យ៉ាងហោចណាស់ មានទាហានថៃឈុតខ្មៅចំនួន៧នាក់ បានបំពានផ្លូវភេទទៅលើស្ត្រីពលករខ្មែរ វ័យ១៨ឆ្នាំម្នាក់ កាលពីយប់ថ្ងៃទី១៥ ខែវិច្ឆិកា ក្នុងពេលនាងរួមដំណើរជាមួយពលករ ១២នាក់ផ្សេងទៀត ដើម្បីឆ្លងដែនត្រឡប់ទៅស្រុកកំណើតនៅកម្ពុជា។
តាមសម្រង់សម្ដីពីក្រុមពលករខ្មែរ ចុះផ្សាយដោយសារព័ត៌មានក្នុងស្រុក បានរៀបរាប់ថា អំឡុងពេលពួកគេទាំង១៣នាក់ធ្វើដំណើរតាមច្រករបៀង មកដល់ចំណុចកើតហេតុ មានទាហានថៃឈុតខ្មៅមួយក្រុមបានកាក់រថយន្ត ហើយឲ្យពួកគេចុះដើម្បីនាំទៅសាកសួរ។ ក្នុងពេលសាកសួរ ពួកទាហានថៃ បានវាយធ្វើបាបលើពលករខ្មែរទាំងអស់ ជាពិសេសពលករប្រុសៗ ដែលត្រូវបានវាយធ្វើទារុណកម្មយ៉ាងសាហាវឃោឃៅ។
ប្រភពនិយាយថា៖ «ពួកវាវាយផង ទាត់ផង ធាក់ផង ហើយថែមទាំងអុកនឹងស្វ័យកាំភ្លើងទៀត»។
ប្រភពដដែល បន្តថា ស្របពេលដែលពួកទាហានថៃកំពុងវាយធ្វើទារុណកម្មលើពួកគេ ស្រាប់តែមានទាហានមួយក្រុមមានគ្នាយ៉ាងតិច៧នាក់ បានអូសនារីវ័យក្មេងម្នាក់យកទៅរំលោភ។
ក្រុមពលករ បានបញ្ជាក់ថា ក្រោយពីវាយធ្វើបាបពលករខ្មែរអស់ចិត្ត ពួកទាហានសៀម បានប្លន់យកលុយពីក្រុមពលករអស់ប្រមាណ ៦ ៥០០បាត ឬស្មើ២០០ដុល្លារ និងទូរស័ព្ទចំនួន៤គ្រឿង ទើបពួកគេដោះលែងឲ្យបន្តដំណើរឆ្លងអូរព្រំដែនទាំងកណ្ដាលយប់ ត្រឡប់ចូលដីខ្មែរវិញ។
ក្រុមពលករខ្មែរទាំង១៣នាក់ ត្រូវបានកម្លាំងនគរបាលការពារព្រំដែន ប្រចាំប៉ុស្ដិ៍ស្វាយចេក សហការជាមួយកម្លាំងយោធាការពារព្រំដែន នៅតំបន់នោះ ទទួលនិងនាំយកទៅប្រគល់ជូនក្រុមការងារ «មណ្ឌលទទួលពលករ» ប្រចាំស្រុកកំរៀង ខេត្តបាត់ដំបង ក្រោយបញ្ចប់ការសួរនាំបឋម នៅប៉ុស្ដិ៍ព្រំដែន។
ទោះយ៉ាងណា ក្រុមពលករខ្មែរទាំងនោះ មិនបានចាំ ឬស្គាល់ចំណុចដែលក្រុមទាហានសៀមចាប់វាយធ្វើបាបពួកគេនោះទេ។ ប៉ុន្តែពួកគេបញ្ជាក់ច្បាស់ថា ទង្វើដ៏សាហាវព្រៃផ្សៃរបស់ពួកទាហានសៀម បានកើតឡើងនៅក្នុងទឹកដីសៀម ពេលពួកគេធ្វើដំណើរតាមរថយន្ត មកជិតដល់ព្រំដែនខ្មែរ-សៀម។
អ្នកនាំពាក្យរងក្រសួងមហាផ្ទៃ លោក ទូច សុឃៈ (សុខ:) នៅថ្ងៃទី១៧ ខែវិច្ឆិកា បានចេញវីដេអូមួយ អំពីចំណាត់ការបន្ទាន់របស់កម្ពុជាទៅលើករណីនេះ ដោយទាមទារដាច់ខាតឱ្យភាគីថៃចាប់ជនល្មើសមកដាក់ទោសទណ្ឌតាមផ្លូវច្បាប់។ លោកហៅទង្វើរបស់យោធាថៃ ថាជាទង្វើបាត់បង់ភាពជាមនុស្ស អមនុស្សធម៌ អំពើស្មោគគ្រោក ដែលគ្មានជាតិសាសន៍ណាមួយនៅលើពិភពលោក អាចទទួលយកបានឡើយ។
លោក ទូច សុឃៈ ថ្លែងថា៖ «វាមិនមែនសម្រាប់តែប្រជាពលរដ្ឋខ្មែរទូទៅដែលមិនអាចទទួលយកបានទេ ជាតិសាសន៍ណាក៏ដោយ ក៏មិនអាចទទួលយកបាន នូវអំពើដ៏ថោកទាបនេះបានជាដាច់ខាត។ ហើយយើងទទួចឱ្យសមត្ថកិច្ចរបស់ថៃ ត្រូវតែស្វែងរកចាប់ខ្លួនជនទាំង៧នាក់ និងអ្នកពាក់ព័ន្ធទាំងអស់នេះ យកមកផ្ដន្ទាទោសឱ្យបានជាដាច់ខាត ហើយប្រកាសជាសាធារណៈឱ្យប្រជាជនថៃបានដឹង ប្រជាពលរដ្ឋកម្ពុជាបានដឹង ប្រជាពលរដ្ឋនៅទូទាំងពិភពលោកបានដឹងថា ខ្លួនបានចាត់ការទៅលើជនល្មើសដែលជាកងកម្លាំងប្រដាប់អាវុធរបស់ខ្លួនថែមទៅទៀតផង»។
ជាចំណាត់ការបន្ទាន់ ក្រសួងមហាផ្ទៃ បានចាត់ក្រុមការងារជំនាញ សហការជាមួយស្នងការខេត្តបាត់ដំបង ចុះប្រមូលភស្តុតាង និងកសាងឯកសារ ដើម្បីធ្វើពាក្យបណ្ដឹងដាក់ទៅបីស្ថាប័ន ទីមួយ ដាក់ទៅអគ្គស្នងការដ្ឋាននគរបាលជាតិថៃ ទីពីរ ធ្វើបណ្ដឹងតវ៉ាតាមរយៈទូតថៃ និងទីបី ធ្វើបណ្ដឹងតវ៉ាតាមរយៈអង្គការអន្តរជាតិ។
ជុំវិញរឿងនេះ ស្នងការរងទទួលបន្ទុកផែនប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបាត់ដំបង អ្នកស្រី រស់ ជីវី ប្រាប់វីអូឌីនៅថ្ងៃទី១៧ ខែវិច្ឆិកា នេះថា ក្រុមការងារកំពុងរៀបចំនីតិវិធីតាមដំណាក់កាល ដោយជាដំបូង គឺត្រូវរក្សាគម្លាតឱ្យជនរងគ្រោះបានព្យាបាលផ្លូវកាយសិន។
អ្នកស្រី រស់ ជីវី ថ្លែងថា៖ «អ្វីដែលយើងត្រូវធ្វើគឺសង្គ្រោះគាត់ រឿងផ្លូវសុខភាពសិន។ សុខភាពផ្លូវចិត្តអីអាហ្នឹងនីតិវិធីយើងធ្វើបន្តទៀត»។
បច្ចុប្បន្ន នារីរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្តបន្ទាយមានជ័យ។
បើតាមរដ្ឋមន្ត្រីក្រសួងមហាផ្ទៃ លោក ស សុខា ក្រោយបានចុះទៅសួរសុខទុក្ខនារីរងគ្រោះ នៅព្រឹកថ្ងៃចន្ទនេះ បានប្រាប់អ្នកសារព័ត៌មានថា នារីរងគ្រោះមានស្ថានភាពធូរស្រាលបន្តិច បើធៀបនឹងពីម្សិលម៉ិញដែលនាងមានភាពរវើរវាយ និងបាត់បង់ការចងចាំមួយចំនួន។ លោករដ្ឋមន្ត្រី បានណែនាំពលករដទៃទៀត ឱ្យធ្វើដំណើរជាក្រុមពេលឆ្លងដែនមកកម្ពុជាវិញ និងផ្ដល់ដំណឹងដល់សាច់ញាតិជាមុន។ បន្ថែមពីនេះ លោកណែនាំឱ្យពលករប្រញាប់ស្វែងរកអន្តរាគមន៍ និងដាក់ពាក្យបណ្ដឹងឱ្យបានលឿនទៅកាន់អាជ្ញាធរមូលដ្ឋាន ប្រសិនជួបបញ្ហាណាមួយ។
ស្ថានភាពតានតឹងនៃបញ្ហាព្រំដែនកម្ពុជា-ថៃ បានរុញច្រានពលករខ្មែររាប់សិបម៉ឺននាក់ ឱ្យត្រឡប់ចូលស្រុកកំណើតវិញដោយបារម្ភពីសុវត្ថិភាព និងការយាយីពីសំណាក់ប្រជាជនថៃទៅលើពួកគេ។
ពលករភាគច្រើនឆ្លងដែនតាមច្រកព្រំដែន ដោយមានលិខិតស្របច្បាប់ តែក្នុងនោះក៏មានពលករមួយចំនួនដែលធ្វើដំណើរតាមច្រករបៀង ដោយខ្លះចង់ចំណេញពេលវេលា និងខ្លះពុំមានឯកសារគ្រប់គ្រាន់ ខណៈបច្ចុប្បន្នមានច្រកព្រំដែនខ្លះបិទការឆ្លងកាត់ទាំងស្រុង ឯខ្លះអនុញ្ញាតឱ្យចេញចូលទៅស្រុកកំណើតវិញ ក្នុងរយៈពេលកំណត់មួយ៕
