ប្រទេសកូរ៉េ ត្រៀមដាក់ទណ្ឌកម្មហិរញ្ញវត្ថុលើជំនួញដែលជាប់ពាក់ព័ន្ធជាមួយបណ្តាញឧក្រិដ្ឋកម្ម ដែលមានមូលដ្ឋាននៅប្រទេសកម្ពុជា ដែលដំណើរប្រតិបត្តិការជួញដូរមនុស្ស និងការឆបោកទ្រង់ទ្រាយធំ ដើម្បីឆ្លើយតបទៅនឹងការកើនឡើងការចាប់ជំរិតនៃប្រជាពលរដ្ឋកូរ៉េ នៅក្នុងប្រទេសអាស៊ីអាគ្នេយ៍។
ដឹខូរៀថាម(The Korea Times) បានផ្សាយនៅថ្ងៃទី១៩ ខែតុលា ឆ្នាំ២០២៥នេះថា ការបញ្ជាក់អំពីវិធានការណ៍នេះ គឺត្រូវបានរំពឹងទុកថានឹងប្រកាសនៅចុងខែនេះ និងបង្ហាញពីសកម្មភាពនៃការសម្រេចចិត្តរបស់ទីក្រុងសេអ៊ូល ដោយមានការលើកឡើងពីការរិះគន់ថា រដ្ឋាភិបាលមានសកម្មភាពយឺតយ៉ាវ។
ប្រភពបន្តថា យោងតាមអាជ្ញាធរហិរញ្ញវត្ថុនៅថ្ងៃអាទិត្យថា អង្គភាពស៊ើបការសំងាត់ហិរញ្ញវត្ថុ ក្រោមគណៈកម្មាការសេវាហិរញ្ញវត្ថុ កំពុងពិនិត្យថាតើនឹងត្រូវចាត់តាំងឧក្រិដ្ឋជនដែលសង្ស័យ និងអាជីវកម្មដែលពាក់ព័ន្ធជា‘‘អង្គភាពរឹតបណ្តឹង’’ ជាជំហ៊ាននៃការបង្កកទ្រព្យសម្បត្តិ និងរារាំងប្រតិបត្តិការហិរញ្ញវត្ថុ រួមទាំងរូបិយប័ណ្ណឌីជីថលដែរឬទេ។
ប្រភពថា ក្រសួងរតនាគារសហរដ្ឋអាមេរិក បានកំណត់ក្រុមហ៊ុនព្រីនស៍គ្រុប(Prince Group)ជា‘‘អង្គការឧក្រិដ្ឋកម្មឆ្លងដែន’’ និងបានចោទប្រកាន់ប្រធាន ឬនាយកប្រតិបត្តិដែលមានដើមកំណើតចិន លោក ចេន ហ្ស៊ី(Chen Zhi) ពីបទឆបោកហិរញ្ញវត្ថុតាមអនឡាញ និងការលាងលុយ។ ទីកន្លែងលាក់ខ្លួនរបស់លោកឥឡូវនេះត្រួវបានការរាយការណ៍ថា គ្មានអ្នកណាស្គាល់ បន្ទាប់ពីការដាក់ទណ្ឌកម្មត្រូវបានប្រកាស។ ហ៊ុយវ័នគ្រុប(Huione Group) ក៏ត្រូវបានកាត់ចេញពីប្រព័ន្ធហិរញ្ញវត្ថុរបស់សហរដ្ឋអាមេរិកផងដែរ។
ប្រភពបន្ថែមថា ទំហំទ្រព្យសម្បត្តិរបស់ពួកគេនៅប្រទេសកូរ៉េនោះ មិនទាន់ដឹងនៅឡើយទេ ដែលឥឡូវនេះប៉ូលីសកូរ៉េ កំពុងតែធ្វើការស៊ើបអង្កេតការអះអាងថា ក្រុមហ៊ុនព្រីនគ្រុប(Prince Group)ប្រតិបត្តិការការិយាល័យមួយនៅទីក្រុងសេអ៊ូល ដែលអាចកាន់តំណែងសម្រាប់ជ្រើសរើសបុគ្គលិក ពាក់ព័ន្ធការងារឆបោកនៅក្រៅប្រទេស។ សាខាក្រុមហ៊ុនអចលនទ្រព្យរបស់ព្រីនស៍គ្រុប(Prince Group) ត្រូវបានរកឃើញថា ដំណើរការការិយាល័យនៅជាន់ទី១៦ នៃអគារមួយនៅសង្កាត់ហ្គាងណាម(Gangnam) ភាគខាងត្បូងនៃទីក្រុងសេអ៊ូលតាំងពីខែកុម្ភៈ ក្រោមឈ្មោះថា ឃីងមែនរៀលអេស្តេតគ្រុប(KINGMEN REAL ESTATE GROUP)
នៅថ្ងៃសុក្រ សវនកម្មសភា លោកយូ ជេស៊ុង (Yoo Jae-seong) ប្រធានស្តីទីនៃទីភ្នាក់ងារប៉ូលីសជាតិបាននិយាយថា ប៉ូលីសកំពុងពិនិត្យមើលការចោទប្រកាន់នេះ ដើម្បីកំណត់ថាតើត្រូវបើកការស៊ើបអង្កេតផ្លូវការលើសាខាក្រុមហ៊ុនព្រីនស៍គ្រុប(Prince Group)ដែរឬទេ។
របាយការណ៍ចាប់ជំរិត និងការឃុំឃាំងជនជាតិកូរ៉េខុសច្បាប់ នៅក្នុងប្រទេសកម្ពុជា ទទួលបានដោយការិយាល័យក្រសួងការបរទេសក្នុងស្រុក បានកើនឡើងដល់ ៣៣០នាក់ គិតត្រឹមខែសីហា បើប្រៀបធៀបទៅនឹងចំនួន ១៧ករណី ក្នុងឆ្នាំ២០២៣។ នៅក្នុងករណីជាច្រើន ជនរងគ្រោះដែលត្រូវបានល្បូងដោយការងារក្លែងក្លាយ ត្រូវបានបង្ខំឱ្យចូលរួមក្នុងគម្រោងក្លែងបន្លំក្នុងអនឡាញ ដែលជាញឹកញាប់ស្ថិតក្រោមការគំរាមកំហែងនៃការធ្វើទារុណកម្ម ឬស្លាប់។ កាលពីដើមខែនេះ ការខឹងសម្បាកាន់តែខ្លាំងឡើង ក្នុងចំណោមសាធារណជនកូរ៉េ បន្ទាប់ពីនិស្សិតមហាវិទ្យាល័យអាយុ ២២ឆ្នាំម្នាក់ ដែលត្រូវបានចាប់ពង្រត់នៅកម្ពុជា ត្រូវបានគេរកឃើញថាបានស្លាប់ជាមួយនឹងភស្តុតាងនៃការធ្វើទារុណកម្មធ្ងន់ធ្ងរ។
ដើម្បីការពារសោកនាដកម្មស្រដៀងគ្នានេះ ក្រសួងយុត្តិធម៌របស់ប្រទេសកូរ៉េ បានចាប់ផ្តើមបង្ហាញការព្រមានជាសាធារណៈនៅព្រលានយន្តហោះអន្តរជាតិអ៊ីនឆុន(Incheon) សម្រាប់អ្នកដំណើរដែលចេញមកកាន់ប្រទេសកម្ពុជា ដោយជូនដំណឹងដល់ពួកគេអំពីការកើនឡើងនៃការក្លែងបន្លំការងារ ការជាប់ពន្ធនាគារ និងការចាប់ពង្រាត់។ ក្រុមហ៊ុនអាកាសចរណ៍ ក៏ត្រូវបានណែនាំឱ្យចែកខិតប័ណ្ណជំរុញឱ្យប្រុងប្រយ័ត្ន និងផ្តល់ព័ត៌មានទាក់ទងបន្ទាន់៕
