មេធាវី និងអ្នកតាមដានសវនាការ បង្ហាញការសោកស្តោយ ការដែលតុលាការកំពូល បានប្រកាសបដិសេធសំណុំរឿងស្នើសុំស្រូបទោសរបស់ លោក ថាច់ សេដ្ឋា អនុប្រធានគណបក្សភ្លើងទៀន ដែលក្នុងនោះតុលាការក៏មិនបានបញ្ជាក់សំអាងហេតុដោយផ្ទាល់មាត់នោះឡើយ។
កាលពីថ្ងៃទី១០ ខែតុលានេះ តុលាការកំពូល បានបើកសវនាការលើសំណុំរឿងស្នើសុំស្រូបទោសរបស់លោក ថាច់ សេដ្ឋា ដោយសាលដីកានឹងត្រូវប្រកាស នៅព្រឹកថ្ងៃទី២៤ ខែតុលា ឆ្នាំ២០២៥នេះ។
លោក អែម ចន្ថា មេធាវីការពារក្តីឱ្យលោក ថាច់ សេដ្ឋា ឱ្យដឹងថា តុលាការកំពូល បានសម្រេចបដិសេធសំណើរសុំស្រូបទោសនៃការអនុវត្តទោសកូនក្តីរបស់លោក ហើយហេតុផលយ៉ាងណានោះ លោកនៅពុំទាន់បានដឹងនៅឡើយ ដោយរងចាំមើលការសំអាងនៅក្នុងសាលដីការបស់តុលាការ។
លោកថា៖ «សោកស្តាយចំពោះការដែលតុលាការបដិសេធលើពាក្យស្នើសុំស្រូបទោស ដែលមិនបានស្រូបទោសឱ្យកូនក្តីយើងខ្ញុំ ព្រោះតាមផ្លូវច្បាប់ គាត់គួរតែទទួលបាននូវការអនុវត្តទោសស្រូប នៅក្នុងកម្រិតអតិប្បរមា»។
បើតាម លោក អែម ចន្ថា មេធាវីនឹងពិនិត្យ និងពិចារណាទៅលើសំអាងហេតុរបស់តុលាការ នៅពេលដែលទទួលបានសាលដីកា ដែលបដិសេធស្នើសុំស្រូបទោសនេះ និងសិក្សាទៅលើការអនុវត្តទោសរបស់លោក ថាច់ សេដ្ឋា ក្នុងសំណុំរឿងទី២របស់គាត់ ដើម្បីរៀបចំនីតិវិធីបន្តថាត្រូវធ្វើយ៉ាងណាទៀត។
កន្លងមក មេធាវីការពារក្តីឱ្យលោក ថាច់ សេដ្ឋា រូបនេះ ធ្លាប់បានគូសបញ្ជាក់ថា ការដាក់ពាក្យស្នើសុំស្រូបទោសទៅតុលាការកំពូលនេះ ដោយលើកហេតុផលថាដោយសារតែបញ្ហាសុខភាពរបស់លោក ថាច់ សេដ្ឋា ដែលមានជំងឺប្រចាំកាយ (បេះដូងដាក់រ៉ូស័រ) ខណៈលោក ថាច់ សេដ្ឋា ក៏បានអនុវត្តទោសក្នុងពន្ធនាគារកន្លងមក បានធ្វើរយៈពេលជាច្រើនខែហើយ។
អ្នកនយោបាយជំទាស់ លោក ថាច់ សេដ្ឋា ដែលជាប្រធានសហគមន៍ខ្មែរកម្ពុជាក្រោមផងនោះ ត្រូវបានសាលាដំបូងរាជធានីភ្នំពេញ ផ្តន្ទាទោសពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង» ដោយដាក់ពន្ធនាគារ ៣ឆ្នាំ ពាក់ព័ន្ធនឹងការថ្លែងរបស់លោកនៅប្រទេសកូរ៉េខាងត្បូង អំពីប្រវត្តិនៃការកកើតគណបក្សប្រជាជនកម្ពុជា និងថ្ងៃ៧មករា។
ក្រៅពីសំណុំរឿងបទញុះញង់នេះ លោក ថាច់ សេដ្ឋា ដែលត្រូវបានចាប់ខ្លួន កាលពីដើមឆ្នាំ ២០២៣ ក៏ត្រូវបានតុលាការកាត់ទោសដាក់ពន្ធនាគារ ១ឆ្នាំកន្លះ ពីបទ មិនបំពេញកាតព្វកិច្ចចំពោះឧបករណ៍ដែលអាចជួញដូរបាន។ ហើយលោក ក៏ត្រូវបានតុលាការតម្រូវឱ្យបង់លុយជំពាក់ចំនួន ៣៣ ៤០០ដុល្លារអាមេរិក ត្រូវបង់ប្រាក់ពិន័យចូលរដ្ឋចំនួន ៣លានរៀលនិង ៥លានរៀល ត្រូវបង់សងជំងឺចិត្តដល់ក្រុមហ៊ុនបញ្ចាំមួយដែលជាដើមបណ្តឹង។
លោក តូច ថឹង ជាប្រជាពលរដ្ឋដែលធ្លាប់បានចូមរួមស្តាប់សវនាការ និងតាមដានករណីនេះ យល់ថា ការសម្រេចរបស់តុលាការដែលបដិសេធសំណើរសុំស្រូបទោសលើករណីអនុប្រធានបក្សប្រឆាំងរូបនេះ ថាជារឿងអយុត្តិធម៌ ដោយលោកបានស្នើទៅតុលាការពិនិត្យ និងសម្របសម្រួលឡើងវិញលើសំណុំរឿងនេះ។
លោកថា៖ «ជាធម្មតា នៅក្នុងពន្ធនាគារ វាមិនដែលស្រណុកទេ ដូច្នេះគឺខ្ញុំសុំឱ្យតុលាការហ្នឹងពិនិត្យ និងសម្របសម្រួលសារឡើងវិញទៅ ដោយក្នុងច្បាប់បានចែងហើយថា បើមានទោសពីរបីករណី គេសម្រេចថានឹងយកមួយណាដែលច្រើន ឥលូវច្រើនហ្នឹងមាន៣ឆ្នាំ ហើយអត់មានសម្រេចអីផង ហើយគាត់នៅក្នុង[ពន្ធនាគារ]ហ្នឹង ក៏គាត់បានធ្វើ បានអនុវត្តទៅតាមច្បាប់ត្រឹមត្រូវទៅតាមច្បាប់ហើយតើ វាហាក់ដូចជាដាក់ទណ្ឌកម្ម ឬពិន័យជាបន្តបន្ទាប់ ឱ្យគាត់វេទនាជាបន្តបន្ទាប់»។
វីអូឌី មិនអាចសុំការបញ្ជាក់ជុំវិញករណីនេះ ពីអ្នកនាំពាក្យតុលាការកំពូល អ្នកស្រី ម៉ៅ ធីតា បានទេ នៅថ្ងៃសុក្រនេះ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត បង្ហាញការសោកស្តាយចំពោះការសម្រេចរបស់តុលាការកំពូល ដែលបដិសេធការស្នើសុំស្រូបទោសលើករណី លោក ថាច់ សេដ្ឋា ដោយលោកថា សកម្មជននយោបាយរូបនេះ ត្រូវបានកាត់ទោសក្នុងសំណុំរឿង២ផ្សេងគ្នា ប៉ុន្តែបទល្មើសនៅក្នុងមាត្រាដូចគ្នា ដែលតុលាការគួរមានការពិចារណា បើសិនដាក់ស្នើនោះត្រូវទៅតាមលក្ខខណ្ឌ។
យ៉ាងណា លោកថា នេះជាឆន្ទានុសិទ្ធរបស់តុលាការក្នុងការសម្រេចក្តី ប៉ុន្តែចង់មិនចង់ ការសម្រេចក្តីនេះ ក៏អាចនឹងរងនូវការរិះគន់ពីសហគមន៍ជាតិ និងអន្តរជាតិ ដោយសារការចោទប្រកាន់ទៅលើ លោក ថាច់ សេដ្ឋា នេះត្រូវបានគេមើលឃើញថា ជារឿងនយោបាយ ច្រើនជាងការអនុវត្តច្បាប់។
លោក អំ សំអាត បន្តថា៖ «កន្លងទៅ យើងដឹងហើយថា ករណីលោកថាច់ សេដ្ឋា នេះ ដោយសារតែគាត់ជាអ្នកនយោបាយដ៏សកម្ម ហើយមានប្រជាប្រិយភាពមួយរបស់គណបក្សប្រឆាំង អីចឹងហើយនៅពេលដែលចាប់គាត់ ចោទប្រកាន់គាត់ជាបន្តបន្ទាប់ និងការកាត់ទោសជាបន្តបន្ទាប់ហ្នឹង នាំឱ្យមានសហគមន៍អន្តរជាតិគេរិះគន់ជាច្រើនទៅលើលំហសេរីភាពនយោបាយ ថាហាក់ដូចជាមានការរឹតត្បិត ហើយការចាប់ខ្លួនហ្នឹង គេលើកឡើងថា វាជារឿងនយោបាយច្រើនជាងការអនុវត្តច្បាប់ជាដើម។ ចឹងនៅក្នុងកាលៈទេសៈនេះ ទី១ ដើម្បីឱ្យមានការរួបរួមខ្មែរតែមួយ គ្រប់គណបក្សនយោបាយ និងអ្នកនយោបាយទាំងអស់ត្រូវរួមគ្នាតែមួយ នៅក្នុងពេលដែលយើងកំពុងតែមានជម្លោះព្រំដែនជាមួយប្រទេសជិតខាងហ្នឹង គួរតែពិនិត្យនិងពិចារណានៅក្នុងការសម្រាល និងការដោះលែង សម្រាប់សកម្មជនគណបក្សនយោបាយ សកម្មជនសិទ្ធិមនុស្ស សកម្មជនបរិស្ថាន សកម្មជនសង្គមជាដើម»។
ដូចគ្នានេះដែរ មន្ត្រីស៊ើបអង្កេតជាន់ខ្ពស់សមាគមការពារសិទ្ធិមនុស្សអាដហុក លោក យី សុខសាន្ត ដែលតាមរឿងនេះ ក៏បង្ហាញការខកចិត្តដែរ ដោយសំអាងថា រដ្ឋាភិបាលចេះសម្របសម្រួយនិងចរចាជាមួយភាគីថៃ ហេតុអីមិនអាចសម្របសម្រួលជាមួយជាតិសាសន៍ខ្មែរដូចគ្នាបាន។
លោកថា៖ «យើងអាចផ្សះផ្សាជាតិជាមួយនឹងជាតិសាសន៍ដទៃ ដូចជា ជម្លោះរវាងខ្មែរថៃហើយយើងសុខចិត្តចុះកិច្ចព្រមព្រៀង ហេតុអីបានជារវាងខ្មែរនិងខ្មែរ យើងគ្រាន់តែអធ្យាស្រ័យឱ្យមិនបាន នេះជាហេតុផលមួយដែលយើងកត់សម្គាល់ ដូច្នេះយើងស្នើសុំលោកទទូចឱ្យមានការដោះលែងគាត់ឲ្យមានសេរីភាព ឬក៏បន្ធូរបន្ថយទោស តាមការស្នើសុំរបស់មេធាវីដើម្បីឱ្យគាត់ចូលរួមកសាងប្រទេសជាតិជាមួយនឹងរាជរដ្ឋាភិបាល»។
យ៉ាងណា ករណីលោក ថាច់ សេដ្ឋា ហាក់ត្រូវនឹងការព្យាករទុករបស់តំណាងរាស្រ្តបក្សសង្គ្រោះជាតិ លោក អ៊ុំ សំអាន ដែលលោកថា នឹងមិនទទួលបានយុត្តិធម៌នោះទេ ដោយសារតែតុលាការនៅកម្ពុជា ជាតុលាការតេឡេ និងមិនឯករាជ្យ ធ្វើទៅតាមតែបញ្ជាពីគ្រួសារហ៊ុន ដូច្នេះការកាត់ក្តីកាត់ក្តីធ្វើទៅតាមបែបនយោបាយ មិនមែនសម្អាងទៅលើអង្គហេតុ និងអង្គច្បាប់នោះទេ៕
