ក្រុមអតិថិជនទិញផ្ទះពីឧកញ៉ា ឡេង ណាវ៉ាត្រា ហាក់បង្ហាញពីចេតនាអស់ការអត់ធ្មត់ ដោយព្រមានថា នឹងចេញតវ៉ាជាថ្មីទៀតនៅចុងសប្តាហ៍នេះ ដើម្បីឱ្យឧកញ៉ាស្និទ្ធមេដឹកនាំរូបនេះ ចេញមុខទទួលខុសត្រូវចំពោះមុខច្បាប់លើកិច្ចសន្យាទិញ លក់ ក្រោយបង់លុយគ្រប់៤ឆ្នាំ តែក្រុមហ៊ុនគ្មានផ្ទះឱ្យ។
ការណ៍នេះ ពួកគេសំអាងថា ធ្វើឱ្យអតិថិជនច្រើនរយគ្រួសារ ដែលបានចងការប្រាក់ពីធនាគារ ដើម្បីយកលុយមកទិញផ្ទះនៅក្រុមហ៊ុនឧកញ៉ា ឡេង ណាវ៉ាត្រា នេះ ជួបវិបត្តិគ្រួសារ បញ្ហាបំណុល ដោយសារតែភាគីក្រុមចេះតែរកលេស ពន្យាពេល មិនព្រមប្រគល់ផ្ទះឱ្យ ពីមួយឆ្នាំទៅមួយឆ្នាំ រហូតបច្ចុប្បន្ននេះ។
ការព្រមាននេះ ក្រោយក្រុមអតិថិជនបានប្រមូលផ្តុំគ្នាម្តងរួចហើយ កាលពីថ្ងៃទី១៨ ខែតុលា នៅមុខបុរី ឡេង ណាវ៉ាត្រា គម្រោង៦A តែពួកគេថាភាគីក្រុមហ៊ុនបន្តគេចវេសមិនសងលុយ និងប្រើល្បិចដោះដូរដីឱ្យអតិថិជន។
អតិថិជនម្នាក់ លោក រ៉ា វុធ ប្រាប់VODនៅថ្ងៃទី២២ ខែកក្កដានេះថា ក្រោយតវ៉ារួច ក្រុមហ៊ុនឱ្យជម្រើសដូរដី និងផ្ទះ តែលោកថាដីនៅតំបន់ព្រះប្រសប់ដែលក្រុមហ៊ុនដោះដូរនោះមានសណ្ឋានជាបាតបឹង ហើយផ្ទះដែលក្រុមហ៊ុនដោះដូរវិញគ្មានស្តង់ដារទេ។
ការផ្តល់ជម្រើសដោះដូរបែបនេះ លោកថា ជាល្បិចកេងចំណេញលើអតិថិជន ដែលក្រុមអតិថិជនមិនអាចទទួលយកបានទេ ហើយក្រុមអតិថិជននឹងប្រមូលផ្តុំគ្នាទៀត ទាល់តែមានដំណោះស្រាយដែលពួកគេចង់បាន។
បើតាមលោក រ៉ា វុធ ក្រុមអតិថិជនទាមទារឱ្យក្រុមហ៊ុនសង់ផ្ទះ និងចាក់ដីឱ្យបានមុនឆ្នាំ២០២៥ បើពុំនោះទេ ត្រូវសងលុយឱ្យអតិថិជនវិញ ខណៈកិច្ចសន្យាចែងថា បើលើសពេលសាងសង់ត្រូវសងសំណង ១០០ដុល្លារក្នុងមួយខែ តែក្រុមហ៊ុនមិនគោរពនោះទេ ទោះលើសពេលសាងសង់ច្រើនឆ្នាំទៅហើយក្តី។
លោកថា៖ «សូមឱ្យភាគីខាងក្រុមហ៊ុនសងលុយដើមពួកខ្ញុំត្រលប់មកវិញមក! ខ្ញុំសុំតែលុយដើមបានហើយ! លុយសំណង ១ឆ្នាំ ២ឆ្នាំ ពួកខ្ញុំអត់ត្រូវការទេ។ ដូចជាខ្ញុំជាដើម បើមកដល់បច្ចុប្បន្ននេះ លុយសំណងរបស់ខ្ញុំ ប្រហែលជាល្បាក់២ពាន់(ដុល្លារ)ជាង! លុយសំណង ហើយអតិថិជនខ្លះមកដល់បច្ចុប្បន្ននេះ សំណងរហូតដល់៣ពាន់(ដុល្លារ)ជាង»។
កាលពីថ្ងៃទី១៨ ខែតុលា ក្រុមអតិថិជនប្រមាណ៥០នាក់ បានប្រមូលផ្តុំគ្នានៅមុខបុរីឡេង ណាវ៉ាត្រា គម្រោង៦A ដើម្បីទាមទារឱ្យភាគីក្រុមហ៊ុនទទួលខុសត្រូវ។
ប្រភពថា៖ «សូមឱ្យលោកឧកញ៉ាចេញមុខមក ដោះស្រាយឱ្យពួកខ្ញុំ ធ្វើផ្ទះឱ្យពួកខ្ញុំ។ បើមិនធ្វើផ្ទះឱ្យពួកខ្ញុំ សងលុយខ្ញុំវិញមក។ សងលុយខ្ញុំវិញ ឡេង ណាវ៉ាត្រា អត់គោរពកិច្ចសន្យា។ មិនដឹងដី មិនដឹងផ្ទះនៅណាទេ! ឥលូវបងប្អូនខ្ញុំមកទីនេះ ចង់ពិពណ៌នា ប្រាប់បងប្អូនក្រៅស្រុក និងក្នុងស្រុកឱ្យដឹងថា បងប្អូនខ្ញុំនេះ ឥលូវនេះមានទុក្ខធ្ងន់ខ្លាំងណាស់ ដោយសារឧកញ៉ាស្រុកខ្មែរ ស្រុកខ្មែរយើងនេះ ឧកញ៉ា ថោកទាបបោកប្រាស់បួនប្រាំឆ្នាំហើយ»។
ក្នុងពេលតវ៉ានោះ ក្រុមអតិថិជនបានស្រែកថាពួកគេបង់លុយគ្រប់៤ឆ្នាំហើយ តែមិនទទួលបានផ្ទះទេ ខណៈខ្លះទៀតស្រែកថា កំពុងជួបវិបត្តិជីវភាពក្រោយខ្ចីលុយធនាគារមកទិញផ្ទះ និងដី ក្នុងក្រុមហ៊ុន ឡេង ណាវ៉ាត្រា។
យ៉ាងណា បើតាមលោក រ៉ា វុធ ប្រាប់VODថា ក្រុមអតិថិជន គ្រោងតវ៉ាជាថ្មីទៀតនៅថ្ងៃទី២៦ ខែតុលា នៅមុខបុរីឡេង ណាវ៉ាត្រា គម្រោង៦A ដើម្បីរកយុត្តិធម៌បន្តទៀត ដែលចំនួនអ្នកចូលរួមអាចកើនជិត១០០នាក់។
លោកថា លោកទិញដី និងផ្ទះក្នុងក្រុមហ៊ុនឡេង ណាវ៉ាត្រា ជិត៤ម៉ឺនដុល្លារ ហើយដីដែលលោកទិញមិនទាន់មានការចាប់បំពេញត្រឹមត្រូវ ដែលមានសណ្ឋានជាបាតបឹង រីឯផ្ទះក្រុមហ៊ុនបានដកជាងសាងសង់ចេញអស់ហើយ។
លោកថា៖ «ក្រសួងពាក់ព័ន្ធ អាជ្ញាធរពាក់ព័ន្ធ និងរដ្ឋាភិបាល សូមសំណូមពរឲ្យជួយអន្តរាគមន៍ទៅលើបុរី ឡេង ណាវ៉ាត្រា ផងដោយសារតែពួកខ្ញុំជាអតិថិជនមួយ ដែលទិញទាក់ទងជាមួយនឹងផ្ទះសំបែង ដីធ្លីនេះ ស្ថិតនៅក្នុងផ្លូវស្របច្បាប់ទាំងអស់ ហើយមិនមែនជាការកេងបន្លំ ឬក៏ជាការចោទប្រកាន់ទៅលើក្រុមហ៊ុន ឡេង ណាវ៉ាត្រាទេ។ ចំពោះពួកខ្ញុំដែលជាអតិថិជនដែលអត់បានអី! ពួកខ្ញុំត្រូវការតវ៉ា ត្រូវការសំណូមពរ។ បើអតិថិជនខ្លះបានផ្ទះហើយអាហ្នឹងជារបស់គាត់ តែពួកខ្ញុំអត់បានសោះ សូម្បីតែដីក៏មិនទាន់ចាក់ពេញដែរ»។
ជុំវិញរឿងនេះ VOD មិនអាចសុំការឆ្លើយតបពីភាគីបុរី ឡេង ណាវ៉ាត្រា បាននៅឡើយទេ គិតត្រឹមម៉ោងផ្សាយនេះ។
យ៉ាងណា ឧកញ៉ា ឡេង ណាវ៉ាត្រា បញ្ជាក់លើហ្វេសប៊ុករបស់ខ្លួន កាលពីថ្ងៃទី២០ ខែតុលា ថា បុរីកំពុងខិតខំលក់ដីដែលមាន ដើម្បីបញ្ចប់គម្រោងជាប់គាំង ហើយអតិថិជនដែលមិនអាចរង់ចាំបាន លោកមានផ្ទះ និងដីខ្លះដើម្បីដោះដូរ។
ដោយឡែក សំនួរថាលុយលក់ផ្ទះបានយកទៅណា លោកឆ្លើយថា ចំណូលបានពីលក់ផ្ទះ បានយកទៅទិញដីអភិវឌ្ឍន៍គម្រោង មុនពេលមានវិបត្តិសេដ្ឋកិច្ច ហើយថាកំពុងលក់ដីទាំងនោះវិញ ដើម្បីបញ្ចប់គម្រោងឲ្យអតិថិជន។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត យល់ថា ក្រុមហ៊ុនគួរតែទទួលខុសត្រូវសងសំណងដល់ក្រុមអតិថិជន ដូចដែលមានចែងក្នុងកិច្ចសន្យាទិញលក់ដែលភាគីទាំង២បានព្រមព្រៀងគ្នា។
យ៉ាងណា លោកកត់សម្គាល់ថា មិនមែនមានតែក្រុមហ៊ុន ឡេង ណាវ៉ាត្រា មួយទេដែលមានបញ្ហាជាមួយពលរដ្ឋ តែនៅមានក្រុមហ៊ុនផ្សេងទៀត ដូចជា ក្រុមហ៊ុន ឡេង ចាន់ណា ហ៊ី គឹមហុង និងក្រុមហ៊ុនភូមិខ្មែរគ្រុបនៅខេត្តស្វាយរៀងជាដើម ដែលជនរងគ្រោះតែងតែចេញតវ៉ាជាបន្តបន្ទាប់ ដើម្បីទាមទារសំណងមកវិញដូចគ្នានេះដែរ។
លោកបារម្ភថា បញ្ហានេះនឹងក្លាយជាជំងឺសង្គមកាន់តែធ្ងន់ធ្ងរ បើជនរងគ្រោះមិនទទួលបានយុត្តិធម៌ ហើយពួកគេអស់ការអត់ធ្មត់ប្រមូលផ្តុំតវ៉ាកាន់តែច្រើននោះ។
លោកថា៖ «ប៉ះពាល់ដល់អ្នកវិនិយោគទុនផ្សេងទៀត ដែលគេចង់មកវិនិយោគ ហើយឃើញទិដ្ឋភាពអ៊ីចឹងវាប៉ះពាល់ ហើយប្រជាពលរដ្ឋថ្ងៃក្រោយទៅក៏មានការបារម្ភទៅលើបញ្ហាទាំងអស់នេះដែរ។ អាហ្នឹងវាពាក់ព័ន្ធបញ្ហាការវិនិយោគលើការអភិវឌ្ឍដីធ្លី ឬក៏បុរីអីជាដើម។ ហើយបើសិនជាអូសបន្លាយយូរ ទិដ្ឋភាពក្រុមហ៊ុនច្រើន ហើយមានការតវ៉ាច្រើន វាប៉ះពាល់! យើងមើលជារូបភាពមួយមិនល្អ ហើយអ្វីដែលសំខាន់ហ្នឹង គឺពលរដ្ឋគាត់ត្រូវរងគ្រោះ»។
ជាការកត់សម្គាល់ ឧកញ៉ា ឡេង ណាវ៉ាត្រា តែងតែឱ្យលុយរាប់លានដុល្លារ ដល់រដ្ឋាភិបាលគ្រួសារហ៊ុន ខណៈគម្រោងរកស៊ីវិស័យលក់ផ្ទះរបស់លោក ជាប់គាំងមិនសង់ផ្ទះឱ្យអតិថិជននោះទេ ទោះបីពួកគេបង់លុយគ្រប់ចំនួនទៅហើយក្តី។
ឧកញ៉ាដែលមានរឿងអាស្រូវកាប់បំផ្លាញព្រៃឈើ នៅតំបន់ភ្នំតាម៉ៅផង រូបនេះក៏ត្រូវបានប្រធានបក្សកាន់អំណាចចេញមុខការពារជាចំហរផងដែរ។
ជាក់ស្តែង ប្រធានគណបក្សកាន់អំណាច លោក ហ៊ុន សែន កាលពីឆ្នាំ២០២៤ ធ្លាប់ចេញការពារថា ភាពយឺតយ៉ាវសង់ផ្ទះនេះ ដោយសារតែក្រុមហ៊ុនកប់ដើមទុនទៅលើដីក្នុងចំនួនច្រើន និងធានាថាក្រុមហ៊ុននេះមិនទាន់ក្ស័យធុនទេ។
ការចេញមុនការពាររបស់មេដឹកនាំកំពូលបែបនេះ ត្រូវគេមើលឃើញថា ជាមូលហេតុដែលធ្វើឱ្យប្រព័ន្ធច្បាប់ មិនហ៊ានកាត់ទោសឧកញ៉ារូបនេះ ទោះបីបានរកស៊ីបំពានកិច្ចសន្យាទិញលក់ផ្ទះច្រើនឆ្នាំទៅហើយក្តី ធ្វើឱ្យជនរងគ្រោះជួបវិបត្តិជីវភាពធ្ងន់ធ្ងរក្រោយខ្ចីលុយធនាគារយកទៅទិញផ្ទះ៕
