កម្មករនិយោជិតជាង ៧០នាក់ រកក្រសួងការងារជួយ ដោយសំអាងថាក្រុមហ៊ុនអេចស៊ីស៊ី គ្រុប (HCC Group Co, Ltd) ដែលសំអាតព្រលានយន្តហោះអន្តរជាតិភ្នំពេញ បញ្ចប់កិច្ចសន្យាការងារពួកគេ ទាំងមិនបានទូទាត់ប្រាក់សំណងឱ្យតាមច្បាប់ ក្រោយទីតាំងនោះបិទដំណើរការ។
ការស្នើនេះ បានធ្វើឡើងអំឡុងពេលបុគ្គលិកក្រុមហ៊ុនអេចស៊ីស៊ី ដែលជាក្រុមហ៊ុនសំអាតព្រលានយន្តហោះអន្តរជាតិភ្នំពេញ ឬព្រលានយន្តហោះពោធិ៍ចិនតុង បានទៅប្រមូលផ្តុំនៅមុខក្រសួងការងារ នៅថ្ងៃទី១២ ខែវិច្ឆិកា ឆ្នាំ២០២៥។
បុគ្គលិកក្រុមហ៊ុនអេចស៊ីស៊ី អ្នកស្រី មិន កញ្ញា បានឱ្យដឹងថា ការដែលពួកគាត់ទៅប្រមូលផ្តុំនៅក្រសួងការងារនេះ គឺចង់ឱ្យក្រសួងជួយសម្របសម្រួលរកដោះស្រាយបញ្ចប់វិវាទការងារ ដោយសារតែខាងក្រុមហ៊ុនបានបញ្ឈប់បុគ្គលិកភ្លាមៗ នៅពេលដែលព្រលានយន្តហោះអន្តរជាតិពោធិ៍ចិនតុង បានបិទដំណើរការ ដោយមិនមានការជូនដំណឹងជាមុន និងទូទាត់អត្ថប្រយោជន៍ទៅតាមច្បាប់។
អ្នកស្រីបន្តថា ពួកគាត់ទាមទារឱ្យក្រុមហ៊ុនដោះស្រាយទូទាត់សំណងបញ្ចប់កិច្ចសន្យាការងារ ទៅតាមច្បាប់ចំនួន ៥ចំណុច ដែលកន្លងមកខាងក្រុមហ៊ុនទូទាត់ឱ្យខ្លះហើយ ប៉ុន្តែប្រាក់ជូនដំណឹងជាមុន និងសំណងជំងឺចិត្ត ខាងក្រុមហ៊ុនមិនបានទូទាត់ឱ្យនោះទេ។
អ្នកស្រីថា៖ «ខ្ញុំចង់ឱ្យខាងរាជរដ្ឋាភិបាល ខាងក្រសួងការងារ គាត់ជួយដោះស្រាយរឿងថា ពួកខ្ញុំអត់សុខចិត្ត រឿងថាការបិទព្រលានយន្តហោះពោធិ៍ចិនតុងនេះ ពួកគាត់អត់មានគិតលុយឱ្យពួកខ្ញុំទេ លុយផ្តល់ដំណឹងមុន៣ខែក៏អត់ លុយសងជំងឺចិត្តក៏អត់ ហើយនិងលុយរបស់ពួកខ្ញុំដែលខំប្រឹងធ្វើការកាលពីឆ្នាំ២០២១ ក៏គាត់អត់គិតឱ្យ និយាយទៅក្រុមហ៊ុនគាត់អត់មានទំនួលខុសត្រូវជាមួយបុគ្គលិក។ ហើយនៅពេលដែលព្រលានយន្តហោះបិទពិប គាត់បញ្ឈប់កូនចៅក៏គាត់អត់មានជូនដំណឹង គាត់អត់មានថាបើបិទព្រលានហ្នឹងហើយ គាត់ត្រូវរកការងារណាដែលឱ្យកូនចៅចូលបានគ្រប់កន្លែងចឹងណា តែនេះទីតាំងនិមួយៗពួកខ្ញុំគ្មានអ្នកណាមានការងារធ្វើទេ ដើរស្វែងរកការងារធ្វើ ដោយសារអី?ខាងក្រុមហ៊ុនគាត់អត់មានផ្តល់ដំណឹងឱ្យយើង ដល់ថ្ងៃដែលត្រូវបិទ បានគាត់ប្រាប់ថាព្រលានយន្តហោះបិទ»។
ព្រលានយន្តហោះអន្តរជាតិភ្នំពេញ ឬព្រលានយន្តហោះពោធិ៍ចិនតុង ស្ថិតនៅក្នុងភូមិសាស្ត្រសង្កាត់ចោមចៅ និងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ត្រូវបានបិទដំណើរការទាំងស្រុង កាលពីថ្ងៃទី០៩ ខែកញ្ញា ឆ្នាំ២០២៥ បន្ទាប់ពីបានដំណើរការអស់រយៈពេលជិត ៧០ឆ្នាំ។
បច្ចុប្បន្នព្រលានយន្តហោះថ្មី ដែលមានឈ្មោះថា អាកាសយានដ្ឋានអន្តរជាតិតេជោ ស្ថិតនៅខេត្តកណ្តាល បាននិងកំពុងបើកដំណើរការ ហើយក្រុមហ៊ុនអេចស៊ីស៊ីគ្រុបនេះ ក៏បានដេញថ្លៃជាប់ ក្នុងការសំអាតព្រលានថ្មីនេះផងដែរ ប៉ុន្តែខាងក្រុមហ៊ុនបានរើសបុគ្គលិកថ្មីចូលធ្វើការ ដោយមិនយកបុគ្គលិកដែលធ្លាប់សំអាតនៅព្រលានយន្តហោះចាស់ ទៅធ្វើការនៅព្រលានថ្មីនោះទេ។ នេះបើតាមការបញ្ជាក់ពីក្រុមកម្មករដែលតវ៉ា។
កម្មករបម្រើការងារនៅក្រុមហ៊ុនអេចស៊ីស៊ី ដែលត្រូវបានបញ្ឈប់ពីការងារម្នាក់ទៀត សុំមិនបញ្ចេញឈ្មោះ បាននិយាយថា ការដែលក្រុមហ៊ុនបញ្ឈប់បុគ្គលិក ដោយមិនទូទាត់ប្រាក់សំណងទៅតាមច្បាប់ការងារនេះ ជារឿងអយុត្តិធម៌ ដែលការណ៍នេះ ពួកគាត់អំពាវនាវដល់ប្រមុខរដ្ឋាភិបាល ក៏ដូចជាក្រសួងការងារ ជួយអន្តរាគមន៍រកដំណោះស្រាយ។
លោកថា៖ «សំណូមពរដល់ថ្នាក់ដឹកនាំសម្តេច សម្តេចមហាបវធិបតី សូមជួយរកយុត្តិធម៌ដល់ពួកខ្ញុំជាកម្មករ វាអយុត្តិធម៌ណាស់ដែលបញ្ឈប់ពួកខ្ញុំ មិនផ្តល់ដំណឹង។ ហើយគ្នាពួកខ្ញុំមានច្រើននាក់ បុគ្គលិកដល់៧០នាក់ជាងឯណោះ សូមជួយផង»។
លោក ទូច កុសល ប្រធានសហព័ន្ធសហជីពកម្មករនិយោជិតវិស័យទេសចរណ៍កម្ពុជា (CTWUF) មានប្រសាសន៍ថា តាមរយៈការចរចារកដំណោះស្រាយនាពេលកន្លងមក ខាងក្រុមហ៊ុនបានទូទាត់សំណងទៅតាមច្បាប់មួយចំនួនដែរ ដូចជា ការឈប់សម្រាកប្រចាំឆ្នាំ ប្រាក់អតីតភាពការងារ និងប្រាក់ខែចុងក្រោយ។ ប៉ុន្តែសម្រាប់ប្រាក់ជួសការជូនដំណឹងជាមុន និងប្រាក់សំណងជំងឺចិត្ត ខាងក្រុមហ៊ុនមិនបានផ្តល់ឱ្យទេ ដោយក្រុមហ៊ុនបានលើកឡើងថា ខាងព្រលានយន្តហោះនោះ បានផ្តាច់កិច្ចសន្យាជាមួយក្រុមហ៊ុនសម្រាប់ការសំអាតនៅព្រលានយន្តហោះចាស់ ហើយខាងក្រុមហ៊ុនក៏បានយកសេចក្តីជូនដំណឹងទៅបិទនៅក្តារខៀនរបស់ក្រុមហ៊ុនដែរ។
តែយ៉ាងណា លោកថា ខាងភាគីកម្មករបានអះអាងថា មិនបានឃើញការជូនដំណឹងពីខាងក្រុមហ៊ុនទេ ខណៈខាងក្រុមហ៊ុនក៏បានជាប់ក្នុងការដេញថ្លៃសំអាតនៅព្រលានយន្តហោះថ្មីដែរ ប៉ុន្តែខាងក្រុមហ៊ុនមិនបានយកកម្មករទាំងនោះទៅធ្វើការបន្តនៅព្រលានយន្តហោះថ្មីនោះទេ។ ការណ៍នេះ លោកជំរុញឱ្យភាគីទាំងពីរបន្តការចរចាដោយសន្តិវិធី និងផ្អែកទៅលើទិដ្ឋភាពច្បាប់ស្តីពីការងារ។
លោក ទូច កុសល ថ្លែងថា៖ «អាហ្នឹងសំខាន់លើជំហរក្រុមហ៊ុន បើសិនជាគាត់អាចផ្តល់ឱ្យកម្មករបាន អាហ្នឹងវាចប់ហើយរឿងហ្នឹង ហើយបើសិនជាមិនអាចផ្តល់ឱ្យបានទេ អាហ្នឹងវានៅមានការអូសបន្លាយពេលវេលាទៅមុខទៀត ព្រោះខ្ញុំឃើញជំហរកម្មករ ខ្ញុំបានជួបកម្មករប៉ុន្មានដង គាត់នៅតែទាមទារ២ចំណុចហ្នឹង គឺប្រាក់ជួសឱ្យការជូនដំណឹង និងប្រាក់សំណងជំងឺចិត្តហ្នឹង»។
វីអូឌី មិនអាចសុំការអត្ថាធិប្បាយជុំវិញករណីនេះ ពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា និងតំណាងក្រុមហ៊ុនអេចស៊ីស៊ីគ្រុប បានទេ នៅថ្ងៃទី១៣ ខែវិច្ឆិកានេះ។
តែបើតាមប្រធានសហជីព លោក ទូច កុសល ភាគីតំណាងកម្មករ និងខាងក្រុមហ៊ុន គ្រោងនឹងជួបចរចាគ្នាជាថ្មីទៀត នៅថ្ងៃទី១៧ ខែវិច្ឆិកាខាងមុខនេះ។
កន្លងមក កម្មករជាង១០០នាក់ ដែលធ្វើការនៅក្រុមហ៊ុនអេចស៊ីស៊ី ដែលជាក្រុមហ៊ុនផ្តល់សេវាសំអាតព្រលានយន្តហោះខេត្តសៀមរាបផងដែរនោះ ក៏បាននាំគ្នាតវ៉ាផងដែរ ពាក់ព័ន្ធនឹងការព្យួរការងារកម្មករ ដោយមិនបានជូនដំណឹងទៅមន្ទីរ ឬក្រសួងការងារ កាលពីឆ្នាំ២០២០ ក្នុងអំឡុងពេលនៃការរាតត្បាតជំងឺកូវីដ-១៩។
តែយ៉ាងណា បើតាមសហព័ន្ធសហជីពកម្មករនិយោជិតវិស័យទេសចរណ៍កម្ពុជា វិវាទការងារនៅខេត្តសៀមរាបនោះ ត្រូវបានដោះស្រាយបញ្ចប់ កាលពីអំឡុងខែមីនា ឆ្នាំ២០២៥នេះ ដោយខាងក្រុមហ៊ុនយល់ព្រមបើកប្រាក់សំណងបញ្ចប់កិច្ចសន្យាការងារជូនកម្មករនិយោជិតចំនួន ១១២នាក់ ដែលមានទឹកប្រាក់សរុបជាង ៨ម៉ឺនដុល្លារ (៨១,៨២៣.២៦ដុល្លារសហរដ្ឋអាមេរិក) ក្រោយវិវាទបានអូសបន្លាយអស់រយៈពេល ៥ឆ្នាំ៕
