ក្រោយពីសហរដ្ឋអាមេរិក និងចក្រភពអង់គ្លេស ចាត់វិធានការមេឧក្រិដ្ឋជនលំដាប់ពិភពលោក លោក ចេន ហ្ស៊ី ស្ថាបនិកធនាគារព្រីនស៍ និងជាទីប្រឹក្សាមេដឹកនាំកំពូលកម្ពុជានោះ ជំរុញឱ្យមានការព្រមានពីហានិភ័យប្រព័ន្ធធនាគារនៅកម្ពុជា បើមិនចាប់ខ្លួន លោក ចេន ហ្ស៊ី ឱ្យអន្តរជាតិ កាត់ទោសទាន់ពេល។
ការព្រមាននេះ ក្រោយសហរដ្ឋអាមរិក និងចក្រភពអង់គ្លេស បានរួមគ្នាបង្កកទ្រព្យសម្បត្តិក្រុមហ៊ុនព្រីនស៍របស់ឧកញ៉ា ចេន ហ្ស៊ី ទីប្រឹក្សា លោក ហ៊ុន សែន ដែលពាក់ព័ន្ធឧក្រិដ្ឋកម្មឆបោកអនឡាញខា្នតអន្តរជាតិ បង្កការភ័យខ្លាចដល់បណ្តាប្រទេសទូទាំងពិភពលោក។
ការិយាល័យស៊ើបអង្កេតសហព័ន្ធអាមេរិក FBI រកឃើញថា លោក ចេន ហ្ស៊ី បានធ្វើឱ្យក្រុមហ៊ុន Prince Group ក្លាយជាអង្គការឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី ដែលកំពុងប្រតិបត្តិការនៅក្នុងប្រទេសចំនួន៣០នៅលើពិភពលោក។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ យល់ថា បើរដ្ឋាភិបាលគ្រួសារហ៊ុនមិនចាប់ខ្លួនឧក្រិដ្ឋជន ចេន ហ្ស៊ី ឱ្យអន្តរជាតិកាត់ទោសទេ វាជាគ្រោះថ្នាក់ដល់ប្រព័ន្ធធនាគារនៅទូទាំងប្រទេសកម្ពុជា។
ក្នុងន័យនេះ លោកពន្យល់ថា សហរដ្ឋអាមេរិកនឹងបន្តដាក់ទណ្ឌកម្មបន្ថែមទៀតលើកម្ពុជា ដែលជំរុញឱ្យបណ្តាអ្នកវិនិយោគធំៗ ដកសេចក្តីទុកចិត្តលើប្រព័ន្ធធនាគារកម្ពុជា ពាក់ព័ន្ធបទឧក្រិដ្ឋ ដែលជាហានិភ័យធ្ងន់ធ្ងរដល់វិបត្តិសេដ្ឋកិច្ចកម្ពុជាក្នុងពេលដ៏ខ្លី។
លោកថា៖ «មានបញ្ហាអ្វីដល់ប្រទេសកម្ពុជាខ្លាំងមែនទែនហើយ។ មានបញ្ហា សេដ្ឋកិច្ចគ្រប់វិស័យទាំងអស់ វាប៉ះពាល់ទាំងអស់ហើយ។ វិនិយោគគេពិត! ប្រាកដជាអត់មានទៅកម្ពុជាទេ ជាពិសេសឈ្មោះ ហ៊ុន សែន ឈ្មោះកម្ពុជាហ្នឹងគេអត់មក។ ប៉ះពាល់ទាំងអស់ហើយចេញមកនិយាយថា មិនប៉ះពាល់ទេ ដោយមានធនាគារជាតិកម្ពុជា អ្នករ៉ាប់រងទាំងអស់។ និយាយហ្នឹង និយាយកូនក្មេង ដូចកូនក្មេង! ប៉ះពាល់ទាំងអស់ឲ្យធនាគាររតនាគារនៅកណ្តាលនៅសហរដ្ឋអាមេរិក គេចាត់វិធានការ ប៉ះពាល់ទាំងអស់ ទាល់តែគាត់កុំចាយលុយដុល្លារ ចាយលុយខ្មែរអាហ្នឹងបានអត់ប៉ះពាល់»។
ជាងនេះទៀត លោកថា ការបង្រ្កាបមេឧក្រិដ្ឋជនធំៗរបស់សហគមន៍អន្តរជាតិពេលនេះ ក៏ជាគ្រោះថ្នាក់អំណាចគ្រួសារហ៊ុនដែរ បើមិនវះកាត់ក្រុមឧក្រិដ្ឋជនដែលនៅក្បែរខ្លួនចោលទេនោះ។
លោកថា៖ «របបហ៊ុន សែន នឹងត្រូវរលាយជាមួយក្រុមម៉ាហ្វីយ៉ាចិន ដែលអន្តរជាតិកំពុងតែបង្ក្រាប។ លោក ហ៊ុន សែន គាត់កំពុងតែបារម្ភភ័យខ្លាំងណាស់ ដូចជា គោដំបៅខ្នងចឹង! ព្រោះគាត់ទាក់ទងយ៉ាងជ្រៅ ក្នុងរឿងឧក្រិដ្ឋកម្មទាំងអស់នោះ! ដែលពិភពលោកកំពុងតែបង្រ្កាបតែកម្ចាត់ឧក្រិដ្ឋកម្មឆ្លងដែន នឹងធ្វើឱ្យរបបត្រកូលហ៊ុន ដួលរលំជាមិនខាន ពីព្រោះនៅជុំវិញគាត់សុទ្ធតែជាមេចោរម៉ាហ្វីយ៉ា ហើយមានឧក្រិដ្ឋជនឈ្មោះ ចេន ហ្ស៊ី ចឹងហើយនៅជុំវិញទាំងអស់ ដែលចក្រភពអង់គ្លេស អាមេរិកគេដាក់ក្នុងបញ្ជីខ្មៅហ្នឹង គឺបញ្ហា! ចឹងគាត់ ហ៊ុន សែន ភ័យខ្លាំងមែនទែនពីរឿងឧក្រិដ្ឋកម្មឆ្លងដែននេះ»។
យ៉ាងណា ធនាគារព្រីនស៍ កាលពីថ្ងៃទី១៧ ខែតុលា បានប្រកាសថា ខ្លួនកំពុងស្វែងរកយុទ្ធសាស្ត្រដើម្បីចាកចេញពីទណ្ឌកម្មនេះ និងប្តេជ្ញារក្សាភាពស្មោះត្រង់ ស្ថិរភាពហិរញ្ញវត្ថុ ព្រមទាំងធ្វើការយ៉ាងជិតស្និទ្ធជាមួយធនាគារជាតិនៃកម្ពុជា ដើម្បីបង្ហាញតម្លាភាពគ្រប់ដំណាក់កាល។
បន្ថែមលើនេះ ធនាគារជាតិនៃកម្ពុជាបានគូសបញ្ជាក់ដែរថា ខ្លួនកំពុងចាត់វិធានការចាំបាច់នានា ដើម្បីធានាប្រតិបត្តិការជាប្រក្រតីនូវគណនីទាំងឡាយរបស់អតិថិជន នៅធនាគារព្រីនស៍ ជាពិសេសដើម្បីធានានូវសុវត្ថិភាពសាច់ប្រាក់របស់អតិថិជនរបស់ធនាគារនេះ។
ការចេញមុខអះអាងនេះ ក្រោយក្រុមអតិថិជនរបស់ធនាគារព្រីនស៍ បានអះអាងលើបណ្តាញសង្គមជុំវិញភាពមិនប្រក្រតី ក្នុងប្រតិបត្តិការផ្ទេរសាច់ប្រាក់ទៅធនាគារផ្សេង ដោយថាលុយរបស់ពួកគេត្រូវបានកាត់ចេញ តែមិនទទួលបានក្នុងគណនីធនាគារផ្សេងអស់ជាច្រើនថ្ងៃ។
យ៉ាងណា អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ថា ទោះបីជាធនាគារព្រីនស៍ជាស្ថាប័នឯកជនពិតមែន ប៉ុន្តែស្ថិតក្រោមការគ្រប់គ្រងរបស់ធនាគារជាតិនៃកម្ពុជា ដែលលោកថា នេះជាវិញ្ញាសារដែលត្រូវដោះស្រាយបន្ទាន់ ដើម្បីទប់ស្កាត់ការជាប់គាំងប្រតិបត្តិការប្រព័ន្ធធនាគារនៅកម្ពុជា។
សម្រាប់លោក សុជាតិ ទោះជាលោក ចេន ហ្ស៊ី ត្រូវបានអន្តរជាតិ រួមទាំងប្រទេសចិនផង លាតត្រដាងថា បុគ្គលនេះមានជាប់ពាក់ព័ន្ធពីឧក្រិដ្ឋកម្មឆបោក លាងលុយកខ្វក់ក៏ដោយ ក៏រដ្ឋាភិបាលកម្ពុជាមិនបានចាប់ខ្លួន លោក ចេន ហ្ស៊ី ឱ្យទៅអន្តរជាតិកាត់ទោសតាមផ្លូវច្បាប់នោះឡើយ។
ក្នុងន័យនេះ លោកថា ការមិនចាត់វិធានការលើរឿងនេះ នោះអន្តរជាតិនឹងចាត់ទុកថាកម្ពុជាគ្មានចេតនា ក្នុងការបង្រ្កាបបទឧក្រិដ្ឋឆបោកជាមួយអន្តរជាតិនេះទេ ហើយវានឹងប៉ះពាល់ដល់ការវិនិយោគ អ្នកជំនួញធំៗលែងទុកចិត្តប្រព័ន្ធធនាគារកម្ពុជា ដែលរាលដាលដល់ប្រតិបត្តិការផ្ទេរសាច់ប្រាក់ ធ្វើឱ្យជាប់គាំងសេដ្ឋកិច្ចផងដែរ។
លោកថា៖ «យើងសង្ឃឹមថា រដ្ឋាភិបាលនឹងដោះស្រាយបញ្ហាទាំងអស់នេះ ពីព្រោះបើសិនជាក្នុងករណីយើងមិនអាចដោះស្រាយ ចឹងប្រព័ន្ធហិរញ្ញវត្ថុកម្ពុជានៅលើឆាកអន្តរជាតិអាចត្រូវបានគេមើលឃើញថា វាមានភាពមិនប្រក្រតី ដូច្នេះរាល់ការរកស៊ីការជួញដូរធំៗជាមួយនឹងអ្នកវិនិយោគសុចរិតអីយ៉ាងណាក៏ដោយ ក៏ត្រូវបានដាក់ការសង្ស័យពីសហគមន៍អន្តរជាតិ ដូច្នេះវានឹងធ្វើឲ្យមានការជាប់គាំងនៅក្នុងសេដ្ឋកិច្ចកម្ពុជា នៅក្នុងរយៈពេលខាងមុខ បើសិនជាយើងមិនមានចំណាត់ការ ឬក៏មានវិធានការពិសេសទាន់សភាពការណ៍ណាមួយ ដើម្បីដោះស្រាយបញ្ហាទាំងអស់ហ្នឹងទេ»។
កាលពីថ្ងៃទី១៤ ខែតុលា អាមេរិក និងចក្រភពអង់គ្លេសរួមគ្នាដាក់ទណ្ឌកម្មបង្កកទ្រព្យសម្បត្តិក្រុមហ៊ុនព្រីនស៍របស់ឧកញ៉ា ចេន ហ្ស៊ី ទីប្រឹក្សា លោក ហ៊ុន សែន ក្រោយរកឃើញថា ជាបណ្តាញឧក្រិដ្ឋកម្មឆបោកខ្នាតអន្តរជាតិ លួចលុយរាប់ពាន់លានដុល្លារ ពីជនរងគ្រោះជុំវិញពិភពលោក។
រដ្ឋាភិបាលអង់គ្លេស បានចោទថា លោក ចេន ហ្ស៊ី គឺជាមេបណ្ដាញក្រុមឧក្រិដ្ឋជនឆបោកតាមអនឡាញ និងបក្ខពួក កំពុងបើកអាជីវកម្មជាច្រើនកន្លែងនៅក្នុងប្រទេសអង់គ្លេស ក្នុងនោះរួមទាំងការវិនិយោគនៅក្នុងទីផ្សារអចលនទ្រព្យក្នុងទីក្រុងឡុងដ៍ (London) ការកាន់កាប់ភូមិគ្រឹះមួយកន្លែង ដែលមានតម្លៃ១២លានផោន មានអាគារការិយាល័យតម្លៃ ១០០លានផោន រួមទាំងផ្ទះល្វែងចំនួន១៧ផ្សេងទៀត៕
