អាជ្ញាធររាជធានីភ្នំពេញ នៅព្រឹកថ្ងៃសុក្រនេះ បានចាប់ផ្តើមរុះរើសំណង់សាលាជ័យថាវី ក្រោយក្រសួងរៀបចំដែនដី ថាសំណង់សាលានោះ បានសង់បិទផ្លូវសាធារណៈរបស់រដ្ឋ ធ្វើឱ្យខូចសោភ័ណភាព និងបាត់បង់សណ្តាប់ធ្នាប់សាធារណៈ ខណៈម្ចាស់សំណង់សាលាជ័យថាវី ថាវិធានរបស់អាជ្ញាធរធ្វើឡើងមិនស្មើភាពគ្នាចំពោះមុខច្បាប់។
ក្នុងវីដេអូឡាយ(Live) ក្នុងទំព័រហ្វេសប៊ុករបស់សាលារៀន ជ័យ ថាវី-ទំព័រផ្លូវការ នៅថ្ងៃទី០៧ ខែវិច្ឆិកា ឆ្នាំ២០២៥នេះ បានបង្ហាញពីសកម្មភាពនៃការរុះរើរបងធ្វើពីដែក ដែលសង់នៅលើផ្លូវលេខ១៤៩ មុខក្លោងទ្វារចូលសាលារៀនជ័យថាវី ក្នុងសង្កាត់វាលវង់ ខណ្ឌ៧មករា ដែលរបងនោះត្រូវបានស្ត្រីម្នាក់អះអាងថាជារបស់សាលារៀនមួយនេះ។
ស្រ្តីម្ចាស់ផេកហ្វេសប៊ុកសាលារៀន ជ័យ ថាវី រូបនោះ បាននិយាយថា៖ «ពេលនេះគេចុះអនុវត្តច្បាប់តែចំពោះសាលាជ័យថាវីមួយគត់ តែតាមធម្មតា ផ្លូវ១៤៩នេះទៅធ្លុះដល់១៣៤ ប៉ុន្តែគេអត់អនុវត្តច្បាប់ចំពោះប្រជាជនទូទៅទេ គេអនុវត្តតែចំពោះខ្ញុំ តើគេមានបំណងអីដែរ សូមៗៗថ្នាក់លើឯកឧត្តមជួយរកយុត្តិធម៌ឱ្យខ្ញុំផង ជួយខ្ញុំផងៗៗ តើខ្ញុំខុសអី?ៗ ខ្ញុំរស់នៅទីនេះតាំងពីឆ្នាំ១៩៩២ ប៉ុន្តែគេមកអនុវត្តច្បាប់ចំពោះខ្ញុំ គ្មានដំណោះស្រាយគ្មានអីទាំងអស់ ខ្ញុំមិនដែលរារាំងនឹងការអភិវឌ្ឍរបស់រដ្ឋាភិបាលទេ ប៉ុន្តែការអភិវឌ្ឍត្រូវតែស្មើភាពគ្នាចំពោះមុខច្បាប់ ស្មើគ្នាទាំងអស់ទាំងប្រជាជនទូទៅ ហេតុអីក៏ធ្វើចំពោះខ្ញុំ ផ្លូវ១៤៩នេះត្រូវធ្លុះដល់ផ្លូវ១៣៩ បើកទាំងអស់គ្នា មិនត្រូវតែអនុវត្តច្បាប់តែចំពោះសាលាមួយទេ ធ្វើដើម្បីបុគ្គលណាៗ?»។
វីអូឌី មិនអាចសុំការអត្ថាធិប្បាយបន្ថែមជុំវិញករណីនេះ ពី ម្ចាស់សំណង់សាលាជ័យថាវី បានទេ នៅថ្ងៃសុក្រនេះ។
អ្នកនាំពាក្យក្រសួងរៀបចំដែនដី លោក សេង ឡូត អះអាងថា ក្រសួងមិនបានដឹងរឿងនេះទេ ដោយជំរុញឱ្យទាក់ទងអាជ្ញាធរក្រុងវិញ ដែលវីអូឌីមិនអាចទាក់ទងបាន។
លោកថា៖«ថ្នាក់ក្រោមគេធ្វើមិនមែនក្រសួងទេ។ កិច្ចការហ្នឹងខ្ញុំអត់ក្តាប់បានដែរ បាទ ខ្ញុំអត់ច្បាស់ដែរ ខាងហ្នឹងសួរទៅរាជធានីភ្នំពេញ ឬខាងខណ្ឌបានគេដឹង ខាងនេះខ្ញុំអត់ដឹងដែរ ឃើញតែគេបង្ហោះវីដេអូដែរ»។
យ៉ាងណា កាលពីថ្ងៃទី៥ ខែវិច្ឆិកា ឆ្នាំ២០២៥ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ បានលើកឡើងក្នុងទំព័រហ្វេសប៊ុករបស់លោកថា ការសម្រេចឱ្យម្ចាស់សំណង់សាលាជ័យថាវី ធ្វើការរុះរើសំណង់របស់ខ្លួន ដោយសារក្រសួងបានចុះទៅកាន់ទីតាំងសំណង់ជាក់ស្តែង រកឃើញថា សំណង់នេះ បានសាងសង់ពីដែកសម្រាប់ប្រើប្រាស់ជារោងសម្រាប់ចំណតកង់-ម៉ូតូ របស់បុគ្គលិក និងសិស្ស ដែលមកបង្រៀន ឬរៀននៅសាលាជ័យថាវី ហើយសំណង់នេះ បានសាងសង់បិទផ្លូវលេខ១៤៩ ដែលជាផ្លូវសាធារណៈ បង្កឱ្យមានភាពអាណាធិបតេយ្យ និងបាត់បង់សណ្តាប់ធ្នាប់ ដោយការដាក់កង់ ម៉ូតូពាសពេញផ្លូវ ព្រមទាំងធ្វើឱ្យប៉ះពាល់ដល់លំហូរចរាចរណ៍ក្នុងតំបន់ ព្រមទាំងសុវត្ថិភាព និងការសង្រ្គោះនានានៅពេលមានអគ្គិភ័យកើតឡើងជាយថាហេតុ។
ការលើកឡើងរបស់រដ្ឋមន្ត្រីរូបនេះ ក៏មានភ្ជាប់ជាមួយនូវលិខិតរបស់ក្រសួង ចុះថ្ងៃទី០៣ ខែវិច្ឆិកា ឆ្នាំ២០២៥ ដាក់ទៅរដ្ឋបាលរាជធានីភ្នំពេញ ដោយស្នើឱ្យអាជ្ញាធររាជធានីភ្នំពេញ ចុះរុះរើសំណង់របស់ម្ចាស់សាលាជ័យថាវី ដែលបានសាងសង់សំណង់អំពីដែកបិទផ្លូវសាធារណៈរបស់រដ្ឋ ដែលមានទីតាំងលើផ្លូវលេខ១៤៩ សង្កាត់វាលវង់ ខណ្ឌ៧មករានេះផងដែរ។
លោក សាយ សំអាល់ បានលើកឡើងក្នុងសំណេរដើមបន្ថែមថា៖ «សូមម្ចាស់សំណង់ និងបងប្អូនប្រជាពលរដ្ឋយល់អំពីបញ្ហានេះ និងចូលរួមជាមួយសង្គមជាតិ ដើម្បីរៀបចំស្រុកយើងឱ្យបានស្អាត មានសោភ័ណភាព សុវត្ថិភាព សណ្តាប់ធ្នាប់ និងប្រកបដោយសេចក្តីថ្លៃថ្នូរ»៕
