អាជ្ញាធរមីនកម្ពុជា បន្ទរតាមពីក្រោយក្រសួងការបរទេស បានចេញមុខបដិសេធទៅការចោទប្រកាន់របស់ថៃដែលថាទាហានខ្លួនពីរនាក់ថ្មីទៀត ដែលបានជាន់មីនរងរបួសនៅតំបន់ភ្នំទ្រព្យ ដោយសារតែកម្ពុជាបានដាក់មីនថ្មី បំពានលើសេចក្តីថ្លែងការណ៍រួម ស្តីពីសន្តិភាពកម្ពុជា-ថៃ ជុំវិញបទឈប់បាញ់។
ការណ៍នេះ អ្នកឃ្លាំមើលថា ជាល្បិចរបស់ថៃ ដើម្បីសម្រេចមហិច្ឆតាលេបទឹកដីខ្មែរ តាមបន្ទាត់ព្រំដែន តាមផែនទីដែលថៃគូរវាសដោយឯកតោភាគី ដែលមេដឹកនាំកម្ពុជាត្រូវប្រុងប្រយ័ត្ន។
តាមរយៈលិខិតចុះថ្ងៃទី១១ ខែវិច្ឆិកា ឆ្នាំ២០២៥ អាជ្ញាធរមីន បាននិយាយថា ខ្លួនសម្តែងការសោកស្តាយចំពោះសារព័ត៌មានថៃមួយចំនួន ដែលបានផ្សព្វផ្សាយក្នុងចេតនាចោទប្រកាន់ និងបង្អួចកេរ្តិ៍ឈ្មោះកម្ពុជា ថា បានប្រើប្រាស់ និងដាក់មីនថ្មី។
អាជ្ញាធរមីន ចាត់ទុកថា ចេតនាចោទប្រកាន់ណាមួយគ្មានការពិត ឬការប្រើប្រាស់មីនដើម្បីបម្រើដល់នយោបាយ អាចនឹងបំផ្លាញដល់ទំនុកចិត្តរវាងគ្នានិងគ្នា ធ្វើឱ្យអាប់ឱនដល់កិត្តិយសរបស់រដ្ឋភាគី និងស្មារតីនៃអនុសញ្ញាអូតាវ៉ា។ ហើយថា កម្ពុជាដែលបានគាំទ្រយ៉ាងមុតមាំ និងជារដ្ឋភាគីអនុសញ្ញាអូតាវ៉ា កម្ពុជា មិនបានប្រើប្រាស់ ហើយនឹងមិនប្រើប្រាស់មីនថ្មីឡើយ។
កាលពីថ្ងៃទី១០ខែវិច្ឆិកានេះ ក្រសួងការបរទេសកម្ពុជា ក៏បានបញ្ចេញប្រតិកម្មឆ្លើយតបទៅនឹងការចោទប្រកាន់របស់ថៃនេះដែរ ដោយកម្ពុជាថា ការចោទប្រកាន់របស់ថៃ ជាការព្រួយបារម្ភ ខណៈថៃប្រកាសដកខ្លួនឈប់អនុវត្តបទឈប់បាញ់ និងប្តូរជំហរ មិនព្រមប្រគល់ទាហានខ្មែរ ១៨នាក់ ឱ្យកម្ពុជាវិញ តាមស្មារតីសេចក្តីថ្លែងការណ៍រួម ដែលបានធ្វើឡើងនៅកិច្ចប្រជុំកំពូលអាស៊ាននៅទីក្រុងគូឡាឡាំពូរ ប្រទេសម៉ាឡេស៊ី ដែលមានចុះហត្ថលេខាដោយនាយករដ្ឋមន្ត្រីថៃ និងកម្ពុជា និងប្រធានអាស៊ានប្តូរវេន ម៉ាឡេស៊ី លោក អាន់វ៉ា អ៊ីប្រាហ៊ីន រួមទាំងប្រធានាធិបតីលោក ដូណាល់ ត្រាំ។
ជុំវិញបញ្ហានេះ អ្នកច្បាប់ និងជាអ្នកវិភាគឯករាជ្យ លោក វ៉ន ចាន់ឡូត ហៅការដែលថៃប្រកាសទាត់ចោលកិច្ចព្រមព្រៀងសន្ដិភាពគូឡាឡាំពួរនេះ បញ្ជាក់ថា ថៃមិនចង់ឱ្យមាន ភាគីទីបីចូលរួមដោះស្រាយបញ្ហាព្រំដែននេះទេ ដោយក្លាយអន្ដរាយដល់ផែនការឈ្លានពាន។
យ៉ាងណា លោកថា តាក់តិចនេះ ថៃអាចធានាកេងផលចំណេញបានខ្លះៗ តាមរយៈការចល័តកងទ័ព និងពង្រឹងកងកម្លាំងរបស់ខ្លួន ដោយប្រើលេសដោះមីន រួចបន្ដឈរជើងក្នុងតំបន់ទាំងនោះតែម្ដង ដូចភាគីថៃបានធ្វើកន្លងមកនៅផ្នែកខ្លះនៃភូមិជោគជ័យ ភូមិព្រៃចាន់ និងតំបន់ផ្សេងៗមួយចំនួនទៀត ដែលកម្ពុជាចាំបាច់ត្រូវប្រុងប្រយ័ត្ន៕
