ក្រោយប្រកាសដកខ្លួនពីបទឈប់បាញ់ ថៃបានចាត់វិធានផ្អាកផ្ដល់សិទ្ធិស្នាក់នៅដល់ពលករខ្មែរ ដែលកំពុងធ្វើការនៅប្រទេសរបស់ខ្លួន ការណ៍នេះជំរុញឱ្យមានការបារម្ភពីអនាគតមិនច្បាស់លាស់របស់ពលករខ្មែរ បើរដ្ឋាភិបាលមិនពង្រីកឱកាសការងារ ដើម្បីឆ្លើយតបទៅនឹងតម្រូវការចាំបាច់ពួកគេបាន។
សារព័ត៌មានថៃ The Nation Thailand បានស្រង់សំដីអ្នកស្រី ត្រៃស៊ុលី ត្រៃសរណៈគូន អគ្គលេខាធិការនៃនាយករដ្ឋមន្ត្រី មកចុះផ្សាយកាលថ្ងៃទី១០ ខែវិច្ឆិកា ឆ្នាំ២០២៥ ។
អ្នកស្រី ត្រៃស៊ុលី ត្រៃសរណៈគូន (Traisulee Traisoranakul) អគ្គលេខាធិការនៃនាយករដ្ឋមន្ត្រី បាននិយាយថា នាយករដ្ឋមន្ត្រី លោក អានុធីន ឆានវីរៈគូន (Anutin Charnvirakul) បានសម្រេចផ្អាកការចុះហត្ថលេខាលើសេចក្តីព្រាងសេចក្តីប្រកាសរបស់ក្រសួងមហាផ្ទៃ ដែលអនុញ្ញាតឱ្យពលរដ្ឋខ្មែរដែលមានលិខិតអនុញ្ញាតការងារផុតកំណត់ស្នាក់នៅក្នុងប្រទេសថៃជាបណ្តោះអាសន្ន។
អ្នកស្រី ត្រៃស៊ុលី បន្តថា អាជ្ញាធរថៃបានរកឃើញថា ពលករខ្មែរជិត ១០ម៉ឺននាក់ លិខិតអនុញ្ញាតធ្វើការរបស់ពួកគេ បានផុតកំណត់នៅក្នុងខែកុម្ភៈ ឆ្នាំ២០២៥ ដោយមិនអាចកំណត់អត្តសញ្ញាណ ឬកំណត់ទីតាំងបានត្រឹមត្រូវទេ។
លោកស្រីថា ការផ្តល់ការបន្តសុពលភាពដោយស្វ័យប្រវត្តិ ដោយគ្មានការផ្ទៀងផ្ទាត់អាចបង្កហានិភ័យដល់សន្តិសុខជាតិ និងបង្កើនករណីចូលប្រទេសខុសច្បាប់ និងឧក្រិដ្ឋកម្មឆ្លងដែន។
បន្ថែមពីនេះ លោក អានុធីន ក៏បានបញ្ជាឱ្យមានការត្រួតពិនិត្យពេញលេញ ដើម្បីធានាបាននូវការអនុលោមតាមច្បាប់យ៉ាងតឹងរឹង និងការផ្ទៀងផ្ទាត់ពេញលេញនៃកំណត់ត្រាទាំងអស់មុនពេលអនុម័ត។
វិធានសម្រេចចិត្តរបស់រដ្ឋាភិបាលថៃនេះ បានធ្វើឡើងបន្ទាប់ពីទាហានថៃពីរនាក់ទៀត បានរងរបួសដោយដើរជាន់មីននៅតំបន់ភ្នំទ្រព្យ ដែលថៃចោទថាជាមីនទើបនឹងដាក់ថ្មីពីភាគីកម្ពុជា រំលោភលើកិច្ចព្រមព្រៀងបទឈប់បាញ់កម្ពុជា ថៃ។
យ៉ាងណា កម្ពុជា តាមរយៈក្រសួងការបរទេស កាលពីថ្ងៃទី១០ខែវិច្ឆិកា បានប្រកាសច្រានចោលដោយថា ការចោទប្រកាន់របស់ថៃ និងបង្ហាញការព្រួយបារម្ភពីការដែលថៃប្រកាសដកខ្លួនពីកិច្ចព្រមព្រៀងនេះ។
VOD មិនទាន់អាចសុំការឆ្លើយតបពី អ្នកនាំពាក្យក្រសួងការងារ លោក ស៊ុន មេសា ដើម្បីចង់ដឹងពីជម្រើសទទួលខុសត្រូវ លើជោគវាសនាពលករខ្មែរ ជុំវិញវិធានរដ្ឋាភិបាលថៃនាពេលនេះបានទេ គិតត្រឹមម៉ោងផ្សាយនេះ។
យ៉ាងណាកន្លងទៅ លោក ហេង សួរ រដ្ឋមន្ត្រីក្រសួងការងារ កាលពីថ្ងៃទី៣១ ខែសីហា ឆ្នាំ២០២៥ បាននិយាយថា មានពលរដ្ឋខ្មែរ ៩២ម៉ឺននាក់ បានវិលត្រឡប់ពីប្រទេសថៃ ចូលមកកម្ពុជាវិញ ក្នុងនោះមានពលករប្រហែល៧០ម៉ឺននាក់ ប្រឈមនឹងភាពអត់ការងារធ្វើ ។
សម្រាប់ សហស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន មានប្រសាសន៍ថា ប្រសិនបើរដ្ឋាភិបាលថៃ ចាត់វិធានបែបនេះមែន អាចនឹងធ្វើឱ្យប៉ះពាល់ដល់ប្រយោជន៍ប្រទេសទាំងសងខាង។ ហើយថា មិនចំណេញដល់ប្រទេសទាំងពីរឡើយ តែផ្ទុយទៅវិញ ធ្វើឱ្យពលរដ្ឋនៃប្រទេសទាំងពីរប្រឈមវិបត្តិការងារ ជីវភាព រួមទាំងវិនិយោគផងដែរ។
លោកថា៖ «កាលណាពលករមិនមានការងារធ្វើ វាប៉ះពាល់ដល់បញ្ហាជីវភាព ប៉ះពាល់ដល់កូនចៅក្រុមគ្រួសាររបស់គាត់ ការទទួលបានការអប់រំអីក្ដីហ្នឹង វាច្បាស់ជាប៉ះពាល់ហើយ ចំពោះរឿងមួយរឿងពន្ធនៃបដិការដែលចរចាជាមួយអាមេរិក ទោះបីជាបានជោគជ័យមួយជំហានធំក៏ដោយ ក៏នៅតែប៉ះពាល់ដល់ការងាររបស់ពលករក្នុងស្រុកប្រហែលជាង១០ម៉ឺននាក់ប៉ុណ្ណោះ ដូច្នេះវាធ្វើឲ្យប៉ះពាល់ហើយ បើបន្ថែមចំនួនកាន់តែច្រើនអត់ការងារកាន់តែច្រើន វាធ្វើឲ្យសេដ្ឋកិច្ចក្ដីអីក្ដី កម្ពុជាហ្នឹងវារងផលប៉ះពាល់ ហើយម្យ៉ាងជីវភាពរបស់មនុស្ស បើសិនជាមនុស្ស២០ ទៅ៣០ម៉ឺននាក់អត់ការងារធ្វើ វាធ្វើឲ្យកម្រិតឬក៏ចំនួនភាគរយនៃភាពក្រីក្រហ្នឹងវានឹងកើនឡើង»។
យ៉ាងណាក្ដី លោកច័ន្ទរ័ត្ន លើកឡើងថា ក្នុងកាលៈទេសៈនេះ កម្ពុជាចាំបាច់ណាស់ត្រូវតែបង្ហាញភាពខ្លាំងរបស់ខ្លួន ដោយរដ្ឋាភិបាល រួមទាំងក្រសួងពាក់ព័ន្ធ គួរមានវិធានបង្កើតឱកាសការងារក្នុងស្រុកឱ្យបានច្រើន បង្កើនទីផ្សារនាំចេញទៅក្រៅប្រទេស ដើម្បីអាចផ្ដល់ឱកាសការងារជូនដល់ពលរដ្ឋ។
ករណីនេះ មន្ត្រីគម្រោងផ្នែកការពារសិទ្ធិពលករចំណាកស្រុកប្រចាំប្រទេសថៃនៃអង្គការសង់ត្រាល់ លោកលឹង សុផុន ថ្លែងប្រាប់VOD នៅថ្ងៃទី១២ ខែវិច្ឆិកានេះថា ស្ថានភាពបច្ចុប្បន្នរបស់ពលករខ្មែរដែលកំពុងរស់នៅនិងធ្វើការនៅថៃ គឺបន្តធ្វើការធម្មតា ដោយមិនទាន់ឃើញមានសកម្មភាពនៃការគំរាមកំហែង ឬវិធានជញ្ជូនត្រលប់ទៅកាន់ប្រទេសវិញឡើយ ។
លោក សុផុន បន្តថា ស្របពេលពលករបង្ហាញពីក្ដីបារម្ភជុំវិញការអាចបាត់បង់សិទ្ធិធ្វើការ អាជ្ញាធរថៃកំពុងយកចិត្តទុកដាក់ពិនិត្យទៅលើលិខិតការងារស្របច្បាប់ ដែលពលករបានដាក់ស្នើទាំង១០ម៉ឺននាក់នេះផងដែរ ។
លោកថា៖ «ពលរដ្ឋខ្មែរយើងនៅក្នុងប្រទេសថៃ មានការព្រួយបារម្ភ និងមានការកង្វល់ទាក់ទងទៅនឹងការស្នើសុំបន្តសុពលភាពប័ណ្ណការងារនៅក្នុងប្រទេសថៃហ្នឹង ហើយ១៣ខែកុម្ភៈកន្លងមក២០២៥ហ្នឹង គឺពលករកម្ពុជាយើងហ្នឹងចំនួន១០ម៉ឺននាក់ កន្លងមកហ្នឹង មានការស្នើសុំធ្វើថ្មីៗនឹងរដ្ឋាភិបាលថៃ បានបង្ហាញក្តីកង្វល់ដល់ប្រជាពលរដ្ឋខ្មែរ ដែលកំពុងតែរស់នៅប្រទេសថៃ តែដោយឡែកប្រជាពលរដ្ឋខ្មែរដែលកំពុងតែស្នាក់នៅធ្វើការនៅក្នុងប្រទេសថៃកន្លងមកហ្នឹង ឃើញច្រើនដោយខាងក្រសួងការងារថៃបានបញ្ជាក់ថា ថ្មីៗនេះថាមានចំនួនរហូតទៅដល់៤៩ម៉ឺននាក់ ដែលកំពុងស្នាក់នៅធ្វើការ ប៉ុន្តែចំនួន១០ម៉ឺននាក់ហ្នឹង ដូចការស្នើសុំបន្តសុពលភាពប័ណ្ណការងារនៅក្នុងប្រទេសថៃ»។
ចំណែក អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ យល់ថា សកម្មភាពនេះកំពុងបង្ហាញថាថៃមិនបានគោរពទៅតាមគោលការណ៍អង្គការពលកម្មអន្តរជាតិរំលោភទៅលើក្របខណ្ឌនៃការគាំពារពលករចំណាកស្រុក ក្នុងកម្រិតអាស៊ាននិងកិច្ចព្រមព្រៀង ឬអនុសារណៈក្នុងការបញ្ជូនពលករជាដើម ព្រោះថៃធ្វើការសម្រេចចិត្តជាលក្ខណៈឯកតោភាគី។
លោក ថារ៉ូ បន្តថា ជុំវិញបញ្ហានេះ នឹងជះផលអវិជ្ជមានទៅដល់ពលករ លើវិបត្តិការងារ និងប្រាក់ចំណូល ហើយចង់មិនចង់ពួកគាត់ត្រូវតែធ្វើការសម្រេចចិត្តទាំងបង្ខំ ដែលអាចប្រឈមមុខទៅនឹងភាពមិនស្របច្បាប់ ដូច្នេះរដ្ឋាភិបាលកម្ពុជាគួរកែទម្រង់ទៅគោលនយោបាយ ដើម្បីឆ្លើយតបនឹងបញ្ហាដែលពលករកំពុងប្រឈមរួមទាំងកិច្ចគាំពារសុខមាលភាពការងារ ជាពិសេសត្រូវលុបបំបាត់អ្នកកេងប្រវ័ញ្ញឆបោកពលករទៅធ្វើការនៅក្រៅប្រទេសជាដើម។
លោកថា៖ «បញ្ហានេះ ជាឧបសគ្គរារាំង ហើយទាមទារឲ្យមានកំណែទម្រង់គោលនយោបាយ ដើម្បីឆ្លើយតបទៅនឹងស្ថានភាពវិបត្តិដែលកើតចេញមកពីជម្លោះព្រំដែន ដែលប៉ះពាល់ទៅដល់ស្ថានភាពសុខុមាលភាពការងារប្រាក់ចំណូលរបស់ពលករខ្មែរ អ៊ីចឹងប្រសិនបើមិនវាងនូវគោលនយោបាយឆ្លើយតបណាមួយ ដើម្បីផ្ដល់នូវកិច្ចអន្តរាគមន៍ដោយមានប្រសិទ្ធភាព នៅក្នុងការធានាឲ្យពួកគាត់អាចមានឱកាស ក្នុងការស្វែងរកការងារ ឬក៏គោលនយោបាយគាំពារសង្គមណាមួយនោះ ដែលពាក់ព័ន្ធទៅនឹងសំណាញ់សុវត្ថិភាព នៅក្នុងអំឡុងពេលដែលគាត់អត់មានការងារធ្វើ និងដើម្បីដោះស្រាយទៅនឹងស្ថានភាពសេចក្ដីត្រូវការចាំបាច់ណាស់ អាហ្នឹងវាទាមទារឲ្យមាននូវការឆ្លើយតបជាបន្ទាន់»។
បើតាមលោក ថារ៉ូ ផ្អែកលើការសិក្សារបស់សង់ត្រាល់កន្លងមកឃើញថា ប្រព័ន្ធគាំពារសេចក្ដីត្រូវការជាមូលដ្ឋានរួមទាំងកង្វះទីផ្សារការងារ ជាភាពចាំបាច់ណាស់ សម្រាប់កម្ពុជាក្នុងវិស័យការងារ ដែលទាមទារឱ្យរដ្ឋាភិបាលបង្ហាញឆន្ទៈពិតប្រាកដ បង្កើននូវឱកាសទីផ្សារការងារ និងសម្រួលដល់ការសងបំណុលជូនពលករដែលប្រឈមក្នុងអំឡុងពេលមានជម្លោះកម្ពុជា-ថៃ ។
លោកថា៖ «ទោះជួបឧបសគ្គនឹងស្ថានភាពនៃទីផ្សារការងារ ប្រសិនបើរាជរដ្ឋាភិបាលមានឆន្ទៈនៅក្នុងការកំណែទម្រង់ ក្នុងការវិនិយោគទៅលើមុំបី ទី១ផ្តល់ការគាំពារនៅក្នុងអន្តរកាលមួយសម្រាប់ពួកគាត់ ខ្ញុំគិតថា វានឹងអាចជួយដោះបន្ទុករបស់ពួកគាត់ ទី២ពិនិត្យពិចារណាទៅនឹងក្របខ័ណ្ឌគោលនយោបាយជាពាក់ព័ន្ធទៅនឹងបញ្ហាបំណុល ការព្យួរនូវការបង់សងបំណុល ប្រាក់ខែប្រាក់ការដើមជាដើមហ្នឹង វាអាចជួយសម្រាលបន្ទុក ខណៈពេលដែលអត់មានការងារធ្វើ ទី៣គឺការវិនិយោគទៅលើហេដ្ឋារចនាសម្ព័ន្ធធនធានមនុស្ស ហើយវគ្គបណ្ដុះបណ្ដាលដែលកន្លងទៅ ក្រសួងបានលើកឡើងក្នុងការផ្ដល់វគ្គបណ្ដុះបណ្ដាលជំនាញ ខ្ញុំគិតថា នឹងវាជាគោលដៅរយៈពេលវែង ចឹងប្រសិនបើយើងមានគោលនយោបាយឆ្លើយតបទាន់ពេលនៅក្នុងអន្តរកាលរយៈពេលខ្លីពេក វានឹងអាចជួយសម្រាលបន្ទុក ហើយយើងត្រូវគិតអំពីការកំណែទម្រង់ទៅលើហេដ្ឋារចនាសម្ព័ន្ធ ការវិនិយោគទៅលើប្រព័ន្ធកិច្ចគាំពារសង្គម ឲ្យបានទូលំទូលាយគ្របដណ្តប់ទៅដល់ក្រុមគ្រួសារពលករដែលគាត់មានជីវភាពក្រីក្រ»។
យោងតាមរបាយការណ៍របស់វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) កាលពីថ្ងៃទី២៧ខែសីហា បច្ចុប្បន្នមានពលករខ្មែរទើបវិលត្រឡប់មកពីថៃប្រមាណតែ១៩ម៉ឺននាក់ប៉ុណ្ណោះ ក្នុងចំណោម៩២ម៉ឺននាក់ដែលទទួលបានការងារធ្វើ៕
