អគ្គនាយកដ្ឋានអត្តសញ្ញាណកម្ម អះអាងថា ខ្លួនកំពុងបើកការស៊ើបអង្កេតលើមន្ត្រីផ្កាយពីរម្នាក់ ជុំវិញរឿងអាស្រូវពុករលួយ រត់ការផ្តល់សញ្ជាតិខ្មែរឱ្យជនបរទេស ជាថ្នូរនឹងទទួលលុយ២លានដុល្លារ តែមិនបានសម្រេច ហើយមិនព្រមប្រគល់ប្រាក់ឱ្យជនរងគ្រោះវិញ។
អគ្គនាយករងនៃអគ្គនាយកដ្ឋានអត្តសញ្ញាណកម្ម លោក គង់ វុទ្ធី ត្រូវបានគេចែកចាយលើបណ្តាញសង្គមជាបន្តបន្ទាប់ នាពេលថ្មីៗនេះថា បានទទួលលុយចំនួន២លានដុល្លារ ដើម្បីរត់ការផ្តល់សញ្ជាតិឱ្យជនបរទេស។ ប៉ុន្តែថា ជាង១ឆ្នាំហើយ មន្រ្តីពាក់ផ្កាយពីររូបនេះ រត់ការបរាជ័យ ហើយលុយ២លានដុល្លារមិនព្រមប្រគល់ជូនជនរងគ្រោះវិញទេ។
ជុំវិញរឿងនេះ អគ្គនាយកដ្ឋានអត្តសញ្ញាណកម្ម បានបញ្ជាក់លើហ្វេសប៊ុកនៅថ្ងៃទី២៨ ខែតុលាថា ក្រុមប្រឹក្សាវិន័យរបស់អគ្គនាយកដ្ឋានអត្តសញ្ញាណកម្ម បានចាត់វិធានការកោះហៅសាមីខ្លួនដើម្បីបំភ្លឺ និងកំពុងបន្តស្រាវជ្រាវស៊ើបអង្កេតបន្ថែម ។
ប្រភពបន្តថា ករណីរកឃើញថា មន្ត្រី ឬថ្នាក់ដឹកនាំណាម្នាក់បានប្រព្រឹត្តកំហុសផ្ទុយនឹងវិន័យរបស់កងកម្លាំងនគរបាលជាតិ អគ្គនាយកដ្ឋានអត្តសញ្ញាណកម្មនឹងចាត់វិធានការអនុវត្តវិន័យលើបុគ្គលរូបនោះយ៉ាងម៉ឺងម៉ាត់។
ទន្ទឹមនេះ អគ្គនាយកដ្ឋានអត្តសញ្ញាណកម្ម ស្នើដល់បុគ្គលពាក់ព័ន្ធ ឬជាជនរងគ្រោះសហការផ្តល់ព័ត៌មាន ក៏ដូចជាឯកសារភស្តុតាងបន្ថែមមកនាយកដ្ឋានរដ្ឋបាលសរុបនៃអគ្គនាយកដ្ឋានអត្តសញ្ញាណកម្មរៀងរាល់ម៉ោងធ្វើការ។
ជុំវិញរឿងនេះ VOD មិនទាន់អាចសុំការបំភ្លឺបន្ថែមពីអគ្គនាយកដ្ឋានអត្តសញ្ញាណកម្ម និងអ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្រ បាននៅឡើយទេ គិតត្រឹមម៉ោងផ្សាយនេះ។
សម្រាប់ តំណាងរាស្រ្តគណបក្សសង្រ្គោះជាតិ លោក អ៊ុំ សំអាន យល់ថា ការដែលរដ្ឋាភិបាលមិនអាចបោសសម្អាតអំពើពុករលួយបាន ដោយសារតុលាការកម្ពុជាមិនឯករាជ្យ ហើយមន្រ្តីខិលខូចទាំងនោះអាងខ្សែបក្សពួក គប់គិតគ្នាជាប្រព័ន្ធពីលើដល់ក្រោម ដែលកើតមានគ្រប់ស្ថាប័នរដ្ឋនៅកម្ពុជា។
ក្នុងន័យនេះ លោកថា ទាល់តែផ្លាស់ប្តូរប្រព័ន្ធដឹកនាំបែបគ្រួសារនិយមរបស់រដ្ឋាភិបាលគ្រួសារហ៊ុន ទើបអាចបោសសម្អាតអំពើពុករលួយដល់ឬសគល់បាន។
លោកថា៖ «ត្រូវតែហ៊ានកម្ចាត់អំពើពុករលួយ តាំងពីលើដល់ក្រោម ត្រូវហ៊ានអារសាច់ស្អុយចេញ។ អ្នកដែលប្រព្រឹត្តអំពើពុករលួយត្រូវចាប់មកផ្តន្ទាទោសទៅតាមផ្លូវច្បាប់។ អាហ្នឹងទើបអាចកម្ចាត់អំពើពុករលួយបាន បើមិនអ៊ីចឹងទេ គឺមិនអាចលុបបំបាត់អំពើពុករលួយក្នុងសង្គមខ្មែរបានទេ។ បើតាមយោបល់ខ្ញុំយល់ថា មានតែប្ដូរមេដឹកនាំប្រទេសចេញនោះទេ ប្ដូរត្រកូលហ៊ុនចេញពីការដឹកនាំប្រទេស ទើបអាចលុបបំបាត់អំពើពុករលួយបាន។ បើមិនអ៊ីចឹងទេ! មិនអាចលុបបំបាត់អំពើពុករលួយបានទេ ព្រោះទៅជាប្រពៃណីហើយ ដែលលោក ហ៊ុន សែន អនុញ្ញាតឲ្យមន្ត្រីរបស់គាត់ហ្នឹង ពុករលួយដើម្បីយកលុយទៅពង្រឹងអំណាចឲ្យគណបក្សប្រជាជន អាចរឹងមាំបន្តទៀត ហើយនឹងអាចឲ្យត្រកូលហ៊ុនដឹកនាំប្រទេសបន្តទៀតតាមរបៀបផ្ដាច់ការ គ្រួសារនិយម»។
ដោយឡែកអ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ជំរុញឱ្យអង្គភាពប្រឆាំងអំពើពុករលួយ ចូលរួមបើកការស៊ើបអង្កេតបន្ថែមលើករណីនេះ ដើម្បីធានាតម្លាភាព និងយុត្តិធម៌។
បន្ថែមលើនេះ លោកថា រដ្ឋាភិបាលដែលជាអាណាព្យាបាល ក៏ត្រូវមានវិធានការលើក្រសួងមហាផ្ទៃ និងភាគីពាក់ព័ន្ធបើកការស៊ើបអង្កេតផ្ទៃក្នុងបន្ថែមទៀត ដើម្បីផ្ទៀងផ្ទាត់ថាតើមន្រ្តីដែលទទួលបន្ទុកផ្នែកអគ្គនាយកដ្ឋានអត្តសញ្ញាណកម្ម បានប្រព្រឹត្តដូចការចោទមែនឬយ៉ាងណា។
លោកថា៖ «ធ្វើបែបនេះ គឺដើម្បីធានាបាននូវយុត្ដិធម៌តម្លាភាពហើយ ក៏អាចផ្តល់នូវទំនុកចិត្ត និងការជឿជាក់ទៅលើការអនុវត្តរបស់រាជរដ្ឋាភិបាល ហើយនិងស្ថាប័នពាក់ព័ន្ធ ជាពិសេសគឺដើម្បីលើកកម្ពស់នីតិរដ្ឋហើយនឹងទទួលបានការសាទរ និងគាំទ្រពីសាធារណជន ហើយក៏ជាការព្រមានទៅដល់មន្ត្រីដែលធ្លាប់ទទួលសំណូក ឬក៏រៀបចំប្រព័ន្ធដើម្បីដោះស្រាយបញ្ហារត់ការ ដើម្បីជាថ្នូរទទួលបានអត្ថប្រយោជន៍ជាថវិកា ឬក៏ជាអ្វីមួយដែលវាប្រាសចាកអំពីគោលការណ៍នៃច្បាប់របស់ជាតិរបស់យើង»។
អង្គការតម្លាភាពអន្តរជាតិ ដែលធ្វើការផ្តោតលើអំពើពុករលួយ និងអភិបាលកិច្ច បានចេញសេចក្តីថ្លែងការណ៍ថ្មីមួយ អំឡុងខែកុម្ភៈឆ្នាំ២០២៥នេះ រកឃើញថា កម្រិតនៃអំពើពុករលួយ កម្ពុជា ស្ថិតក្នុងលំដាប់អាក្រក់ជាប់គ្នាជិត១០ឆ្នាំ បើធៀបនឹងប្រទេសជាសមាជិកអាស៊ាន។
មូលហេតុចម្បងមួយដែលអង្គការអន្តរជាតិនេះរកឃើញ គឺប្រព័ន្ធយុត្តិធម៌មិនអាចកាត់ទោសកំហុសមេដឹកនាំបាន។ ហើយថាប្រទេសដែលអាចរើខ្លួនពីការញាំញីដោយអំពើពុករលួយបាន ចាំបាច់ត្រូវបើកលំហសេរីភាពបញ្ចេញមតិ និងត្រូវរៀបចំឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌ តាមគន្លងប្រជាធិបតេយ្យ៕
