រដ្ឋមន្ត្រីការពារជាតិសហរដ្ឋអាមេរិក លោក ភីត ហេកសេត បាននិយាយកាលពីថ្ងៃអាទិត្យថា សហរដ្ឋអាមេរិកចង់បង្កើនទំនាក់ទំនងយោធាកាន់តែស៊ីជម្រៅជាមួយប្រទេសវៀតណាម អំឡុងពេលចាប់ផ្តើមដំណើរទស្សនៈកិច្ចទៅទីក្រុងហានូយ ចំពេលមានការពិភាក្សាសម្រាប់ការផ្គត់ផ្គង់គ្រឿងបរិក្ខាយោធាដ៏មានសក្តានុពលដល់ប្រទេសដែលធ្លាប់ជាសត្រូវរបស់ក្រុងវ៉ាស៊ីនតោន។
ទីភ្នាក់ងារសារព័ត៌មានរ៉យទ័រ(Reuters) បានរាយការណ៍នៅថ្ងៃទី០២ ខែវិច្ឆិកា ឆ្នាំ២០២៥នេះថា ប្រទេសអាស៊ីអាគ្នេយ៍នេះ ដែលពឹងផ្អែកលើអាវុធរុស្ស៊ី បានព្យាយាមស្វែងរកការពង្រីកប្រភពអាវុធរបស់ខ្លួន អស់រយៈពេលជាច្រើនឆ្នាំមកហើយ។ ការចរចាជាមួយសហរដ្ឋអាមេរិក ដែលបានលើកលែងទណ្ឌកម្មលើអាវុធក្នុងឆ្នាំ២០១៦ បានចាប់ផ្តើមលូតលាស់ក្នុងរដ្ឋបាល លោក បៃឌិន(Biden) ប៉ុន្តែមិនទាន់ប្រកាសជាផ្លូវការអំពីគ្រឿងបរិក្ខាយោធាណាមួយនៅឡើយ។
‘‘កិច្ចសហប្រតិបត្តិការផ្នែកយោធាកាន់តែស៊ីជម្រៅ នឹងផ្តល់ផលប្រយោជន៍ដល់ប្រទេសយើងទាំងពីរ’’ លោក ហេកសេត (Hegseth) ដែលមកដល់រដ្ឋធានីវៀតណាម បន្ទាប់ពីកិច្ចប្រជុំនៅប្រទេសម៉ាឡេស៊ីជាមួយសមភាគីអាស៊ី បាននិយាយមុនពេលជួបជាមួយរដ្ឋមន្ត្រីការពារជាតិវៀតណាម លោក ហ្វាន់ វ៉ាន់ហ្សាង (Phan Van Giang)។
លោកបានបន្ថែមថា សហរដ្ឋអាមេរិក បានប្រគល់នាវាការពារព្រំដែនសមុទ្រចំនួន ៣គ្រឿង ទៅកងទ័ពការពារសមុទ្រវៀតណាម និងយន្តហោះហ្វឹកហាត់ធី៦(T-6)ចំនួន ៣គ្រឿង ពីការបញ្ជាទិញចំនួន១២ ហើយមានបំណងផ្គត់ផ្គង់បន្ថែមទៀត។
នៅក្នុងសេចក្តីថ្លែងការណ៍មួយ ក្រសួងការពារជាតិវៀតណាម បាននិយាយថា រដ្ឋាភិបាលទាំងពីរបានយល់ព្រមបន្តជំរុញកិច្ចសហប្រតិបត្តិការសន្តិសុខ រួមទាំងវិស័យដូចជាការពារជាតិជាដើម។
ប្រទេសទាំងពីរ បានលើកឡើងអំពីយន្តហោះដឹកបញ្ជូនយោធាស៊ី ១៣០ ហ៊រឃ្យូលីស(C-130 Hercules) ក្នុងចំណោមគ្រឿងបរិក្ខាដែលនឹងត្រូវពិភាក្សា។ មន្ត្រីយោធាអាមេរិក ក៏បានបញ្ជាក់ផងដែរថា ការពិភាក្សានឹងមានការលើកឡើងអំពី ស៊ី១៣០ (C-130) ផងដែរ។
ប្រភពរ៉យទ័រថា រ៉យទ័របានរាយការណ៍កាលពីឆ្នាំមុន លើកិច្ចពិភាក្សាលក់យន្តហោះស៊ី១៣០(C-130) ឱ្យទៅក្រសួងការពារជាតិប្រទេសវៀតណាម ហើយនៅក្នុងខែកក្កដា ពិភាក្សាលើកិច្ចព្រមព្រៀងបឋមលើឧទ្ធម្ភាគចក្រ អេស៩២(S-92) ចំនួន២គ្រឿង បន្ទាប់ពីការភាក្សាជាច្រើនឆ្នាំលើបញ្ហានេះ ជាមួយកងកម្លាំងសន្តិសុខសាធារណៈរបស់ខ្លួន៕
