រដ្ឋាភិបាលថៃ បាននិយាយនៅថ្ងៃអង្គារនេះថា ខ្លួននឹងប្រាប់ទៅសហរដ្ឋអាមេរិក ពីបំណងផ្អាកអនុវត្តកិច្ចព្រមព្រៀងបទឈប់បាញ់ ជាមួយកម្ពុជា និងមិនបញ្ជូនទាហានខ្មែរ១៨នាក់នោះទេ ក្រោយពីថៃបានចុះហត្ថលេខាកាលពីខែមុន នៅចំពោះមុខប្រធានាធិបតីអាមេរិក លោក ដូណាល់ ត្រាំ និងប្រធានអាស៊ានប្តូរវេនរួចមក។
ទីភ្នាក់ងារសារព័ត៌មានរ៉យទ័រ បានរាយការណ៍នៅថ្ងៃទី១១ ខែវិច្ឆិកា ឆ្នាំ២០២៥នេះថា រដ្ឋមន្រ្តីការពារជាតិថៃលោក ណាតថាផុន ណាក់ផានីត(Natthaphon Narkphanit) បានប្រាប់អ្នកសារព័ត៌មានថា ទីក្រុងបាងកកក៏នឹងផ្អាកបញ្ជូនអ្នកទោសសង្រ្គាមកម្ពុជាចំនួន ១៨នាក់ ដែលបច្ចុប្បន្នកំពុងឃុំឃាំងដោយយោធាថៃផងដែរ។ លោកបានបដិសេធមិនឆ្លើយសំណួរមួយថា តើទាហាននឹងត្រូវដាក់ពង្រាយឡើងវិញដែរឬទេ។
យោធាថៃ បានចោទប្រកាន់ប្រទេសកម្ពុជា ពីបទដាក់មីនថ្មីៗ បន្ទាប់ពីប្រទេសទាំងពីរបានព្រមព្រៀងលើជំហានបទឈប់បាញ់ ដែលរួមបញ្ចូលទាំងការដកទ័ព និងអាវុធធន់ធ្ងន់ ព្រមទាំងការដោះលែងអ្នកជាប់ឃុំរបស់ទីក្រុងបាងកក។
នៅក្នុងសេចក្តីថ្លែងការណ៍មួយនៅថ្ងៃអង្គារ ក្រសួងការពារជាតិរបស់ប្រទេសកម្ពុជា បានបដិសេធថា មិនបានដាក់មីនថ្មី និងបានជំរុញឱ្យភាគីថៃជៀសវាងការល្បាតនៅក្នុងតំបន់មីនចាស់។ ក្រសួងការពារជាតិ បានបន្ថែមថា ប្តេជ្ញាធ្វើការជាមួយទីក្រុងបាងកកស្របតាមកិច្ចព្រមព្រៀងខែតុលា។
បទឈប់បាញ់ដែលត្រូវបានពង្រឹងចុះហត្ថាលេខា អំឡុងកិច្ចប្រជុំកំពូលអាស៊ាន នៅប្រទេសម៉ាឡេស៊ី មានបំណងបន្តលើកិច្ចព្រមព្រៀងបទឈប់បាញ់ ដែលបានសម្របសម្រួលកាលពីខែកក្កដា ដោយលោក ត្រាំ(Trump) បានអំពាវនាវដល់មេដឹកនាំប្រទេសទាំង២ ជំរុញឱ្យពួកគេបញ្ចប់អរិភាព ឬប្រឈមមុខនឹងការផ្អាកកិច្ចចរចាពាណិជ្ជកម្មរៀងៗខ្លួនជាមួយទីក្រុងវ៉ាស៊ីនតោន។
រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ(Sihasak Phuangketkeow) បាននិយាយថា ការសម្រេចចិត្តរបស់ប្រទេស លោកនឹងពន្យល់ទៅកាន់សហរដ្ឋអាមេរិក និងប្រទេសម៉ាឡេស៊ី ជាប្រធាននៃប្លុកអាស៊ានដែលបានសម្របសម្រួលដល់ដំណើរការបទឈប់បាញ់៕
