ក្រសួងមហាផ្ទៃ ប្រកាសដកខ្លួនថា លោក ស សុខា មិនជាប់ពាក់ព័ន្ធជាមួយនឹងកាស៊ីណូអនឡាញ ក្រោយរបាយការណ៍ពីអន្តរជាតិរកឃើញមន្ត្រីជាន់ខ្ពស់កម្ពុជាមួយចំនួន ក្នុងនោះមានទាំងរដ្ឋមន្ត្រីក្រសួងមហាផ្ទៃផងនោះ ថាមានជាប់ពាក់ព័ន្ធនឹងបទឧក្រិដ្ឋឆបោកតាមអនឡាញលំដាប់ពិភពលោក។
យ៉ាងណា អ្នកឃ្លាំមើល យល់ថា ដើម្បីលាងជម្រះខ្លួនពីបញ្ហានេះ មេដឹកនាំ ក៏ដូចជាមន្ត្រីរដ្ឋាភិបាលកម្ពុជា គួរតែស៊ើបអង្កេតស្រាវជ្រាវឱ្យបានស៊ីជម្រៅ និងចាប់ខ្លួនមេខ្លោងដែលពាក់ព័ន្ធនឹងបទឧក្រិដ្ឋនេះ យកមកបំភ្លឺវិញ ជាជាងការបំភ្លឺតែខ្លួនឯង។
ការប្រកាសរបស់ក្រសួងនេះ ធ្វើឡើងក្រោយពីមានការផ្សព្វផ្សាយព័ត៌មានមួយចំនួន ដោយផ្អែកលើរបាយការណ៍ដែលថា លោក ស សុខា រដ្ឋមន្ត្រីក្រសួងមហាផ្ទៃ ជាសហវិនិយោគិនជាមួយនឹងក្រុមហ៊ុនកាស៊ីណូ ជីន ប៉ី នៅក្រុងព្រះសីហនុ ខេត្តព្រះសីហនុ។
នៅថ្ងៃទី២០ ខែតុលា ឆ្នាំ២០២៥ ក្រសួងមហាផ្ទៃ ចេញសេចក្តីបំភ្លឺមួយថា លោក ស សុខា រដ្ឋមន្ត្រីក្រសួងមហាផ្ទៃ ពុំមានការពាក់ព័ន្ធ និងពុំមានភាគហ៊ុនណាមួយជាមួយនឹងអាជីវកម្មកាស៊ីណូ ជីន ប៉ី (Jin Bei) ដូចការលើកឡើងនៅក្នុងរបាយការណ៍ និងការចោទប្រកាន់នោះឡើយ។
ក្រសួងបន្តថា រដ្ឋមន្ត្រីក្រសួងមហាផ្ទៃរូបនេះ បាននិងកំពុងខិតខំប្រឹងប្រែងក្នុងការសម្របសម្រួលដឹកនាំរដ្ឋបាលថ្នាក់ក្រោមជាតិ និងការគ្រប់គ្រងថែរក្សាសន្តិសុខ សណ្តាប់ធ្នាប់សាធារណៈ សំដៅទប់ស្កាត់ និងលុបបំបាត់បទល្មើសគ្រប់ប្រភេទជាអាទិ៍ បទល្មើសបច្ចេកវិទ្យា អំពើជួញដូរមនុស្សគ្រប់ទម្រង់ និងបទល្មើសជួញដូរគ្រឿងញៀនជាដើម។
ការណ៍នេះ ក្រសួងថា ការផ្សព្វផ្សាយដែលចោទប្រកាន់ទៅលើ លោក ស សុខា ថាមានពាក់ព័ន្ធនឹងកាស៊ីណូល្បែងអនឡាញមួយនេះ ជារឿងមិនពិត និងថា ទង្វើនេះធ្វើឱ្យប៉ះពាល់យ៉ាងធ្ងន់ធ្ងរដល់កិតិ្តយសស្ថាប័នជាតិទាំងមូល និងសេចក្តីថ្លៃថ្នូររបស់បុគ្គល។
បើតាមក្រសួងមហាផ្ទៃ ក្នុងរយៈពេល ៩ខែ ឆ្នាំ២០២៥ ក្រោមការដឹកនាំរបស់លោក ស សុខា សមត្ថកិច្ចបានស្រាវជ្រាវ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scam) ចំនួន ៤៨លើក ដោយឃាត់ខ្លួនមនុស្សបញ្ជូនទៅតុលាការចំនួន ១៦៨នាក់ និងបណ្តេញចេញពីកម្ពុជា ២ ៧២២នាក់។ បទល្មើសជួញដូរមនុស្ស ១៤៧ករណី ឃាត់ខ្លួន ២០៥នាក់ កសាងសំណុំរឿងទៅតុលាការ និងរំដោះជនរងគ្រោះបាន ៤៨៣នាក់។ បទល្មើសគ្រឿងញៀន ៦ ៩១៤ករណី ឃាត់ខ្លួនអ្នកពាក់ព័ន្ធ ១៧ ៤០៦នាក់ រឹបអូសគ្រឿងញៀនគ្រប់ប្រភេទបានប្រមាណ ៧តោន និង ៥០៩គីឡូក្រាម ព្រមទាំងសារធាតុគីមីផ្សំប្រមាណ ៤៨តោន។
ទោះយ៉ាងណា ប្រធានអង្គការប្រជាធិបតេយ្យខ្មែរ (KOD) លោក ស៊ឹង សែនករុណា យល់ថា ការបំភ្លឺឬការច្រានចោលរបស់មេដឹកនាំ និងមន្ត្រីរដ្ឋាភិបាលកម្ពុជា ចំពោះរបាយការណ៍ជាតិ និងអន្តរជាតិ ដែលរកឃើញ ទាំងរឿងការរំលោភសិទ្ធិមនុស្ស និងបទឧក្រិដ្ឋឆបោកតាមអនឡាញនេះជាដើម វាក្លាយជាប្រពៃណី និងជារឿងធម្មតាទៅហើយ ខណៈបញ្ហាបទឧក្រិដ្ឋអនឡាញនេះ បាននិងកំពុងកើតមានជាប្រព័ន្ធ ដែលមិនទាន់មានការទប់ស្កាត់ឱ្យមានប្រសិទ្ធភាពនៅឡើយ។
លោកថា៖ «ការឆ្លើយតបការបំភ្លឺណាមួយ គឺពិតជាសិទ្ធិក្នុងការឆ្លើយតបបំភ្លឺចឹងមែន ប៉ុន្តែអ្វីដែលគួរធ្វើឱ្យមានការជឿជាក់បានហ្នឹង គឺត្រូវធ្វើការស៊ើបអង្កេតឱ្យបានស៊ីជម្រៅ ហើយចាប់ខ្លួនមេខ្លោថដែលពាក់ព័ន្ធក្នុងបទល្មើសហ្នឹង ឱ្យពួកគេមកសារភាព ឬក៏បង្ហាញឱ្យច្បាស់ថា ពួកគេពិតជាប្រព្រឹត្តដោយខ្លួនគេ ដោយអត់មានពាក់ព័ន្ធជាមួយនឹងលោក ស សុខា អីចឹងទៅ អាហ្នឹងទើបមានឥទ្ធិពល ហើយអាចធ្វើឱ្យមានការជឿជាក់ជាង ក្នុងការបំភ្លឺតែខ្លួនឯង ខណៈដែលវិធានការដែលធ្វើឱ្យស៊ីជម្រៅ ធ្វើឱ្យមានការចាប់ខ្លួនទៅដល់មេខ្លោងធំៗ ដូចដែលមានការចោទប្រកាន់នៅក្នុងរឿងហ្នឹង ឧទាហរណ៍ដូចជា លោក ចេន ហ៊្សី ដែលជាជនជាតិចិនហ្នឹងជាដើម ហើយប្រសិនជាចាប់ខ្លួនហើយ បុគ្គលរូបនោះឆ្លើយថាអត់មានពាក់ព័ន្ធនឹងលោក ស សុខា ខ្ញុំជឿជាក់ថា ប្រជាពលរដ្ឋក៏ដូចជាសហគមន៍ជាតិ អន្តរជាតិ គេអាចជឿជាក់បាន»។
បើតាម លោក ស៊ឹង សែនករុណា បើសិនជារដ្ឋាភិបាលកម្ពុជា មិនទទួលយកនូវអ្វីដែលសហគមន៍ជាតិ និងអន្តរជាតិ បានរកឃើញ និងចាត់វិធានដោះស្រាយបន្ទាន់ទេ នោះបញ្ហាបទឧក្រិដ្ឋឆបោកតាមអនឡាញ ដែលកំពុងល្បីកក្រើកនៅកម្ពុជានេះ នឹងមិនអាចលុបបំបាត់ ឬទប់ស្កាត់បាននោះទេ ហើយបញ្ហានេះនឹងធ្វើឱ្យមុខមាត់កម្ពុជាបន្តស្អុយរលួយ ឬអាប់ឱននៅលើឆាកអន្តរជាតិ ដែលធ្វើឱ្យគេមានការខ្លាចរអាក្នុងការចូលមកវិនិយោគ និងទេសចរណ៍នៅកម្ពុជា ហើយទំនាក់ទំនងនយោបាយអន្តរជាតិក៏ធ្លាក់ចុះផងដែរ។
លោកបន្ថែមថា៖ «ហើយបើកាលណាមានបញ្ហាហ្នឹងកើតឡើង យើងដឹងហើយសេដ្ឋកិច្ចប្រទេសកម្ពុជាយើងកំពុងធ្លាក់ដុនដាបស្រាប់ផង ពលរដ្ឋកំពុងតែរងគ្រោះនូវវិបត្តិជីវភាព ក្រីក្រធ្ងន់ធ្ងរទៅៗផង ចឹងវារឹតតែធ្វើឱ្យកម្ពុជាហ្នឹងកាន់តែធ្លាក់ កាន់តែមានសភាពយ៉ាប់យឺនបន្តទៅទៀង ចឹងវាអត់មានអីមានភាពធូរស្រាលមកវិញ ដើម្បីឱ្យសហគមន៍ជាតិ អន្តរជាតិ ឬគេជឿជាក់បានហ្នឹង វាកាន់តែធ្វើឱ្យកម្ពុជាកាន់តែឆ្ងាយពីខាងសហគមន៍អន្តរជាតិហើយ»។
ប្រភពនៅលើគេហទំព័ររបស់ក្រុមហ៊ុន DW Capital Holdings មានមូលដ្ឋាននៅប្រទេសសិង្ហបុរី (Singapore) ដែលជាក្រុមហ៊ុនគ្រប់គ្រងមូលនិធិឱ្យការវិនិយោគផ្ទាល់របស់ លោក ចេន ហ្ស៊ី បានសរសេរថា លោក ចេន ហ្ស៊ី (Chen Zhi) មានដើមកំណើតជាជនជាតិចិនទទួលបានសញ្ជាតិខ្មែរ និងមានងារជាឧកញ៉ា ក្នុងពេលរកស៊ីនៅកម្ពុជានេះ បានបង្កើតអាជីវកម្មរួមគ្នាមួយជាមួយ លោក ស សុខា ដែលក្រុមហ៊ុននោះ មានឈ្មោះថា ជីនប៉ី (Jinbei Cambodia Investment Co. Ltd.)។
ប្រភពនោះបន្តថា កាលពីពេលនោះ ឪពុកលោក ស សុខា គឺលោក ស ខេង ជារដ្ឋមន្ត្រីក្រសួងមហាផ្ទៃ មុននឹងលោកបានផ្ទេរតំណែងនេះឱ្យទៅ លោក ស សុខា នៅឆ្នាំ២០២៣។ តែយ៉ាងណា អាជីវកម្មរួមគ្នាមួយជាមួយលោក ស សុខា នេះ ត្រូវបានរំលាយចោលនៅឆ្នាំ២០២១។
ស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន មានប្រសាសន៍ថា លោកមិនបានដឹងការពិតនៅពីក្រោយបញ្ហាឧក្រិដ្ឋកម្មតាមអនឡាញ ដែលកំពុងល្បីកក្រើកនៅកម្ពុជានេះទេ ប៉ុន្តែលោកយល់ថា បញ្ហាទាំងនេះកើតឡើងបច្ចុប្បន្ន ដោយសារតែកម្ពុជា មិនព្រមទទួលស្គាល់ការពិត ហើយចាត់វិធានការស៊ើបអង្កេត ដោះស្រាយនោះទេ ផ្ទុយទៅវិញតែងតែប្រកែក ឬច្រានចោល និងការពារគ្នាទៅវិញទៅមក នៅពេលដែលមានរបាយការណ៍ ឬការរកឃើញនានាពីសហគមន៍ជាតិ និងអន្តរជាតិ។
លោកថា សម្រាប់នៅបណ្តាប្រទេសប្រជាធិបតេយ្យ នៅពេលដែលមានការចោទប្រកាន់ណាមួយ មិនថាការចោទប្រកាន់ទៅលើថ្នាក់ដឹកនាំ ឬមន្ត្រីធំៗក្តី ក៏គេមានការស៊ើបអង្កេត រហូតដល់មន្ត្រីខ្លះប្រកាសចុះចេញពីតំណែង ដើម្បីបើកឱ្យមានការស៊ើបអង្កេតជាដើម។
លោកថា៖ «ប៉ុន្តែប្រទេសយើងអត់ទេ កាលណាមានការចោទប្រកាន់ តែងតែបដិសេធហើយបន្តកាន់អំណាចតទៅទៀត អត់បើកផ្លូវឱ្យមានការស៊ើបអង្កេតទេ អាហ្នឹងដែលជាបញ្ហាសម្រាប់ប្រទេសយើង ដូច្នេះខ្ញុំគិតថា រឿងពិតយ៉ាងម៉េចយើងអត់ហ៊ានថាទេ ព្រោះអាចប្រឈមផ្លូវច្បាប់ ព្រោះបើសិនជាយើងថា យើងចោទប្រកាន់ ប៉ុន្តែបើអ្វីដែលគេចោទប្រកាន់ យើងគួរតែបើកផ្លូវឱ្យមានការស៊ើបអង្កេត ត្រឹមត្រូវទៅ ដើម្បីបង្ហាញពីភាពស្អាតស្អំរបស់មន្ត្រីយើង ហើយជាពិសេសថ្នាក់ដឹកនាំរបស់យើង»។
សហរដ្ឋអាមេរិក និងចក្រភពអង់គ្លេស នៅថ្ងៃទី១៥ ខែតុលា ឆ្នាំ២០២៥ បានរួមគ្នាដាក់ទណ្ឌកម្មធ្ងន់ធ្ងរលើក្រុមហ៊ុន Prince Group របស់អ្នកឧកញ៉ា ចេន ហ្ស៊ី ដែលជាទីប្រឹក្សារបស់ប្រធានព្រឹទ្ធសភាកម្ពុជា លោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត ជុំវិញឧក្រិដ្ឋកម្មឆបោកតាមអនឡាញ។ ជាមួយគ្នានេះ អាមេរិកបានសម្រេចបង្កកប្រាក់ លោក ចេន ហ្ស៊ី ក្នុងទឹកប្រាក់ជាង ១៥ពាន់លានដុល្លារ។
ក្រៅពី លោក ចេន ហ្ស៊ី មន្រ្តីជាន់ខ្ពស់រដ្ឋាភិបាលកម្ពុជា និងឧកញ៉ាមួយចំនួន ក៏ជាប់ក្នុងបញ្ជីខ្មៅរបស់អាមេរិក ពាក់ព័ន្ធនឹងការចាប់ជម្រិតតាមប្រព័ន្ធអនឡាញនេះផងដែរ ក្នុងនោះមានដូចជា លោកនេត សារឿន ឧបនាយករដ្ឋមន្រ្តីនិងជាក្មួយប្រសារលោក ហ៊ុន សែន ឧកញ៉ាហ៊ុន តូ ជាក្មួយលោកហ៊ុន សែន ឧកញ៉ាកុក អានសមាជិកព្រឹទ្ធសភា លោកឌី វិជ្ជា កូនប្រសារលោក ហ៊ុន សែន លោកគួច ចំរើន អភិបាលខេត្តកណ្តាល លោកស សុខា រដ្ឋមន្ត្រីក្រសួងមហាផ្ទៃ និងលោកយឹម លក្ខណ៍ ប្អូនថ្លៃលោកហ៊ុន ម៉ានី ។ល។
មកដល់ពេលនេះ មន្ត្រីទាំងនោះ នៅមិនទាន់មានការចេញមុខបំភ្លឺជុំវិញបញ្ហានេះ ដូចខាងក្រសួងមហាផ្ទៃនៅឡើយ។
បើតាមសារព័ត៌មានក្នុងស្រុកមួយចំនួន កាស៊ីណូ ជីនប៉ី ដែលមានមូលដ្ឋាននៅខេត្តព្រះសីហនុ នាពេលបច្ចុប្បន្ននេះ ហាក់មានការពង្រីកសាខាមួយចំនួន ដូចជា កាស៊ីណូជីនប៉ី២ កាស៊ីណូជីងប៉ី៤ ជាដើម។ ក្នុងនោះ បើតាមគេហទំព័រ SBM News កាលពីថ្ងៃទី២១ ខែឧសភា ឆ្នាំ២០២៤ នៅអគារកាស៊ីណូជីនប៉ី៤ សមត្ថកិច្ចខេត្តព្រះសីហនុ បានចុះបង្ក្រាបជនបរទេសរាប់សិបនាក់ ក្រោយមានសេចក្តីរាយការណ៍ថា មានការផ្ទុះអាវុធ និងមានមនុស្សស្លាប់ ដែលជាករណីជម្លោះរវាងជនជាតិឥណ្ឌាគ្នាឯង ដែលចង់ផ្លាស់ប្តូរកន្លែងការងារថ្មី។
ជាមួយគ្នានេះ មេដឹកនាំសហជីព លោក ម៉ម រិទ្ធី ក៏ត្រូវបានតុលាការក្រុងភ្នំពេញ កាត់ទោសឱ្យជាប់ពន្ធនាគារ ១៨ខែ ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» និងបទ «ធ្វើឱ្យបាត់បង់ជំនឿលើសេចក្តីសម្រេចរបស់តុលាការ» និងពិន័យជាប្រាក់ពីរលានរៀល (ប្រមាណ ៥០០ដុល្លារ) កាលពីអំឡុងខែឧសភា ឆ្នាំ២០២៤ ជុំវិញការចេញមុខរបស់លោក ទាមទារយុត្តិធម៌ឱ្យបុគ្គលិកជាស្ត្រីម្នាក់ ធ្វើការនៅកាស៊ីណូ ជីនប៉ី២ ក្នុងខេត្តព្រះសីហនុនេះផងដែរ។
លោក រិទ្ធី តាមចោទថា បានឡាយតាមបណ្តាញសង្គមហ្វេសប៊ុក រិះគន់កាស៊ីណូ ជីនប៉ី ២ ក្នុងខេត្តព្រះសីហនុ ដោយថាក្រុមហ៊ុននេះបានចោទប្រកាន់បុគ្គលិកម្នាក់ឈ្មោះ ម៉ម ស្រីលក្ខណ៍ ថាបានជួយភ្ញៀវបន្លំឈ្នះប្រាក់ប្រមាណ ១៨ ០០០ដុល្លារ ហើយភ្ញៀវនោះលែងមកលេងកាស៊ីណូទៀត។ អំឡុងពេលនោះ លោក រិទ្ធី ក៏បានរិះគន់តុលាការផងដែរ ចំពោះការឃុំខ្លួនអ្នកនាង ម៉ម ស្រីលក្ខណ៍ ដោយគ្មានភស្តុតាង និងបានស្នើឱ្យតុលាការបញ្ចេញវីដេអូ ដែលតុលាការយកមកចោទប្រកាន់លើរូបនាង។
បើតាមអ្នកឃ្លាំមើល កម្ពុជាគួរមានស្រាវជ្រាវស៊ើបអង្កេតឱ្យបានច្បាស់លាស់ និងបង្ក្រាបបញ្ហាបទល្មើសឆបោកតាមអនឡាញនេះ ឱ្យមានប្រសិទ្ធភាព ដើម្បីឆ្លើយតបទៅនឹងរបាយការណ៍ ឬក៏ការរកឃើញនានា ជាជាងការប្រកែកយករួចខ្លួន និងការពារបក្ខពួក បើពុំនោះទេ ស្ថានភាពបទឧក្រិដ្ឋដែលកំពុងល្បីខ្ទរខ្ទារនៅលើពិភពលោកនេះ នឹងរីកដុះដាលកាន់តែធ្ងន់ធ្ងរទៅៗ ហើយស្ថានភាពកាន់អាក្រក់ខ្លាំងថែមទៀត៕
