សហរដ្ឋអាមេរិក បានព្រមានជនជាតិអាមេរិកនៅក្នុងប្រទេសម៉ាលី នៅថ្ងៃអង្គារ ឱ្យចាកចេញពីប្រទេសជាបន្ទាន់ ដោយប្រើជើងហោះហើរពាណិជ្ជកម្ម ខណៈដែលរដ្ឋាភិបាលរបស់ខ្លួន ស្ថិតក្រោមសម្ពាធដែលកើនឡើងកាន់តែខ្លាំង ពីក្រុមបះបោរមានទំនាក់ទំនងជាមួយក្រុមអាល់កៃដា ដែលកំពុងដាក់ការបិទប្រេងឥន្ធនៈ។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី២៩ ខែតុលា ឆ្នាំ២០២៥នេះថា ក្រុមសកម្មប្រយុទ្ធ ចាម៉ាត់ នូស្រាត់ អាល់អ៊ីស្លាម វ៉ាល់មូស្លីមមីន(Jama’at Nusrat al-Islam wal-Muslimin) បានប្រកាសពីការបិទផ្លូវលើការនាំចូលប្រេងឥន្ធនៈ ទៅកាន់ប្រទេសអាហ្វ្រិកខាងលិចដែលគ្មានព្រំដែននៅដើមខែកញ្ញា។ ចាប់តាំងពីពេលនោះមក ពួកគេបានវាយប្រហារក្បួនរថយន្តដឹកប្រេង ដែលប៉ុនប៉ងចូលប្រទេស ឬឆ្ពោះទៅកាន់រដ្ឋធានីបាម៉ាកូ(Bamako)។
រដ្ឋាភិបាល កាលពីថ្ងៃអាទិត្យ បានបញ្ជាឱ្យផ្អាកសាលារៀន និងសកលវិទ្យាល័យទូទាំងប្រទេសម៉ាលី រយៈពេល ២សប្តាហ៍ដោយសារកង្វៈប្រេង។
ស្ថានទូតសហរដ្ឋអាមេរិកប្រចាំនៅប្រទេសម៉ាលី បានចេញសេចក្តីថ្លែងការណ៍មួយថា ‘‘បញ្ហាប្រឈមផ្នែកហេដ្ឋារចនាសម្ព័ន្ធនៅក្នុងប្រទេសម៉ាលី រួមទាំងការរំខានជាបន្តបន្ទាប់នៃការផ្គត់ផ្គង់ប្រេងសាំង ប្រេងម៉ាស៊ូត ការបិទស្ថាប័នសាធារណៈ ដូចជា សាលា និងសាកលវិទ្យាល័យទូទាំងប្រទេស និងជម្លោះប្រដាប់អាវុធដែលកំពុងបន្តរវាងរដ្ឋាភិបាលប្រទេសម៉ាលី និងក្រុមភេរវករជុំវិញទីក្រុងបាម៉ាកូ (Bamako) បង្កើនភាពដែលមិនអាចទាយទុកជាមុនបាននៃស្ថានភាពសន្តិសុខរបស់ទីក្រុងបាម៉ាកូ (Bamako)។
អ្នកវិភាគបានពណ៌នាការបិទប្រេងឥន្ធនៈថា ជាផ្នែកនៃយុទ្ធនាការដាក់សម្ពាធលើរដ្ឋាភិបាលដែលដឹកនាំដោយយោធារបស់ប្រទេសម៉ាលី ដោយក្រុមសកម្មប្រយុទ្ធដែលចង់កាត់ផ្តាច់អុកស៊ីសែនសេដ្ឋកិច្ចរបស់ប្រទេស។
ស្ថានទូត បាននិយាយថា អាកាសយានដ្ឋានក្នុងទីក្រុងបាម៉ាកូ(Bamako) នៅតែបើកធម្មតាដោយណែនាំជនជាតិអាមេរិក ឱ្យចាកចេញដោយប្រើជើងហោះហើរពាណិជ្ជកម្ម ជាជាងធ្វើដំណើរតាមផ្លូវគោកទៅកាន់ប្រទេសជិតខាង ដោយសារហានិភ័យនៃ “ការវាយប្រហារភេរវកម្មតាមផ្លូវជាតិ”។
ពលរដ្ឋសហរដ្ឋអាមេរិក ដែលជ្រើសរើសនៅក្នុងប្រទេសម៉ាលី គួរតែរៀបចំផែនការសង្រ្គោះបន្ទាន់ រួមទាំងជម្រកស្នាក់នៅសម្រាប់រយៈពេលបន្ថែម៕
