សហរដ្ឋអាមេរិក បានបង្ហាញក្តីរំពឹងថា ថៃនឹងដោះលែងទាហានខ្មែរ ១៨នាក់ភ្លាមៗ បន្ទាប់ពីមេដឹកនាំកម្ពុជា-ថៃ បានចុះហត្ថលេខាពង្រឹងលើកិច្ចព្រមព្រៀងបទឈប់បាញ់ កាលពីថ្ងៃអាទិត្យ ក្រោមវត្តមានរបស់ប្រធានាធិបតីលោក ដូណាល់ ត្រាំ ធ្វើជាសាក្សី។
សារព័ត៌មានរ៉យទ័រ បានរាយការណ៍នៅថ្ងៃទី២៨ខែតុលានេះថា មន្ត្រីជាន់ខ្ពស់ក្រសួងការបរទេស១រូប បាននិយាយនៅថ្ងៃចន្ទថា សហរដ្ឋអាមេរិករំពឹងថាថៃនឹងធ្វើការជាមួយប្រទេសកម្ពុជា ដើម្បីដោះលែងទាហានចំនួន ១៨នាក់ភ្លាមៗ បន្ទាប់ពីមេដឹកនាំនៃប្រទេសនានាបានចុះហត្ថលេខាពង្រឹងលើកិច្ចព្រមព្រៀងបទឈប់បាញ់កាលពីថ្ងៃអាទិត្យ ចំពោះវត្តមានរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ។
យ៉ាងណា នាយករដ្ឋមន្ត្រីថៃ លោក អនុធិន ត្រូវបានកាសែតថៃ Khaosod ស្រង់សំដីមកចុះផ្សាយកាលពីថ្ងៃទី២៦ខែតុលាថា លោកមិនបដិសេធសំណើរប្រធានាធិបតីអាមេរិក លោក ត្រាំ ដោះលែងឈ្លើយសឹកកម្ពុជា ១៨នាក់នោះទេ។
ក្នុងន័យនេះ លោកបញ្ជាក់ថា ថៃនឹងដោះលែងឈ្លើយសឹកទាហានកម្ពុជា ១៨នាក់ ប៉ុន្តែសូមឱ្យស្ថានភាពព្រំដែនមានសុវត្ថិភាពនិងស្ងប់ស្ងាត់។ លោកអះអាងថា ភាគីថៃនឹងរៀបចំនីតិវិធីក្នុងការដោះលែងឈ្លើយសឹកកម្ពុជា១៨នាក់ ប៉ុន្តែសូមមិនបញ្ជាក់ពេលវេលា។
យ៉ាងនេះក្តី សេចក្តីថ្លែងការណ៍របស់ក្រសួងអឺរ៉ុប និងការបរទេសបារាំង នៅថ្ងៃទី២៨ខែតុលានេះ បាននិយាយថា ខ្លួនផ្តល់តម្លៃលើសេចក្តីថ្លែងការណ៍រួមសន្តិភាពកម្ពុជា-ថៃនេះ និងបន្តតាមដានការអនុវត្តនៃប្រទេសទាំងពីរ។
បើតាមប្រភពនោះ ប្រទេសបារាំងវាយតម្លៃខ្ពស់ចំពោះការចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ក្នុងឱកាសនៃកិច្ចប្រជុំកំពូលអាស៊ានលើកទី៤៧ នៅទីក្រុងគូឡាឡាំពួរ លើសេចក្តីថ្លែងការណ៍សន្តិភាពរវាងប្រទេសកម្ពុជា និងប្រទេសថៃ ដោយមានវត្តមានប្រទេសម៉ាឡេស៊ី ដែលជាប្រធានអាស៊ាន និងសហរដ្ឋអាមេរិក។
ប្រភពនោះ បញ្ជាក់ថា សេចក្តីថ្លែងការណ៍រួមនេះ អនុញ្ញាតឱ្យប្រទេសកម្ពុជា និងប្រទេសថៃដោះស្រាយជម្លោះព្រំដែនដោយសន្តិវិធី ដែលមានភាពចាំបាច់សម្រាប់ស្ថិរភាពតំបន់។
ប្រទេសបារាំងវាយតម្លៃខ្ពស់ ជាពិសេសចំពោះការចុះហត្ថលេខាលើលក្ខខណ្ឌយោងសម្រាប់ក្រុមអ្នកសង្កេតការណ៍អាស៊ាន ដែលនឹងអនុញ្ញាតឱ្យពន្លឿនការដាក់ពង្រាយនៅតាមមូលដ្ឋាន ការប្តេជ្ញាចិត្តរបស់ភាគីទាំងពីរ ក្នុងការដកអាវុធធុនធ្ងន់ចេញពីព្រំដែន ការបន្តការដោះមីន ក៏ដូចជាការប្រកាសរបស់ប្រទេសថៃ ស្តីពីការដោះលែងទាហានកម្ពុជាដែលប្រទេសថៃកំពុងឃុំខ្លួន។
ដោយមានទំនាក់ទំនងជាមួយដៃគូអាស៊ាន និងសហរដ្ឋអាមរិក ប្រទេសបារាំងនឹងតាមដានដោយយកចិត្តទុកដាក់ចំពោះការអនុវត្តជាក់ស្តែង នូវការប្តេជ្ញាចិត្តទាំងនេះ ក៏ដូចជាការបន្តការដោះស្រាយជម្លោះព្រំដែនរវាងភាគីទាំងពីរតាមរយៈការសន្ទនា និងដោយគោរពច្បាប់អន្តរជាតិ៕
