ជនជាតិសិង្ហបុរីសរុបចំនួន ២៧នាក់ និងជនជាតិម៉ាឡេស៊ី ៧នាក់ ត្រូវបានប៉ូលិសសិង្ហបុរី ចេញដីការ និងស្វែងរកចាប់ខ្លួន ពីបទជាផ្នែកមួយនៃក្រុមឆបោកតាមអ៊ីនធឺណិតជាប្រព័ន្ធ ដែលប្រតិបត្តិការចេញពីទីតាំងនៅក្នុងប្រទេសកម្ពុជា។ នេះបើតាមការប្រកាសរបស់ កងកម្លាំងប៉ូលិសសិង្ហបុរី កាលពីថ្ងៃទី២៩ ខែតុលា។
កងកម្លាំងប៉ូលីសសិង្ហបុរី (SPF) បានរកឃើញថា បណ្ដាញក្រុមឆបោកតាមអ៊ីធឺណិតទាំងនេះ បានផ្តោតគោលដៅទៅលើជនរងគ្រោះនៅក្នុងប្រទេសសិង្ហបុរី ដោយពួកគេបានប្រើប្រាស់ឧបាយកល តាមរយៈការក្លែងបន្លំអត្តសញ្ញាណជាមន្ត្រីរដ្ឋាភិបាល ឬបុគ្គលិករបស់ស្ថាប័នមួយចំនួន ជាដើម។
ប៉ូលីសសិង្ហបុរី បានបន្ថែមថា ក្រុមជនសង្ស័យដែលត្រូវបានកំណត់អត្តសញ្ញាណទាំង ៣៤នាក់នេះ បានប្រព្រឹត្តិករណីបោកជនរងគ្រោះ យ៉ាងហោចណាស់ចំនួន ៤៣៨ករណី ក្នុងទំហំទឹកប្រាក់សរុបប្រមាណ ៣១.៧លានដុល្លារអាមេរិក។
តែយ៉ាងណា ប៉ូលិសសិង្ហបុរី បានបញ្ជាក់ថា បច្ចុប្បន្នជនសង្ស័យទាំង ៣៤នាក់នេះ កំពុងនៅក្រៅប្រទេសសិង្ហបុរី ហើយអាជ្ញាធរសិង្ហបុរី កំពុងធ្វើការជាមួយសមភាគីអន្តរជាតិ ក៏ដូចជា ប៉ូលិសអាំងទ័រប៉ូល ដើម្បីកំណត់ទីតាំង និងចាប់ខ្លួនក្រុមជនសង្ស័យទាំងនោះ។
តាមការអះអាងរបស់អាជ្ញាធរសិង្ហបុរី ជនសង្ស័យក្នុងប្រតិបត្តិការឆបោកតាមអ៊ីនធឺណិតទាំង ៣៤នាក់ ត្រូវបានគេកំណត់អត្តសញ្ញាណ បន្ទាប់ពីកងកម្លាំងប៉ូលិសសិង្ហបុរី បានធ្វើប្រតិបត្តិការរួមគ្នាជាមួយអគ្គស្នងការនគរបាលជាតិកម្ពុជា កាលពីថ្ងៃទី៩ ខែកញ្ញា រហូតកំណត់បានទីតាំងធ្វើប្រតិបត្តិការចេញពីបរិវេណអាគារឆបោក នៅក្នុងរាជធានីភ្នំពេញ ប្រទេសកម្ពុជា។
ប៉ូលីសសិង្ហបុរី បានបញ្ជាក់បន្ថែមថា អាជ្ញាធរសិង្ហបុរី នឹងមិនលះបង់ការខិតខំប្រឹងប្រែង ដើម្បីតាមចាប់ខ្លួនក្រុមឧក្រិដ្ឋជនឆបោកតាមអនឡាញ ទាំងនៅក្នុង ឬក្រៅប្រទេសនោះឡើយ ដរាបណា ឧក្រិដ្ឋកម្មឆបោកឆ្លងដែនមួយនេះ រលាយបាត់ខ្លួនចេញពីសិង្ហបុរី។
ពាក់ព័ន្ធនឹងឧក្រិដ្ឋកម្មឆបោកតាមអ៊ីនធឺណិត ដែលមានមូលដ្ឋាននៅក្នុងប្រទេសកម្ពុជានេះដែរ សារព័ត៌មានវៀតណាម ណិត(Vietnam Net)បានចុះផ្សាយនៅថ្ងៃទី៣០ ខែតុលានេះថា ប៉ូលិសខេត្តឡៃចូវ(Lai Chau) បានបង្ក្រាបក្រុមឧក្រិដ្ឋជនឆបោកតាមអ៊ីនធឺណិតឆ្លងដែន ជនជាតិវៀតណាមចំនួន ៥៩នាក់ ក្នុងនោះមានស្ត្រី ១៥នាក់ ដែលកំពុងប្រតិបត្តិការនៅក្នុងប្រទេសកម្ពុជា។ ប្រភពបន្តថា ជនសង្ស័យទាំងនោះ ត្រូវបានចោទប្រកាន់ពីបទឆបោកជនរងគ្រោះជាង ៨ពាន់នាក់ ក្នុងចំនួនទឹកប្រាក់ប្រហែល ១២.២លានដុល្លារអាមេរិក។
យោងតាមអ្នកស៊ើបអង្កេត ជនសង្ស័យបានប្រើយុទ្ធសាស្ត្របោកប្រាស់ផ្សេងៗ ដូចជា ក្លែងបន្លំជាបុគ្គលិកដឹកជញ្ជូន មន្ត្រីប៉ូលីស បុគ្គលិកយោធា និងល្បិចអន្ទាក់ទឹកឃ្មុំ ដោយប្រើប្រាស់ទំនាក់ទំនងស្នេហា ដើម្បីបញ្ឆោតជនរងគ្រោះ។
វីអូឌី មិនអាចទាក់ទងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន និងរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកស្រី ជូ ប៊ុនអេង ដើម្បីសុំការបកស្រាយបន្ថែម ជុំវិញបញ្ហានេះបានទេ នៅថ្ងៃទី៣០ ខែតុលា។
ទោះជាយ៉ាងណា អ្នកនាំពាក្យរងក្រសួងមហាផ្ទៃ លោក ទូច សុឃៈ បានលើកឡើងថា គិតត្រឹមរយៈពេល៩ខែ ក្នុងឆ្នាំ២០២៥នេះ អាជ្ញាធរបានចុះបង្ក្រាបទីតាំងបទល្មើសបច្ចេកវិទ្យា (Online scam) ចំនួន ៤៨លើក ក្នុងភូមិសាស្រ្ត ១៥រាជធានីខេត្ត។
លោក ទូច សុឃៈ បញ្ជាក់ថា នៅក្នុងប្រតិបត្តិការបោសសម្អាតនេះ អាជ្ញាធរបានឃាត់ខ្លួនមនុស្សចំនួនជិត ៣ពាន់នាក់ ក្នុងនោះកសាងសំណុំរឿងបញ្ជូនទៅកាន់តុលាការចំនួន ១៦៨នាក់ និងអនុវត្តនីតិវិធីបណ្ដេញចេញពីកម្ពុជាចំនួនជាង ២ពាន់៧រយនាក់។
ជុំវិញរឿងនេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ឃើញថា ដើម្បីបោសសម្អាតឧក្រិដ្ឋកម្មឆបោកតាមអ៊ីនធឺណិត ឱ្យមានប្រសិទ្ធិភាព រដ្ឋាភិបាលកម្ពុជា ត្រូវបង្កើនកិច្ចសហប្រតិបត្តិការជាមួយអន្តរជាតិ ដើម្បីចាប់ខ្លួនមេខ្លោងធំ ខណៈនៅក្នុងផ្ទះខ្លួនឯងវិញ រដ្ឋាភិបាលត្រូវបោសសម្អាតអំពើពុករលួយ ដែលជាឬសគល់នៃឧក្រិដ្ឋកម្មឆ្លងដែនមួយនេះ។
លោកថា៖ «ដូច្នេះ នេះគឺជាអំពើពុករលួយមួយ ដែលត្រូវតែព្យាយាមលុបបំបាត់ ដើម្បីធានាបាននូវភាពរឹងមាំក្នុងការអនុវត្តច្បាប់ ក៏ដូចជាការស្ដារកិត្តិយស និងភាពថ្លៃថ្នូររបស់កម្ពុជា នៅលើឆាកអន្តរជាតិ ទាក់ទងទៅនឹងបទល្មើសបច្ចេកវិទ្យានេះផងដែរ»។
កន្លងទៅ លោកនាយករដ្ឋមន្ត្រី ហ៊ុន ម៉ាណែត ធ្លាប់បានប្រកាសបើកយុទ្ធនាការបោសសម្អាតបទល្មើសអនឡាញនៅទូទាំងប្រទេស ដោយបញ្ជាឱ្យអាជ្ញាធរមានសមត្ថកិច្ច និងស្ថាប័នពាក់ព័ន្ធទាំងអស់ត្រូវចុះប្រតិបត្តិការបង្ក្រាបគ្រប់ទីតាំង ដោយភាពម្ចាស់ការទទួលខុសត្រូវក្នុងភូមិសាស្ត្ររបស់ខ្លួន។
ក៏ប៉ុន្តែ អ្នកស៊ើបអង្កេតឧក្រិដ្ឋកម្មឆបោកតាមអ៊ីនធឺណិត សង្កេតឃើញថា បទបញ្ជានេះ មិនបានអនុវត្តឱ្យមានសុក្រឹត្យភាពនោះឡើយ ដោយកម្ពុជាខ្លួនឯងផ្ទាល់ ហាក់កំពុងរក្សាតំណែងនៅលើតារាងលំដាប់កំពូលនៅឡើយ ទោះបីជាចរន្តនៃប្រតិបត្តិករឆបោកនៅកម្ពុជា ត្រូវបានផ្លាស់ប្ដូរទីតាំង និងត្រូវអាជ្ញាធរចុះបង្ក្រាបបានមួយចំនួនក្ដី ក៏ក្រុមជនឆបោកទាំងនោះ ហាក់មិនបានទៅណាឆ្ងាយពីទឹកដីកម្ពុជានោះទេ ផ្ទុយទៅវិញពួកគេថែមទាំងពង្រីកបណ្ដាញប្រតិបត្តិការ កាន់តែធំជាងមុនថែមទៀត៕
