ និងគាំទ្រដល់ការអភិវឌ្ឍសេដ្ឋកិច្ចប្រកបដោយចីរភាពរបស់ប្រទេសកម្ពុជា។ ដំណើរទស្សនៈកិច្ចនេះ បង្កើតបានជាកម្លាំងជំរុញក្រោមវេទិការពាណិជ្ជកម្មនិងការវិនិយោគរួមគ្នា រវាងចក្រភពអង់គ្លេស និងប្រទេសកម្ពុជាដែលជាវេទិការសំខាន់សម្រាប់សម្របសម្រួលទ្វេរភាគី និងការចូលរួមពីវិស័យឯកជន។
ប្រភពបន្តថា អំឡុងពេលទស្សនៈកិច្ចរបស់លោក វេស្ទើន (Western) នឹងចូលរួមពិធីសម្ពោធព្រលានយន្តហោះអន្តរជាតិតេជោ ដែលសម្គាល់ជាគម្រោងហេដ្ឋារចនាសម្ព័ន្ធ ដែលរចនាឡើងដោយក្រុមហ៊ុនចក្រភពអង់គ្លេសហ្វូសស្ទ័រ និងផាតន័រ ដែលជានិមិត្តរូបនៃការរួមចំណែករបស់ចក្រភពអង់គ្លេស ចំពោះការតភ្ជាប់ និងកំណើនរយៈពេលវែងរបស់ប្រទេសកម្ពុជា។
ប្រភពបន្ថែមថា លោកក៏នឹងជួបជាមួយរដ្ឋមន្ត្រីប្រទេសកម្ពុជា ដើម្បីតាមដានគោលនយោបាយពាណិជ្ជកម្មរបស់ប្រទេសកម្ពុជា ហើយកិច្ចពិភាក្សានិងរួមបញ្ចូលទាំងស្ថាបត្យកម្មពាណិជ្ជកម្មក្នុងតំបន់ ពិសេសការអភិវឌ្ឍជុំវិញភាពជាដៃគូរអន្តរជាតិប៉ាស៊ីហ្វិករីកចម្រើនគ្រប់ជ្រុងជ្រោយ និងថាតើកម្ពុជានិងចក្រភពអង់គ្លេស អាចពង្រឹងកិច្ចសហប្រតិបត្តិការណ៍សមាហរណកម្មពាណិជ្ជកម្មក្នុងតំបន់ដោយរបៀបណា?
លោក វេស្ទើន(Western) នឹងជួបជាមួយអ្នកជំនួញអង់គ្លេសប្រតិបត្តិការក្នុងប្រទេសកម្ពុជា ដើម្បីបង្ហាញអំពីការរួមចំណែករបស់ពួកគេ ក្នុងការបង្កើតការងារ ច្នៃប្រឌិត និងកំណើនប្រកបដោយចីរភាព។ លោកក៏នឹងចូលរួមជាមួយស្ថាប័នអប់រំសកម្មរបស់អង់គ្លេស នៅក្នុងប្រទេសកម្ពុជា ដើម្បីពិភាក្សាអំពីតួនាទីរបស់ពួកគេក្នុងការអភិវឌ្ឍជំនាញ ការកែលម្អលទ្ធភាពការងារ សង្គមចល័ត និងគាំទ្រដល់ការរីកចម្រើនប្រកបដោយបរិយាបន្ន។
ក្នុងដំណើរទស្សនៈកិច្ចនេះ ឆ្លុះបញ្ចាំងភាពជាដៃគូរយូរអង្វែងរបស់អង់គ្លេស ក្នុងការជួយដល់ការផ្លាស់ប្តូររបស់ប្រទេសកម្ពុជាពីស្ថានភាពការអភិវឌ្ឍអប្បបរមា និងការខំប្រឹងប្រែងរបស់ខ្លួនក្នុងការលើកកម្ពស់បៃតង និងការរីកចម្រើនសមធម៌។ វាក៏ស្របតាមបំណងដ៏ទូលំទូលាយរបស់ចក្រភពអង់គ្លេស ក្នុងការពង្រឹងទំនាក់ទំនងសេដ្ឋកិច្ចនៅទូទាំងតំបន់អាស៊ីប៉ាស៊ីហ្វិក ដោយទទួលស្គាល់តួនាទីស្នូលរបស់អាស៊ាន ក្នុងការជំរុញពាណិជ្ជកម្ម និងការវិនិយោគក្នុងតំបន់។
ចក្រភពអង់គ្លេស នៅតែប្តេជ្ញាចិត្តធ្វើការយ៉ាងជិតស្និទ្ធជាមួយដៃគូរប្រទេសកម្ពុជា ដើម្បីលើកកម្ពស់វិបុលភាពទៅវិញទៅមក និងបើកឱកាសពាណិជ្ជកម្មថ្មីសម្រាប់ប្រជាជាតិទាំងពីរ។
ទំហំពាណិជ្ជកម្មរវាង កម្ពុជា និងចក្រភពអង់គ្លេស មានទឹកប្រាក់ប្រមាណ ១ពាន់លានដុល្លារ ក្នុងឆ្នាំ២០២៤ ខណៈកម្ពុជានាំចេញទៅកាន់ទីផ្សារ ចក្រភពអង់គ្លេស ដោយភាគច្រើន គឺជាសម្លៀកបំពាក់ និងស្បែកជើង ។ បច្ចុប្បន្នមានរោងចក្រជាង ១៨០ រោងចក្រ កំពុងផលិតសម្លៀកបំពាក់ ស្បែកជើងឱ្យក្រុមហ៊ុនម៉ាកល្បីៗរបស់អង់គ្លេស។
ប្រព័ន្ធអនុគ្រោះពន្ធពាណិជ្ជកម្ម UK DCTS គឺដូចគ្នាទៅនឹងប្រព័ន្ធអនុគ្រោះពន្ធពាណិជ្ជកម្ម EU EBA ដែរបន្ទាប់ពីចក្រភពអង់គ្លេសចាកចេញពីសមាជិកភាព សហភាពអឺរ៉ុប ដោយផ្សារភ្ជាប់លក្ខខណ្ឌសិទ្ធិមនុស្ស និងសិទ្ធិការងារ សម្រាប់ប្រទេសដែលមានការអភិវឌ្ឍតិចតួចជាក់ស្តែងដូចប្រទេសកម្ពុជា។
កិច្ចព្រមព្រៀងពាណិជ្ជកម្មជាមួយចក្រភពអង់គ្លេស មានគោលដៅខ្ពស់ដើម្បីសម្រេចបានការចាកចេញពីប្រទេសដែលមានការអភិវឌ្ឍតិចតួច ក្លាយទៅជាប្រទេសដែលប្រជាពលរដ្ឋ មានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០ ដែលទាមទារឱ្យកម្ពុជាមានការតាំងចិត្ត និងយកចិត្តទុកដាក់ខ្ពស់ ក្នុងក្របខណ្ឌកិច្ចព្រមព្រៀងពាណិជ្ជកម្មរវាង កម្ពុជា និងចក្រភពអង់គ្លេស ដើម្បីកសាងសេដ្ឋកិច្ចកម្ពុជា ជាពិសេសការលើកកម្ពស់ឱ្យមានអភិបាលកិច្ចល្អក្នុងការគោរពសិទ្ធិមនុស្ស សិទ្ធិការងារ៕
