ប៉ូលីសបាននិយាយនៅថ្ងៃចន្ទនេះថា ប៉ូលីសកូរ៉េខាងត្បូង កំពុងស្វែងរកការឃុំខ្លួនភាគច្រើននៃជនជាតិកូរ៉េខាងត្បូងចំនួន ៦៤នាក់ ធ្វើមាតុភូមិនិវត្តន៍ពីប្រទេសកម្ពុជា ជុំវិញបទចោទប្រកាន់ថា ពួកគេជាប់ពាក់ព័ន្ធក្នុងការឆបោកតាមអនឡាញនៅក្នុងប្រទេសអាស៊ីអាគ្នេយ៍។
ទីភ្នាក់ងារសារព័ត៌មានរ៉យទ័រ បានរាយការណ៍នៅថ្ងៃទី២០ ខែតុលា ឆ្នាំ២០២៥នេះថា ពួកគេបាននិយាយនៅក្នុងសេចក្តីថ្លែងការណ៍មួយថា ប៉ូលីសបានដាក់សំណើរទៅកាន់តុលាការ ដើម្បីឃុំខ្លួនពលរដ្ឋចំនួន ៥៨នាក់ដែលបានធ្វើមាតុភូមិនិវត្តន៍ ខណៈដែលមានម្នាក់ត្រូវបានឃុំឃាំងរួចទៅហើយ។
អង្គការសហប្រជាជាតិ និយាយថា មជ្ឈមណ្ឌលឆបោកដែលបានលេចឡើងនៅក្នុងអាស៊ីអាគ្នេយ៍ អំឡុងការរាតត្បាតនៃកូវីដ-១៩ និងជាគោលដៅជនរងគ្រោះ ជុំវិញពិភពលោកជាមួយនឹងការឆបោកតាមទូរស័ព្ទ និងការឆបោកតាមអនឡាញដែលបង្កើតប្រាក់ចំណូលរាប់ពាន់លានដុល្លារ ជារៀងរាល់ឆ្នាំ សម្រាប់បណ្តាញឧក្រិដ្ឋកម្ម។
វាបានប៉ាន់ប្រមាណថា មនុស្សរាប់ពាន់នាក់ កំពុងធ្វើការនៅក្នុងមជ្ឈមណ្ឌលដោយមនុស្សខ្លះ ត្រូវបានទាក់ទាញដោយការសន្យាការងារដែលមានប្រាក់ខែល្អ ប៉ុន្តែមនុស្សជាច្រើនបានបង្ខំឱ្យធ្វើដូច្នោះក្រោមការគំរាមកំហែងនៃអំពើហិង្សា។
ការត្រឡប់មកកម្ពុជារបស់ជនជាតិកូរ៉េខាងត្បូង កាលពីថ្ងៃសៅរ៍ បានកើតឡើងបន្ទាប់ពីការស្លាប់របស់និស្សិតកូរ៉េខាងត្បូងម្នាក់ ដែលត្រូវល្បូងទៅប្រទេសកម្ពុជាសម្រាប់អ្វីដែលគាត់គិតថា គឺជាការងារដែលមានប្រាក់ខែខ្ពស់។
កូរ៉េខាងត្បូង បានចេញការហាមឃាត់ការធ្វើដំណើរ‘‘កូដខ្មៅ’’ ផ្នែកខ្លះនៃប្រទេសកម្ពុជាជុំវិញការកើនឡើងថ្មីៗនេះនៅក្នុងករណីជុំវិញការឃុំខ្លួន និង‘‘ការក្លែងបន្លំការងារ’’។
រដ្ឋាភិបាលបានបង្កើតក្រុមការងារ ដើម្បីជួយប្រជាពលរដ្ឋដែលត្រូវបានល្បួងឱ្យធ្វើការនៅក្នុងបរិវេណឆបោកនិងធានាការដោះលែងអ្នកដែលប្រព្រឹត្តផ្ទុយទៅនឹងបំណងរបស់ពួកគេ។
យោងតាមប៉ូលីស បានឱ្យដឹងថា អ្នកដែលត្រឡប់មកវិញ ត្រូវបានចាប់ខ្លួននៅក្នុងប្រទេសកម្ពុជាក្នុងខែថ្មីៗនេះ ដែលមានជាប់ពាក់ព័ន្ធក្នុងឧក្រិដ្ឋកម្មផ្សេងៗ ដែលទាក់ទងការបន្លំជាសំឡេង ការឆបោកស្នេហា និងគម្រោងការក្លែងបន្លំដោយ‘‘មិនបង្ហាញ’’។
“No-show” ឬការមិនបង្ហាញគឺជាការបោកប្រាស់ប្រភេទថ្មីនៃការក្លែងបន្លំ ដែលអ្នកបោកប្រាស់ធ្វើការកក់ទុកជាមុន ឬទទួលការបង់ប្រាក់ជាមុន ក្រោមអត្តសញ្ញាណក្លែងក្លាយ ហើយក៏បាត់ខ្លួនទៅជាមួយនឹងលុយ។
រដ្ឋាភិបាលចក្រភពអង់គ្លេស បាននិយាយថា មជ្ឈមណ្ឌលដែលមានទីតាំងនៅប្រទេសកម្ពុជា មីយ៉ាន់ម៉ា និងទូទាំងអាស៊ីអាគ្នេយ៍ បានប្រើពាណិជ្ជកម្មការងារក្លែងបន្លំ ដើម្បីទាក់ទាញកម្មករ បន្ទាប់មកត្រូវបានបង្ខំឱ្យប្រព្រឹត្តការក្លែងបន្លំតាមអនឡាញ ក្រោមការគំរាមកំហែងនៃការធ្វើទារុណកម្ម។
យោងតាមការប៉ាន់ស្មានពីមន្ត្រីកូរ៉េខាងត្បូងថា ប្រតិបត្តិការណ៍ឆបោកនៅក្នុងប្រទេសកម្ពុជា ត្រូវបានគេប៉ាន់ស្មានថា មានកម្មករប្រហែល ២សែននាក់(២០០០០០) ក្នុងនោះមានជនជាតិកូរ៉េខាងត្បូង ១០០០នាក់ផងដែរ។
ប៉ូលីសបាននិយាយថា ‘‘ប៉ូលីសគ្រោងនឹងស៊ើបអង្កេតឱ្យបានហ្មត់ចត់រាល់បទចោទប្រកាន់ ជុំវិញបរិវេណឆបោករបស់កម្ពុជា’’ រួមទាំងការចាប់ជំរិត ឬការឃុំខ្លួនជនជាតិកូរ៉េខាងត្បូងផងដែរ។
ប៉ូលីសបានបន្ថែមថា ពួកគេកំពុងធ្វើការត្រួតពិនិត្យលើការអះអាងមនុស្ស៤នាក់ ដែលត្រឡប់មកពីប្រទេសកម្ពុជានាពេលចុងសប្តាហ៍ ដែលត្រូវបានឃុំឃាំង និងវាយដំដោយអង្គការឧក្រិដ្ឋកម្មដែលដំណើរការនៅក្នុងបរិវេណឆបោក៕
