អតិថិជនខ្លះ ដែលបានខ្ចីលុយពីធនាគារព្រីនស៍ បានត្អូញត្អែរពីវិបត្តិគ្រួសារ ដោយសំអាងថា ធនាគារនេះ បានកាត់ការប្រាក់ទៅជាដើមក្នុងករណីខ្វះលទ្ធភាពបង់ និងបង្កើនប្រាក់ពិន័យដល់ទៅ ២៤ភាគរយ បើពួកគេបង់យឺតយ៉ាវ ដែលធ្វើឱ្យកើនបំណុលទ្វេដង។
ការណ៍នេះ អ្នកឃ្លាំមើលចាត់ទុកថា ជាសកម្មភាពផ្ទុយពីច្បាប់ ដែលរដ្ឋាភិបាលត្រូវអន្តរាគមន៍បន្ទាន់ ដើម្បីទប់ស្កាត់ចលាចលសង្គម ដែលកើតចេញពីអតិថិជនរងគ្រោះកាន់តែច្រើនអស់ការអត់ធ្មត់ ។
ការទម្លាយពីការបង្កើនប្រាក់ពិន័យនេះ ចំពេលម្ចាស់ធនាគារនេះគឺ ឧកញ៉ា ចេន ហ្ស៊ី ត្រូវអាមេរិក និងចក្រភពអង់គ្លេស រួមទាំងប្រទេសមួយចំនួនទៀត បង្កកទ្រព្យសម្បត្តិ និងតាមចាប់ខ្លួន ពាក់ព័ន្ធការឆបោកតាមអនឡាញ និងលាងលុយកខ្វក់ លំដាប់អន្តរជាតិ។
ស្រ្តីម្នាក់បានទម្លាយប្រាប់ VOD ថា ខ្លួនធ្លាប់ជាបុគ្គលិករបស់ធនាគារព្រីនស៍ ហើយបានខ្ចីលុយទិញផ្ទះ ដោយធនាគារគិតការប្រាក់ ៥.៥ភាគរយក្នុងមួយឆ្នាំ តែក្រោយលាឈប់ពីការងារ ធនាគារបានគិតការប្រាក់ដូចអតិថិជនទូទៅវិញ។
ប្រភពបន្តថា ក្នុងពេលថ្មីៗនេះដោយសារជួបវិបត្តិសេដ្ឋកិច្ចក្នុងគ្រួសារ ទើបបង់សងទៅធនាគារយឺតយ៉ាវ ធ្វើឱ្យធនាគារបានពិន័យចំនួនលុយដែលបង់យឺត រួមជាមួយការប្រាក់ពី ៨ភាគរយទៅ៩ភាគរយ រួមទាំងត្រូវបូកបញ្ចូលជាមួយប្រាក់ដើមថែមទៀត។
ជាងនេះទៀត ស្រ្តីរូបនេះថា ចំពេលស្ថាបនិកធនាគារព្រីនស៍ គឺឧកញ៉ា ចេន ហ្ស៊ី ផ្ទុះរឿងរកស៊ីបទឧក្រិដ្ឋឆបោក ភាគីធនាគារក៏បានបង្កើនអត្រាការប្រាក់ដល់១៨ភាគរយក្នុងមួយឆ្នាំតែម្តង បើអតិថិជននៅតែបង់សងយឺតចាប់ពី១ខែឡើងទៅ។
ប្រភពថា៖ «ផ្ទុះរឿង ចេន ហ្ស៊ី ហ្នឹងគឺធនាគារគេអូតូអនុម័តតែម្ដង គឺបានន័យថា រាល់អតិថិជនដែលមានកម្ចីលុយទិញផ្ទះបង់យឺតមួយខែ ចូលដល់ខែទីពីរ នៅតែអត់ទាន់មានលុយបង់ គឺធនាគារព្រីនស៍ គេនិងអូតូការប្រាក់ពី៨ឬ៩ភាគរយហ្នឹង ទៅ ១៨ភាគរយក្នុងមួយឆ្នាំតែម្ដងហើយមានអត្រាផាកពិន័យលើ១៨ភាគរយទៀត បើសិនជាគេត្រូវឡើងទៅ១៨ភាគរយហើយយើងនៅតែបង់យឺត គឺគេមាន២៤ភាគរយទៀត។ ពេលគេដំឡើងការប្រាក់យើងពីធម្មតាទៅដប់១៨ភាគរយហ្នឹងហើយ គឺមាន២៤ភាគរយ ផាកពិន័យពីលើទៀត ដែលយើងអត់ទាន់មានលុយបង់»។
បើតាមអតិថិជនរូបនេះ ខ្លួនធ្លាប់តវ៉ាជាមួយធនាគារដែរ តែមិនទទួលបានផលទេ ដោយធនាគារថា អត្រាការប្រាក់១៨ភាពរយក្នុងមួយឆ្នាំនេះ មិនខុសច្បាប់ទេ កុំឱ្យតែលើសពីនេះ។
អ្នកស្រីថា៖ «ពេលដែលយើងតវ៉ាចរចាថា១៨ភាគរយហ្នឹង វាលើសហើយ! គេថាធនាគារជាតិអត់ថាអីផង ឲ្យតែនៅចន្លោះក្រោម១៨ភាគរយហ្នឹង។ ធនាគារចង់ធ្វើអីធ្វើទៅ គេនិយាយអ៊ីចឹងហើយដល់ពេលអ៊ីចឹង យើងជាប្រជាជនអត់ដឹងរត់ទៅណាទេបង។ គិតមើលយើងពេលដែលគេទៅឡើងទៅដប់១៨ភាគរយ ហើយយើងលក់នេះលក់នោះយកទៅបង់។ បង់ពី៦០០ទៅ១២០០ ដើមយើងបានថាប៉ុន្មានរៀលទេ ពេលដែលយើងចង់ឲ្យមានអន្តរាគមន៍ជួយ គឺយើងអត់ដឹងទៅរកអ្នកណា! ពឹងអ្នកណា ផ្លូវច្បាប់អីក៏យើងមិនដឹងថាទៅពឹងអ្នកណាទេ នៅស្រុកខ្មែរហ្នឹង បងអើយខ្ញុំធ្លាប់បានរត់ទៅរកអ្នកសារព័ត៌មានអីដែរ ប៉ុន្តែមិនមានណាគេហ៊ានជួយផ្សាយឲ្យយើងទេ អត់មានអ្នកណាគេជួយនិយាយឱ្យយើងទេ» ។
ជុំវិញរឿងនេះ VOD មិនអាចទាក់ទងធនាគារព្រីនស៍ និងប្រធានធនាគារជាតិកម្ពុជា អ្នកស្រី ជា សិរី ដើម្បីសុំការឆ្លើយតបបានទេគិតត្រឹមម៉ោងផ្សាយនេះ។
សម្រាប់ តំណាងរាស្រ្តគណបក្សសង្រ្គោះជាតិ លោក ម៉ែន សុថារិន្រ្ទ ចាត់ទុកការពិន័យការប្រាក់ខ្ពស់លើអតិថិជនបែបនេះ ជាទង្វើខុសច្បាប់ដែលរដ្ឋាភិបាលត្រូវមានវិធានការទប់ស្កាត់បន្ទាន់ ដើម្បីបញ្ចៀសចលាចលសង្គម។
លោកថា៖ «នេះគឺកេងប្រវ័ញ្ចពីប្រជាពលរដ្ឋទាំងស្រុងហើយ ហើយកិច្ចសន្យានេះជាមួយគ្នាហើយក្នុងប៉ុន្មានឆ្នាំៗ គេមិនអាចផ្លាស់ប្តូរការប្រាក់តាមស្រេចតែចិត្តអ៊ីចឹងទេ។ ៤ទៅ១០ឆ្នាំ គឺ ការប្រាក់ នៅតែដដែល។ ខ្ញុំជឿជាក់ហ៊ានតែធ្វើអ៊ីចឹង គឺប្រជាពលរដ្ឋមិនអាចទ្រាំបានទេ ព្រោះថា ប្រទេសកម្ពុជាយើងអត់មានច្បាប់! អត់មានអីទាំងអស់។ អ៊ីចឹងមានន័យថា ថ្នាក់ដឹកនាំជាពិសេស លោក ហ៊ុន ម៉ាណែត ដែលជានាយករដ្ឋមន្រ្តីហ្នឹង មិនអាចក្តោបក្តាប់អ្នកវិនិយោគ ពួកអ្នកនាយទុនធ្វើអីបានស្រេចតែចិត្ត នាំឱ្យផ្ទុះហើយ មិនយូរទេរឿងហ្នឹង កាន់តែផ្ទុះទៅខ្លាំងមែនទែនហើយ»។
សម្រាប់ នាយកទទួលបន្ទុកកិច្ចការទូទៅនៃអង្គកាសិទ្ធិមនុស្សលីកាដូ លោក អំ សំអាត និយាយថា បច្ចុប្បន្នរដ្ឋាភិបាលបានមានយន្តការជួយសម្រួលពលរដ្ឋសងត្រលប់ទៅធនាគារបើមានបញ្ហាសេដ្ឋកិច្ចក្នុងគ្រួសារ។
លោកបន្ថែមថា បើមានករណីបង្កើនការប្រាក់ដូចធនាគាព្រីសន៍មែន គឺផ្ទុយពីគោលការណ៍រដ្ឋាភិបាលហើយ អតិថិជនអាចរកការអន្តរាគមន៍ពីធនាគារជាតិ ដើម្បីរកដំណោះស្រាយបន្ទាន់ផងដែរ។
លោកថា៖ «តាមផ្លូវច្បាប់ ទោះបីថាមិនឲ្យលើសពី១៨ភាគរយក្នុងមួយឆ្នាំ ក៏មិនអាចថាដំឡើងការប្រាក់តាមអំពើចិត្តបានដែរ ពីព្រោះអានេះ វាទាក់ទងនឹងភាពទំនុកចិត្តរវាងធនាគារជាមួយនឹងអតិថិជន។ កាលណាប្រសិនជាធ្វើសកម្មភាពអ៊ីចឹងមែន វាប៉ះពាល់សម្រាប់អតិថិជនច្រើនទៀត អ៊ីចឹងករណីនេះ ខ្ញុំមិនច្បាស់ទេ ប៉ុន្តែបើសិនជាធ្វើអ៊ីចឹង វាធ្វើឲ្យបាត់បង់ទំនុកចិត្តពីអតិថិជន។ ហើយថ្មីៗយើងដឹងហើយថា ធនាគារមួយនេះក៏កំពុងតែមានបញ្ហាទាក់ទងនឹងអ្នកដឹកនាំដែលមានការផ្ទុះរឿងពីបរទេសអីជាដើម អ៊ីចឹងទៅបើសិនជារឿងហ្នឹង គឺវាអាចប៉ះពាល់»។
យ៉ាងណា នៅពីថ្ងៃទី១១ ខែវិច្ឆិកា ឆ្នាំ២០២៥នេះ ក្រុមហ៊ុនព្រីសន៍គ្រុប បានចេញសេចក្តីថ្លែងការណ៍ច្រានចោលការចោទថា ឧកញ៉ា ចេន ហ្ស៉ី បានចូលរួមក្នុងសកម្មភាពខុសច្បាប់ក្នុងឧក្រិដ្ឋកម្មឆបោក។
ប្រភពនោះថា ការចោទប្រកាន់នេះគឺគ្មានមូលដ្ឋានច្បាស់លាស់ និងមានគោលបំណងរកលេស ដើម្បីរឹបអូសទ្រព្យសម្បត្តិដែលមានតម្លៃរាប់ពាន់លានដុល្លារ។
ក្រុមហ៊ុនព្រីសន៍គ្រុបថា អស់រយៈពេលជាងមួយទស្សវត្សរ៍ហើយ ដែលក្រុមហ៊ុនបានធ្វើប្រតិបត្តិការប្រកបដោយតម្លាភាព និងអនុលោមតាមច្បាប់ជាធរមាន។
ក្រសួងយុត្តិធម៌អាមេរិក នៅថ្ងៃទី១៤ ខែតុលា ប្រកាសថា អាមេរិកបានបង្កកទ្រព្យសម្បត្តិ ១៥ពាន់លានដុល្លាររបស់ឧកញ៉ា ចេន ហ្ស៊ី ព្រមទាំងចេញដីកាចោទប្រកាន់ជុំវិញការបើកមជ្ឈមណ្ឌលឆបោកតាមអនឡាញ លាងលុយកខ្វក់ និងបង្ខាំងមនុស្សខុសច្បាប់។
បើតាមក្រសួងយុត្តិធម៌អាមេរិក រដ្ឋអាជ្ញាតុលាការសហព័ន្ធសហរដ្ឋអាមេរិកក្រុងញ៉ូវយ៉ក បានចោទប្រកាន់ លោក ចេន ហ្ស៊ី ជុំវិញបទឧក្រិដ្ឋឆបោក និងលាងលុយ ដែលអាចប្រឈមជាប់ពន្ធនាគារ៤០ឆ្នាំ។
ការិយាល័យស៊ើបអង្កេតសហព័ន្ធអាមេរិក (FBI) បញ្ជាក់ថា លោក ចេន ហ្ស៊ី (Chen Zhi) បានធ្វើឱ្យក្រុមហ៊ុន Prince Group ក្លាយជាអង្គការឧក្រិដ្ឋកម្មឆ្លងដែនដ៏ធំបំផុតមួយនៅអាស៊ី ដែលកំពុងប្រតិបត្តិការនៅក្នុងប្រទេសចំនួន៣០នៅលើពិភពលោក៕
