ប្រធានាធិបតីសហរដ្ឋអាមេរិក លោក ដូណាល់ ត្រាំ និយាយនៅថ្ងៃចន្ទថា ប្រធានាធិបតីរុស្ស៊ី លោក វ្លាឌីមៀពូទីន គួរតែបញ្ចប់សង្រ្គាមនៅអ៊ុយក្រែន ជាជាងសាកល្បងមីស៊ីលដើរដោយថាមពលនុយក្លេអ៊ែរ ហើយថាសហរដ្ឋអាមេរិកមាននាវាមុជទឹកនុយក្លេអ៊ែរនៅជិតឆ្នេរសមុទ្ររុស្ស៊ី។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី២៧ ខែតុលា ឆ្នាំ២០២៥នេះថា លោក ពូទីន បាននិយាយនៅថ្ងៃអាទិត្យថា រុស្ស៊ីបានជោគជ័យក្នុងការសាកល្បងមីស៊ីលបួរេវេសស្និក(Burevestnik) ដើរដោយថាមពលនុយក្លេអ៊ែររបស់ខ្លួន ជាអាវុធដែលមានសមត្ថភាពនុយក្លេអ៊ែរដែលទីក្រុងមូស្គូ និយាយថា អាចទម្លុះខែលការពារណាមួយ ហើយអាចឆ្ពោះទៅរកការដាក់ពង្រាយអាវុធ។
ទីក្រុងមូស្គូ បាននិយាយថា បួរេសវេសស្និក ស្តមផែតត្រល (Burevestnik(StormPetrel)) បានហោះហើរចម្ងាយ ១៤ ០០០គីឡូម៉ែត្រ។ ដោយឡែកសំណួរបានលើកឡើងនៅលើយន្តហោះអ៊ែហ្វសវ័ន អំពីការសាកល្បងមីស៊ីលអេសអេសស៊ី អេក ៩ ស្កាយហ្វល (SSC-X-9 Skyfall) ដោយអង្គការណាតូ លោក ត្រាំបាននិយាយថា សហរដ្ឋអាមេរិកមិនចាំបាច់ហោះទៅឆ្ងាយទេ ខណៈខ្លួនមាននាវាមុជទឹកនុយក្លេអ៊ែរនៅជិតឆ្នេរសមុទ្ររុស្ស៊ី។
នេះបើយោងតាមឯកសារដែលបង្ហោះដោយសេតវិមាន លោក ត្រាំ បានប្រាប់អ្នកសារព័ត៌មានថា «ពួកគេដឹងថា យើងមាននាវាមុជទឹកដ៏អស្ចារ្យក្នុងពិភពលោកនៅក្បែរសមុទ្ររបស់ពួកគេ ដូច្នេះខ្ញុំមានន័យថា មិនបាច់ត្រូវចំណាយទៅដល់ ៨០០០ម៉ាយនោះទេ»។
លោក ត្រាំ បានបន្តថា៖ «ខ្ញុំមិនគិតថា វាជារឿងដែលសមរម្យសម្រាប់ពូទីនក្នុងការនិយាយនោះទេ ម្យ៉ាងវិញទៀត អ្នកគួរតែបញ្ចប់សង្រ្គាម ដែលសង្រ្គាមនេះគួរតែចំណាយមួយសប្តាហ៍ឥឡូវនេះ គឺឆ្នាំទី៤ នោះហើយជាអ្វីដែលអ្នកគួរធ្វើជំនួសដោយការសាកល្បងមីស៊ីល»។
ចាប់តាំងពីការប្រកាសជាលើកដំបូងចំពោះមីស៊ីល ៩អែម៧៣០បួរេសវេសស្និក (9M730 Burevestnik) ក្នុងឆ្នាំ២០១៨ លោក ពូទីន បង្ហាញអាវុធនេះជាការឆ្លើយតបទៅកាន់សកម្មភាពសហរដ្ឋអាមេរិក ក្នុងការបង្កើតជាខែលការពារមីស៊ីល បន្ទាប់ពីទីក្រុងវ៉ាស៊ីតោនបានដកខ្លួនជាឯកតោភាគីក្នុងឆ្នាំ២០០១ ពីសន្ធិសញ្ញាប្រឆាំងមីស៊ីលបលលីស្ទីកឆ្នាំ១៩៧២ និងដើម្បីពង្រីកសម្ព័ន្ធមិត្តយោធារបស់ណាតូ។
រ៉យទ័រ បានរាយការណ៍ពីទីក្រុងវ៉ាស៊ីតោន នៅថ្ងៃទី២៥ ខែតុលាថា រដ្ឋបាលលោក ត្រាំ បានត្រៀមទណ្ឌកម្មបន្ថែមទៀត ដែលប្រើដើម្បីកំណត់គោលដៅសំខាន់ៗនៃសេដ្ឋកិច្ចរបស់រុស្ស៊ី ប្រសិនបើលោក ពូទីន បន្តអូសបន្លាយក្នុងការបញ្ចប់សង្រ្គាមនៅអ៊ុយក្រែន៕
