សារព័ត៌មានថៃនៅថ្ងៃសុក្រនេះ បានរាយការណ៍ថា កម្លាំងជំនាញរបស់ខ្លួន បានទប់ស្កាត់សកម្មភាពជ្រុលនិយម របស់លោក វីរៈ ស៊ុមឃ្វាមឃីត មិនឱ្យទៅកាន់ភូមិជោគជ័យ តាមការគ្រោងទុក ខណៈទីតាំងនោះ រងការរំលោភបំពាន ពីសំណាក់យោធាថៃ នាប៉ុន្មានថ្ងៃមុននេះ ទាំងគ្មានការរំខានពីកម្លាំងកម្ពុជា។
សារព័ត៌មានប៉ុស្តិ៍លេខ៧ថៃ រាយការណ៍នៅថ្ងៃទី៣១ខែតុលានេះថា លោក វីរៈ ស៊ុមឃ្វាមឃីត អ្នកដឹកនាំក្រុមជ្រុលនិយមថៃ មានគម្រោងយកគ្រឿងចក្រជាង៥គ្រឿង ដើម្បីបណ្តេញពលរដ្ឋខ្មែរ ចេញពីភូមិជោគជ័យ ដែលថៃនៅថាជាភូមិណងចាន់ និងឈូសបំផ្លាញផលដំណាំពលរដ្ឋខ្មែរនៅទីនោះ។
ប្រភពនោះដកស្រង់សំដី លោក វីរៈ ស៊ុមឃ្វាមឃីត មកចុះផ្សាយនៅថ្ងៃទី៣១ខែតុលានេះថា៖ «ជាថ្ងៃដែលលោកនិងក្រុមជ្រុលនិយម ណាត់គ្នាបណ្តេញពលរដ្ឋខ្មែរចេញពីភូមិជោគជ័យ ព្រោះមិនទុកចិត្តអាជ្ញាធរថៃ ហ៊ានបណ្តេញពលរដ្ឋខ្មែរទេ»។
លោកអះអាងថា ថ្ងៃនេះ បើអាជ្ញាធរថៃមិនបណ្តេញពលរដ្ឋខ្មែរចេញពីភូមិជោគជ័យទេ ក្រុមជ្រុលនិយម នឹងប្រើគ្រឿងចក្រឈូសបណ្តេញពលរដ្ឋខ្មែរទាំងនោះ ចេញឱ្យអស់ពីទឹកដី ដែលលោកអះអាងថា ជាទឹកដីរបស់ថៃ។
យ៉ាងណា ប្រភពខាងលើ អះអាងថា អាជ្ញាធរថៃ បាននឹងកំពុងបន្ថែមកងកម្លាំងរារាំង ទប់ស្កាត់សកម្មភាព ក្រុមជ្រុលនិយម លោក វីរៈ ដើម្បីជៀសវាងបង្កជម្លោះកាន់តែខ្លាំងនៅតំបន់ព្រំដែនកម្ពុជា ថៃ នេះ។
យោធាថៃបានបញ្ជូនគ្រឿងចក្រមកឈូសឆាយ រំលោភដីខ្មែរនៅភូមិជោគជ័យ ម្តងហើយ កាលពីថ្ងៃទី២៧ ខែតុលា ឆ្នាំ២០២៥ លើដីទំហំ៥ហិកតា ទាំងគ្មានការទប់ស្កាត់ពីភាគីកម្ពុជា។
បញ្ហានេះ អ្នកនាំពាក្យខេត្តបន្ទាយមានជ័យ លោក លី សុវណ្ណារិទ្ធ កាលពីពេលនោះ ក៏ទទួលស្គាល់ថា ពេលនោះ ថៃពិតជាបានធ្វើសកម្មភាពនេះពិតមែន។
លោកថា៖«ទាក់ទងនឹងភូមិជោគជ័យនេះដែរ ការធ្វើសកម្មភាពឈូសឆាយ និងប្រើម៉ាស៊ីនវ៉ៃកម្ទេចមីននេះ កាលព្រឹកមិញនេះ ទំហំដីប្រហែលជា៥ហិកតា អាហ្នឹងទាំងដីចម្ការនិងដីលំនៅឋាន ហើយម្ចាស់គឺម្ចាស់៦គ្រួសារហ្នឹងហើយបាទ ម្ចាស់៦គ្រួសារដែលវាបណ្ដេញចេញពីផ្ទះ»។
លើសពីនេះ ក្រោយមានបទឈប់បាញ់ នាថ្ងៃទី២៨ ខែកក្កដា ឆ្នាំ២០២៥ ជាង៣ខែមកនេះ ថៃមិនបានគោរពកិច្ចព្រមព្រៀងនេះទេ ដែលយោធាថៃ ជាញឹកញាប់ បានចល័តទ័ពចូលមកព័ទ្ធបន្លាលួសយកដីខ្មែរ នៅប្រាសាទតាមាន់ធំ ក្នុងខេត្តឧត្តរមានជ័យ ព័ទ្ធយកផ្នែកខ្លះនៅច្រកអានសេះ ក្នុងខេត្តព្រះវិហារ រួមទំាង ផ្នែកខ្លះក្នុងភូមិជោគជ័យ និងភូមិព្រៃចាន់ និងច្រើនកន្លែងទៀតនៅខេត្តពោធិ៍សាត់ ទាំងគ្មានការរារាំងពីក្រសួងការពារជាតិកម្ពុជា។
យ៉ាងណា ក្រោមភាពស្ងៀមស្ងាត់នេះ កម្ពុជា-ថៃ បានឈានទៅចុះកិច្ចព្រមព្រៀងថ្មីមួយ នៅប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ហៅថា ជាកិច្ចព្រមព្រៀងសន្តិភាពកម្ពុជា-ថៃ ក្រោមយន្តការអាស៊ាន និងមានប្រធានាធិបតី ត្រាំ ចុះហត្ថលេខាធ្វើជាសាក្សី ពង្រឹងបទឈប់បាញ់។
យ៉ាងណា អ្នកឃ្លាំមើលហៅកិច្ចព្រមព្រៀងថ្មីនេះថា ជាកិច្ចព្រមព្រៀងកាត់ដីឱ្យថៃ ដើម្បីប្តូរយកសន្តិភាព ខណៈកងទ័ពថៃ នៅបន្តឈរជើងនៅទីតាំងដែលថៃបានរំលោភយក ទាំងមុនផ្ទុះអាវុធ និងក្រោយផ្ទុះអាវុធ៕
