សារព័ត៌មាន The Chosun Daily របស់កូរ៉េខាងត្បូង បានចុះផ្សាយកាលពីថ្ងៃអង្គារថា របបដឹកនាំរបស់កម្ពុជាដែលរួមរឹតដោយអំពើពុករលួយ ពេលនេះបានក្លាយជាជម្រកក្រុមឧក្រិដ្ឋជន ពិសេសក្រុមឧក្រិដ្ឋជនជាតិចិន ក្រោយពីមានការបង្ក្រាប ពីបណ្តាប្រទេសមួយចំនួន ។
The Chosun Daily បានចុះផ្សាយ កាលពីថ្ងៃទី២១ ខែតុលា ឆ្នាំ២០២៥នេះថា ប្រទេសកម្ពុជាធ្លាប់ពេញនិយម ដោយសារប្រាសាទអង្គរវត្ត និងរមណីយដ្ឋានឆ្នេរ តែឥឡូវបានលេចចេញ ជាមជ្ឈមណ្ឌលដ៏សំខាន់សម្រាប់អង្គការឧក្រិដ្ឋកម្មចិន ក្នុងរយៈពេល៣ទៅ ៤ឆ្នាំកន្លងទៅនេះ ។
បើតាមប្រភពនោះ ក្រុមឧក្រិដ្ឋជនចិន ពីមុនបានប្រតិបត្តិការនៅប្រទេសឡាវ មីយ៉ាន់ម៉ា និងតំបន់ដទៃទៀតដែលប្រព្រឹត្តបទឧក្រិដ្ឋធ្ងន់ធ្ងរ ដូចជា ការក្លែងបន្លំ ចាប់ជំរិត និងឃាតកម្ម ទោះជាយ៉ាងណាក៏ដោយ ពេលដែលចាត់វិធានការណ៍កាន់តែខ្លាំងនៅក្នុងប្រទេសទាំងនោះ ពួកគេបានផ្លាស់ប្តូរមូលដ្ឋានប្រតិបត្តិការណ៍យ៉ាងឆាប់រហ័ស។
ប្រភពសារព័ត៌មានដឹឆូស៊ុនដេលី(The Chosun Daily)របស់ប្រទេសកូរ៉េខាងត្បូងដដែល បានឱ្យដឹងទៀតថា ដោយឈរលើលំហូរចូលនៃ‘‘លុយចិន’’(ដើមទុនចិន) និងការគាំទ្រយ៉ាងច្បាស់លាស់នៃរបបផ្តាច់ការរបស់ប្រទេសកម្ពុជា អង្គការទាំងនេះ បានរីកចម្រើនយ៉ាងឆាប់រហ័ស ដោយក្រុមចិនបានដាក់គោលដៅលើជនជាតិកូរ៉េខាងត្បូង ឧក្រិដ្ឋកម្មជនកូរ៉េដែលស្វែងរកប្រាក់ចំណេញរហ័ស ក៏កើនឡើងមកប្រទេសកម្ពុជាផងដែរ។
សហគមន៍អន្តរជាតិ វិភាគថា ‘‘អង្គការឧក្រិដ្ឋកម្មចិនបានកែច្នៃប្រព័ន្ធអេកូឡូស៊ីឧក្រិដ្ឋកម្មរបស់ពួកគេ ដោយរួមបញ្ចូលឧស្សាហ៍កម្មទេសចរណ៍ ដូចជា សណ្ឋាគារ កាស៊ីណូជាមួយនឹងការក្លែងបន្លំ និងការជួញដូរមនុស្ស។
ប្រភពបន្តថា អំពើរពុករលួយដែលផ្អែកលើអំណាចរបស់ប្រទេសកម្ពុជា គឺត្រូវបានគេកំណត់ថាជាកត្តាសំខាន់ក្នុងការរីករាលដាលនៃឧក្រិដ្ឋកម្ម។
ប្រទេសនេះ ជារបបផ្តាច់ការតពូជដែលគ្រប់គ្រងដោយគ្រួសារលោក ហ៊ុន សែន (ដែលជាអតីតនាយករដ្ឋមន្រ្តី និងជាប្រធានព្រឹទ្ធសភានាពេលបច្ចុប្បន្ន) ក្នុងរបបដែលដឹកនាំដោយ លោក ហ៊ុន សែន ការគប់គិតគ្នារវាងនយោបាយ និងជំនួញ រួមជាមួយនឹងប្រព័ន្ធនៃប្រាក់ចំណូលបានចាក់ឫសកាន់តែជ្រៅ។
ប្រភពបានបន្ថែមថា ការរិះគន់នៅតែមានទាំងខាងក្នុងស្រុក និងខាងក្រៅស្រុកថា របបនិយមចិនបានអត់ឱន និងធ្វេសប្រហែសចំពោះសកម្មភាពឧក្រិដ្ឋកម្មចិន។ ដោយឡែក ការិយាល័យអង្គការសហប្រជាជាតិទទួលបន្ទុកផ្នែកគ្រឿងញៀន និងឧក្រិដ្ឋកម្មបានបញ្ជាក់ថា ឧស្សាហ៍កម្មក្លែងបន្លំរបស់ប្រទេសកម្ពុជា‘‘រីកចម្រើនក្រោមការការពារនៃបណ្តាញពុករលួយក្នុងរដ្ឋាភិបាល’’។
ប្រភពដឹឆូស៊ុនដេលី(The Chosun Daily)ដដែលថា សសរស្តម្ភដែលគាំទ្ររបប លោក ហ៊ុន សែន គឺប្រទេសចិន បើទោះបីជាលោកឡើងកាន់អំណាចដោយមានជំនួយពីវៀតណាមក៏ដោយ ក៏លោកពឹងផ្អែកទាំងស្រុងលើទីក្រុងប៉េកាំង តាមរយៈគំនិតផ្តួចផ្តើមខ្សែក្រវ៉ាត់នឹងផ្លូវដែលបានចាប់ផ្តើមឡើងក្នុងឆ្នាំ២០១៣ ប្រទេសចិនបានបង្ហូរមូលនិធិចូលទៅក្នុងការសាងសង់កំពង់ផែ ថ្នល់ និងអាកាសយានដ្ឋាន ហើយឥឡូវនេះបានកាន់កាប់ចំនួន ៣៥%នៃបំណុលខាងក្រៅរបស់ប្រទេសកម្ពុជា។
ប្រភពបន្តថា សមត្ថភាពការអនុវត្តច្បាប់នៅក្នុងប្រទេសកម្ពុជា ជិតដួលរលំដោយសារអំពើពុករលួយ ប្រាក់ឈ្នួលទាប និងខ្វះកម្លាំងពលកម្ម។ យោងតាមអង្គការលើកលែងទោសអន្តរជាតិបានចេញផ្សាយ កាលពីខែមិថុនាថា ក្នុងចំណោមតំបន់ឧក្រិដ្ឋកម្មចំនួន៥៣ នៅក្នុងតំបន់១៦ រួមទាំងក្រុងព្រះសីហនុ និងក្រុងភ្នំពេញមានតែពីរប៉ុណ្ណោះ ដែលបានបិទបន្ទាប់ពីរដ្ឋាភិបាលបានអន្តរាគមន៍៕
