ចាប់តាំងពីមានការផ្ទុះសង្គ្រាមកាលពីខែកក្កដា ហើយថៃនៅតែបន្តរំលោភឈ្លានពានយ៉ាងគឃ្លើនចូលមកក្នុងទឹកដីកម្ពុជាឥតឈប់ឈររហូតមកដល់ពេលនេះ ទាំងពលរដ្ឋខ្មែរ និងសមាជិកមេដឹកនាំគ្រួសារហ៊ុន លែងចេញទៅព្យាបាលជំងឺនៅប្រទេសថៃទៀតហើយ ក៏ប៉ុន្តែនៅតែបន្តសម្រុកចេញទៅព្យាបាលជំងឺ និងពិនិត្យសុខភាពនៅក្រៅប្រទេសដដែល ដោយដូរទិសដៅទៅកាន់ប្រទេសផ្សេង ដូចជា វៀតណាម ម៉ាឡេស៊ីនិងប្រទេសឥណ្ឌាជាដើម ដោយសារតែមិនទុកចិត្តសេវាសុខាភិបាលក្នុងស្រុក។
លោក អ៊ិន រតនៈ ជាមន្ត្រីរាជការម្នាក់ មានវ័យជាង៥០ឆ្នាំ រស់នៅរាជធានីភ្នំពេញ តែងតែនាំភរិយារបស់លោកដែលមានវ័យជិត៥០ឆ្នាំ ទៅព្យាបាលជំងឺ និងពិនិត្យសុខភាពនៅមន្ទីរពេទ្យក្នុងខេត្តសុរិន្ទ ឬនៅក្នុងទីក្រុងបាងកក ប្រទេសថៃ យ៉ាងហោចណាស់ពីរដងក្នុង១ឆ្នាំ។ ប៉ុន្តែចាប់តាំងពីមានការផ្ទុះសង្គ្រាមរវាងកងទ័ពថៃ កាលពីខែកក្កដាមក លោក រតនៈ បានបង្វែរទិសដៅចេញទៅព្យាបាលជំងឺ និងពិនិត្យសុខភាពនៅប្រទេសវៀតណាមវិញ បន្ទាប់ពីលោកបានព្យាយាមចូលទៅព្យាបាលជំងឺនៅតាមគ្លីនិកឯកជននៅភ្នំពេញមួយរយៈ។
លោក រតនៈ ដែលកើតជំងឺរបេងក្នុងឈាម ហើយបានឆ្លងមេរោគរាលដាលទៅដល់ពងស្វាស ដែលត្រូវធ្វើការវះកាត់ បានប្រាប់វីអូឌីកាលពីថ្ងៃទី៨ខែវិច្ឆិកាថា បន្ទាប់ពីមានការបិទច្រកព្រំដែនកម្ពុជា-ថៃមក លោកបានទៅព្យាបាលនៅគ្លីនិកឯកជននៅភ្នំពេញមួយចំនួន ក៏ប៉ុន្តែការពិនិត្យនិងការវិនិច្ឆ័យរោគរបស់គ្រូពេទ្យខ្មែរ ហាក់ដូចមិនបានត្រឹមត្រូវនោះទេ ខណៈការវិនិច្ឆ័យរោគរបស់គ្រូពេទ្យថៃ និងគ្រូពេទ្យវៀតណាម វាមានកម្រិតត្រឹមត្រូវខ្ពស់ជាង ហើយការព្យាបាលក៏មានប្រសិទ្ធភាពជាងផងដែរ។
លោកថា៖ «ស្រុកខ្មែរយើង ខ្ញុំបានទៅពិនិត្យគ្លីនិកចំនួន៣ ហើយការវាយតម្លៃវាអត់ត្រូវដោយសារគាត់បានវ៉ៃថ្នាំ ហើយបានព្យាបាលមួយរយៈមកហើយ។ គ្លីនិកខ្លះ ខ្ញុំក៏ត្រូវបានគេឃាត់ទុកដេកនៅនុង១អាទិត្យហើយគេចាក់ថ្នាំផ្សះព្យួរស្សេរ៉ូម ប៉ុន្តែដល់ពេលចេញមកអាការៈជំងឺនឹងក៏អត់បាត់។ ចឹងខ្ញុំក៏សម្រេចចិត្តទៅប្រទេសវៀតណាម ដើម្បីធ្វើការពិនិត្យនិងធ្វើការវាយតម្លៃជំងឺ។ បន្ទាប់មក ជាលទ្ធផលគេវាយតម្លៃហើយក៏ចាប់ផ្តើមធ្វើការវះកាត់ គេថាមិនអាចទុកបានទេ ហើយតម្លៃថ្លៃថ្នូរអី វាខុសគ្នាមិនច្រើនប៉ុន្មានដែរទេ។ ចឹងហើយបានខ្ញុំទៅព្យាបាលនៅប្រទេសជិតខាង មិនមែនថាមិនបានឆ្លងកាត់ពេទ្យនៅប្រទេសខ្មែរទេ»។
បន្ថែមពីនេះ លោកថា មន្ទីរពេទ្យនៅថៃ និងវៀតណាម ក៏មានឧបករណ៍សម្រាប់វិនិច្ឆ័យរោគទំនើបជាងហើយគ្រូពេទ្យគេក៏បំពេញការងារយកចិត្តទុកដាក់ជាង និងការនិយាយស្តីសមរម្យចំពោះអ្នកជំងឺ ខុសពីគ្រូពេទ្យខ្មែរមួយចំនួន។ លោក អ៊ិន រតនៈ បានទៅធ្វើការវះកាត់ និងព្យាបាលជំងឺរបស់លោក នៅមន្ទីរពេទ្យវៀតណាម អស់រយៈពេល៣យប់៣ថ្ងៃ កាលពីពាក់កណ្តាលខែតុលា ឆ្នាំ២០២៥ ដោយចំណាយអស់ប្រាក់ប្រមាណ២ពាន់ដុល្លារ។
ជាមួយគ្នានេះ អ្នកស្រី សន ចរិយា វ័យ៤០ឆ្នាំ ជាពលរដ្ឋរស់នៅសង្កាត់បឹងទំពុន ខណ្ឌមានជ័យ រាជធានីភ្នំពេញ បាននិយាយថា បញ្ហាសេវាសុខាភិបាលនៅកម្ពុជា ពិតជានៅមានភាពខ្វះខាតលើផ្នែកមួយចំនួន ដោយគ្រូពេទ្យខ្លះ មិនចេះធ្វើការវិនិច្ឆ័យរោគឱ្យថ្នាំលេបច្រើនៗអាងអីអាងចាក់ថ្នាំ ព្យួរស៊ីរ៉ូម ដើម្បីធ្វើយ៉ាងណាអាចយកលុយពីអ្នកជំងឺឱ្យបានច្រើន ដោយហាក់មិនសូវគិតពីអាយុជីវិតរបស់អ្នកជំងឺនោះឡើយ។
ស្ត្រីដែលទើបវិលត្រឡប់មកពីព្យាបាលជំងឺក្រពះនៅប្រទេសវៀតណាម កាលពីសប្តាហ៍មុនរូបនេះ បានឱ្យដឹងថា ឥឡូវមានពលរដ្ឋខ្មែរច្រើនណាស់ បានសម្រុកទៅព្យាបាលជំងឺ និងពិនិត្យសុខភាពនៅមន្ទីរពេទ្យក្នុងប្រទេសវៀតណាម គឺឡើងស្ទះពេទ្យវៀតណាម រកកន្លែងដេកគ្មាន ចាប់តាំងពីកម្ពុជាមានសង្គ្រាមព្រំដែនជាមួយថៃមក។ ស្ត្រីដែលបដិសេធមិនឱ្យថតសំឡេងរូបនេះ និយាយថា នៅពេទ្យវៀតណាមក៏គេពិនិត្យវិនិច្ឆ័យរោគរាងល្អិតល្អន់ប្រហាក់ប្រហែលពេទ្យថៃដែរ ហើយគេផ្តល់ថ្នាំតិចលេបម្តង១គ្រាប់ឬពីរបីគ្រាប់តែមានប្រសិទ្ធភាព មិនមែនឱ្យលេបថ្នាំច្រើនៗដូចពេទ្យខ្មែរ ប៉ុន្តែមិនសូវមានប្រសិទ្ធភាពនោះទេ។
ចំណែក លោក សេង សុង ជាពលរដ្ឋរស់នៅស្រុកពារាំង ខេត្តព្រៃវែង ដែលបាននាំឪពុកក្មេកនិងបងប្អូនសាច់ថ្លៃ៤នាក់ ទៅពិនិត្យព្យាបាលជំងឺនៅពេទ្យវៀតណាម កាលពីពាក់កណ្តាលខែតុលា បានប្រាប់វីអូឌីកាលពីថ្ងៃទី១០ខែវិច្ឆិកាថា ការពិនិត្យនិងព្យាបាលជំងឺនៅពេទ្យថៃ និងពេទ្យវៀតណាម គេមានកម្រិតខ្ពស់ជាងគួរឱ្យជឿទុកចិត្ត ខណៈគ្រូពេទ្យខ្មែរមួយចំនួន ធ្វើការព្យាបាលខ្ជីខ្ជានៅអូសក្រឡាធ្វើយ៉ាងណាដើម្បីកៀបយកលុយពីអ្នកជំងឺឱ្យបានច្រើន។
លោកថា៖ «មុនដំបូងព្យាបាលជំងឺនៅខ្មែរយើងសភាពជំងឺវាអត់បានធូរ ដល់ពេលទៅថៃ វាបានធូរ ត្រូវច្រើន។ ព្យាបាលនៅថៃគ្រាន់តែថាតម្លៃវាថ្លៃ បើយើងប្រៀបធៀបតម្លៃព្យាបាលនៅវៀតណាមប្រភេទជំងឺអស់ ៥០០[ដុល្លារ] ទៅវៀតណាមអស់ចន្លោះពី១០០០ទៅ១០០០[ដុល្លារ]ជាងតិចតួច»។
វីអូឌី មិនអាចទាក់ទងលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ដើម្បីស្នើសុំធ្វើការអត្ថាធិប្បាយលើបញ្ហានេះបានទេ នៅថ្ងៃទី១០ខែវិច្ឆិកានេះ។
យ៉ាងណាក្តី កាលពីថ្ងៃទី៦ខែវិច្ឆិកានេះ លោក ឈាង រ៉ា រដ្ឋមន្ត្រីក្រសួងសុខាភិបាល បានឆ្មក់ចុះទៅពិនិត្យដោយមិនបានជូនដំណឹងជាមុន នៅមណ្ឌលសុខភាពកោះរ៉ុង ស្ថិតនៅលើដែនកោះកណ្តាលសមុទ្រ ក្នុងខេត្តព្រះសីហនុ ដោយបានសង្កេតឃើញថា បុគ្គលិកនៅប្រចាំការ២៤ម៉ោងក្នុងមួយថ្ងៃ។ មណ្ឌលសុខភាពមានបរិស្ថានអនាម័យស្អាត អ្នកជំងឺត្រូវបានទទួលពិនិត្យព្យាបាលដោយយកចិត្តទុកដាក់ មិនមានការរង់ចាំហើយគុណភាពសេវា ត្រូវបានវាយតម្លៃថា គ្រប់គ្រាន់ និងមានការរីកចម្រើនជាដើម។ លោករដ្ឋមន្ត្រី បានលើកទឹកចិត្តឱ្យបុគ្គលិកពេទ្យទាំងអស់ បន្តប្រឹងប្រែងក្នុងភារកិច្ចបម្រើសេវាសុខាភិបាលឱ្យកាន់តែល្អប្រសើរ ដើម្បីកសាងស្នាមញញឹមជូនប្រជាពលរដ្ឋ។ នេះបើយោងតាមហ្វេសប៊ុកក្រសួងសុខាភិបាល។
ទាក់ទងនឹងចំនួនប្រជាពលរដ្ឋខ្មែរចេញទៅព្យាបាលជំងឺនៅក្រៅប្រទេសវិញ លោក ឈាង រ៉ា ធ្លាប់បានថ្លែងកាលពីចុងឆ្នាំ២០២៤ថា នៅក្នុងឆ្នាំ២០២៣ ក្រសួងសុខាភិបាល បានធ្វើការប៉ាន់ប្រមាណមានប្រជាពលរដ្ឋខ្មែរប្រមាណពីជាង២០ទៅ២៥ម៉ឺននាក់ ស្មើនឹង១,៥% បានចេញទៅពិនិត្យ និងព្យាបាលជំងឺនៅបរទេស តែបើប្រៀបធៀបនឹងអ្នកជំងឺដែលទទួលពិនិត្យព្យាបាលនៅក្នុងស្រុក គឺមានចំនួនប្រមាណជាង១៣លាននាក់ ស្មើនឹង៩៨,៥%។ យ៉ាងនេះក្ដី លោកថា ក្រសួងសុខាភិបាល នៅតែបន្ដខិតខំប្រឹងប្រែងពង្រឹងការផ្តល់សេវាសុខាភិបាល ឱ្យបានកាន់តែល្អប្រសើរ ទាំងសេវាសុខភាពរដ្ឋ និងឯកជន ធ្វើយ៉ាងណាផ្ដល់ការជឿទុកចិត្ត ដើម្បីកាត់បន្ថយការចេញទៅទទួលសេវាសុខាភិបាលនៅក្រៅប្រទេស។
ជាច្រើនឆ្នាំមកហើយ ប្រជាពលរដ្ឋខ្មែរដែលមានជីវភាពរាងសមរម្យ តែងតែចេញទៅព្យាបាលជំងឺនៅប្រទេសថៃនិងវៀតណាម ចំណែកមន្ត្រីជាន់ខ្ពស់រដ្ឋាភិបាល ក្នុងនោះក៏មានមេដឹកនាំគ្រួសារហ៊ុនផងដែរតែងចេញទៅព្យាបាលជំងឺនៅប្រទេសបារាំង សិង្ហបុរី និងប្រទេសឥណ្ឌាជាដើម។
អ្នកស្រី ហ៊ុន ស៊ីណាត ប្អូនស្រីលោក ហ៊ុន សែន ប្រធានព្រឹទ្ធសភា កាលពីថ្ងៃទី៤ខែតុលា បានបង្ហោះសារនិងរូបថតនៅលើបណ្តាញសង្គមថា ថ្ងៃនេះនាំ ជំនាងផ្ទះឡើងទៅព្យាបាលជំងឺនៅប្រទេសឥណ្ឌា ខណៈកាលពីមុន ត្រូវឡើងទៅព្យាបាលនៅមន្ទីរពេទ្យ Bumrungrad នៅក្នុងទីក្រុងបាងកក ប្រទេសថៃ។
អ្នកស្រីបញ្ជាក់ក្នុងសំណេរដើមថា៖ «ឥលូវនេះដូរទិសហើយ រកគ្រូពេទ្យឥណ្ឌាម្ដង ទៅគ្រូពេទ្យដើមនៅថៃមិនស្រួល វាចាប់ឯងធ្វើចំណាប់ខ្មាំងដូចកងទ័ពកម្ពុជា១៨នាក់ទៀតងាប់ហើយ មុខខ្ញុំនេះ ពួកវាស្គាល់ច្បាស់ ចឹងទៅកន្លែងព្រះសម្មាសម្ពុទ្ធវិញហើយ»។
នៅថ្ងៃទី៨ ខែតុលា ម្តាយមីងលោកនាយករដ្ឋមន្ត្រី ហ៊ុន ម៉ាណែត ដែលត្រូវបានគេដឹងថា ជាអ្នកគ្រប់គ្រងអ្នកលក់ឡេលើបណ្តាញសង្គម ដែលជាផ្នែកមួយនៃការលាងលុយខ្មៅរបស់គ្រួសារហ៊ុនរូបនេះ បានសរសេរបង្ហោះទៀតថា មកដល់ទីក្រុងញូដេលី ប្រទេសឥណ្ឌាហើយ មកសួរសុខទុក្ខប្អូនថ្លៃសម្រាកព្យាបាលជំងឺនៅមន្ទីរពេទ្យ Apollo ពេលនេះមានសង្ឃឹមច្រើនហើយ។ អ្នកស្រីបានឱ្យដឹងថា នៅប្រទេសឥណ្ឌានេះឃើញមានខ្មែរមកព្យាបាលជំងឺច្រើន ហើយសួរនាំទៅច្រើនតែមកដូរគ្រលៀន និងដូរថ្លើម។
សម្រាប់ លោក រតនៈ ដែលជាមន្ត្រីរាជការមានបណ្ណ បសស តែមិនដែលបានប្រើដោយសារតែធុញទ្រាន់ក្នុងការទៅឈររងចាំនៅតាមមន្ទីរពេទ្យរដ្ឋនានា ដែលមានអ្នកឈររង់ចាំព្យាបាលដល់ខ្ទង់ពាន់នាក់ក្នុង១ថ្ងៃៗ បានស្នើឱ្យរដ្ឋាភិបាលត្រូវបង្កើនការយកចិត្តទុកដាក់ពង្រីកសេវា និងពង្រឹងគុណភាពសុខាភិបាលបង្កើនចំនួនគ្រូពេទ្យ និងចំណេះជំនាញ ព្រមទាំងក្រមសីលធម៌របស់គ្រូពេទ្យ។
លោកថា៖ «ខ្ញុំចង់ឃើញក្រសួងសុខាភិបាលហ្នឹង ជួយជំរុញធ្វើយ៉ាងណាឱ្យការព្យាបាលនៅប្រទេសខ្មែរយើងហ្នឹងវាសម្បូរបែប។ ចង់និយាយថា គឺមានអ្នកជំនាញបច្ចេកទេសច្រើន មានក្រមសីលធម៌វិជ្ជាជីវៈកាន់តែល្អប្រសើរ ហើយប្រកបដោយគុណភាព និងតម្លៃទៀតសោត អាចធ្វើឱ្យប្រជាជនយើងទទួលយកបានចង់និយាយថាមិនមានតម្លៃថ្លៃខ្លាំង»។
ជាមួយគ្នានេះ ទាំងលោក សុង និងលោក រតនៈ ក៏ដូចជាអ្នកស្រី ចរិយា ផងដែរ បាននិយាយដូចគ្នាថា ប្រសិនបើគ្រូពេទ្យខ្មែរធ្វើការព្យាបាលជំងឺដោយយកចិត្តទុកដាក់ខ្ពស់ និយាយស្តីមានសីលធម៌ ថែមទាំងមានភាពសុចរិតស្មោះត្រង់ មិនកុហក កៀបស៊ីលុយកាក់អ្នកជំងឺ នោះគ្មានពលរដ្ឋខ្មែរណាចង់ចេញទៅព្យាបាលជំងឺនៅក្រៅប្រទេស ដែលមានគ្រូពេទ្យជាសាសន៍ដទៃពិបាកនិយាយគ្នានោះទេ។
ប្រភពដដែល បានអះអាងថា ជាច្រើនឆ្នាំមកហើយគ្រូពេទ្យខ្មែរមួយចំនួន ទាំងនៅមន្ទីរពេទ្យរដ្ឋ និងឯកជនហាក់ឱ្យតម្លៃលើលុយធំជាងអាយុជីវិតមនុស្ស ដោយទុកអ្នកជំងឺចោលមិនព្រមធ្វើការព្យាបាល បើសិនអ្នកជំងឺនោះមិនទាន់បង់លុយ រហូតដល់ធ្វើឱ្យអ្នករងរបួសធ្ងន់ក្នុងគ្រោះថ្នាក់ចរាចរណ៍ខ្លះ បានស្លាប់ ដោយសារតែពុំមានសាច់ញាតិទៅបង់ប្រាក់ព្យាបាលទាន់ពេលវេលា ហើយអ្នកខ្លះមានជំងឺធម្មតាដែលមិនគួរស្លាប់ ក៏បែរជាស្លាប់ផងដែរ បន្ទាប់ពីទៅព្យាបាលជំងឺនៅមន្ទីរពេទ្យ ឬគ្លីនិកឯកជនប៉ះចំគ្រូពេទ្យគ្មានជំនាញ។
សូមបញ្ជាក់ផងដែរថា បច្ចុប្បន្នមានក្រុមហ៊ុនឡានក្រុងជាង១០ក្រុមហ៊ុន រង់ចាំដឹកអ្នកដំណើរពីភ្នំពេញទៅទីក្រុងហូជីមិញ អតីតក្រុងព្រៃនគររបស់កម្ពុជា ដែលក្នុងនោះភាគច្រើនទៅព្យាបាលជំងឺ។ ក្រុមហ៊ុនទាំងនោះ ស្ទើតែទាំងអស់ជាក្រុមហ៊ុនរបស់វៀតណាមបើកបរដោយជនជាតិវៀតណាម៕
