លោក សម រង្ស៊ី ដែលកំពុងនិរទេសចោទថា រដ្ឋាភិបាលគ្រួសារហ៊ុន មានគម្រោងផ្ទេរមាស៥៤តោន ឬស្មើនឹងជាង២៦ពាន់លានដុល្លារ ដែលជាទ្រព្យបម្រុងរបស់ជាតិ ផ្ទេរពីប្រទេសលោកសេរី ទៅទុកនៅប្រទេសចិន ដោយថា ដើម្បីលួងចិត្តចោរអន្តរជាតិ ប្លុកលោកសេរីកំពុងតាមចាប់។
កាលពីថ្ងៃទី១០ ខែវិច្ឆិកា ឆ្នាំ២០២៥នេះ រដ្ឋាភិបាលក្រៅប្រទេសរបស់លោក សម រង្ស៊ី បានចេញសេចក្តីថ្លែងការណ៍មួយ ថ្កោសទោសយ៉ាងដាច់អហង្ការ លើរដ្ឋាភិបាលគ្រួសារហ៊ុន ដោយចោទពីចេតនាផ្ទេរមាស ប្រមាណ៥៤តោន ដែលបានតម្កល់នៅធនាគារនៃប្រទេសស្វីស សហរដ្ឋអាមេរិក និងអង់គ្លេស ទៅដាក់នៅធនាគារនៃប្រទេសចិនកុម្មុយនិស្ត។
លោកចោទថា ទង្វើនេះ គឺជាការរឹបអូសយកទ្រព្យសម្បត្តិរបស់ជាតិ ទៅលួងចិត្តពួកម៉ាហ្វីយ៉ាជនជាតិចិន ដែលថាជាចោរអន្តរជាតិ ខណៈសហរដ្ឋអាមេរិក អង់គ្លេស និងសម្ព័ន្ធមិត្ត កំពុងតាមចាប់។
លើសពីនេះ លោកថា អំពើបែបនេះ ក៏ជាការកម្ទេចចោលទាំងស្រុងនូវទំនុកចិត្តនៃការដោះដូរពាណិជ្ជកម្មអន្តរជាតិរបស់កម្ពុជា ដែលប្រើប្រាស់ប្រាក់ដុល្លារអាមេរិកជាមូលដ្ឋានទូទាត់ ពីព្រោះមាសគឺជាទុនបម្រុងអន្តរជាតិ ដ៏សំខាន់បំផុតរបស់ជាតិ។
ប្រភពនិយាយថា៖ «នេះមានន័យថា របបភ្នំពេញនៃគ្រួសារហ៊ុន អស់ផ្លូវក្នុងការផ្សះផ្សាធ្វើពាណិជ្ជកម្មជាមួយ បណ្តាប្រទេសសេរី ប្រជាធិបតេយ្យ ឬប្រទេសនីតិរដ្ឋហើយ»។
សម្រាប់រដ្ឋាភិបាលនៅក្រៅប្រទេសរបស់លោក សម រង្ស៊ី បង្ហាញការយល់ថា នេះជាសញ្ញាដែលបង្ហាញថា ប្រទេសកម្ពុជា និងប្រជាពលរដ្ឋខ្មែរ នឹងរអិលវិលទៅកាន់របបអតីតកាលដែលខ្សត់ពាណិជ្ជកម្មក្រៅប្រទេស ហើយប្រជាពលរដ្ឋខ្មែររស់តាមយថាកម្ម ដោយខ្សត់ទីផ្សារអន្តរជាតិ សម្រាប់លក់ផលិតផល រហូតទាល់តែដល់ពេលរបបភ្នំពេញនៃគ្រួសារហ៊ុន ដួលរលំអំណាច។
បន្ថែមលើសេចក្តីថ្លែងការណ៍នេះ លោក អ៊ុំ សំអាន ដែលមានឈ្មោះក្នុងរដ្ឋាភិបាលនៅក្រៅប្រទេសនេះ បានប្រាប់VOD នៅថ្ងៃទី១១ខែវិច្ឆិកានេះថា ការសំអាងនៃសេចក្តីថ្លែងការណ៍នេះ ហាក់ស៊ីគ្នាទៅនឹងសារព័ត៌មានអន្តរជាតិពីរដែលអាចជឿបាន។
លោកថា៖ «ខ្ញុំយល់ថា ព័ត៌មានពី Business Times ហ្នឹងគឺអាចទុកចិត្តបានពីការផ្ទេរមាសពីប្រទេសសេរីទៅកាន់ប្រទេសចិនកុម្មុយនិស្ត ហើយការពន្លឿនផ្ទេរមាសចេញពីប្រទេសសេរីទៅប្រទេសចិនកុម្មុយនីស្តនេះ»។
លើសពីនេះ លោកចាត់ទុកថា គម្រោងផ្ទេរទ្រព្យបម្រុងរបស់ជាតិ ទៅទុកនៅប្រទេសចិន ពីសំណាក់បក្សកាន់អំណាចនេះ ឆ្លុះបញ្ចាំងថា គ្រួសារហ៊ុនកំពុងខ្លាចសហគមន៍អន្តរជាតិបង្កកទ្រព្យសម្បត្តិ ដែលបញ្ជាក់ថា រដ្ឋាភិបាលគ្រួសារហ៊ុនពិតជាមានជាប់ពាក់ព័ន្ធនឹងក្រុមឧក្រិដ្ឋកម្មឆបោក គឺលោក ចេន ហ្ស៊ី ដែលសហគមន៍អន្តរជាតិ ទាំងសហរដ្ឋអាមេរិក ចក្រភពអង់គ្លេស និងបណ្តាប្រទេសចំនួន ៧ទៀត កំពុងតាមចាប់ខ្លួន និងបង្កកទ្រព្យសម្បត្តិជាច្រើនរបស់ លោក ចេន ហ្ស៊ី ទីប្រឹក្សាលោក ហ៊ុន សែន ដែលរកឃើញថា មានជាប់ពាក់ព័ន្ធនឹងឧក្រិដ្ឋកម្មឆបោក Scammer online Cyber crime និងលាងលុយកខ្វក់ជាដើម។
សម្រាប់ លោក អ៊ុំ សំអាន គ្រួសារហ៊ុនប្រហែលជាដឹងថា បើនៅបន្តដាក់មាសជាតិនៅក្នុងប្រទេសលោកសេរីទៀត ថ្ងៃណាមួយប្រទេសលោកសេរីទាំងនេះ នឹងបង្កក ឬរឹបអូសទ្រព្យសម្បត្តិទាំងនោះ ដែលធ្វើឱ្យមេដឹកនាំគ្រួសារហ៊ុនអាចនឹងប្រឈមហានិភ័យពីការដួលរលំអំណាច ការណ៍នេះ ទើបមេដឹកនាំគ្រួសារហ៊ុនពន្លឿនចង់ផ្ទេរមាសជាតិពីប្រទេសសេរីទៅប្រទេសកុម្មុយនិស្តចិនបែបនេះ។
លោកថា៖ «មេដឹកនាំខ្មែរយើងត្រកូលហ៊ុនហ្នឹង គឺជាប់ពាក់ព័ន្ធនឹងបទឧក្រិដ្ឋនៃការឆបោកតាមអនឡាញព្រោះយើងដឹងហើយឧកញ៉ា ចេន ហ្ស៊ី ជាទីប្រឹក្សារបស់លោក ហ៊ុន សែន ទីប្រឹក្សារបស់លោក ហ៊ុន ម៉ាណែត សូម្បីតែឧកញ៉ា លី យ៉ុងផាត់ ឧកញ៉ា កុក អាន ហ្នឹងសុទ្ធតែជាមនុស្សស្និទ្ធនឹងត្រកូលហ៊ុន ការណ៍នេះ គាត់ព្រួយបារម្ភខ្លាចប្រទេសសេរីហ្នឹង គេបង្កកមាសហ្នឹងទៅ វាអាចប៉ះពាល់ដល់សេដ្ឋកិច្ចនៅកម្ពុជា»។
បើតាមសារព័ត៌មាន The Business Times ចុះផ្សាយកាលពីថ្ងៃទី៥ ខែតុលា ឆ្នាំ២០២៥ ឱ្យដឹងថា ប្រទេសកម្ពុជានឹងក្លាយជាប្រទេសមួយក្នុងចំណោមប្រទេសដទៃ ដែលគ្រោងផ្ទេរមាសទុកជាមួយប្រទេសចិន។
ប្រភពបន្តថា ប្រជាជាតិអាស៊ីអាគ្នេយ៍មួយនេះ គឺកម្ពុជាកំពុងមានគ្រោងផ្ទេរមាសទុនបម្រុងទុករបស់ជាតិខ្លួនទៅក្នុងឃ្លាំងមាស ជាមួយទីផ្សារក្រុមហ៊ុនមាសសៀងហៃ ក្នុងទីក្រុង Shenzhen នៃប្រទេសចិន។
បើតាម The Business Times «យោងតាមការវាយតម្លៃចុងក្រោយរបស់ក្រុមប្រឹក្សាមាសពិភពលោក ធនាគារកណ្តាលរបស់កម្ពុជា ដែលមានមាសប្រហែល ៥៤ តោន ដែលជាទុនបម្រុងរបស់ជាតិ ឬស្មើនឹងប្រាក់បរទេសចំនួន ២៦ពាន់លានដុល្លារអាមេរិក គ្រោងនឹងផ្ទេរចេញពីប្រទេសស្វីស សហរដ្ឋអាមេរិក និងចក្រភពអង់គ្លេស ទៅប្រទេសចិនជំនួសវិញ»។
ជុំវិញបញ្ហានេះ អ្នកនាំពាក្យគណបក្សប្រជាជនកម្ពុជា លោក ជា ធារិទ្ធិ ច្រានចោលចំពោះការចោទប្រកាន់នេះ ដោយលោកថា ជាព័ត៌មានមិនពិត ប្រឌិតដើម្បីចោទប្រកាន់ថ្នាក់ដឹកនាំកម្ពុជាប៉ុណ្ណោះ។
លោកថា៖ «ពួកគេនោះ បានព័ត៌មានពីណា ពួកគេបានព័ត៌មានពីប្រទេសណា គឺពួកគេបន្លឺតាមប្រទេសមួយទៀតហ្នឹង ចឹងបុគ្គលក្រុមទាំងអស់នេះ បម្រើផលប្រយោជន៍នរណាគេឥឡូវហ្នឹង បម្រើផលប្រយោជន៍ខ្មែរ ឬក៏បម្រើផលប្រយោជន៍បរទេស ចឹងវាជាសកម្មភាពមួយដែលគ្មានតម្លៃគ្មានប្រយោជន៍សម្រាប់ជាតិទាល់តែសោះ»។
យ៉ាងណា ប្រធានអង្គការប្រជាធិបតេយ្យខ្មែរប្រចាំនៅប្រទេសអូស្រ្តាលី លោក ស៊ឹង សែនករុណា មិនគាំទ្រឱ្យរដ្ឋាភិបាលកម្ពុជាផ្ទេរមាសរបស់ជាតិពីប្រទេសលោកសេរី ទៅប្រទេសចិនកុម្មុយនិស្តនោះទេ។
លោកយល់ថា ការផ្ទេរមាសរបស់ជាតិរាប់តោនបែបនេះ ចេញពីប្រទេសលោកសេរី វានឹងបង្កហានិភ័យដល់ប្រព័ន្ធសេដ្ឋកិច្ចជាតិ គឺធ្វើឱ្យសហគមន៍អន្តរជាតិកាន់តែអស់ទំនុកចិត្តចង់រកស៊ីជាមួយកម្ពុជា ការណ៍នេះ វានឹងបង្កគ្រោះថ្នាក់ដល់សង្គមជាតិ ជាពិសេសប្រជារាស្រ្តខ្មែរម្ចាស់ប្រទេស។
លោកថា៖ «ក្រោយពីមានបញ្ហារឿង Scammer រឿងអនឡាញ ការឆបោកអនឡាញ និងអំពើឧក្រិដ្ឋកម្មផ្សេងៗ ត្រូវបានបែកធ្លាយ បានន័យថា ត្រូវបានបំបែកសំណុំរឿងបន្តបន្ទាប់ ហើយត្រូវបានបណ្ដាប្រទេសផ្សេងៗបង្កកនូវប្រាក់វាល់ពាន់លានដុល្លារ ដែលយើងមើលឃើញទាំងអស់គ្នា ចឹងក្រោយពីមានបញ្ហាហ្នឹង ទើបថ្មីៗហ្នឹង ខាងរដ្ឋាភិបាលហាក់ដូចជាមិនមានទំនុកចិត្ត ក្នុងការរក្សានូវទ្រព្យសម្បត្តិរបស់ជាតិ ឬក៏ទ្រព្យសម្បត្តិដែលពាក់ព័ន្ធនឹងការគ្រប់គ្រងរបស់ខ្លួន ទៅទីតាំងណាមួយដែលខ្លួនយល់ថា មានសុវត្ថិភាព ប៉ុន្តែសម្រាប់ខ្ញុំ ខ្ញុំគិតថា ទៅទីណាក៏ដោយ បើសិនជាយើងមិនបានអនុវត្តឲ្យបានត្រឹមត្រូវទៅតាមច្បាប់ ទៅតាមគោលការណ៍អន្តរជាតិ អាចនឹងប្រឈមនឹងបញ្ហាជាបន្តបន្ទាប់ទៀត បើសិនជាមិនមានដំណោះស្រាយណាមួយ ដែលធ្វើឲ្យសហគមន៍អន្តរជាតិគេជឿជាក់ត្រូវបាន»។
កាលពីថ្ងៃទី៣១ ខែតុលានេះ ប៉ូលិសសិង្ហបុរី បានប្រកាសរឹបអូសទ្រព្យសម្បត្តិ លោក ចេន ហ្ស៊ី បន្ថែមទៀតចំនួនជាង ១១៥ លានដុល្លារអាមេរិក ក្រោយពីសហរដ្ឋអាមេរិក ចក្រភពអង់គ្លេស និងកូរ៉េខាងត្បូង ប្រកាសដាក់ទណ្ឌកម្មបង្កកទ្រព្យសម្បត្តិ លោក ចេន ហ្ស៊ី ទីប្រឹក្សាលោក ហ៊ុន សែន នោះ។
ប្រភពអះអាងថា លោក ចេន ហ្ស៊ី ទីប្រឹក្សាលោក ហ៊ុន សែន ជាមេក្លោងឧក្រិដ្ឋកម្មឆបោកខ្នាតអន្តរជាតិ ដែលទីភ្នាក់ងារស៊ើបអង្កេត FBI អាមេរិក បញ្ជាក់ថា លោក ចេន ហ្ស៊ី ជាមេឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី ដែលកំពុងប្រតិបត្តិការក្នុងប្រទេសចំនួន ៣០ លើពិភពលោក។
ប្រភពបន្តថា លោក ចេន ហ្ស៊ី ដែលគេស្គាល់ថាជាទីប្រឹក្សាលោក ហ៊ុន សែន បានបង្កើតក្រុមហ៊ុនជាច្រើន រួមទាំងក្រុមហ៊ុន Prince Group ដើម្បីលាងលុយកង្វក់ និងប្រព្រឹត្តិបទល្មើសឆបោកខ្នាតអន្តរជាតិ។
ប្រភពបន្តទៀតថា សហរដ្ឋអាមេរិក និងចក្រភពអង់គ្លេស កំពុងសហការជាមួយប្រទេសដៃគូ ដើម្បីបន្តដាក់ទណ្ឌកម្មបង្កកទ្រព្យសម្បត្តិ លោក ចេន ហ្ស៊ី ព្រោះគាត់ជាមេឧក្រិដ្ឋកម្មឆបោកខ្នាតអន្តរជាតិ ធ្វើប្រតិបត្តិការលួចលុយរាប់ពាន់លានដុល្លារ ជុំវិញពិភពលោក។
ការណ៍នេះ ប្រទេសជាដៃគូ មានទាំងថៃ តៃវ៉ាន់ ហុងកុង និងសិង្ហបុរី បាននឹងកំពុងសហការអនុវត្តវិធានការបង្កកទ្រព្យសម្បត្តិលោក ចេន ហ្ស៊ី និងតាមប្រមាញ់ចាប់ខ្លួនគាត់ផងដែរ។
លោក ចេន ហ្ស៊ី ដែលជាម្ចាស់ក្រុមហ៊ុន ព្រីនស៍គ្រុប បានបាត់វត្តមានតាំងពីពាក់កណ្តាលខែតុលា ពោលគឺនៅក្រោយពេលដែលចក្រភពអង់គ្លេស សហរដ្ឋអាមេរិក សិង្ហបុរី និងតៃវ៉ាន់ ជាដើម បានដកហូតទ្រព្យសម្បត្តិ និងប្រកាសតាមចាប់ខ្លួន ករណីឆបោកតាមអ៊ីនធឺណិត ធ្វើទារុណកម្ម និងលាងលុយកខ្វក់។
លើសពីនេះ បើតាមផ្សព្វផ្សាយអន្តរជាតិ ដូចជា Times Now របស់ឥណ្ឌា និង CNN របស់អាមេរិក ជាដើម បានចុះផ្សាយជាហូរហែអំពីប្រវត្តិ និងការរកស៊ីរបស់លោក ចេន ហ្ស៊ី ដោយភ្ជាប់ជាមួយឈ្មោះអតីតមេដឹកនាំកម្ពុជា លោក ហ៊ុន សែន ដែលជាបុគ្គលសំខាន់ នៅពីក្រោយការផ្ដល់ទីកន្លែងឱ្យគាត់ បង្កើតរោងចក្រឧស្សាហកម្មឆបោកតាមអ៊ីនធឺណិត លំដាប់ថ្នាក់អន្តរជាតិ នៅលើទឹកដីកម្ពុជា។
សារព័ត៌មានទាំងនេះ បានដកស្រង់នូវសេចក្ដីសន្និដ្ឋានបឋមរបស់អាជ្ញាធរអន្តរជាតិថា លោក ចេន ហ្ស៊ី អាចនឹងកំពុងលាក់ខ្លួន ក្នុងប្រទេសណាមួយនៅទ្វីបអាស៊ី ដែលមានប្រព័ន្ធនីតិរដ្ឋខ្សោយ និងសម្បូរអំពើពុករលួយ ដោយក្នុងនោះ កម្ពុជាត្រូវបានគេសង្ស័យខ្លាំងជាងគេ។
ប្រភពទាំងនោះ បានលើកឡើងថា ច្រើនឆ្នាំកន្លងមកនេះ លោក លោក ចេន ហ្ស៊ី បានព្យាយាមរក្សាទំនាក់ទំនងជិតស្និទ្ធជាមួយគ្រួសារ លោក ហ៊ុន សែន ដែលជាមេបក្សកាន់អំណាចនៅកម្ពុជា រហូតលោកត្រូវបានអតីតមេដឹកនាំកម្ពុជា លោក ហ៊ុន សែន តម្លើងឋានៈជាទីប្រឹក្សាជាន់ខ្ពស់របស់លោក ដែលមានឋានៈជារដ្ឋមន្ត្រី និងបន្ទាប់មក ជាទីប្រឹក្សារបស់កូនប្រុសលោកដែលបានស្នងតំណែង គឺលោក ហ៊ុន ម៉ាណែត និងមន្ត្រីចាស់វស្សាមួយចំនួនទៀត៕
