របាយការណ៍ប្រព័ន្ធផ្សព្វផ្សាយបានផុសឡើង ដោយបញ្ជាក់ថា លោក ចេន ហ្ស៊ី(Chen Zhi) ម្ចាស់ក្រុមហ៊ុនព្រីនស៍គ្រុប(Prince-Group) ដែលគេកំណត់ថាជាមេក្លោងនៅពីក្រោយឧក្រិដ្ឋកម្មទ្រង់ទ្រាយធំ នៅក្នុងប្រទេសកម្ពុជា ត្រូវបានគេប៉ាន់ស្មានថា មានទ្រព្យសម្បត្តិដែលមានតម្លៃ ៦០ពាន់លានដុល្លារ។
សារព័ត៌មាន ដឹ ឆូសាន់ ដេលី(The Chosun Daily)របស់កូរ៉េខាងត្បូង បានផ្សាយនៅថ្ងៃទី១៣ ខែវិច្ឆិកា ឆ្នាំ២០២៥នេះថា នៅថ្ងៃទី១២ (ម៉ោងនៅក្រុងស្រុក) កាសែតប្រចាំថ្ងៃរបស់អង់គ្លេស ‘‘ដឹ ថាម(The Times)’’បានរាយការណ៍អំពីអត្ថបទមួយ ដែលរៀបរាប់អំពីសកម្មភាពរបស់ លោក ចេន ហ្ស៊ី និងបានបើកបង្ហាញអំពីព័ត៌មាននេះ។ ក្លីវ ថែវ(Cliff Teo) ជនជាតិសិង្ហបុរីដែលធ្វើការជាមួយ លោក ចេន ហ្ស៊ី អស់រយៈពេលជាយូរមកហើយ ក្រោយមកបានក្លាយជាអ្នកផ្តល់ព័ត៌មាន ត្រូវបានគេរាយការណ៍ថា បានឮលោក ចេន ហ្ស៊ី ឆ្លើយតបជាមួយនឹង “ប្រាក់ ៦០ពាន់លានដុល្លារ” នៅពេលសួរអំពីទំហំទ្រព្យសម្បត្តិរបស់លោក។
កាសែត ដឹ ថាមស៍(The Times) បានរាយការណ៍ថា លោក ចេន ហ្ស៊ី មានទំនាក់ទំនងយ៉ាងជិតស្និទ្ធជាមួយរដ្ឋាភិបាលប្រទេសកម្ពុជា និងអាជ្ញាធរស៊ើបការសម្ងាត់របស់ចិន ហើយត្រូវបានគេប៉ាន់ស្មានថា មានទឹកប្រាក់ប្រហែលនឹងម្ចាស់គ្រឿងញៀនអាមេរិកខាងត្បូង។
មុននេះ ចក្រភពអង់គ្លេស និងសហរដ្ឋអាមេរិក បានប្រកាសដាក់ទណ្ឌកម្មប្រឆាំងនឹងព្រីនស៍គ្រុប(Prince Group) លោក ចេន ហ្ស៊ី ដោយបញ្ជាក់ថា បានកំណត់អត្តសញ្ញាណសកម្មភាពឧក្រិដ្ឋកម្មរបស់ពួកគេ តាមរយៈកិច្ចសហប្រតិបត្តិការកាលពីខែមុន។
ប្រភពបន្តថា យោងតាមរដ្ឋាភិបាលទាំងពីរ លោក ចេន ហ្ស៊ី(Chen Zhi) គឺជាបណ្តាញនៃមជ្ឈមណ្ឌលបោកប្រាស់តាមអនឡាញ ដោយត្រូវបានគេរាយការណ៍ថា យ៉ាងហោចណាស់ មានមជ្ឈមណ្ឌលចំនួន១០ នៅក្នុងប្រទេសកម្ពុជា បានបង្ខាំងមនុស្សរាប់ពាន់នាក់ ដែលធ្វើសកម្មភាពក្លែងបន្លំ តាមរយៈការហៅទូរសព្ទ ឬប្រព័ន្ធផ្សព្វផ្សាយសង្គម។
ព្រីនស៍គ្រុប(The Prince Group) ត្រូវបានគេយល់ថារកបានប្រាក់យ៉ាងច្រើនសន្ធឹកសន្ធាប់ តាមរយៈសកម្មភាពនេះ។ តាមក្រសួងរតនាគារសហរដ្ឋអាមេរិក រាយការណ៍ថា បានរឹបអូសប៊ីតខញ(Bitcoin) ដែលមានតម្លៃប្រមាណ ១៣ពាន់លានដុល្លារកាលពីខែមុន។
ប្រភពបន្ថែមថា កាសែត ដឹ ថាមស៍(The Times) បានប៉ាន់ប្រមាណថា ទំនាក់ទំនងរបស់ លោក ចេន ហ្ស៊ី ជាមួយមន្ត្រីចារកិច្ចចិន បានចាប់ផ្តើមប្រហែលឆ្នាំ២០១៥។ មានសេចក្តីរាយកាណ៍ថា ការចោទប្រកាន់របស់រដ្ឋអាជ្ញាសហរដ្ឋអាមេរិក បានលើកឡើងថា លោក ចេន ហ្ស៊ី បានផ្តល់សំណូករួមទាំងលុយសុទ្ធ ហើយនាឡិការតម្លៃរាប់លានដុល្លារទៅអ្នកនយោបាយកម្ពុជា និងមន្ត្រីមកពីក្រសួងសន្តិសុខសាធារណៈ និងក្រសួងសន្តិសុខរដ្ឋរបស់ប្រទេសចិន។
ទោះជាយ៉ាងណាក៏ដោយ លោក ចេន ហ្ស៊ី(Chen Zhi) និងអាជ្ញាធរចិន មិនអាចរក្សាទំនាក់ទំនងជិតស្និទ្ធរបស់ពួកគេបានទេ។ នៅក្នុងឆ្នាំ២០២០ ប៉ូលីសចិន បានប្រកាសបង្កើតក្រុមការងារពិសេស ដើម្បីស៊ើបអង្កេតព្រីនស៍គ្រុប(Prince Group)ផងដែរ។
ក្រុមហ៊ុនព្រីនស៍គ្រុប(Prince Group) បានច្រានចោលបទចោទប្រកាន់ ដោយបញ្ជាក់ថា ‘‘ការចោទប្រកាន់នាពេលថ្មីៗនេះ គឺគ្មានមូលដ្ឋាន ហើយបញ្ជាក់អំពីជាការប៉ុនប៉ង ដើម្បីបង្ហាញអំពីភាពត្រឹមត្រូវនៃការរឹបអូសទ្រព្យសម្បត្តិដោយខុសច្បាប់’’។ ក្រុមហ៊ុននេះ បានបន្ថែមថា ‘‘យើងច្រានចោលទាំងស្រុងចំពោះការអះអាងថា ក្រុមហ៊ុនរបស់យើង និងប្រធាន ចេន ពាក់ព័ន្ធនឹងសកម្មភាពខុសច្បាប់’’៕
