ក្រុមអតិថិជនគំរាមតវ៉ាទ្រង់ទ្រាយធំជាលើកទី៣ នៅចុងខែនេះ ដោយថាកិច្ចអន្តរាគមន៍របស់អាជ្ញាធរហាក់គ្មានឥទ្ធិពលលើឧកញ៉ា ឡេង ណាវ៉ាត្រា ឱ្យប្រគល់ផ្ទះតាមកិច្ចសន្យា ខណៈអតិថិជនខ្លះខ្ចីលុយធនាគារទិញផ្ទះបង់លុយគ្រប់៤ឆ្នាំ តែក្រុមហ៊ុនគ្មានផ្ទះឱ្យ ធ្វើឱ្យញាំញីដោយវិបត្តិបំណុលធ្ងន់ធ្ងរច្រើនឆ្នាំទៅនេះ។
អតិថិជនម្នាក់ លោក រ៉ា វុធ ប្រាប់VOD នៅថ្ងៃទី៧ ខែវិច្ឆិកានេះថា ក្រុមហ៊ុននៅតែគេចវេសមិនសងលុយ និងប្រើល្បិចដោះដូរដី និងផ្ទះឱ្យអតិថិជនដដែល ទោះមានការអន្តរាគមន៍ពីអាជ្ញាធរខេត្តកណ្តាល ក្នុងអំឡុងពេលពួកគេតវ៉ាចំនួន២ដង ក្នុងខែតុលា ឆ្នាំ២០២៥ នៅមុខបុរីឡេង ណាវ៉ាត្រា គម្រោង៦Aក្តី។
ប្រភពបន្តថា បើមិនព្រមដោះដូរដី ឬផ្ទះទេ ក្រុមហ៊ុនឱ្យបន្តរងចាំក្នុងភាពមិនច្បាស់លាស់ ដោយក្រុមហ៊ុនថា មានលទ្ធភាពពេលណាគេនឹងសាងសង់ពេលនោះ។
បើតាម លោក រ៉ា វុធ អតិថិជនគ្រោងតវ៉ាទ្រង់ទ្រាយធំជាលើកទី៣ នៅមុខក្រសួងដែនដី ក្នុងរាជធានីភ្នំពេញវិញម្តង នៅថ្ងៃទី២៦ ខែវិច្ឆិកា ដើម្បីឱ្យឧកញ៉ា ឡេង ណាវ៉ាត្រា ប្រគល់ផ្ទះតាមកិច្ចសន្យា។
លោកថា៖ «យើងនឹងគ្រោង(តវ៉ា)ថ្ងៃទី២៦ ខែ១១នេះ។ ជំហរបស់អតិថិជនគឺចង់ឲ្យ ឡេង ណាវ៉ាត្រា ដោះស្រាយធ្វើម៉េចសាងសង់ផ្ទះឱ្យអតិថិជនគ្រប់រូប ទៅតាមប្លុកនីមួយៗ។ អតិថិជននីមួយៗ គឺមិនចង់ធ្វើការដោះដូរទេ គឺគាត់ទិញផ្ទះ គឺចង់បានផ្ទះ! ទិញដីចង់បានដី។ ទីតាំងផ្ទះរបស់គាត់ទិញកន្លែងណា គឺចង់បានកន្លែងហ្នឹង ពីព្រោះអីមុនហ្នឹង! យើងទិញទីតាំងផ្ទះ! យើងសុទ្ធតែមើលដឹងថា ទីតាំងផ្ទះនេះល្អអ៊ីចេះ! ល្អអ៊ីចុះហើយ! យើងអត់ចង់ធ្វើការដោះដូរទេ។ សុំឲ្យខាងអាជ្ញាធរ និងក្រសួងពាក់ព័ន្ធសុំឲ្យដោះស្រាយឲ្យមានភាពស្មើគ្នា។ អតិថិជនគ្រប់រូប គឺចង់តែទិញផ្ទះ គឺបានផ្ទះទេ! អត់មានដំណោះស្រាយណាមួយថា ប្លុកនេះ ដោះស្រាយ ប្លុកនោះគេអត់ដោះស្រាយទេ។ អ៊ីចឹងប្លុកណាមួយ ក៏ដោះស្រាយដែរ។ មួយទៀតចង់ឱ្យខាងក្រុមហ៊ុនចាំបាច់ត្រូវតែយកជាងដាក់ចូលនៅក្នុងឆ្នាំ២០២៦ ជាចាំបាច់តែម្តង និងយកឡានមកចាក់ដី»។
បើតាមក្រុមអតិថិជន ក្នុងកិច្ចសន្យាចែងថា រយៈពេល១៨ខែ សង់ផ្ទះរួចរាល់ ហើយបើក្រុមហ៊ុនលើសពេលសាងសង់ត្រូវសង១០០ដុល្លារក្នុងមួយខែ តែភាគីក្រុមហ៊ុនមិនគោរពនោះទេ ទោះលើសពេលសាងសង់ដែលមានអតិថិជនខ្លះលើសពេល៤ឆ្នាំទៅហើយក្តី។
ជាមួយគ្នានេះ គណនីហ្វេសប៊ុកឈ្មោះ Srey Touch Vlog ដែលអះអាងថាជាជនរងគ្រោះម្នាក់ដែលបានអំពាវនាវឱ្យមេដឹកនាំជួយរកយុត្តិធម៌ ក្រោយឧកញ៉ា ឡេង ណាវ៉ាត្រា មិនព្រមសង់ផ្ទះតាមកិច្ចសន្យា។
កញ្ញាថា៖ «នាងខ្ញុំសូមគោរពសម្តេចទាំងទ្វេ ពីចម្ងាយ ដោយហេតុតែកូនចៅ គឺជាអតិថិជនរងគ្រោះម្នាក់នៅក្នុងចំណោមជាច្រើននាក់ទៀត នៅក្នុងបុរីឡេងណាវ៉ាត្រា៦អា។ ថ្ងៃនេះកូនចៅដាច់ចិត្តសូមមេត្តាសម្តេចទាំងទ្វេ ជួយដោះស្រាយក៏ដូចជារកយុត្តិធម៌ឲ្យកូនចៅផងដោយសារតែកូនចៅមិនអាចបន្តរង់ចាំនូវការសន្យាខ្យល់របស់អ្នកឧកញ៉ាម្ដងហើយម្ដងទៀតបានទេ។ កាលពីថ្ងៃទី២៦ ខែ១០ ឆ្នាំ២០២៥នេះ ដោយការឈឺចាប់ពេកបានចូលរួមធ្វើកូដកម្មនៅលើផ្លូវ៦អា ដើម្បីឱ្យខាងបុរីចេញមុខដោះស្រាយ ប៉ុន្តែខាងបុរីពុំអើពើ ក៏ដូចជាចេញមកដោះស្រាយចំពោះបញ្ហាហ្នឹង ជាមួយអតិថិជនដែលបានស្នើសុំនោះទេ ហើយទាំងអស់នេះសុទ្ធតែជាភាពឈឺចាប់របស់អតិថិជនទាំងអស់ រួមទាំងខ្ញុំម្នាក់ ក្នុងនាមគឺជាអតិថិជនរងគ្រោះម្នាក់ដែរ»។
ក្រុមអតិថិជនទិញបុរីឧកញ៉ា ឡេង ណាវ៉ាត្រា បានផ្ទុះការតវ៉ាយ៉ាងតិច២ដង ក្នុងខែតុលានេះ នៅមុខបុរីឡេង ណាវ៉ាត្រា គម្រោង៦A ដោយលើកទី១ តវ៉ាកាលពីថ្ងៃទី១៨ ខែតុលា និងលើកទី២ នៅថ្ងៃទី២៦ ខែតុលា ដែលឈានដល់ការបិទកំណាត់ផ្លូវ6Aផងដែរ។
ប្រភពថា៖ «ឡេង ណាវ៉ាត្រា មិនគោរពកិច្ចសន្យា បំពានទំនុកចិត្ត ពួកខ្ញុំជាជនរងគ្រោះ អយុត្តិធម៌ណាស់ ជួយពួកខ្ញុំផង សងលុយពួកខ្ញុំវិញមក»។
ជុំវិញរឿងនេះ VOD មិនអាចទាក់ទង លោក គួច ចំរើន អភិបាលខេត្តកណ្ដាល ដើម្បីសុំការឆ្លើយតបរឿងនេះបានទេ គិតត្រឹមម៉ោងផ្សាយនេះ។
យ៉ាងណា ក្រោយការតវ៉ា ឧកញ៉ា ឡេង ណាវ៉ាត្រា បានបង្ហោះសារលើបណ្តាញសង្គមជាបន្តបន្ទាប់ ថា បុរី ឡេង ណាវ៉ាត្រា ឈរលើកគោលការណ៍ដោះស្រាយ មិនឲ្យអតិថិជនខាតបង់ អត្ថប្រយោជន៍ឡើយ ហើយថា បច្ចុប្បន្នក្រុមការងារលោកកំពុងទាក់ទងអតិថិជន ដើម្បីដោះស្រាយបញ្ចប់ជាបន្តបន្ទាប់។
ជុំវិញរឿងនេះ ស្ថាបនិកគណបក្សកែទម្រង់កម្ពុជា លោក អ៊ូ ចន្ទរ័ត្ន កត់សម្គាល់ថា ការតវ៉ារបស់ពលរដ្ឋក្នុងជម្លោះទិញអចលនទ្រព្យ ជារឿងដដែលៗ ហើយរដ្ឋាភិបាលវិញហាក់គ្មានការអន្តរាគមន៍ច្បាស់លាស់នោះទេ។
លោកសង្កត់ធ្ងន់ថា បើនៅមិនទទួលបានយុត្តិធម៌ ជនរងគ្រោះមិនស្ងប់ចិត្តទេ ហើយនៅតែបន្តតវ៉ាថែមទៀត ដែលធ្វើឱ្យប៉ះពាល់ដល់កេរ្តិ៍ឈ្មោះឧកញ៉ាផ្សេងទៀត ហើយពលរដ្ឋនឹងលែងទុកចិត្តវិស័យអចនលទ្រព្យនៅកម្ពុជាផងដែរ បើរដ្ឋាភិបាលគ្មានដោះស្រាយបន្ទាន់នោះទេ។
លោកថា៖ «ជាគំនិតរបស់ខ្ញុំទេថា! អ្នកដែលជាឧកញ៉ាហ្នឹង! គិតថាប្រហែលជាមិនមានលទ្ធភាពដោះស្រាយទេ! បានចេះតែពន្យារហើយមិនមានដំណោះស្រាយជូនប្រជាពលរដ្ឋ។ ជាទូទៅមនុស្សកាលណាបាត់បង់លទ្ធភាពដោះស្រាយហើយ គឺបាត់បង់ហើយមិនមានចម្លើយតបទេ មានតែរាជរដ្ឋាភិបាលលោកអន្តរាគមន៍ទេថា ត្រូវធ្វើយ៉ាងម៉េចដើម្បីឲ្យប្រជាពលរដ្ឋហ្នឹងទទួលបានការសុខចិត្តនោះ។ ម្លោះហើយគួរតែចាប់ផ្ដើមធ្វើកិច្ចការមានវិធានការមានអីជួយទៅដល់អ្នកដែលរងគ្រោះហ្នឹង»។
ដោយឡែក ប្រធានអង្គការប្រជាធិបតេយ្យខ្មែរនៅប្រទេសអូស្រ្តាលី លោក ស៊ឹង សែនករុណា យល់ថា ឧកញ៉ាភាគច្រើននៅកម្ពុជាព្យាយាមភ្ជាប់ទំនាក់ទំនងជាមួយគ្រួសារមេដឹកនាំ ដើម្បីបង្ហាញឥទ្ធិពលរបស់ខ្លួន ធ្វើឱ្យអាជ្ញាធរពុំហ៊ានប្រើប្រាស់វិធានការច្បាប់ ទោះពួកគេរកស៊ីខុសច្បាប់ក្តី។
លោកសង្កត់ធ្ងន់ថា កម្ពុជាជាប្រទេសមានអំពើពុករលួយខ្ពស់ បក្សពួកនិយម ធ្វើឱ្យប្រព័ន្ធច្បាប់មិនអាចរកយុត្តិធម៌ឱ្យជនរងគ្រោះបានទេ បើពួកគេមិនងើបតវ៉ាដោយខ្លួនឯង។
លោកថា៖ «ទាមទារតវ៉ាហ្នឹង គឺជាផ្នែកមួយដែលធ្វើឲ្យអ្នកសម្រេចចិត្តហ្នឹង អាចមានសម្ពាធដោយមិនអាចឈរទ្រាំអត់ធ្មត់ មើលអំពីការប្រព្រឹត្តអំពើអយុត្តិធម៌ទៅលើប្រជាពលរដ្ឋអីទាំងអស់ហ្នឹង។ បើសិនជាស្ងប់ស្ងៀមទៅវិញទេ ដែលមិនមានដំណោះស្រាយ! ចឹងពលរដ្ឋធម្មតាការប៉ះពាល់នូវផលប្រយោជន៍របស់ខ្លួន ទាល់តែខិតខំក្នុងការទាមទារតវ៉ា គ្រប់រូបភាពគ្រប់មធ្យោបាយ ជំរុញទៅដល់អ្នកដែលមានអំណាចសម្រេចចិត្ត ក្នុងការផ្តល់យុត្តិធម៌»។
ក្រៅពីករណីឧកញ៉ា ឡេង ណាវ៉ាត្រា ហើយនោះ នៅមានក្រុមជនរងគ្រោះដោយសារគម្រោងអចលនទ្រព្យផ្សេងទៀត ដូចជា ចាញ់បោកអតីតឧកញ៉ា ហ៊ី គឹមហុង ឡេង ចាន់ណា ជា សារ៉ន ឧកញ៉ា និងក្រុមហ៊ុនភូមិខ្មែរគ្រុបនៅខេត្តស្វាយរៀង ជាដើម នៅតែមិនទាន់ទទួលបានសំណងវិញទេ ខណៈក្រុមឈ្មួញទាំងនោះ តែងតែបង្ហាញខ្លួនស្និទ្ធិនឹងមេដឹកនាំជ្រកក្រោមស្លាកជាអ្នកគាំទ្របក្សកាន់អំណាច។
អង្គការគម្រោងយុត្តិធម៌ពិភពលោក បានចេញផ្សាយរបាយការណ៍ស្ដីពីនីតិរដ្ឋ កាលពីថ្ងៃទី២៤ ខែតុលា ឆ្នាំ២០២៤ ដាក់ឱ្យប្រទេសកម្ពុជាជាប់ចំណាត់ថ្នាក់លេខរៀងទី១៤១ ជាចំណាត់ថ្នាក់ទាបជិតបាតតារាងដូចឆ្នាំកន្លងទៅដែរ ក្នុងចំណោមប្រទេសទាំង១៤២៕
