រដ្ឋាភិបាលគ្រួសារហ៊ុននៅបន្តភាពស្ងៀមស្ងាត់ មិនទាន់មានចំណាត់ការផ្លូវច្បាប់ណាមួយ លើឧកញ៉ា ចេន ហ្ស៊ី ទីប្រឹក្សា លោក ហ៊ុន សែន ទោះបីពិភពលោករកឃើញថា លោក ចេន ហ្ស៊ី ជាមេឧក្រិដ្ឋជនឆបោកលំដាប់អន្តរជាតិ បង្កការគំរាមគំហែងសន្តិសុខតំបន់ និងពិភពលោកក្តី។
ក្នុងរយៈពេលប៉ុន្មានសប្តាហ៍ចុងក្រោយនេះ យ៉ាងហោចណាស់ មានប្រទេសចំនួន៤ បានរួមគ្នាដាក់ទណ្ឌកម្មបង្កកទ្រព្យសម្បត្តិឧកញ៉ា ចេន ហ្ស៊ី ជុំវិញបទឧក្រិដ្ឋឆបោកតាមអនឡាញ និងលាងលុយកខ្វក់។
ក្រៅពីមហាអំណាចសហរដ្ឋអាមេរិក ចក្រភពអង់គ្លេស កូរ៉េខាងត្បូង ថ្មីៗនេះមានប្រទេសសិង្ហបុរីមួយទៀត ប្រកាសរឹបអូសទ្រព្យរបស់មហាសេដ្ឋីខ្មែរ ដើមកំណើតចិន គឺ ឧកញ៉ា ចេន ហ្ស៊ី ពាក់ព័ន្ធអំពើឆបោកតាមអនឡាញ និងលាងលុយកខ្វក់។
សារព័ត៌មាន Channel News Asia ចុះផ្សាយនៅថ្ងៃទី៣១ ខែតុលាថា ប៉ូលិសសិង្ហបុរីបានរឹបអូសទ្រព្យសម្បត្តិលោក ចេន ហ្ស៊ី ប្រមាណជា១១៥លានដុល្លារអាមេរិកលើទឹកដីសិង្ហបុរី។
ប្រភពថា សកម្មភាពនេះ ជាផ្នែកមួយនៃការស៊ើបអង្កេតលើករណីឆបោក និងលាងលុយកខ្វក់ ពាក់ព័ន្ធក្រុមហ៊ុន Prince Holding Group មានទីតាំងនៅកម្ពុជាដឹកនាំដោយឧកញ៉ា ចេន ហ្ស៊ី។
វិធានការរបស់សិង្ហបុរីនៅពេលនេះ ក្រោយការិយាល័យស៊ើបអង្កេតសហព័ន្ធអាមេរិក FBI រកឃើញថា លោក ចេន ហ្ស៊ី ធ្វើឱ្យក្រុមហ៊ុន Prince Group ក្លាយជាអង្គការឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី ដែលកំពុងប្រតិបត្តិការនៅក្នុងប្រទេសចំនួន៣០នៅលើពិភពលោក។
យ៉ាងណា បើទោះបីសហគមន៍អន្តរជាតិ ចង្អុលប្រាប់ថា លោក ចេន ហ្ស៊ី ជាមេឧក្រិដ្ឋជនឆបោកលំដាប់ពិភពលោកក្តី តែគ្រួសារហ៊ុននៅមិនទាន់បើកការស៊ើបអង្កេតលើមនុស្សជំនិតរបស់លោក ហ៊ុន សែន នេះទេ។
ជុំវិញរឿងនេះ តំណាងរាស្រ្តគណបក្សសង្រ្គោះជាតិ លោក ម៉ែន សុថាវរិន្រ្ទ យល់ថា ការដែលគ្រួសារហ៊ុនមិនកាត់ទោសលោក ចេន ហ្ស៊ី គឺជាចេតនាការពារឧក្រិដ្ឋជនរូបនេះ ឱ្យរួចផុតពីសំណាញ់ច្បាប់ ដោយសំអាងថា លោក ចេន ហ្ស៊ី ជួយរកលុយទ្រទ្រង់អំណាចគ្រួសារហ៊ុនច្រើនឆ្នាំទៅនេះ។
លោកថា៖ «គឺធ្ងន់ហើយ ខ្ញុំមើល! អន្តរជាតិគេមើលទៅ គឺឃើញថា លោក ហ៊ុន ម៉ាណែត លោក ហ៊ុន សែន ហ្នឹងជាមេឧក្រិដ្ឋកម្ម! គេអាចចោទទាំងប្រទេសកម្ពុជាហ្នឹងទៀត។ ធ្វើឲ្យខូចឈ្មោះប្រទេសកម្ពុជាយើង ខូចឈ្មោះប្រទេសយើង ខ្លាំងមែនទែនហើយ។ ក្នុងនាមយើងជាប្រជាពលរដ្ឋខ្មែរទាំងអស់ មានន័យថា សោកស្តាយខ្លាំងមែនទែន ដែលគេមើលឃើញពីទង្វើរបស់ថ្នាក់ដឹកនាំខ្មែរដែលធ្វើរបៀបហ្នឹង»។
បន្ថែមលើនេះ លោកព្រមានថា ការមិនកាត់ទោសឧក្រិដ្ឋជនលំដាប់អន្តរជាតិ លោក ចេន ហ្ស៊ី នឹងធ្វើឱ្យកម្ពុជាប៉ះពាល់គ្រប់វិស័យ ទាំងសេដ្ឋកិច្ចដែលនាំទៅរកគ្រោះថ្នាក់ដល់ជីវភាពពលរដ្ឋទូទាំងប្រទេស។
លោកថា៖ «ទី១ គឺអត់មានអ្នកវិនិយោគទុនចូល វិស័យទេសចរណ៍ក៏អត់ វិស័យសំណង់ក៏អត់ ពាណិជ្ជកម្មក៏អត់ វាប៉ះគ្រប់វិស័យ។ វិស័យទាំងអស់ហ្នឹង ទាំងប៉ុន្មានហ្នឹងគឺគាំង។ អត់មានអ្នកវិនិយោគអីមក ចឹងវាប៉ះពាល់ទាំងអស់។ វិស័យធំៗជាងគេទាំង៥ វាត្រូវប៉ះពាល់អស់ហើយ ឥលូវហ្នឹង! អត់មាន! ទេសចរណ៍អត់មាន សំណង់អត់មាន ដូចអ្នកជំនួញពាណិជ្ជករតូចតាចវិស័យទាំងអស់ហ្នឹង! ឧស្សាហកម្មធំៗអត់មានទេ ប៉ះពាល់ទាំងអស់។ អ៊ីចឹងប្រជាពលរដ្ឋខ្មែរមិនអាចនៅឲ្យស្លាប់ ខ្ញុំជឿជាក់ថា ប្រទេសកម្ពុជាយើង នឹងមានការបះបោរ នឹងអាចទម្លាក់របបហ្នឹងចោល បើមិនអ៊ីចឹងទេ គឺយើងទុក្ខវេទនាខ្លាំងមែនទែន»។
ជុំវិញរឿងនេះ VOD មិនទាន់អាចសុំការឆ្លើយតបពីអ្នកនាំពាក្យរងក្រសួងមហាផ្ទៃ លោក ទូច សុខៈ និងអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បាននៅឡើយទេ គិតត្រឹមម៉ោងផ្សាយនេះ។
យ៉ាងណា នាយករដ្ឋមន្រ្តីកម្ពុជា លោក ហ៊ុន ម៉ាណែត បានបញ្ជាក់លើហ្វេសប៊ុកលោកនៅថ្ងៃទី៣១ ខែតុលាថា លោកបានជួបពិភាក្សាតាមទូរសព្ទជាមួយ លោក Kash Patel នាយកនៃការិយាល័យស៊ើបអង្កេតកម្រិតសហព័ន្ធ (FBI) របស់សហរដ្ឋអាមេរិក។
លោកសរសេរក្នុងន័យដើមថា៖ «យើងបានវាយតម្លៃខ្ពស់ចំពោះលទ្ធផលប្រកបដោយផ្លែផ្កានៃកិច្ចសហប្រតិបត្តិការជាច្រើនឆ្នាំកន្លងមក រវាងស្ថាប័នសន្តិសុខរបស់កម្ពុជា និង FBI ក្នុងការទប់ស្កាត់ និងប្រយុទ្ធប្រឆាំងឧក្រិដ្ឋកម្មឆ្លងដែន ដូចជា ការជួញដូរមនុស្ស គ្រឿងញៀន ឃាតកម្ម ជម្រិតទារប្រាក់ ឧក្រិដ្ឋកម្មហិរញ្ញវត្ថុ និងការឆបោកតាមប្រព័ន្ធបច្ចេកវិទ្យា។ ជាជំហានបន្ទាប់ យើងបានឯកភាពគ្នាបន្តពង្រឹងកិច្ចសហប្រតិបត្តិការ រវាងស្ថាប័នសន្តិសុខកម្ពុជា និង FBI ដើម្បីរក្សាសន្តិសុខ និងសុវត្ថិភាពសម្រាប់ប្រជាជន និងប្រទេសយើងទាំងពីរ»។
សម្រាប់ អ្នកតាមដានបញ្ហាសង្គម លោក ប៉ោ មករា យល់ថា កម្ពុជាកំពុងស្ថិតក្នុងក្រសែភ្នែករបស់អន្តរជាតិដែលសំឡឹងមកឃើញថា ជាជម្រករបស់ឧក្រិដ្ឋជន ដែលបង្កការភ័យខ្លាចដល់អ្នកវិនិយោគល្អៗ និងភ្ញៀវទេសចរបទេស។
យ៉ាងណា លោកថា បទឧក្រិដ្ឋឆបោកនេះ ជាកង្វល់សម្រាប់ពិភពលោកទាំងមូល សម្រាប់ដោះស្រាយមិនថានៅកម្ពុជានោះទេ ដែលទាមទារឱ្យកម្ពុជាគួរសម្អាតបញ្ហានេះមុនគេ ដើម្បីឱ្យឃ្លាតចាកពីការឆបោកតាមប្រព័ន្ធអនឡាញនេះ។
បញ្ហានេះ លោកមើលឃើញដែរថា អាចជាប់ពាក់ព័ន្ធអំពើពុករលួយធ្វើឱ្យប្រព័ន្ធនីតិរដ្ឋទាប ដែលធ្វើឱ្យការអនុវត្តច្បាប់មានស្តង់ដារ២ មិនអាចកាត់ទោសអ្នកមានលុយមានអំណាចបាន តែកាត់ទោសអ្នកដែលទន់ខ្សោយតែប៉ុណ្ណោះ។
លោកថា៖ «កម្ពុជាគួរតែរលាស់ខ្លួនឱ្យផុតអំពីបញ្ហាហ្នឹង គឺត្រូវតែធ្វើការងារនេះ មុនបរទេសមុនអន្តរជាតិ ពីព្រោះកាលណាយើងគេចផុតអំពីបញ្ហានេះ បានជួយធ្វើឲ្យកម្ពុជាហ្នឹង! កេរ្តិ៍ឈ្មោះសាយទៅល្អ។ ហើយមួយទៀត កម្ពុជាអាចផុតអំពីពិន្ទុនៃសន្ទស្សន៍នីតិរដ្ឋទាប ពីព្រោះបើកាលណាអត់បានសម្អាត ឬក៏មិនធ្វើការរឿងហ្នឹងឲ្យបានដិតដល់ទេ កម្ពុជានឹងពាក់ព័ន្ធទៅនឹងបញ្ហាពិន្ទុនីតិរដ្ឋកាន់តែខ្សោយ។ អ៊ីចឹងកាលណាយើងនិយាយអំពីបញ្ហានីតិរដ្ឋហ្នឹង វាក៏ជាបញ្ហាកង្វល់មួយសម្រាប់ស្ថាប័នអន្តរជាតិ ក៏ដូចជាអ្នកដែលរកស៊ីនៅក្នុងកម្ពុជា ក៏ដូចជាអ្នកដែលមានបំណងមកបោះទុននៅកម្ពុជានៅតែបារម្ភ»។
អាមេរិក និងចក្រភពអង់គ្លេស កាលពីថ្ងៃទី១៤ ខែតុលា បានរួមគ្នាដាក់ទណ្ឌកម្មបង្កកទ្រព្យសម្បត្តិក្រុមហ៊ុនព្រីនស៍របស់ឧកញ៉ា ចេន ហ្ស៊ី ទីប្រឹក្សា លោក ហ៊ុន សែន ក្រោយរកឃើញថា ជាបណ្តាញឧក្រិដ្ឋកម្មឆបោកខ្នាតអន្តរជាតិ លួចលុយរាប់ពាន់លានដុល្លារ ពីជនរងគ្រោះជុំវិញពិភពលោក។
៦ថ្ងៃក្រោយមក ពោលគឺនៅថ្ងៃទី២០ ខែតុលា កាសែត The Chosun Daily ដែលមានមូលដ្ឋាននៅប្រទេសកូរ៉េ ឱ្យដឹងថា ប្រាក់បញ្ញើមានប្រមាណ ៩១,២ពាន់លានវ៉ុន ឬស្មើនឹងប្រមាណ ៦៤លានដុល្លារ ដែលរក្សាទុកនៅក្នុងធនាគារចំនួន៦ របស់កូរ៉េ ត្រូវបង្កកបន្ទាប់ពីការដាក់ទណ្ឌកម្មលើក្រុមហ៊ុនព្រីនស៍គ្រុបដែលជាក្រុមហ៊ុនមេ និងមានអង្គភាពពាក់ព័ន្ធចំនួន១៤៤ទៀត៕
