បន្ទាប់ពីបានបោសសម្អាតបុគ្គលិកដែលគាំទ្រ និងជាសមាជិកសហជីពឯករាជ្យចេញពីក្រុមហ៊ុន និងបានចូលរួមបង្ក្រាបដោយហិង្សា លើអតីតបុគ្គលិករបស់ខ្លួន ដែលតវ៉ារឿងបញ្ឈប់ពីការងារដោយគ្មានមូលហេតុច្បាស់លាស់ ពេលនេះក្រុមហ៊ុនបនល្បែងកាស៊ីណូ ណាហ្គាវើលដ៍(Naga World) បានទទួលប័ណ្ណសរសើរ ហើយថាជាកន្លែងធ្វើការល្អបំផុត ខណៈអតីតបុគ្គលិក យល់ថា ចំណាត់ថ្នាក់នេះ គឺបានមកពីការវាយតម្លៃមិនត្រឹមត្រូវ និងគ្មានភាពសុក្រឹត្យ។
អតីតបុគ្គលិកកាស៊ីណូ ណាហ្គាវើលដ៍ អ្នកស្រី ម៉ម សុវឌ្ឍិន ប្រាប់វីអូឌីនៅថ្ងៃទី២៩ ខែតុលាថា ក្រុមហ៊ុនបនល្បែងមួយនេះ មិនស័ក្ដិសមនឹងទទួលបានវិញ្ញាបនបត្រ ថាជា«កន្លែងធ្វើការដ៏ល្អបំផុត» នោះទេ ដោយសារតែកន្លងមក កាស៊ីណូ ណាហ្គាវើលដ៍ បានរំលោភសិទ្ធិការងារធ្ងន់ធ្ងរ កេងប្រវ័ញ្ចកម្លាំងពលកម្ម រើសអើងបុគ្គលិក ដែលគាំទ្រសហជីព និងការបណ្ដោយឱ្យសន្តិសុខ បង្កហិង្សាមកលើក្រុមកូដករជាដើម។ អ្នកស្រីបន្តថា កម្មវិធីបច្ចេកវិទ្យាទំនើបផ្សេងៗដែលក្រុមហ៊ុនណាហ្គាដាក់ចេញ គឺគ្រាន់តែជារូបភាពល្អមើល ខណៈបុគ្គលិកទីនោះកំពុងរងការកេងប្រវ័ញ្ចកម្លាំងពលកម្ម។
អ្នកស្រី ម៉ម សុវឌ្ឍិន និយាយថា៖ «ចំណែកឯរឿងគ្រប់គ្រងកម្លាំងពលកម្ម ឥឡូវហ្នឹងបងបានទទួលព័ត៌មានផ្ទាល់ ពីបុគ្គលិកនៅខាងក្នុង គាត់ប្រាប់ថា ការងារហត់ជាងមុន ដោយសារពីមុនគេប្រើប្រាស់បុគ្គលិក ១០នាក់ ឥឡូវគេប្រើតែ២នាក់ ឬ៣នាក់ទេ អ៊ីចឹងវាជាផលវិបាក បើនិយាយឱ្យចំ ជាការកិបកេងកម្លាំងពលកម្ម»។
ការរិះគន់នេះ ធ្វើឡើងបន្ទាប់ពី ក្រុមហ៊ុនណាហ្គាខប(Naga Corp) ដែលជាមេបុត្រសម្ព័ន្ធរបស់កាស៊ីណូ ណាហ្គាវើលដ៍ ត្រូវបានស្ថាប័នវាយតម្លៃមួយឈ្មោះ Great Place To Work® ជាភាសាខ្មែរ កន្លែងធ្វើការដែលល្អ បានទទួលស្គាល់ថា ជាកន្លែងធ្វើការល្អបំផុតប្រចាំឆ្នាំ២០២៥-២០២៦។
គេហទំព័រ Gambling Insider បានដកស្រង់សម្ដីរបស់អគ្គនាយក និងជានាយកប្រតិបត្តិក្រុមហ៊ុនណាហ្គាខប លោក ឈិន យីហ្វុង (Chen Yiy Fon) ថា មូលហេតុសំខាន់ដែលធ្វើឱ្យក្រុមហ៊ុនរបស់លោក ទទួលបានចំណាត់ថ្នាក់ ថាជាកន្លែងធ្វើការដ៏ល្អបំផុតនេះ គឺដោយសារមានការបង្កើតកម្មវិធីផ្សារភ្ជាប់ទំនាក់ទំនង និងសុខុមាលភាពបុគ្គលិក ឱ្យមានភាពរស់រវើក និងសកម្ម តាមរយៈការបង្កើតកម្មវិធីរត់ប្រណាំងណាហ្គាវើលដ៍ (NagaRun) កម្មវិធីប្រឡងសមត្ថភាព និងទេពកោសល្យ (Naga’s Got Talent) ដែលជួយលើកកម្ពស់សុខុមាលភាព សមត្ថភាពខាងសិល្បៈ និងការបង្កើនមិត្តភាពសម្រាប់បុគ្គលិក និងការរក្សាបាននូវតុល្យភាពយេនឌ័រនៃកម្លាំងពលកម្ម ដែលក្នុងនោះមានស្ត្រីកំពុងបំពេញការងារចំនួន ៥០.២ភាគរយ ។
បន្ថែមពីលើនេះ ក្រុមហ៊ុន ណាហ្គាវើល៍ បានសរសេរអះអាងនៅលើទំព័រហ្វេសប៊ុកថា មូលហេតុដែលធ្វើឱ្យក្រុមហ៊ុន ណាហ្គាខប ទទួលបានការចាត់ថ្នាក់ ថាជាកន្លែងធ្វើការដ៏ល្អបំផុតបែបនេះ គឺដោយសារក្រុមហ៊ុនទទួលបានពិន្ទុ(Trust Index™) ខ្ពស់ចំនួន ៩៥ភាគរយ ដែលពិន្ទុនេះ បានមកពីការស្រង់មតិដោយផ្ទាល់ និងអនាមិក របស់បុគ្គលិកក្នុងក្រុមហ៊ុនជាអ្នកដាក់ឱ្យ។
ទោះជាបែបនេះក្ដី ប្រភពពីបុគ្គលិកកំពុងធ្វើការនៅក្នុងកាស៊ីណូ ណាហ្គាវើលដ៍ មួយចំនួនដែល វីអូឌី បានជជែកជាមួយក្រៅបទសម្ភាសន៍ បានអះអាងថា ការស្រង់មតិនេះ គ្មានតម្លាភាពនោះឡើយ ដោយក្រុមហ៊ុនបានដាក់សម្ពាធ និងទិញទឹកចិត្តបុគ្គលិក ដោយការចែកលុយធីប ឬបើកឱ្យពួកគេមានឱកាសរកលុយធីបជាដើម។
យ៉ាងណាក៏ដោយចុះ នៅពីក្រោយកិត្តិយសនៃពានរង្វាន់កន្លែងធ្វើការដ៏ល្អបំផុត ដែលក្រុមហ៊ុនបនល្បែងកាស៊ីណូ ណាហ្គាវើលដ៍ ទទួលបាននេះ គឺពោរពេញទៅដោយរឿងរ៉ាវអាស្រូវ អំពើពុករលួយ និងភាពចម្រូងចម្រាស់ នៅក្នុងវិវាទការងារជាមួយអតីតបុគ្គលិក ដែលបានអូសបន្លាយអស់រយៈពេលជិត ៤ឆ្នាំ ដោយគ្មានដំណោះស្រាយនៅឡើយ។
ជាក់ស្ដែង កាលពីខែធ្នូ ឆ្នាំ២០២១ កូដកម្មអហិង្សានៅក្រុមហ៊ុនណាហ្គាវើលដ៍ចាប់ផ្ដើមកើតឡើង នៅខាងមុខអាគារណាហ្គាវើលដ៍ ភ្នំពេញ ដោយសារក្រុមហ៊ុនល្បែងស៊ីសងមួយនេះ បានបញ្ឈប់បុគ្គលិកប្រមាណ ១ ៣០០នាក់ ដោយគ្មានមូលហេតុត្រឹមត្រូវ។ ក្រុមកូដករ អះអាងថា ការបញ្ឈប់បុគ្គលិកនេះ គឺជាចេតនាបំបាត់សហជីពឯករាជ្យក្នុងក្រុមហ៊ុន ខណៈភាគីក្រុមហ៊ុន បានអះអាងថា គឺដោយសារក្រុមហ៊ុនបានទទួលរងផលប៉ះពាល់ពីឥទ្ធិពលនៃការរីករាលដាលជំងឺកូវីដ-១៩ ដែលធ្វើឱ្យក្រុមហ៊ុនបាត់បង់ចំណូល និងត្រូវបង្ខំចិត្តកាត់បន្ថយបុគ្គលិក។
ក៏ប៉ុន្តែ ផ្ទុយពីហេតុផលរបស់ក្រុមហ៊ុន ដែលបានអះអាងពីការខាតបង់ក្រុមហ៊ុនកាស៊ីណូ ណាហ្គាវើលដ៍ បានបរិច្ចាគលុយឱ្យទៅកាកបាទក្រហមកម្ពុជា និងរដ្ឋាភិបាល ដែលគ្រប់គ្រងដោយគ្រួសារត្រកូលហ៊ុន ជាច្រើនដង ដោយក្នុងមួយលើកៗ មានចំនួនចាប់ពីរាប់សិបម៉ឺន រហូតដល់លានដុល្លារ។ ទន្ទឹមគ្នានេះ ក្រុមហ៊ុនថែមទាំងរកស៊ីបានចំណេញកប់ក្ដោង រហូតដល់មានលទ្ធភាពពង្រីកសាខាបនល្បែង និងប្រកាសរើសបុគ្គលិករាប់ពាន់នាក់បន្ថែមទៀតផង។
នាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ហៅកាត់ថា សង់ត្រាល់ លោក មឿន តុលា ភ្ញាក់ផ្អើលនឹងចំណាត់ថ្នាក់នេះ ព្រោះក្រុមហ៊ុនណាហ្គាវើលដ៍មានឈ្មោះនៅលើទំព័រកាសែតទាំងជាតិ និងអន្តរជាតិ ទាក់ទិននឹងវិវាទការងារមិនទាន់ដាច់ស្រេចជាមួយក្រុមកម្មករ ដែលជាសហជីពឯករាជ្យ។
លោកបន្តថា វិវាទនេះគួរតែដល់ពេលបញ្ចប់ ដោយក្រសួងការងារ ត្រូវសម្របសម្រួលភាគីទាំងពីរ ដោយផ្ដល់នូវដំណោះស្រាយរួមមួយ ជាជាងរុញករណីនេះទៅតុលាការ។
លោក មឿន តុលា ថ្លែងថា៖ ៖ «អាចនឹងក្រសួង[ការងារ] គួរតែសម្របសម្រួលឱ្យមានការជជែកគ្នាឡើងវិញ រវាងភាគីក្រុមហ៊ុន និងភាគីបុគ្គលិកនិយោជិតក្រុមហ៊ុនណាហ្គាវើលដ៍ហ្នឹង ថាមកទល់ពេលនេះ មានការប្រែប្រួលអ្វីខ្លះ។ បើមិនអ៊ីចឹងទេ រឿងណាហ្គាវើលដ៍នេះ វានៅតែជា Foot note ជាកំណត់សម្គាល់ក្នុងរបាយការណ៍របស់អង្គការពលកម្មអន្តរជាតិ ក៏ដូចជារបាយការណ៍របស់ក្រុមប្រឹក្សាសិទ្ធិមនុស្សអង្គការសហប្រជាជាតិ UPR ហ្នឹងដដែល»។
ជាជាងការផ្ដល់ដំណោះស្រាយសមរម្យដល់អតីតបុគ្គលិក អាជ្ញាធរក្រុងភ្នំពេញ និងសន្តិសុខរបស់ក្រុមហ៊ុន បានរួមគ្នាប្រើអំពើហិង្សា រហូតធ្វើឱ្យស្ត្រីម្នាក់រលូតកូន និងមួយចំនួនទៀតរងរបួស និងសន្លប់ ដោយសារត្រូវបានបោកខ្ទប់ក្នុងពេលកូដកម្ម។ លើសពីនេះ អតីតមេដឹកនាំ លោក ហ៊ុន សែន ធ្លាប់បានចោទប្រកាន់លាបពណ៌មកលើក្រុមកូដករជាសាធារណៈថា ជាក្រុមបម្រើបរទេសរហូតដល់ប្រធានសហជីពក្រុមហ៊ុនណាហ្គាវើលដ៍ គឺកញ្ញា ឈឹម ស៊ីថរ ត្រូវបានតុលាការចោទប្រកាន់ និងដាក់ពន្ធនាគារចំនួន ២លើក។
អតីតបុគ្គលិកធ្វើការនៅការស៊ីណូ ណាហ្គាវើលដ៍ លើកឡើងថា ទោះបីជាក្រុមហ៊ុនទទួលបានពានរង្វាន់សរសើរច្រើនយ៉ាងណាក្ដី ក៏កេរ្ដិ៍ឈ្មោះទាំងនេះ គ្រាន់តែជាពានរង្វាន់ក្លែងក្លាយប៉ុណ្ណោះ ប្រសិនបើក្រុមហ៊ុន នៅតែមិនផ្ដល់ដំណោះស្រាយសមរម្យដល់បុគ្គលិក៕
